Apocalipsis 20:2 - La'qaatqa ñi qota'olec Qota'olec & Qota'olec Novita Na Qomyipi

² Ca' sojo nelaatec ỹaconlec so isecỹac 'ec naanoc, só'maq ñauapeco' quen nanaic lodegaxat, ca' chaqaiso' só'maq na'ỹaapec chaqai Satanás, ca' coñirari' quesaua mil ñaxari.

Apocalipsis 20:2 Iomraidhean Croise

Génesis 3:1

Qam so nanaic paguec co'ỹaxaraic quená'ogue na liỹa iseripi neuec quená'maq lo'ueenatec ñi qara'gaxala' qota'olec. Ca inato' aso 'aalo: —¿Peeta'a llic quiyim ñi qota'olec se ỹasenema qamiri quiyim a'guii ana la ana qo'paq quena lanaxanqa'?

Génesis 3:15

Ca' nagui so'uet quiyim qami' chaqai ada 'aalo qamiri pa'guenaxaua', ca 'nejem ca qachaalaxai'pi chaqai ca llaalqaipi ada'maxare. Ca llaalqaipi ada'maxare co'vigui na rqahiqui', chaqai qami' a'quirigui ana la'ỹaaxa.

Job 1:7

Ca' ñi qara'gaxala' inato' na'le so'maxare, 'naaco': —¿Negue' ca chicqoisa'gue? Ca' so na'ỹaapec 'naaco': —Chi souoxonta'pe naua lahil na 'laua.

Ezequiel 47:5

Ca' naloqochin so quinientos metros liỹa, ca so huaxaỹaq mashic ñigui lachiugue. Ca' tot seshit sapacta, ma' ñigui lachiugue qoỹoqochi'ñigui. Ca' qaidaata quiyim qaỹo'xonta'ta, ca' qaigueme qaishit qaỹapacta.

Mateo 19:29

Chaqai ná'ogue ná'maq no'ueenaqchichiriñi caua la'aate', loqo'm caua lqaỹa' chaqai caua lqaỹa' 'aalo, loqo'm ca leta'a, loqo'm aca late'e, loqo'm aca loua, loqo'm ca llaalqaipi, loqo'm caua na'lauari, quiyim ỹapacqajnauec quegue aỹim, ca' cien cá'maq ỹapacauec icoñiguit ma'le. Chaqai icoñiguit ma'le da nca'laxa sqaica lqodoc.

Mateo 8:29

Ca' ỹaualaxai', 'nerac: —¿Chi'negue ma' 'isapegueu'alo qomi', qami' Jesús, qami' llaalec ñi qota'olec? ¿Peeta'a na'itquena quiyim vite ca qanouaxanaxaset quiyim saqa' ỹovita ca laloqo'?

Marcos 4:15

Ca 'uo' na qom 'nejem so nayic tajlec aso nanecse. Na'xaỹaxantapega da na'qaatec, qam ma' ime da na'xaỹaxanaxac, ca nanac so na'ỹaapec, ca rouootaxana'gue da na'qaatec qoỹanteguelec añi le'taxanata.

Marcos 5:7

Ca' ỹaatqajam nelamaxaren, ca 'naaco': —Qami' Jesús, qami' llaalec ñi qota'olec ỹapacauec quená'ogue, ¿chi'neco' ma' 'iisapegueu'a aỹim? Nagui ñi'xoresene'tot qami' quiñí'maq qota'olec quiyim se qa'vi'rahic.

Juan 12:31

Ca' nagui, ca ỹovita yi laloqo' quiyim ñi qota'a ỹa'ue da lasauaxaset na hueetalec na 'laua; ca' nagui, ca ñi'maxare ỹo'daauec so na'ỹaapec só'maq relaataxantac quena 'laua.

Juan 16:11

chaqai retane' ma'le quiyim ñi qota'olec ỹa'ue ca nouaxanaxaset, ma' shi'gue qaỹa'ue da nouaxanaxaset so na'ỹaapec só'maq relaataxanac quena 'laua.

Romanos 16:20

Ca ñí'maq qota'olec chicqo'ot da na'maxa qaỹaloq pataxañi so na'ỹaapec, illo'oto naua qapiaachiri. Chaqai so qara'gaxala' Jesucristo no'ueenaxat ca qayicyaxaguii.

Hebreos 2:14

Na ñaalqaipi 'oonoqui' ca qaỹachigoxochichigui. Na'maxare dá'ogue da no'ueenataxac; ca' chaqaida 'neeta nqohin so Jesús 'ec chaqai qom, qaiyi ishit ileu. Ca' queda, ca ishit ỹopoxoỹaxachigui só'maq hueeto'ot da nquesaxanaxa quiyim ralauataxan. Ca so'maxare chaqaiso so na'ỹaapec.

1 Pedro 5:8

Chaqai ỹaatqajam na'deenaxanqachiñii chaqai nelohitec, ma' so npa'guenaxauahi na'ỹaapec ronoqota'pegue', 'neetari' meca sauaxaic leta'a idaantaque quiyim 'ue ca loxonec.

2 Pedro 2:4

Ma' ñi qota'a se ishit i'xoren só'maq lelaatqaipi piguim laseripi co'na' 'ue da lasauaxaset. Ta'ta'a quiyim inaxa'ña yi ncopatqo' na sauaqhuaiquipi, chaqai coñirañi queca napalaxa loma', ca' nauaanta'guit nqai'en ca na'xa'a quiyim qaimit ná'ogue najo.

Judas 1:6

Chaqai só'maq nelaatqaipi quiñi qota'a piguim laseripi quená'maq se ỹaqamaxat ca loma', ta'ta'a quiyim ỹalat cá'maq lalamaxaret la'a', ca' ñi qota'a coñi', nauaanta'guit nqai'en cá'maq pa'aatec na'xa'a ma' qaimit ná'ogue najo, coñirañi quiyí'maq qaica 'nejem napalaxa.

Apocalipsis 12:13

Ca co'na' so isecỹac 'ec naanoc ỹa'den quiyim qanenaxañi quena 'laua, ca' ỹocanac asó'maq 'aalo 'uo' so llaalec.

Apocalipsis 12:15

Ca' so 'ec nanaic nesal, nahougui nqai'en na lap so huaxaỹaq ỹo'uet lachiugue, qaiyi ỹaỹoxonaxat aso 'aalo.

Apocalipsis 12:17

Ca' queda na'le, ca' so isecỹac ỹaatqajam ro'ỹa aso 'aalo. Ca so'maxare quepegue' nco'ỹa'e' ná'maq llaalqaipi no'ueenañi aso 'aalo, quená'maq na'xaỹaxane'talo naua lelaataxanaxaco ñi qota'a, chaqai ỹaatqajam quejlgoto nauá'maq ỹaatqajam lliquete' na'qaatqa ỹa'xate' na'le so Jesucristo.

Apocalipsis 12:3

Na' ime, ca' lotqai re'oq so liỹa netanec quena piguim, 'neetasa': 'Ue so chalego lecaic isecỹac, da no'ueenataxac 'ec na naanoc, toc, siete saua lqahigo', diez aso lasote. Chaqai quiñi 'óna quesaua lqahigo' neetagui ana nashi nado'o.

Apocalipsis 12:4

Ỹahote'e so lqai'it, ca' ỹauogolenta ana huaqajñi quena piguim, ca' najñi nqai'en añi 'óna quecaua tres, taalec nqai'en na 'laua. Ca' sojo isecỹac nachajñi, reloqoto'ot aso 'aalo sham co'o, ma' ỹahotaque quiyim ma' ne'qaañi so noctoqui', ca' chaqa'ma' ỹa'ic.

Apocalipsis 12:9

Ca' chaqaida dá'maq 'neeto' na'le na' qaỹo'daauec so isecỹac chalego lecaic. Ca so'maxare chaqaiso' só'maq ñaauapec 'ec nanaic leenaxat Satanás chaqai na'ỹaapec, só'maq ỹayintaco' quen ná'ogue na ỹoreta'oguit qomyipi hueetalec ana 'laua. Ca so na'ỹaapec chaqai so lelaatqaipi qaỹo'daauec, taalec nqohin na 'laua.

Apocalipsis 13:2

Sojo isecỹac seuane'ta na'le 'ec na regat. Qam naua lapiaate' 'ec ana layoraxai late'e, chaqai na lap 'ec na sauaxaic leta'a lap. Ca' so isecỹac 'ec naanoc ỹaanem da lquesaxanaxa chaqai yi nqa'xanqa' quiyim nashi, chaqai ỹaanem da chalego lecaic lelaataxanaxac.

Apocalipsis 13:4

Ca' qaimaqachin so isecỹac 'ec naanoc, ma' ỹaanem quiyim relaataxan so isecỹac lodegaxat. Chaqai qaimaqachin qai'neeta so isecỹac, qohinac: —¡Ỹaatqajam qaica nqai 'nejem ñijo isecỹac! chaqai ¿nega'ỹo' ca ishit relogui'e' ñi'maxare?

Apocalipsis 20:10

Ca só'maq na'ỹaapec rayinaxantaco' quen queso'maxare, ca' qainaxañigui so norec lodegaxat lavigaxat na quiquiaxaic, yí'maq qainaxanquio' na'le so isecỹac lodegaxat chaqai só'maq chaqai 'naaco' quen letaxaỹaxaqui ñi qota'a. Ca' hua'ñi, ca' 'ue da le'xoric sqaica lqodoc quenaua'que naua na'xata' chaqai naua piri.

Apocalipsis 20:7

Ca na' ime ỹoxe'ueque saua mil ñaxari, ca' lotqai qaỹosouec so na'ỹaapec queda ncoñiitaxac.

Apocalipsis 9:11

Ca' aso piñaipi 'ue so lashi só'maq neloxoỹaq queca lapooqo' na lqui'i na leuaxaiquipi. Sojo nashi leenaxat quenaua hebreo la'qaatqa Abadón. Chaqai quena griego la'qaatqa Apolión, loqo'm lauataxanaxai.