1 Juan 5:19 - La'qaatqa ñi qota'olec Qota'olec & Qota'olec Novita Na Qomyipi

¹⁹ Sa'deenaq quiyim qomi' lalamaxarete' ñi qota'a, chaqai quiyim ná'ogue na qomyipi ná'maq hueetalec ana 'laua qoỹoiquentac queso na'ỹaapec.

1 Juan 5:19 Iomraidhean Croise

Lucas 4:6

Ca' so na'ỹaapec 'naaco': —Saanem qami' ma'le dá'ogue dajo na'ñaxac chaqai da lecaic naua'que nauajo 'lauari, ma' mashic qanañaañim dá'ogue da'maxare. Ca' vichiguiño' aỹim seshit saanem canchaqaica.

Juan 12:31

Ca' nagui, ca ỹovita yi laloqo' quiyim ñi qota'a ỹa'ue da lasauaxaset na hueetalec na 'laua; ca' nagui, ca ñi'maxare ỹo'daauec so na'ỹaapec só'maq relaataxantac quena 'laua.

Juan 14:30

Totqai queeta quiyim 'xoic ca itaxaỹaxac caqamiri, ma' naata'quena na na'ỹaapec ná'maq relaataxanac quena 'laua. Qam na'maxare qaica ca lquesaxanaxa caỹim.

Juan 16:11

chaqai retane' ma'le quiyim ñi qota'olec ỹa'ue ca nouaxanaxaset, ma' shi'gue qaỹa'ue da nouaxanaxaset so na'ỹaapec só'maq relaataxanac quena 'laua.

Juan 17:15

Se sashiilaxanta'que quiyim naqachi' quena 'laua, ta'ta'a quiyim quepaqataxañirelgoto queso na'ỹaapec.

Romanos 8:16

Ca' chaqaiso só'maq Espíritu só'maq necoñiguit ñi qara'al, quiyim 'nerac quiyim mashic qomi' llaalqa ñi qota'a.

2 Corintios 1:12

Ca dá'maq ỹo'uet da qanetoonaxac 'neetasa': quiyim queda chi qano'ueenataxac sa'deenqata quiyim ña'maxatqata qolqatalec dá'maq ỹaatqajam leloxoỹaxac da na'qaatec na' ñaq salecqataugui ná'ogue na qomyipi quena 'laua, qam paguec na' salecqatauguilo qamiri. Ca' quedá'maq lqouagaxa ñi qota'a, ca qarotauantac quiyim shinqatari' dajo, qam dajo mesqai chicqaugui da chi qara'deenaxanaxa.

2 Corintios 4:4

Ma' so na'ỹaapec se neuanñi nqai'en da la'deenataxanaxac, ca' sqai huelec, qaiyi se iuana da lauaq dá'maq ỹaatqajam no'uen na'qaatec re'oq nqai'en da lauaq so Cristo, ma' chaqaiso só'maq lqui'i nca'leetauec ñi qota'a.

2 Corintios 5:1

Ma' qomi' sa'deenaq quiyim ma' imeho na qaroshicmaxa ma' 'nejem ca 'imec quiyim sqaỹaloq 'guiñi, qam ñi qota'a shi'gue ỹa'maxatetañi ca qara'a' sqaica lqodoc quena piguim, qam mese lo'ueenatec ca chaqai qom.

Gálatas 1:4

só'maq nañaañiguit na'le da lelauaxa sauaxat naua qarasauaxasete', qaiyi nca'laxaterec qomi' quená'ogue na se no'uen huelec na 'laua. Ca' ipacqajanchigui dá'maq ỹahotaque ñi qota'olec coqomi'.

Efesios 2:2

na' ñaqai viitaugui, ca' quiitalec dá'maq no'ueenataxac na qomyipi hueetalec na 'laua, 'viichitac ná'maq ỹahotaque só'maq relaataxantac na'ỹaapec se re'xogui só'maq ỹa'ñaxat ná'maq se na'xaỹaxana ñi qota'a.

2 Timoteo 1:12

Ca' chaqaida dá'maq 'em 'ue da i'xoric. Qam se ypocoqotac, ma' sa'deenta só'maq hueeto'ot da ñaquitaxac. Chaqai ỹaatqajam sa'deenta quiyim so'maxare 'ue da lquesaxanaxa quiyim netela'a aỹim quedá'maq pataxailec, ỹovireta'guit nqai'en cá'maq pa'aatec na'xa'a.

Tito 3:3

Ma' qomi' qai'neete' quesom qaica ca sa'deenaq, ca' se ña'xaỹaxanaxalo naua la'qaatqa ñi qota'a. So'maqatajlec chaqai qolqata'pegue' da qarqo'itaxanqachic chaqai da qaramaanaxanqachic. Seuqataugui da se no'uen chaqai da npa'guenaxanaxa. Qomi' noquiiqate' chaqai chi ñoquiaaqata'ta'.

Santiago 4:4

¡Qam qamiri sqa pacqajñiỹauec ñi qota'a! ¿Sqa 'yiiñio' da queca qom no'm que'uegue da lqo'itaxanqachic quená'maq huelec na 'laua, ca 'ec npa'guenaxaua ñi qota'a? Ma' canchaqaica qom no'm pile'oga da lqo'itaxanqachic quena huelec na 'laua, ca npa'guenaxaua ñi qota'a.

1 Juan 3:14

Ma' qomi' mashic ñapagaxalec da nelauaxa, ca' ñqo'naxa da nca'laxa. Ca' dajo sa'deenaq, ma' se'xorenaq na qarqaỹaripi. Ma' cá'maq se i'xoren ca lqaỹa, ca' ca'maxare ñaqai hueetaugui da nelauaxa.

1 Juan 3:24

Ná'maq na'xaỹaxane'talo naua naqataxaco, ca' na'deetau'a ñi'maxare, chaqai ñi'maxare na'deeta'guita caua'maxare. Sa'deenaq quiyim ñi'maxare hueetauguilo qomi', ma' ñí'maq ne'Espíritu ỹaanema qomi' qara'deenaxanaxan.

1 Juan 5:10

Cá'maq huelec só'maq llaalec ñi qota'a hueetagui nqai'en añi le'taxanata dajo na'qaatec. Qam cá'maq sqai huelec ñi qota'a, ca 'ec 'maatqaic nqai'en, ma' sqai huelec dá'maq 'naac ñi'maxare quiyim ỹa'xat so llaalec.

1 Juan 5:13

Shiriñi dajo caqamiri ma' mashic viilec so llaalec ñi qota'a, qaiyi 'yiiñita quiyim 'ue da rca'laxahi sqaica lqodoc.

1 Juan 5:15

Chaqai quiyim mashic sa'deenaq ñi qota'a quiyim na'xaỹaxana da qanqouagaxainaxac, ca qai'neeta sa'deenaq quiyim mashic seconaxaguit cá'maq sashiilaxanqataque.

1 Juan 5:18

Sa'deenaq quiyim cá'maq ỹaatqajam 'neeta'gue ca leta'a ñi qota'olec se ỹo'uet ca lasauaxaset, ma' so llaalec ñi qota'a cochiitapega, ca' so na'ỹaapec se quehocau'a.

1 Juan 5:20

Sa'deenaq qai'neeta quiyim so llaalec ñi qota'a novi', ca' ỹaanema qomi' da qara'deenataxanaxac, qaiyi sa'deenaq ñí'maq ỹaatqajam qota'a. Qomi' ña'daqatau'a ñí'maq ỹaatqajam 'chichiguiñi, ca so'maxare chaqaiso só'maq Jesucristo, llaalec ñi qota'a. Chaqaiso so Jesús só'maq ỹaatqajam qota'a, chaqai chaqaiso só'maq nca'laxa sqaica lqodoc.

Apocalipsis 12:9

Ca' chaqaida dá'maq 'neeto' na'le na' qaỹo'daauec so isecỹac chalego lecaic. Ca so'maxare chaqaiso' só'maq ñaauapec 'ec nanaic leenaxat Satanás chaqai na'ỹaapec, só'maq ỹayintaco' quen ná'ogue na ỹoreta'oguit qomyipi hueetalec ana 'laua. Ca so na'ỹaapec chaqai so lelaatqaipi qaỹo'daauec, taalec nqohin na 'laua.

Apocalipsis 20:3

Ca inaxa'ña ca lapooqo' na nqui'illipi. Ca ỹapo'ña, ỹo'uet aso netanaqsete ñi lasom, ca tot ishit ỹayin ná'maq ỹoreta'oguit qomyipi, toco' ma' ỹovirerec saua mil ñaxari. Ca' ma'le, ca' liỹa qaỹosouec lecocho'qui'.