2 ᑌᑖᐎᒡ ᐱᒧᑌᔅᑲᓈᒃ ᐊᓐᑕ, ᓀᔥᑕ ᐊᔨᑕᐗᑳᒻ ᓯᐱᒃ, ᑮ ᐃᑕᐤ ᐱᒫᑎᓯᐎᓂ ᒥᔅᑎᒃ, ᑳ ᓂᑖᐎᑭᑖᑦ ᓂᔓᔖᑉ ᑐᐎ ᒥᓂᔕ, ᓀᔥᑕ ᑳ ᒥᓂᔑᐎᑦ ᒥᓯᐌ ᑕᑐ ᐱᓯᒧᒃ: ᒥᔅᑎᒃ ᒫᑲ ᐅ ᓂᐱᔑᒪ ᑲᑕ ᐅᒋ ᒥᓇᐗᒋᐊᐗᒃ ᑳ ᑕᑐᔅᑳᓀᓯᒋᒃ ᐃᓕᓕᐗᒃ᙮
ᐅᑎᐯᓕᒋᑫᐤ ᐅᑦ ᐊᒑᑾ ᓂ ᑭᑭᔥᑳᑯᓕᐗ, ᐌᓴ ᓂ ᑮ ᑕᒪᔅᑯᓂᒃ ᑭᒋ ᑎᐹᒋᒧᔅᑕᐗᑭᒃ ᒥᓗᐋᒋᒧᐎᓂᓕᐤ ᐊᓂᑭ ᑳ ᑭᑎᒫᑭᓯᒋᒃ; ᓂ ᑮ ᐯᒋᑎᔕᐅᒃ ᑭᒋ ᒥᓇᐋᒋᐊᑭᒃ ᐊᓂᑭ ᑳ ᐱᑯᑌᐁᒋᒃ, ᑭᒋ ᑎᐹᒋᒧᔅᑕᐗᑭᒃ ᐋᐸᐊᒫᑫᐎᓂᓕᐤ ᐊᓂᑭ ᑳ ᐋᐗᑳᓂᐎᒋᒃ, ᓀᔥᑕ ᐙᐱᐎᓂᓕᐤ ᐊᓂᑭ ᐁᑳ ᑳ ᐙᐱᒋᒃ, ᑭᒋ ᐋᐸᐗᑭᒃ ᐊᓂᑭ ᑳ ᐅᑐᑭᓯᒋᒃ,
ᐎᓚ ᑫᒋᐙᒃ ᑳ ᑮ ᐅᑎᓇᒃ ᑎᐱᓚᐌ ᐎᔭᐎᒃ ᑭ ᒪᒋᑣᐎᓂᓇᐗ ᒥᔅᑎᑯᒃ; ᑭᓚᓇᓇᐤ, ᐁ ᓂᐱᔭᒃ ᒪᒋᑣᐎᓂᒃ ᐅᒋ, ᑭᒋ ᐱᒫᑎᓯᔭᒃ ᒀᔭᔅᑭᑖᑎᓯᐎᓂᒃ ᐃᔑ: ᐅ ᐸᐸᓴᔅᑕᐅᑯᓯᐎᓇ ᑳ ᐅᒋ ᒥᓇᐗᒋᐃᑲᐎᔦᒃ᙮
ᐊᓇ ᑳ ᐅᑖᐗᑳᑦ, ᐁᑯᔑ ᑲᑕ ᐯᑕᒻ ᐋᒑᒃ ᑳ ᐃᑖᑦ ᒫᒪᐎᐋᔭᒥᐋᐗ; ᐊᓇ ᑳ ᔖᑯᒋᐃᐌᑦ, ᓂ ᑳ ᒥᓚᐤ ᐱᒫᑎᓯᐎᓂ ᒥᔅᑎᑯᒃ ᑭᒋ ᐅᒋ ᒥᒋᓱᑦ, ᑳ ᐃᑖᓕᒋ ᑌᑖᐎᒡ ᐅ ᐹᕋᑕᐃᓯᒥᒃ ᑭᒋᒪᓂᑐ᙮
ᐊᓂᐃ ᓂᔓᔖᑉ ᑭᒋᐃᔥᒀᑌᒪ ᐁᐗᒀᓂᑭ ᓂᔓᔖᑦ ᐁᓴᒃ; ᒥᓯᐌ ᑕᑐ ᑭᒋᐃᔥᒀᑌᒻ ᐯᔭᒃ ᐁᔅ: ᐱᒥᑌᔅᑲᓇᐤ ᒫᑲ ᐃᑖᐎᓂᒃ ᒣᒧᒋ ᑭ ᐅᓴᐎᔔᓕᐋᓈᐱᔅᑯᐗᓐ, ᑖᐱᑺᒡ ᑳ ᔖᐳᐙᓱᒃ ᐙᓭᓂᑖᑲᓐ᙮
ᐊᓂᑭ ᒫᑲ ᑳ ᑕᑐᔅᑳᓀᓯᒋᒃ ᐃᓕᓕᐗᒃ ᑳ ᐱᒫᒋᐋᑲᓂᐎᒋᒃ ᑲᑕ ᐱᒧᑖᑕᒶᒃ ᐁ ᐃᔑ ᐙᓯᓱᓕᒃ: ᐁᑯᑕ ᒫᑲ ᑭᒋᐅᑭᒪᐗᒃ ᐅᑕ ᐊᔅᑮᒃ ᐱᐁᑖᒋᒃ ᐅ ᑭᔅᑌᓕᑖᑯᓯᐎᓂᐗᐤ ᓀᔥᑕ ᐅ ᑭᔅᑎᓯᐎᓂᐗᐤ᙮
ᓂ ᑮ ᐙᐸᑎᓕᒃ ᒫᑲ ᐁ ᐸᓓᑲᒃ ᓯᐱ ᐁ ᐱᒫᑎᓯᐎᓂ ᓂᐱᐗᒃ, ᐁ ᐙᓭᑲᒥᒃ ᑖᐱᔅᑯᒡ ᒪᔅᑾᒥ, ᐁ ᐅᒋᐸᓕᒃ ᑭᒋᒪᓂᑐ ᐅᑦ ᐅᑭᒪᐗᐱᐎᓂᒃ ᓀᔥᑕ ᒫᓂᔥᒑᓂᔑᔥ᙮
ᔕᐌᓕᑖᑯᓯᐗᒃ ᐊᓂᑭ ᑳ ᑐᑕᒸᒋᒃ ᐅ ᑲᑫᔅᑴᐎᓂᓕᐗ, ᒀᔭᔉ ᑭᒋ ᑮ ᐋᔭᐙᒋᒃ ᐱᒫᑎᓯᐎᓂ ᒥᔅᑎᑾ, ᓀᔥᑕ ᔕᐳ ᑭᒋᐃᔥᒀᑌᒥᒃ ᑭᒋ ᐱᑐᑫᒋᒃ ᐃᑖᐎᓂᒃ᙮
ᑮᔥᐱᓐ ᒫᑲ ᐊᐌᓇ ᐃᓕᓕᐤ ᑫ ᐃᑲᑌᓇᒧᑴ ᑳ ᐃᑗᒪᑲᓂᓕᒃ ᐅᒪ ᑭᔅᑭᐙᐃᑫᐎ ᐋᔭᒥᐎᓐ ᒪᓯᓇᐃᑲᓂᒃ, ᑭᒋᒪᓂᑐ ᑲᑕ ᐃᑲᑌᓇᒬᐤ ᐅ ᑎᐯᓕᑖᑯᓯᐎᓂᓕᐤ ᐱᒫᑎᓯᐎᓂ ᒪᓯᓇᐃᑲᓂᒃ ᐅᒋ, ᓀᔥᑕ ᐸᓓᑭ ᐃᑖᐎᓂᒃ ᐅᒋ, ᓀᔥᑕ ᐊᓂᐃ ᑫᒀᓇ ᐅᒋ ᑳ ᒪᓯᓇᐃᑳᑌᑭ ᐅᒪ ᒪᓯᓇᐃᑲᓂᒃ᙮