3 ᑭᓚ ᒫᑲ ᔑᐯᓕᑕ ᐊᓕᒥᓯᐎᓐ, ᑖᐱᔅᑯᒡ ᐅ ᒥᓗ ᓄᑎᓂᑫᒪ ᒋᓴᔅ ᙭᙮
ᐁᑯ ᐅᓇᑐᐸᓕᐗᑳ, ᑳ ᑮ ᐃᑕᔓᐙᑖᑲᓂᐎᒋᒃ, ᐌᑎᓈᒋᒃ ᐹᓚ, ᓀᔥᑕ ᒣᒀᒡ ᐁ ᑎᐱᔅᑳᓕᐤ ᑮ ᐯᔑᐌᐗᒃ ᐊᓐᑕ ᐋᓐᑎᐯᑦᕆᔅ᙮
ᒥᓯᐌ ᑫᒀᓇ ᔑᐱᓚᐌᓯᔅᑕᒧᒪᑲᓐ, ᒥᓯᐌ ᑫᒀᓇ ᑖᐺᑕᒧᒪᑲᓐ, ᒥᓯᐌ ᑫᒀᓇ ᐊᔅᐯᓕᒧᑕᒧᒪᑲᓐ, ᒥᓯᐌ ᑫᒀᓇ ᔕᔑᐯᓕᑕᒧᒪᑲᓐ᙮
ᐊᐌᓇ ᐎᔅᑳᑦ ᓀᑕᐎ ᓇᑐᐸᓕᑦ ᐎᓚ ᑫᒋᐙᒃ ᐁ ᑎᐸᐊᒃ? ᐊᐌᓇ ᐌᔑᑕᑦ ᔓᒥᓋᑎᒃ ᓂᑕᐎᑭᒋᑲᓂᓕᐤ, ᓀᔥᑕ ᐁᑳ ᒫᒋᒡ ᐁ ᐃᔑ ᒥᓂᔑᐗᓂᓕᐤ? ᓀᔥᑕᐱᑯ ᐊᐌᓇ ᐁᔕᒫᑦ ᐊᐗᒀᓇ ᓀᔥᑕ ᐁᑳ ᒫᒋᐙᑦ ᐅ ᒍᒍᔑᒫᐳᓕᐤ ᐋᐗᑳᓇ?
ᓀᔥᑕ ᒫᑲ ᑮᔥᐱᓐ ᑲᒀᑕᑭᓯᔮᒃ, ᐃᑭᓐ ᑭᒋ ᐅᒋ ᑲᑮᒋᐃᑲᐎᔦᒃ ᓀᔥᑕ ᐱᒫᒋᐃᑲᐎᔦᒃ, ᑳ ᐅᒋ ᑲᔥᑭᑖᔦᒃ ᑭᒋ ᔑᐯᓕᑐᒣᒃ ᐊᓂᐃ ᐎᓴᑫᓕᑕᒧᐎᓇ ᑖᐱᔅᑯᒡ ᐊᓂᐃ ᐁ ᐃᔑ ᐎᓴᑫᓕᑕᒫᒃ ᓂᓇᓈᓐ; ᑮᔥᐱᓐ ᒫᑲ ᑳᑮᒋᐃᑳᐎᔮᒃ, ᐃᑭᓐ ᑭᒋ ᐅᒋ ᑲᑭᒋᐃᑲᐎᔦᒃ ᓀᔥᑕ ᐱᒫᒋᐃᑲᐎᔦᒃ ᑭᓚᐗᐤ᙮
ᐅᒪ ᐃᑕᔓᐌᐎᓐ ᑭ ᐸᑭᑎᓇᒫᑎᓐ, ᓂᑯᓯᔅ ᑎᒧᑎ, ᐁ ᐃᑗᒪᑲᑭ ᐊᓂᐃ ᑭᔅᑭᐙᐃᑫᐎᓇ ᑳ ᑮ ᓂᑳᓄᑖᑯᔭᓐ, ᐁᐗᒀᓂ ᑭᒋ ᐅᒋ ᓄᑎᓂᑫᔭᓐ ᒥᓗ ᓄᑎᓂᑫᐎᓐ;
ᐹᓪ, ᐅᑦ ᐊᐸᔅᑕᓕᒪ ᒋᓴᔅ ᙭, ᑭᒋᒪᓂᑐ ᐅᑦ ᐃᑌᓕᑕᒧᐎᓐ ᐅᒋ ᑳ ᐃᑕᔅᑌᒃ ᐊᓂᒪ ᐱᒫᑎᓯᐎᓂ ᐊᔓᑕᒫᑫᐎᓐ ᑳ ᐃᑕᑾᒃ ᙭ ᒋᓴᓯᒃ,
ᐁᐗᑯ ᐅᒋ ᐁᑳᐎᓚ ᓇᓀᐯᐎᓰᔅᑕᒻ ᐅ ᑎᐹᒋᒧᐎᓐ ᑭ ᑎᐯᓕᒋᑫᒥᓇᐤ, ᐁᑳ ᓀᔥᑕ ᓂᓚ ᐅᒋ ᐅ ᑭᐸᐙᑲᓇ: ᒫᑲ ᐎᒋᐅᑎᓇ ᑲᒀᑕᑭᓯᐎᓇ ᒥᓗᐋᒋᒧᐎᓂᒃ ᑳ ᐅᒋᐸᓕᑭ, ᑳ ᐃᑕᔅᑌᓕᒃ ᑭᒋᒪᓂᑐ ᐅ ᑲᔥᑭᐅᐎᓐ;
ᐁᐗᑯ ᒫᑲ ᐅᒋ ᓂ ᓇᔭᑌᓐ ᒥᓯᐌ ᑫᒀᓇ ᐙᐌᓛᐸᒫᑲᓇᒃ ᐅᒋ, ᐎᓚᐗᐤ ᐊᓯᒋ ᑭᒋ ᐋᔮᒋᒃ ᐊᓂᐁᓕᐤ ᐱᒫᒋᐃᐌᐎᓂᓕᐤ ᑳ ᐃᑕᑾᓂᓕᒃ ᙭ ᒋᓴᓯᒃ, ᐊᓯᒋ ᓀᔥᑕ ᑳᑭᑫ ᑭᔅᑌᓕᑖᑯᓯᐎᓂᓕᐤ᙮
ᐃᑕ ᐁ ᐃᔑ ᐊᓕᒥᐃᑲᐎᔮᓐ ᑖᐱᔅᑯᒡ ᐊᐌᓇ ᑳ ᒪᒋᑐᑕᒃ, ᐁ ᒫᒫᒋᒀᐱᓱᔮᓐ: ᒫᑲ ᑭᒋᒪᓂᑐ ᐅᑦ ᐋᔭᒥᐎᓐ ᓇᒪᐎᓚ ᒫᒫᒋᑯᐱᑌᓕᐤ᙮
ᓂ ᑲᒀᑕᑭᐃᑯᓯᐎᓇ, ᓂᑦ ᐊᓕᒥᓯᐎᓇ ᑳ ᑮ ᐅᑎᑎᑯᔮᓐ ᐊᓐᑕ ᐋᓐᑎᐊᑭᒃ, ᓀᔥᑕ ᐋᐃᑯᓂᔭᒥᒃ, ᓀᔥᑕ ᓕᔅᑦᕋᐃᒃ: ᑫᑯ ᑲᒀᑕᑭᐃᑯᓯᐎᓇ ᐁ ᑮ ᓇᔭᑕᒫᓐ: ᒫᑲ ᒥᓯᐌ ᐁᐗᒀᓂᐃ ᐅᒋ ᐅᑎᐯᓕᒋᑫᐤ ᓂ ᑮ ᐎᑾᒋᐃᒃ᙮
ᒫᑲ ᑭᓚ ᒥᓯᐌ ᑫᒀᓇ ᐊᔕᐙᐸᑕ, ᔑᐯᓕᑕ ᑲᒀᑕᑭᓯᐎᓇ, ᑐᑕᒻ ᐅᑦ ᐊᑑᔅᑫᐎᓐ ᒥᓗᐋᒋᒧᐎᓕᓕᐤ, ᒥᑐᓂ ᑭᔅᑫᓕᑖᑯᑖ ᑭᑦ ᐊᑑᔅᑫᐎᓐ᙮
ᓀᔥᑕ ᑳ ᓵᑭᐊᑭᑦ ᐋᑉᐱᔭ, ᓀᔥᑕ ᐋᕐᑭᐸᔅ, ᓂᒋ ᓄᑎᓂᑫᐎᓕᓕᒥᓈᓐ, ᓀᔥᑕ ᐊᓂᑭ ᒫᒪᐎᐋᔭᒥᐋᐗᒃ ᑳ ᐃᑖᒋᒃ ᑭᑭᒃ:
ᒫᑲ ᑭᔅᑭᓯᒃ ᐊᓂᐃ ᑳᔮᔥ ᑭᔑᑳᐗ, ᐁᑯᔅᐱ, ᐹᑎᒫ ᐁ ᑮ ᐙᔅᑌᓇᒫᑲᐎᔦᒃ, ᑭ ᑮ ᒧᔑᑖᓇᐗᐤ ᑭᒋ ᐊᓕᒥᓯᐎᓂ ᓄᑎᓂᑫᐎᓐ;
ᑖᐺᔦᓕᑕᒧᐎᓐ ᐅᒋ ᑮ ᓇᑲᑕᒻ ᐃᒋᑉᑦ, ᐁᑳ ᐁ ᑯᔅᑕᒸᑦ ᑭᒋᐅᑭᒪᐗ ᐅᑦ ᐋᑯᓚᐌᓯᐎᓂᓕᐤ: ᐌᓴ ᑮ ᔑᐯᓕᑕᒻ, ᐁ ᐙᐸᒫᑦ ᐊᓂᐃ ᐁᑳ ᑳ ᓄᑯᓯᓕᒋ᙮
ᐁᑯᔑ ᒫᑲ, ᐃᔅᐱ ᑳ ᑮ ᔑᐱᓚᐌᓯᐎ ᔑᐯᓕᑕᒃ, ᑮ ᒥᓚᐤ ᐊᔓᑕᒫᑫᐎᓂᓕᐤ᙮
ᔕᐌᓕᑖᑯᓯᐤ ᐊᓇ ᐃᓕᓕᐤ ᑳ ᑎᐸᒪᒋᑖᑦ ᑲᑴᒋᐃᑯᓯᐎᓂᓕᐤ: ᐌᓴ ᐃᔅᐱ ᑮ ᑲᑴᒋᐋᑲᓂᐎᑌ, ᑲᑕ ᒥᓚᐤ ᐱᒫᑎᓯᐎᓂ ᑭᒋᐅᑭᒪᐗᔅᑐᑎᓂᓕᐤ, ᐅᑎᐯᓕᒋᑫᐤ ᑳ ᑮ ᐊᔓᑕᒪᐙᑦ ᐊᓂᐃ ᑳ ᓵᑭᐃᑯᑦ᙮
