22 ᐁᑯ ᑭᔅᑭᓄᐊᒪᐙᑲᓇᒃ ᑫᓇᐙᐸᒥᑐᒋᒃ, ᐁ ᐙᐙᓀᓕᑕᑭᒃ ᐊᐌᓕᐗ ᑳ ᐋᓕᒧᒫᓕᒋ᙮
ᒣᒀᒡ ᒫᑲ ᐁ ᒥᒋᓱᒋᒃ, ᑮ ᐃᑗᐤ ᑖᐺ ᑭᑦ ᐃᑎᓇᐗᐤ, ᐯᔭᒃ ᐁ ᐃᑕᔑᔦᒃ ᓂ ᑳ ᐙᔦᔑᐸᑭᑎᓂᒃ᙮
ᓈᔅᐱᒡ ᒫᑲ ᑮ ᒥᒋᓚᐌᓯᐗᒃ, ᒥᓯᐌ ᐁ ᐃᑕᓯᒋᒃ ᒫᑲ ᑮ ᒫᒋ ᐃᑌᐗᒃ, ᑌᐯᓕᒋᑫᔭ, ᓂᓚ ᓈ?
ᒣᒀᒡ ᒫᑲ ᐁ ᐊᐱᒋᒃ ᐁ ᒥᒋᓱᒋᒃ, ᒋᓴᔅ ᑮ ᐃᑗᐤ, ᑖᐺ ᑭᑦ ᐃᑎᓇᐗᐤ, ᐯᔭᒃ ᐁ ᐃᑕᔑᔦᒃ ᑳ ᐎᒋᒥᒋᓱᒥᔦᒃ ᓂ ᑳ ᐙᔦᔑᐸᑭᑎᓂᒃ᙮
ᑮ ᒫᒋ ᒥᒋᓕᐌᓯᐗᒃ ᒫᑲ, ᓀᔥᑕ ᑮ ᐃᑌᐗᒃ ᐯᐯᔭᒃ, ᓂᓚ ᓈ? ᑯᑕᒃ ᒫᑲ ᑮ ᐃᑗᐤ, ᓂᓚ ᓈ?
ᒫᑲ, ᒫᑎᑲ, ᐅᑕ ᐁ ᐃᑖᔮᓐ ᐃᑕᑾᓂᓕᐤ ᒥᒋᓱᓈᑎᑯᒃ ᐅᒋᒋ ᐊᓇ ᑳ ᐙᔦᔑᐸᑭᑎᓂᑦ᙮
ᑮ ᒫᒋ ᑲᑴᒋᒥᑐᐗᒃ ᒫᑲ, ᐊᐌᓇ ᐁ ᐃᑕᓯᒋᒃ ᑫ ᑐᑕᒃ ᐅᒣᓕᐤ᙮
ᓇᒪᐎᓚ ᒥᓯᐌ ᐁ ᐃᑕᔑᔦᒃ ᑭᑦ ᐋᓕᒧᒥᑎᓇᐗᐤ: ᓂ ᑭᔅᑫᓕᒫᐗᒃ ᐊᓂᑭ ᑳ ᑮ ᐙᐌᓛᐸᒪᑭᒃ: ᒫᑲ ᑭᒋ ᒪᓯᓇᐃᑫᐎᓐ ᑭᒋ ᑎᐱᐸᓕᒃ, ᐊᓇ ᑳ ᐎᒋᒥᒋᓱᒥᑦ ᐊᓚᑯᓇᐗ, ᑮ ᐅᐱᓇᒻ ᐅᑐᑕᓐ ᑭᒋ ᒪᒋᑐᑖᐎᑦ᙮
ᐃᔅᐱ ᒋᓴᔅ ᐅᒣᓕᐤ ᑳ ᑮ ᐃᑗᑦ, ᑮ ᒥᑯᔥᑳᑌᓕᑕᒻ ᐅᑦ ᐊᒑᑯᒃ, ᓀᔥᑕ ᑮ ᐎᑕᒫᑫᐤ, ᐁ ᐃᑗᑦ, ᑖᐺ, ᑖᐺ, ᑭᑦ ᐃᑎᓇᐗᐤ, ᐯᔭᒃ ᐁ ᐃᑕᔑᔦᒃ ᓂ ᑳ ᐙᔦᔑᐸᑭᑎᓂᒃ᙮
