15 ᐁᓕᐌᒃ ᒫᑲ, ᓂᒋᔖᓂᑕᒃ, ᐊᐙᓯᑌ ᑭ ᑮ ᓱᑭᑌᐁᐎ ᒪᓯᓇᐊᒫᑎᓇᐗᐤ, ᑭᒋ ᐃᔑ ᑭᔅᑭᓯᐃᑕᑾᒃ, ᐊᓂᒪ ᔕᐌᓕᒋᑫᐎᓐ ᐅᒋ ᑳ ᑮ ᒥᓕᑦ ᑭᒋᒪᓂᑐ᙮
ᐁᐗᑯ ᐊᐗ ᑳ ᑮ ᐅᒋ ᒥᓕᑲᐎᔭᒃ ᔕᐌᓕᒋᑫᐎᓐ ᓀᔥᑕ ᐊᐸᔅᑕᓕᐎᐎᓐ, ᑭᒋ ᐅᒋ ᓇᓇᐃᑕᑭᒃ ᑖᐺᔦᓕᑕᒧᐎᓂᓕᐤ ᒥᓯᐌ ᐁ ᐃᑕᑐᔅᑳᓀᓯᒋᒃ ᐃᓕᓕᐗᒃ, ᐅᑦ ᐃᔑᓇᑳᓱᐎᓐ ᐅᒋ:
ᐌᓴ ᓂᑦ ᐃᑡᓐ, ᐊᓂᒪ ᔕᐌᓕᒋᑫᐎᓐ ᐅᒋ ᑳ ᒥᓕᑳᐎᔮᓐ, ᒥᓯᐌ ᑕᑐ ᐊᐌᓇ ᐁ ᐃᑕᔑᔦᒃ, ᐁᑳᐎᓚ ᐊᐙᓯᑌ ᑭᒋ ᑭᔅᑌᓕᒥᑎᓱᑦ ᐃᔥᐱᔥ ᑫ ᐃᑌᓕᒥᑎᓱᔅᐸᓐ; ᒫᑲ ᑭᒋ ᐯᑳᒡ ᐃᑌᓕᑕᒃ, ᑖᐱᔅᑯᒡ ᑭᒋᒪᓂᑐ ᐁ ᑭᑮ ᐃᔥᐱᔑ ᒫᑎᓇᒫᐙᑦ ᒥᓯᐌ ᑕᑐ ᐊᐌᓕᐗ ᑖᐺᔦᓕᑕᒧᐎᓂᓕᐤ᙮
ᐁ ᐋᔮᔭᒃ ᒫᑲ ᐹᐱᑐᔥ ᒥᓕᑯᓯᐎᓇ ᑖᐱᔅᑯᒡ ᐁ ᐃᔥᐱᔑ ᒥᓕᑲᐎᔭᒃ ᔕᐌᓕᒋᑫᐎᓐ, ᑮᔥᐱᓐ ᑭᔅᑭᐙᐃᑫᐎᓐ, ᑭᔅᑭᐙᐃᑫᑕᐤ ᑖᐱᔅᑯᒡ ᐁ ᐃᔑ ᒫᑎᓇᒫᑲᐎᔭᒃ ᑖᐺᔦᓕᑕᒧᐎᓐ;
ᒫᑲ ᑭᒋᒪᓂᑐ ᐅ ᔕᐌᓕᒋᑫᐎᓐ ᐅᒋ ᓂᑦ ᐃᔑᓈᑯᓯᓐ ᑳ ᐃᔑᓈᑯᓯᔮᓐ: ᓀᔥᑕ ᐅ ᔕᐌᓕᒋᑫᐎᓐ ᑳ ᑮ ᒥᓕᑲᐎᐗᒃ, ᓇᒪᐎᓚ ᐸᑾᓐᑕᐤ ᓂ ᑮ ᐅᒋ ᒥᓕᑳᐎᓐ: ᒫᑲ ᐊᐙᓯᑌ ᓂ ᑮ ᐊᑑᔅᑳᓐ ᐃᔥᐱᔥ ᒥᓯᐌ ᐁ ᐃᑕᓯᒋᒃ; ᐁᓕᐌᒃ ᒫᑲ ᓇᒪᐎᓚ ᓂᓚ ᒫᑲ ᑭᒋᒪᓂᑐ ᐅ ᔕᐌᓕᒋᑫᐎᓐ ᑳ ᐎᒉᐎᑯᐗᒃ᙮
ᑳ ᐃᔑ ᒥᓕᑲᐎᔮᓐ ᑭᒋᒪᓂᑐ ᐅ ᔕᐌᓕᒋᑫᐎᓐ, ᑖᐱᔅᑯᒡ ᑫᑫᑕᐌᓕᑕᒃ ᐅᓂᑲᓂ ᐙᔅᑳᔨᑲᓂᑫᐤ, ᓂ ᑮ ᐅᓚᔅᑕᒋᑳᓐ, ᑯᑕᒃ ᒫᑲ ᐁᑯᑕ ᐎᐋᔅᑳᔨᑲᓂᑫᑦ᙮ ᒫᑲ ᐁᑯᔑ ᒥᓯᐌ ᑕᑐ ᐃᓕᓕᐤ ᑲᑕ ᔮᒀᒥᓯᐤ ᐁ ᐃᔑ ᐙᔅᑳᔨᑲᓂᑫᑦ ᐁᑯᑕ᙮
ᐃᔅᐱ ᒫᑲ ᒉᒻᔅ, ᓯᐹᔅ, ᓀᔥᑕ ᒑᓐ ᓯᑣᔅᑲᐃᑲᓇ ᑳ ᐃᑌᓕᑖᑯᓯᒋᒃ, ᐎᐊᐸᑕᑭᒃ ᐊᓂᒪ ᔕᐌᓕᒋᑫᐎᓐ ᑳ ᑮ ᒥᓕᑲᐎᐗᒃ, ᓂ ᑮ ᒥᓕᑾᒃ ᓀᔥᑕ ᐸᕐᓇᐸᔅ ᐅᑭᒋᓂᔅᑭ ᐎᒉᑐᐎᓐ, ᓂᓚᓈᓐ ᑭᒋ ᓇᑕᑭᒋᒃ ᐁᑳ ᑳ ᐋᔭᒥᐋᒋᒃ, ᐎᓚᐗᐤ ᒫᑲ ᐊᓂᐃ ᑳ ᑭᔅᑫᓄᐙᒋᔣᑲᓂᐎᓕᒋ᙮
ᑮᔥᐱᓐ ᐅᐅ ᑭᔅᑭᓯᑐᑕᒥᐊᑡᐌ ᐎᒋᔖᓂᒪᐗᒃ, ᑭ ᑳ ᒥᓗ ᐋᔭᒥᐊᐎ ᐊᑑᔅᑫᓛᑲᓂᒥᒥᒃ ᒋᓴᔅ ᙭, ᐁ ᐅᐱᑭᔭᓐ ᑖᐺᔦᓕᑕᒧᐎᓂ ᐋᔭᒥᐎᓂᒃ ᓀᔥᑕ ᒥᓗ ᑭᔅᑭᓄᐊᒫᑫᐎᓂᒃ, ᐁᐗᑯ ᑳ ᑮ ᓄᔅᐱᓈᑕᒪᓐ᙮
ᐁᐗᑯ ᐅᒋ ᒫᑲ ᑭ ᑭᔅᑭᓯᐃᑎᓐ, ᑭᒋ ᐃᑌᐊᒶᑦ ᐅ ᒥᓕᐌᐎᓐ ᑭᒋᒪᓂᑐ, ᐊᓂᒪ ᑳ ᐱᒋᔅᑳᑯᔭᓐ ᐁ ᑮ ᓴᒥᓂᔅᑎᒀᓂᑖᓐ ᐅᒋ᙮
ᐅᐅ ᑫᒀᓇ ᑭᔅᑭᓯᑐᑕᒥᐃᒃ, ᐁ ᐃᑕᔓᒪᒋᒃ ᐅᑎᔥᑲᐤ ᐅᑎᐯᓕᒋᑫᐗ, ᐁᑳᐎᓚ ᑭᒋ ᐋᔑᑌᒥᐌᒋᒃ ᐋᔭᒥᐎᓇ ᐅᒋ ᐁᑳ ᓈᓐᑕᐤ ᑳ ᐃᑖᐸᑕᑭ, ᑳ ᐗᓀᓕᑕᒥᐃᑯᒋᒃ ᐱᑯ ᐊᓂᑭ ᑳ ᓇᑐᑕᑭᒃ᙮
ᑭᔅᑭᓯᑐᑕᒥᐃᒃ ᑭᒋ ᓇᓇᐃᑕᑭᒃ ᑎᐯᓕᒋᑫᐎᓇ ᓀᔥᑕ ᓱᑳᑎᓯᐎᓇ, ᑭᒋ ᓇᓇᐃᑕᐙᒋᒃ ᐅᓚᔓᐌᐎᑭᒪᐗ, ᑭᒋ ᐎ ᑐᑕᑭᒃ ᒥᓯᐌ ᑕᑐ ᒥᓗ ᐊᑑᔅᑫᐎᓂᓕᐤ,
ᑭ ᐸᑯᓭᓕᒥᑎᓇᐗᐤ ᓀᔥᑕ, ᓂᒋᔖᓂᑐᒃ, ᐅᑎᓇᒧᒃ ᔑᑭᒥᐌᐎ ᐋᔭᒥᐎᓐ: ᐌᓴ ᑭ ᑮ ᒪᓯᓇᐊᒫᑎᓇᐗᐤ ᒐᑲᐙᔑᔥ ᐋᔭᒥᐎᓂᒃ᙮
ᓯᓪᐯᓇᔅ ᐅᒋ ᑳ ᒀᔭᔅᑯᑐᑖᑖᒃ ᑭᒋᔖᓂᐗᐤ, ᐁ ᐃᑌᓕᑕᒫᓐ, ᐋᐱᔑᔥ ᓂ ᑮ ᒪᓯᓇᐃᑳᓐ, ᐁ ᔑᑭᒥᐌᔮᓐ ᓀᔥᑕ ᐁ ᐋᓕᒧᑕᒫᓐ ᐁᐗᑯ ᐅᒪ ᑖᐺ ᑭᒋᒪᓂᑐ ᐅ ᔕᐌᓕᒋᑫᐎᓐ ᐃᑕ ᑳ ᓂᐸᐎᔦᒃ᙮
ᓀᔥᑕ ᐃᑕᑭᑕᒸᒃ ᐅ ᔑᐱᓚᐌᓯᐎᓐ ᑭ ᑎᐯᓕᒋᑫᒥᓇᐤ ᐁ ᐱᒫᒋᐃᐌᐎᓂᐗᒃ: ᑖᐱᔅᑯᒡ ᓀᔥᑕ ᓯᐊᑭᐋᑲᓂᐎᑦ ᑭᒋᔖᓂᓇᐤ ᐹᓪ, ᐃᔥᐱᔥ ᑲᑫᑕᐌᓕᑕᒧᐎᓂᓕᐤ ᐁ ᑮ ᒥᓛᑲᓂᐎᑦ, ᐁ ᑮ ᒪᓯᓇᐊᒫᑖᒃ:
ᐅᐅ ᑫᒀᓇ ᑭ ᑮ ᒪᓯᓇᐊᒫᑎᓇᐗᐤ ᑭᓚᐗᐤ ᑳ ᑖᐺᔦᓕᑕᒬᒃ ᐅᑦ ᐃᔑᓂᑳᓱᐎᓐ ᑭᒋᒪᓂᑐ ᐅᑯᓯᓴ; ᑭᒋ ᑭᔅᑫᓕᑕᒣᒃ ᐁ ᐋᔭᔦᒃ ᑳᑭᑫ ᐱᒫᑎᓯᐎᓐ, ᓀᔥᑕ ᑭᒋ ᑖᐺᔦᓕᑕᒬᒃ ᐅᑦ ᐃᔑᓂᑳᓯᐎᓈ ᑭᒋᒪᓂᑐ ᐅᑯᓯᓴ᙮