48 ᑭᓚᐗᐤ ᒫᑲ ᑭ ᑳ ᑎᐹᑐᑌᓇᐗᐤ ᐅᐅ ᑫᒀᓇ᙮
ᓀᔥᑕ ᑭᓚᐗᐤ ᐊᓯᒋ ᑭ ᑳ ᑎᐹᒋᒥᓇᐗᐤ, ᐁ ᑮ ᐎᒉᐎᔦᒃ ᓃᔥᑕᒻ ᐅᒋ᙮
ᐁ ᒫᒋ ᐊᑭᑕᒪᒃ ᐅ ᓯᑲᐋᑖᑫᐎᓐ ᒑᓐ, ᐱᓕᔥ ᐊᓂᒪ ᐁ ᑭᔑᑳᒃ ᐃᔅᐱ ᐃᔥᐱᒥᒃ ᑳ ᐅᑎᓈᑲᓂᐎᑦ ᑭᓚᓈᓇᐤ ᐅᒋ, ᑫᒋᓈᔥ ᐯᔭᒃ ᑲᑕ ᐹᑳᓂᐋᑲᓂᐎᐤ ᑭᒋ ᑎᐹᑐᑕᒃ ᐊᓯᒋ ᑭᓚᓈᓇᐤ ᐁ ᑮ ᐗᓂᔥᑳᓕᒋ᙮
ᒫᑲ ᑭ ᑳ ᒥᓕᑲᐎᓇᐗᐤ ᓱᑳᑎᓯᐎᓐ ᐃᔅᐱ ᑮ ᐅᑎᑎᑯᔦᑴ ᑳ ᐹᓓᑭᓯᑦ ᐊᒑᒃ: ᓀᔥᑕ ᒫᑲ ᑭ ᑳ ᑎᐹᒋᒥᓇᐗᐤ ᒋᕉᓴᓚᒥᒃ, ᓀᔥᑕ ᒥᓯᐌ ᒎᑎᐊᐃᒃ, ᓀᔥᑕ ᓴᒣᕆᔭᐃᒃ, ᓀᔥᑕ ᐱᓕᔥ ᒫᐗᒡ ᐁ ᐃᔥᒀᔮᒃ ᐊᔅᑭᒃ᙮
ᓂᓚᓈᓐ ᒫᑲ ᓂ ᑎᐹᑐᑌᓈᓐ ᒥᓯᐌ ᑫᒀᓇ ᑳ ᑮ ᑐᑕᒃ, ᑖᐱᔅᑯᒡ ᐅᑦ ᐊᔅᑭᐙᒃ ᒎᐗᒃ, ᓀᔥᑕ ᒋᕉᓴᓚᒥᒃ; ᐊᓇ ᑳ ᑮ ᓂᐸᐃᑯᑦ ᓀᔥᑕ ᑳ ᑮ ᐊᑯᓖᑯᑦ ᒥᔅᑎᑯᒃ᙮
ᓇᒪᐎᓚ ᒥᓯᐌ ᐃᓕᓕᐗ, ᒫᑲ ᐅᑎᐸᒋᒧᐗ ᓂᔮᑲᓇ ᑳ ᑮ ᐗᐌᓚᐸᒥᑯᓕᒋ ᑭᒋᒪᓂᑐᐗ, ᐙᐙᒡ ᓂᓚᓈᓐ, ᑳ ᑮ ᐎᒋᒥᒋᓱᒪᑭᑦ ᓀᔥᑕ ᐎᒋᒥᓂᑴᒪᑭᑦ ᐸᑎᒪ ᑳ ᐗᓂᔥᑳᑦ ᐅᓂᐱᐗ ᐅᒋ᙮
ᓀᔥᑕ ᑮ ᐗᐸᒥᑯ ᒥᒉᑐ ᑭᔑᑳᐗ ᐊᓂᐃ ᑳᓕᓕᒃ ᑳ ᑮ ᐅᒋ ᐯᒋ ᐎᒉᐎᑯᑦ ᒋᕉᓴᓚᒥᒃ ᐃᔅᑯ, ᐊᓂᑭ ᑳ ᑎᐸᒋᒧᔅᑕᐙᒋᒃ ᐃᓕᓕᐗ ᐁ ᐊᓕᒧᒫᒋᒃ᙮
ᐅᐅ ᒋᓴᓴ ᒫᑲ ᑭᒋᒪᓂᑐ ᒥᓇ ᑮ ᐗᓂᔥᑳᓀᐤ, ᐁᐗᒀᓂᒪ ᒫᑲ ᒥᓯᐌ ᐁ ᐃᑕᔑᔮᒃ ᓂ ᑎᐸᑐᑌᓈᓐ᙮
ᐌᓴ ᐁ ᐅᑎᐹᒋᒧᐎᓕᓕᒥᔉ ᑭ ᑳ ᐋᓕᒧᑕᒪᐙᐗᒃ ᒥᓯᐌ ᐃᓕᓕᐗᒃ ᐊᓂᒪ ᑳ ᑮ ᐙᐸᑕᒪᓐ ᓀᔥᑕ ᑳ ᑮ ᐯᑕᒪᓐ᙮
ᑭ ᑮ ᓂᐸᐋᐗᐤ ᒫᑲ ᐊᓇ ᑳ ᑎᐯᓕᑕᒃ ᐱᒫᑎᓯᐎᓂᓕᐤ, ᐊᓇ ᑭᒋᒪᓂᑐᐗ ᑳ ᑮ ᐗᓂᔥᑳᓂᑯᑦ ᐅᓂᐱᐗ ᐅᒋ; ᐁᐗᒀᓇ ᑳ ᑎᐸᒋᒪᑭᑦ᙮
ᓀᔥᑕ ᑭᒋ ᓱᑳᑎᓯᐎᓇᒃ ᐊᐸᔅᑕᓚᒃ ᑮ ᑎᐹᑐᑕᒬᐗᒃ ᐅ ᐗᓂᔥᑳᐎᓂᓕᐤ ᑳ ᐅᑎᐯᓕᒋᑫᐗ ᒋᓴᓴ: ᑮ ᑭᒋ ᔕᐌᓕᑖᑯᓯᐗᒃ ᒫᑲ ᒥᓯᐌ ᐁ ᐃᑕᓯᒋᒃ᙮
ᓂᓚᓈᓐ ᒫᑲ ᓂ ᑎᐸᒋᒨᔅᑕᒪᐙᓇᓐ ᐅᐅ ᑫᒀᓇ; ᐁᒀᓂ ᓀᔥᑕ ᐁ ᑐᑕᒃ ᑳ ᐸᓓᑭᓯᑦ ᐊᒑᒃ, ᐊᓂᐃ ᑭᒋᒪᓂᑐ ᑳ ᑮ ᒥᓛᑦ ᒥᓯᐌ ᑕᑐ ᑳ ᓇᓇᐃᑖᑯᑦ᙮
ᐊᓂᑭ ᑳ ᓂᑳᓀᓕᑖᑯᓯᒋᒃ ᑳ ᐎᒉᐎᑖᑾᒃ ᓂ ᔑᑭᒪᐗᑳ, ᓂᓚ ᓀᔥᑕ ᑳ ᓂᑳᓀᓕᑖᑯᓯᔮᓐ, ᓀᔥᑕ ᑳ ᐋᓕᒧᑕᒶᒃ ᙭ ᐅ ᐙᐎᓴᑫᓕᑕᒧᐎᓇ, ᓀᔥᑕ ᑳ ᐅᐎᒋᐃᐌᔮᓐ ᐊᓂᒪ ᑭᔅᑌᓕᑖᑯᓯᐎᓐ ᑫ ᐯᒋ ᓄᑯᑖᓂᐗᒃ:
