5 ᐁᑯᔑ ᐅᒪ ᒥᑐᓀᓕᒋᑲᓐ ᑭ ᑳ ᐎ ᐱᒋᔅᑳᑯᓇᐗᐤ, ᑳ ᑮ ᐱᒋᔅᑳᑯᑦ ᓀᔥᑕ ᙭ ᒋᓴᔅ;
ᐅᑎᓇᒫᓱᒃ ᓂ ᑖᐱᔅᑳᑲᓐ, ᑭᔅᑭᓄᐙᐸᒦᒃ ᒫᑲ, ᐌᓴ ᓂ ᓗᔅᐹᑎᓰᓐ ᓀᔥᑕ ᓂ ᑕᐸᑎᓕᒧᓐ ᓂᑌᐃᒃ: ᑭ ᑳ ᒥᔅᑫᓇᐗᐤ ᒫᑲ ᑫ ᐃᔑ ᐋᓜᐱᒋᒃ ᑭᑦ ᐊᒑᑯᐙᐗᒃ᙮
ᐌᓴ ᐊᐌᓇ ᐊᓇ ᐊᐙᓯᑌ ᑫᔅᑎᓯᑦ, ᐊᓇ ᑳ ᐊᐱᑦ ᐁ ᒥᒋᓱᑦ, ᓀᔥᑕᐱᑯ ᐊᓇ ᑳ ᐱᒥᐃᐌᑦ? ᓇᒪ ᓈ ᐊᓇ ᑳ ᐊᐱᑦ ᐁ ᒥᒋᓱᑦ? ᓂᓚ ᒫᑲ ᑭ ᐎᒉᐎᑎᓇᐗᐤ ᑖᐱᔅᑯᒡ ᐊᓇ ᑳ ᐱᒥᐃᐌᑦ᙮
ᑭᒋᒪᓂᑐ ᑳ ᐃᔑ ᑕᒫᔅᑯᓈᑦ ᒋᓴᓴ ᓈᓴᕋᑎᒃ ᑳ ᐅᒌᓕᒋ ᑳ ᐸᓓᑭᓯᓕᒋ ᐊᒑᑾ ᓀᔥᑕ ᓱᑳᑎᓯᐎᓂᓕᐤ ᐅᒋ; ᐊᓇ ᑳ ᐸᐹᐃᑐᑌᑦ ᐁ ᒥᓗᑐᑖᑫᑦ, ᓀᔥᑕ ᐁ ᒥᓇᐙᒋᐋᑦ ᒥᓯᐌ ᐊᓂᐃ ᑳ ᓇᓀᑳᒋᐃᑯᓕᒋ ᒪᒋᒪᓂᑐᐗ: ᐌᓴ ᑭᒋᒪᓂᑐᐗ ᑮ ᐎᒉᐎᑯ᙮
ᒥᓯᐌ ᑫᒀᓇ ᑭ ᑮ ᐙᐸᑎᓕᑎᓈᐗᐤ, ᐊᓂᒪ ᐁ ᐋᐸᑎᓯᔦᒃ ᐅᒋ ᑭ ᑳ ᐅᑎᓇᒪᐗᑖᐙᐗᒃ ᐊᓂᑭ ᑳ ᓕᓚᒥᓯᒋᒃ, ᓀᔥᑕ ᑭᒋ ᑭᔅᑭᓯᑐᑕᒬᒃ ᐅᑦ ᐋᔭᒥᐎᓇ ᐅᑎᐯᓕᒋᑫᐤ ᒋᓴᔅ, ᑖᓂ ᑳ ᐃᔑ ᐃᑗᑦ, ᐊᐙᓯᑌ ᔕᐌᓕᑕᑯᓯᓇᓂᐗᓐ ᐁ ᒥᓕᐙᓂᐗᒃ ᐃᔥᐱᔥ ᐁ ᐅᑎᓂᑳᓂᐗᒃ᙮
ᒫᑲ ᑮᔥᐱᓐ ᑭᒋᔖᓐ ᑲᔥᑫᓕᑕᒥᐃᑯᑦ ᑭ ᒥᒋᒥᓕᐤ, ᓇᒪᐎᓚ ᐁ ᐃᑕᔅᑌᒃ ᓵᑭᐃᑐᐎᓐ ᑭᑦ ᐃᔑ ᐱᒧᑖᓐ᙮ ᐁᑳᐎᓚ ᓂᔑᐗᓈᒋ ᑭ ᒥᒋᒻ ᐅᒋ, ᐊᓇ ᑳ ᑮ ᓂᐳᔅᑕᒫᑯᑦ ᙭ᑕ᙮
ᐌᓴ ᐙᐙᒡ ᙭ ᓇᒪᐎᓚ ᑮ ᓇᐃᓚᐌᐃᑎᓱ; ᒫᑲ, ᐁ ᐃᑕᓯᓇᐃᑳᑌᒃ, ᐅ ᑭᑐᔑᐌᐎᓂᐗᐗ ᐊᓂᑭ ᑳ ᑮ ᑭᑐᑎᔅᑭᒃ ᓂ ᑮ ᐸᑲᒥᔅᑳᑯᐙᓐ᙮
ᐁᑯ ᑭᒋᒪᓂᑐ ᑳ ᑎᐯᓕᑕᒃ ᔑᐱᓚᐌᓯᐎᓂᓕᐤ ᓀᔥᑕ ᑳᑭᒋᐃᐌᐎᓂᓕᐤ ᑭ ᑳ ᐎ ᒥᓕᑯᐗᐤ ᒣᒥᔅᑯᒃ ᑭᒋ ᒥᓗᐃᑌᓕᒥᑐᔦᒃ ᑳ ᐃᔑ ᑭᔅᑭᓄᐊᒫᑫᑦ ᙭ ᒋᓴᔅ:
ᐁ ᐃᔑ ᓇᐃᓚᐌᐊᑭᒃ ᒥᓯᐌ ᐃᓕᓕᐗᒃ ᒥᓯᐌ ᐃᔑ, ᐁᑳ ᐁ ᓈᓇᑕᐌᓕᑕᒫᓐ ᑎᐱᓚᐌ ᓂᑦ ᐅᑎᓯᐎᓐ, ᒫᑲ ᐅᑦ ᐅᑎᓯᐎᓂᐗᐤ ᒥᒉᑦ, ᑭᒋ ᐅᒋ ᐱᒫᒋᐋᑲᓂᐎᒋᒃ᙮
ᐱᒧᑌᒃ ᒫᑲ ᓵᑭᐃᐌᐎᓂᒃ, ᑖᐱᔅᑯᒡ ᑳ ᐃᔑ ᓵᑭᐃᑕᒃ ᙭, ᓀᔥᑕ ᑭᓚᓈᓇᐤ ᑳ ᑮ ᐅᒋ ᒥᓕᐌᑦ ᐎᔭᐤ, ᐸᑭᑎᓂᑫᐎᓂᓕᐤ ᓀᔥᑕ ᓵᓵᑭᐎᓕᐌᐎᓂᓕᐤ ᐁ ᐸᑭᑎᓇᒪᐙᑦ ᑭᒋᒪᓂᑐᐗ, ᐸᑭᑎᓂᑫᐎᓂᓕᐤ ᑳ ᐎᑭᒫᑾᓂᓕᒃ᙮
ᐹᓪ ᓀᔥᑕ ᑎᒧᑎ, ᐅᑦ ᐊᑑᔅᑫᓛᑲᓂᒪ ᒋᓴᔅ ᙭, ᐁ ᒪᓯᓇᐊᒪᐙᒋᒃ ᒥᓯᐌ ᐅᐸᓓᑭᓴ ᙭ ᒋᓴᓯᒃ, ᑳ ᐃᑖᓕᒋ ᐱᓕᐹᐃᐃᒃ, ᐊᓯᒋ ᑭᒋᐋᔭᒥᐁᐎᑭᒪᐗ ᓀᔥᑕ ᑎᑲᓇ:
ᐌᓴ ᐁᐗᑯ ᐌᒋ ᓇᑐᒥᑲᐎᔦᒃ: ᐌᓴ ᙭ ᓀᔥᑕ ᑭ ᐙᐎᓴᑫᓕᑕᒥᔅᑕᒫᑯᓇᐤ, ᐁ ᓇᑲᑕᒫᑕᒃ ᑭᔅᑭᓄᐙᐸᑎᓕᐌᐎᓂᓕᐤ ᑭᒋ ᑖᑖᐸᐊᒣᐌᒃ ᐅ ᑕᑯᔅᑫᐎᓇ:
ᐁ ᑭᔅᑫᓕᑖᑾᒃ ᒫᑲ ᙭ ᐁ ᑮ ᐎᓴᑫᓕᑕᒫᑕᒃ ᐎᔮᓯᒃ, ᐁᑯᔑ ᐳᔅᑎᔥᑲᒧᒃ ᑭᓚᐗᐤ ᓀᔥᑕ ᐁᐗᑯ ᒥᑐᓀᓕᒋᑲᓐ: ᐌᓴ ᐊᓇ ᑳ ᑮ ᐎᓴᑫᓕᑕᒃ ᐎᔮᓯᒃ ᑮ ᐳᓂᑕᐤ ᒪᒋᑐᑕᒧᐎᓂᓕᐤ;
ᐊᓇ ᓂ ᐱᒋᔅᑲᐗᐤ ᑳ ᐃᑗᑦ, ᐁᑯᔑ ᑲᑕ ᐃᔑ ᐱᒧᑌᐸᓐ, ᒬᒋᒃ ᑳ ᑮ ᐃᔑ ᐱᒧᑌᓕᒋ᙮
