Rom 6:3 - Matu Chin New Testament 2006

³ Khrih Jesuh oen pumkhatla awmna dawngah mami baptisma n'dang vengah te a duekna ah baptisma n'dang haih poen tite ataktangla na ming u.

Matu Bible

³ Khrih Jesuh ah aka nuem rhoek boeih tah a dueknah dongah n'nuem uh te na mangvawt uh a?

Rom 6:3 Iomraidhean Croise

Mathai 28:19

Tedawngah dilai dawngkah thlaangphun boeih tengah cet u langtah ahimi te ka hubang la van coeng sak uh; Pa, Capa, Ciim Muithla miing ah baptisma pe uh.

Caeltueih 19:5

Ahih lawng he awl he a yaak vengah Bawipa Jesuh miing ah baptisma te a dang u.

Caeltueih 2:38

Piter lawng ahimi nala te, “Nangmi boeih lawngah na thawlhna yut u langtah na thawlhna boeih khawdawp ngaaina hamla Jesuh Khrih miing oen ah baptisma hu u lah; te atah Pathen kah kutdo Ciim Muithla te na dang u ai.

Caeltueih 8:16

Metihtiah Ciim Muithla te ahimi timkah a-u pakhat tengah khaw law thlan hun; ahimi lawngah Bawipa Jesuh miing bueng oen ah baptisma te a huh u hun dawngah ni.

Rom 6:16

Thlaang pakhat khat kah awl te ngaai pe ham na pum na peek vengah te a awl na ngaai pe bawi kah sal la na awm tite ataktangla na ming u, tetih angla thawlhna awl te na ngaai u atah thawlhna sal la na awm u tih thawlhna phu tah duekna ni; tetih van toengtoeng la Pathen awl na ngaai u atah, te awlngaaina phu tah nangmi te thlaangdoeng la n'khueh ai.

Rom 6:8

Khrih oen mami n'duek haih veng kalawng mami khaw amah oen n'hing haih van ai tila n'tang na.

Rom 7:1

Maya manau thli, nangmi lawng yuvaa la awmna phung he acek aneh la na ming u poen dawngah nangmi tengah ka thui ham koei he khaw na ming u badai. Thlaanghing he a hing khui bueng ni yuvaa la awmna phung lawng a uk.

1Korin 10:2

Ahimi lawngah Mosi kah hubang la muui oen ah tuitunlii khuiah baptisma a dang u.

1Korin 12:13

Tetih van angla mami boeih he tah Judah oen Gental thlaang khaw, sal oen thlaangcuem khaw, Muithla pakhat lawng pum pakhat dawngah baptisma m'peek tih awkk koeila Muithla pakhat te ni mami m'peek u.

1Korin 15:29

Tetih atah thlaangduek yuengla baptisma aka dang thlaang thli te ta metila a awm ai? Ahimi lawng n'tu a ngaiuep u tih a sai u? Thlaangduek thli he tho nawh tite khatsut hue kah thui angla asoeng tangtang atah n'tu hamla ahimi lawngah thlaangduek hamla baptisma te a sai u kai?

1Korin 3:16

Nangmi tah Pathen tempal bok-im la na awm u tih Pathen Muithla nangmi kaw khuiah a awm te ataktang la na ming u!

1Korin 5:6

Nangmi lawngah na oekthloen u ham awm roe nawh! Nangmi lawngah, “Tawlru yoehca lawng ta-ekk hawl at te a rawi sak.” a ti awl te na ming u.

1Korin 6:19

Nangmi kah pum te tah namami kaw khuiah aka awm Pathen kah peek Ciim Muithla a awmna tempal bok-im ni tite na ming u nawh aw? Nangmi tah namami kah koe la na awm u nawh tih Pathen kah koe la ni na awm u;

1Korin 6:9

Pathen Ram te thlaangthe lawngtah paang manawh tite ataktangla na ming u ta. Namami oen namami te thailat u khoeng boel: Thlaanghalh paadak thli, kutsaimuei aka bok thlaang thli, samphaih thlaang thli, hutaa puei oen tawngpa puei oen ah aka thawlh thlaang thli,

1Korin 9:13

Tempal bok-im khuiah bii aka bi lawng Tempal bok-im kah caak awkk te a dang u van tih bokna-thaang dawngah luciik buulna aka nawn thlaang lawngkhaw luciik sa te thoem a bawn van tite na ming u.

1Korin 9:24

Loehlang heengna poei ah thlaang yahawh lawngah loeh u de pakhat lawng ni kutdo a dang tite na ming u. Tedawngah kutdo huh hamla heeng u lah.

2Korin 13:5

Oengna dawngah na hing oen na hing nawh te mingna hamla namami oen namami te noem acai u langtah noekdak u lah. Khrih Jesuh te nangmi thinkaw ah a awm tangtang te na ming u ai! A awm nawh tangtang atah noekdakna dawngah na tlim dingri u poen ai.

Galati 3:27

Nangmi tah Khrih oen pumkhatla awmna dawngah baptisma na dang u poen tih tahe atah Khrih amah hingna oen na khuk na dah u poen.

James 4:4

Nangmi uep-awm nawh thlaang hue! Dilai oen ah beroep u he Pathen kah raal la awm tite na ming u nawh aw? A-u khaw dilai kah paya beroep la awm ham aka ngaih tah amah oen amah te Pathen kah raal la sai u.

1Peter 3:21

te tah tahe ah nangmi kah thlawnna baptisma miknoekna te a thuinuetna ni. He baptisma he tah pum dawngkah ciimcaih nawh te silhna nawh tih athe atheen pekbona kawpoek theen oen Pathen tengah awlkam saina ni. Jesuh Khrih thawhkoepna rang oen ah nangmi tah te baptisma oen n'thlawn u.