2 Corintios 3:3 - La'qaatqa ñi qota'olec Qota'olec & Qota'olec Novita Na Qomyipi

³ Ma' qamiri nauá'maq 'ec qamiri nelaata lerecse so Cristo quiyim qomi' sanaxauec. Ca' qamiri nelaata, qam se qoderaxana ca chaqai neraxanaxat, ta'ta'a só'maq ne'Espíritu ñi qota'a maq nca'leetauec. Najo nelaata se qoỹerelec ca qa', ma' qoỹerelgoto naua le'taxanata na qomyipi.

2 Corintios 3:3 Iomraidhean Croise

Salmos 40:8

Ỹim yqo'ta quiyim so'uet cá'maq vi'saque, qami' qota'olec caỹim; ¡da rapaxaguinataxanaxaqui' selliitagui añi i'taxanata!

Salmos 42:2

'Eco' ỹaatqajam 'xoic da ỹaquip quiñi qota'olec, ñí'maq chicqo'ot da nca'laxa. ¿Chi' laquio' liỹa ñovira'a ñi qota'olec?

Salmos 84:2

¡Ỹaatqajam chalego da ishoxo chaqai da iyaxa quiyim seuete'e yi pa'aauo quiñi qauochi'! ¡Cañá'ogue añi i'taxanata so'ueenta'uegue da ñitoonaxac quiñi qota'olec chicqo'ot da nca'laxa!

Éxodo 24:12

Ca' ñi qara'gaxala' 'naaco' queso Moisés: —Quirishi'megue ana qa' nqo'ñirishi'ma na seueta'ñi. Ca ma'le, ca' nauaañira'piguit aỹim, ma' ỹim saañiraxaroma ma'le caua dos qari mashic seretalgoto queda ỹaqataxac chaqai da ilaataxanaxac, qaiyi paxaguiñi' na Israel llaalqaipi.

Éxodo 32:15

Ca co'na'le, ca' so Moisés rapilñi caso hueetalec quemaralec qa' ladocai, ne'xatete' saua dos qari naneretalgoto da nelaataxanaxaquipi. Saua'maxare qoỹeretalgoto naua'que naua lahil.

Éxodo 34:1

Ca' ñi qara'gaxala' 'naaco' queso Moisés: —Chaqai 'viichi' caua dos qari, denaxachichiriguilo saua 'auaxaqa, qaiyi serelgoto quedá'maq 'au hueetalgoto saua 'auaxaqa qari, sauá'maq poxoỹaxachiriguilo na'le.

Jeremías 31:33

Dajo dá'maq ña'deenaxac ma'le quena llaalqaipi so Israel, ma' ỹovita cajo na'xa'a: Da ilaataxanaxaquipi sellaagui añi le'taxanata chaqai shiriñi quiyi la'deenataxanaxac loma'. Ca' ỹim qota'olec ma'le quena'maxare, chaqai na'maxare, ca' ỹalamaxareteripi. Ỹim na'gaxala', se'taxajñi da ỹa'qaatec.

Daniel 6:26

chaqai sa'ue da ỹaqataxac chaqai selaataxan quiyim ná'ogue na qomyipi quená'maq 'laua soiquentac quiyim se iualaxainari' ñí'maq qota'olec quiñi Daniel. Ma' chaqaiñi ñí'maq qota'olec nca'leetauec, chaqai se neme quiyim 'ue. Da lo'ueenataxanaxac quiyim ỹoiquentac ná'ogue najo qaica iuagaxatac, chaqai qaica lqodoc da lquesaxanaxa.

Mateo 16:16

Co'na'le, ca' so Simón Pedro 'naaco': —Qami' ná'maq qami' nashi nca'laxaqui, qami' ná'maq qami' llaalec ñi qota'olec ñí'maq se ileu.

1 Corintios 3:5

Ma' ¿nega'ỹo' ca Pablo? chaqai ¿nega'ỹo' ca Apolos? Qomi' chaqaidaata qomi' lelaatqa ñi qota'a, qomi' chigoqchiỹauguilo quiyim viilec qamiri ñi qara'gaxala' Jesús. Qam quiñi 'óna coqomi' ỹo'uet cá'maq qaỹamaxalec quiñi qara'gaxala'.

2 Corintios 3:6

Ma' ñi'maxare ñí'maq chicqo'ot quiyim qomi' seshitaq sovirqau'a quiyim so'ueenataxanaq queda dalaxaic 'maqataxac. Da'maxare sqai 'nejem ca qoyiuelec chi naneretañi, ma' da'maxare chaqaida dá'maq dalaxaic chaalataxac chicqo'ot so Espíritu Santo. Na naqataxaquipi qoỹeretañi ỹo'uet ca lelauaxa ca qom, qam so Espíritu Santo ỹo'uet da nca'laxa.

2 Corintios 3:7

Na naqataxaquipi chicqo'ot so Moisés, na'maxare qoỹeretalec so qa', ca' ỹaatqajam 'xoico' na'le na lauaq. Ca so Israel llaalqaipi se ishit ra'iichigui na lashic so Moisés, ma' 'ue na lauaq na lashic, qam so lauaq nqo'neeta'ta', vire'ta na' 'om. Qam co'na' novi' so naqataxaquipi ishit quiyim ralauataxan, ca' qaica 'nejem da lauaq,

2 Corintios 6:16

¿Peeta'a ỹa'maqachiguiñi quiyim qoỹanaugui ca nashiilec nqolac ca 'imec qouagaxainaxaqui quiñi qota'a? 'E', ma' qomi' lauooto' ñi qota'a ñí'maq nca'leetauec. Ma' ñí'maq qota'a 'naac: Sentaugui chaqai salequetaugui na'maxare; ca' chaqaỹim ná'maq ỹim qota'olec quena'maxare, chaqai na'maxare, ca ỹalamqateripi.

1 Tesalonicenses 1:9

Ma' chaqaina na'maxare ỹa'xatetac dá'maq 'neeta na' sovitaxalo qamiri, chaqai ỹa'xatetac dá'maq 'neeta da rquelolaxahi coqomi', chaqai dá'maq 'neeta na' quiỹa'ahi na nashiilec nqolaquipi, ca' quiilec 'ueenataxañiỹot ñí'maq ỹaatqajam qota'a nca'leetauec, mesqai chi nadenqatec.

Hebreos 10:16

Ñi qara'gaxala' 'naac: Ca ña'maqataxac shi'ntegueyi ma'le quecauajo na'xata': Sellaaguilo añi le'taxanata naua ỹaqataxaco, chaqai shichiñi quiyi la'deenataxanaxac loma'.

Hebreos 8:10

Cá'maq ña'maqataxac so'uet ma'le quena llaalqaipi so Israel ma' ime'ueque cauajo na'xata', 'neetasa' ma'le 'naac ñi qara'gaxala': Sellaagui ma'le yi la'deenataxanaxac na ỹaqataxaquipi, chaqai serelgoto ma'le añi le'taxanata. Ca ma'le, ca' ỹim qota'olec quena'maxare, chaqai na'maxare, ca ỹalamaxareteripi.

Hebreos 9:14

Ca no'm chaqaida 'neeta dajo, ¡huose'quet sqai paguec lquesaxanqa' saua leuo' so Cristo! Ma' chicqochigui da lquesaxanaxa so Espíritu sqaica lqodoc quiyim so Cristo chi nañaanot ñi qota'a, 'nejem aca nachitaxanataxanqate quiyim ỹaatqajam co'teeta. Ca' saua leuo' co'taxate' yi qara'deenataxanaxac loma' quenauá'maq qarasauaxasete' rauecqataxansa'a da nelauaxa, qaiyi seshitaq so'ueenataxanqot ñi qota'olec se neme nca'leetauec.

Josué 3:10

Dajo dá'maq netanec ma'le, qaiyi 'yiiñita quiyim ñi qota'olec ỹalequetauguilo qamiri, chaqai quecá'maq loxoỹa'gue, ñi'maxare i'leguec ma'le na Canaán laseripi, na hititaipi, na heveoipi, na ferezeoipi, na gergeseoipi, na amorreoipi chaqai na jebuseoipi.

Apocalipsis 2:1

'Chiriñi ma'le aca lere, ca' lachita ñi nelaatec reloqota'a yí'maq mashic icoñiguit da na'qaatec neeta'ñi yi Efeso. 'Ñiraco': “'Neetayi da la'qaatec ñí'maq lo'qoota'alo ñaua siete huaqajñi queda loic, ñí'maq ỹouoxonta'pe naua lavinñi' ñaua siete ncoỹeraxanaxaqui' ta'ta'a 'oro:

Apocalipsis 2:12

Qai'neeta lachita ma'le aca lere ñí'maq nelaatec reloqota'a yí'maq mashic icoñiguit da na'qaatec neeta'ñi yi Pérgamo. 'Ñiraco': “'Neetayi da la'qaatec ñí'maq 'ue ñi lecat ỹaxaraic dos llaaxa', 'naacsa':

Apocalipsis 2:18

Qai'neeta lachita ma'le aca lere ñi nelaatec reloqota'a yí'maq mashic icoñiguit da na'qaatec na'ñi yi Tiatira. 'Ñiracsa': “'Eda da 'neeta da la'qaatec na llaalec ñi qota'a ñí'maq 'nejme' ca norec lauaq naua nqote', chaqai naua lapiaate' 'nejme' ca lecat leenaxat bronce nquiỹocsec, 'naacsa':

Apocalipsis 2:8

'Chiriñi aca lere, ca' lachita qai'neeta ñi nelaatec reloqota'a yí'maq mashic icoñiguit da na'qaatec neeta'ñi yi Esmirna. 'Ñiraco': “'Neetayi dá'maq 'naac ñí'maq 'auaxaico' na'le chaqai ñí'maq pa'aatec, ñí'maq ileuo' na'le, qam lotqai liỹa nca'leuec:

Apocalipsis 3:1

Qai'neeta lachita aca lere ñi nelaatec reloqota'a yí'maq mashic icoñiguit da na'qaatec na'ñi yi Sardis. 'Ñiraco': “'Eda 'neeta da la'qaatec ñí'maq no'qoota'alo daua siete no'ueenataxanaxaco se re'xoguilo chicqoro'ot ñi qota'a chaqai yaua siete huaqajñi: Ỹim sa'den ná'ogue ná'maq 'viichi'sac, chaqai quiyim mashic qami' leuaxaic, 'eno'm 'ue da lichoxoric aqami' quiyim qohinac rca'lli'sauec.

Apocalipsis 3:14

Qai'neeta lachita ana lere ñi nelaatec reloqota'a yí'maq mashic icoñiguit da na'qaatec neeta'ñi yi Laodicea. 'Ñiraco': “'Neetasa' da la'qaatec ná'maq ỹaatqajam lliqueta, ná'maq ỹaatqajam ipacqajanchigui ca la'qaatec, ñí'maq chicqochigui ná'ogue ná'maq lo'ueenatec ñi qota'a:

Apocalipsis 3:22

Cá'maq ỹa'den ca na'xaỹaxanaxac, ca' no'uen quiyim na'xaỹaxana so Espíritu Santo quedá'maq 'naapega ná'maq mashic icoñiguit da na'qaatec.”

Apocalipsis 3:7

Qai'neeta lachita aca lere ñi nelaatec neeta'ñi yi Filadelfia. 'Ñiraco': “'Neeta da la'qaatec ñí'maq ỹaatqajam co'teeta chaqai lliqueta, ñí'maq hueeto'ot ada lauaatqate na lasom ñi lauo' so nashi David, ma' quena' ỹauachigui, ca' qaica ca ishit ỹapogui, chaqai quena' ỹapogui, ca' qaica ca ishit ỹauachigui:

1 Samuel 17:26

Co'na'le, ca' so David renataxano' quesaua huaqata'to: —¿Nega'ỹo' ca qoỹaanem cá'maq ỹalauat dajo filisteo chaqai ỹapalaxat da nishiuenaxac na Israel llaalqaipi? Ma' ¿negue' quet dá'maq filisteo ma' chi nqouagaxaintacot na chi nqolac, ca ishiuen na nalliripi ñi qota'olec ñí'maq nca'leetauec?