Apocalipsis 3:12 - La'qaatqa ñi qota'olec Qota'olec & Qota'olec Novita Na Qomyipi

¹² Ca cá'maq rauegaxan, ca' ỹim 'ec nqaishin aca nenojnaxa quiyim nolliitañi ñi lauo' ñi qota'olec, ca' totqa nac quiyi'maxare. Ca' quecaua'maxare serelgoto ma'le da leenaxat ñi qota'olec chaqai da leenaxat yi la'a' ñi'maxare, yí'maq dalaxaic Jerusalén chicqa'gue da piguim, chicqo'ot ñi qota'olec. Qai'neeta serelgoto ma'le caua'maxare ca dalaxaic ỹeenaxat.

Apocalipsis 3:12 Iomraidhean Croise

Salmos 46:4

Aso lachiugue chaqai na taỹau'alo ñaachi ỹo'uet da netoonaxac yi qota'olec la'a' yí'maq paguec co'teeta quena la'aateripi ñí'maq ỹapacauec quená'ogue.

Isaías 62:2

Na ỹoreta'oguit qomyipi iuana ma'le ca rca'laxa'e', ná'ogue na nashillipi iuana ma'le da rauaqe'. Ma'le, ca' chaqaiñi ñi qara'gaxala' ỹa'ue ca dalaxaic qadeenaxachi'.

Jeremías 1:18

Ca' ỹim nagui sa'yiñi qami' 'ec ca na'a' lodegaxat pootau'a nodaachiguiñi fierro na qaỹa'yiñi, 'ec qaỹapou'a quena bronce, qaiyi loqoichiguit yá'ogue yi qomyipi na'ñi yi 'laua Judá: na nashillipi, na'gaxalateripi chaqai na netaxaỹaxanqajanqaipi chaqai yá'ogue yi qomyipi quiyi'maxare.

Marcos 12:16

Ca' qanoda'a. Ca co'na' ỹa'ajan, ca' so Jesús renataxano': —¿Negue' lashic ñí'maq ñijo, chaqai yí'maq neenaxat naneretañi? Ca saua'maxare 'neraco': —Ñí'maq lashi na nashillipi quiyi Roma.

Gálatas 2:9

Vichiguiño' saua Jacobo, Pedro, chaqai so Juan, sauá'maq paguec na'gaxalate', ỹa'deenda'a quiyim chaqaiñi ñi qota'a nañaañim dajo no'ueenataxanaxac. Ca necona'guita na'le qomi', ỹim chaqai so Bernabé. Ca' dajo qaneconaxac netanec quiyim chaqai qomi' niỹa', chaqai qaỹa'maxarenta quiyim qomi' so'ueenataxanaxaugui na mesqai judioipi, ca' saua'maxare, ca ro'ueenataxandougui na judioipi.

Efesios 3:15

ñí'maq chicqo'ot quiyim qaicoñiguit da leenaxat quená'maq ỹoreta'oguit qomyipi neetalec na 'laua chaqai ná'maq lelaatqaipi hueeto'ot na piguim.

Hebreos 12:22

Qam qamiri mashic nqo'ñiu'a aso quemaralec ladocai leenaxat Sión, yí'maq na'a' lodegaxat ñi qota'a ñí'maq sqaica lqodoc nca'leetauec, yí'maq qohinac Jerusalén hueeta'gue da piguim, yí'maq hueete'e ná'maq ỹaatqajam 'xoic nelaatqaipi piguim laseripi,

Hebreos 13:14

Ma' quenajo 'laua seuqatalec qaica quet cá'maq ỹaatqajam qara'a' quiyim sqaica lqodoc, ta'ta'a quiyim sedaanqataque ca qara'a' naỹa'quena ma'le.

1 Juan 4:4

Qamiri ỹaalqolqa, qamiri lalamaxarete' ñi qota'a, chaqai mashic qadoxoñiguii na 'maatqaiquipi. Ma' ñi qota'a ñí'maq neetaguilo qamiri paguec lquesaxanaxa quesó'maq na'ỹaapec ỹoiquentac na qom hueetalec ana 'laua.

Apocalipsis 14:1

Ca na' ime, ca' lotqai liỹa ñidaanashiguim, ca' seuane'ta so 'ec qagreta llaalec co'ueetalec aso qa' ladocai leenaxat Sión, lapoota'guita saua ciento cuarenta y cuatro mil qomyipi. Ca sá'ogue qoỹeretalec na latap da leenaxat so 'ec qagreta llaalec chaqai ñi qota'olec.

Apocalipsis 17:14

Ca' nco'uare'e' ma'le so 'ec qagreta llaalec, qam sqaica lovite', ma' so'maxare la'gaxala' na na'gaxalateripi chaqai lashi na nashillipi. Chaqai ná'maq lapoota'guit so'maxare noỹaxanqateripi chaqai nca'acseripi quiñi qota'a, chaqai ỹaqamaxatete' querelec.

Apocalipsis 2:11

Cá'maq ỹa'den ca na'xaỹaxanaxac, ca' 'maxaraic na'xaỹaxana da la'qaatec so Espíritu Santo 'neetapega ná'maq mashic icoñiguit da na'qaatec, 'neetasa': Ca cá'maq rauegaxan ma'le, ca' se ỹovira'a ca le'xoric queca co'uaataxanaxaic nelauaxa.”

Apocalipsis 2:17

Cá'maq ỹa'den ca na'xaỹaxanaxac, ca 'maxaraic na'xaỹaxana da la'qaatec so Espíritu Santo 'naapega ná'maq mashic icoñiguit da na'qaatec, 'naacsa': Ca cá'maq rauegaxan, ca' ỹim saanem ma'le quiyim ỹa'ic cá'maq na'ic qoỹoxotetañi chicqo'ot ñi qota'a, leenaxat maná, chaqai qai'neeta saanem ca qa' lalagaxaic. Ca' quecajo qa', ca naneretalec ca dalaxaic leenaxat. Qam qaica ca ỹa'den, ta'ta'a cá'maq icoñiguit, ca' ỹa'den.”

Apocalipsis 2:7

Ca cá'maq ỹa'den ca na'xaỹaxanaxac, ca 'maxaraic quiyim na'xaỹaxana da la'qaatec so Espíritu Santo 'naapega ná'maq mashic icoñiguit da na'qaatec, 'neetasa': Ca cá'maq rauegaxan ma'le, ca saanem quiyim ỹa'ic aca la adá'maq qo'paq chicqaugui da nca'laxa neetañigui na lavinñi yi lanaxanqa' ñi qota'a.”

Apocalipsis 21:2

Ca' ỹim Juan seuañi'chiguit so na'a' lodegaxat dalaxai Jerusalén, ỹaatqajam co'teeta, chicqashiguim queda piguim, ỹaatqajam chicqo'tot ñi qota'olec, ỹaatqajam qaỹa'maxachichiguiñi, 'ec nqohin da na'maqataxac aca nequetegaxai quiyim ỹovita o'ñiguit ca nauonaxaua.

Apocalipsis 22:4

Ca' ỹaatqajam neuane'e' ñi'maxare, chaqai ná'ogue qoỹeretalec na latap na leenaxat.

Apocalipsis 3:5

Ca cá'maq rauegaxan ma'le, ca' ỹañiñi nqohine' caua noho lalagaxaqa. Chaqai se sapalaxat ca leenaxat quiyim qoỹeretañi cayi lere nca'laxalate, ta'ta'a quiyim sa'xat quiñi ita'a chaqai quena lelaatqaipi piguim laseripi.