Johan 14:6 - Matu Chin New Testament 2006

⁶ Jesuh lawng awl a thung pe tih, “Kai tah lawngpui oen awltak oen ah hingna la ka awm. Kai rang nawh atah a-u khaw Pa tengla cet thai manawh.

Matu Bible

⁶ Jesuh loh anih te, “Kai tah longpuei, oltak neh hingnah la ka om. Kai lamkah pawt atah pa taengla a pha moenih.

Johan 14:6 Iomraidhean Croise

Mathai 11:27

“Apa lawng thaihu soeprep boeih m'peek poen. Apa nawh tah a-u lawngkhaw Capa te ming nawh. Capa oen amah te m'ming seh tila Capa lawng a tueng sak thlaang thli teng bueng nawh atah a-u lawngkhaw a Pa te ming u manawh.

Johan 1:14

Te awl te tah thlaanghing la coengg tih lungvatna oen awltak oen ah betoet, mami tim ah he awm. Mami lawng amah kah ruep-awmna te n'huh u, te ruep-awmna te tah ana Pa kah khuehduen pakhat bueng Capa la a awm te ni.

Johan 1:17

Pathen lawng Phungawl te Mosi rang oen m'peek, tede awltak oen lungvatna tah Jesuh rang oen ni a law.

Johan 1:4

Te awl te tah hingna kungpui la awm tih te kah hingna lawngah thlaanghing tengla aangna te avan khuen.

Johan 10:28

Te thli te dungyan hingna ka peek tih meveng khaw duek u tlaih manawh. A-u lawngkhaw ahimi te van rot u manawh.

Johan 10:7

Tedawngah Jesuh lawng koep a thui pe tih, “Awltak kavan thui: Kai tah tuu thawhka ni.

Johan 10:9

Kai tah thawhka ni. A-u khaw kai dawng kalawng ah a kuun atah thlawnna a dang ai, ahih tah kuun thuk, cet hang vetih ramtliim sainona te a dang ai.

Johan 14:19

Kawlkalh a awm coeng atah dilai lawng kai he n'hu tlaih manawh, tede nangmi lawngtah nan huh ai; kai tah ka hing dawngah nangmi khaw na hing u van ai.

Johan 15:1

Jesuh lawng, “Kai tah misurkung tangtang la ka awm tih a Pa tah Dum khuehkung ni.

Johan 18:37

Tedawngah Pilat lawng koep a doet tih, “Tetih atah nang he sengpahrang aw?” a tina. Jesuh lawng, “Na thui angla kai tah sengpahrang ni. Kai lawng awltak thui ham ka ngaih pakhat dawng maiah ni he dilai ah ka law tih ka thang. A-u khaw awltak dawngah aka awm lawngtah ka awl he a ngaai u.

Johan 5:21

Ana Pa lawng thlaangduek a thawh sak tih hingna a peek angla Capa lawngkhaw amah lawng a ngaih thlaang thli te hingna a peek.

Johan 6:33

Metihtiah Pathen kah peek takawi tah vaan kalawng law thuk tih dilai he hingna a peek.” a tina.

Johan 6:51

Kai tah vaan kalawng aka rum thuk hingna takawi ni. A-u khaw he takawi he aka ca tah yoeyahla hing poen ai. Kai lawng ka peek ham koei takawi tah ka thi ka sa he ni, dilai lawng a hingna ham ka peek ni.” a tina.

Johan 6:57

Aka hing a Pa lawngah kai he n'tuih tih ahih rang oen ah kai khaw ka hing. Tetih van angla a-u khaw kai he aka ca tah kai rang oen ah hing ai.

Johan 6:68

Simon Piter lawngah, “Bawipa, a-u tengla ka ceh u ai? Nang lawng ni dungyan hingna na khueh.

Johan 8:32

awltak te na ming u vetih te kah awltak lawng nangmi te n'loeih sak ai.” a tina.

Johan 8:51

Awltak kavan thui u; a-u khaw kai lawng kan cang puei he aka vai tah mevengah khaw duek manawh.” a tina.

Caeltueih 3:15

Nangmi lawngah hingna benla aka ceh puei thlaang te na ngawn u, tede Pathen lawng ahih te duekna kalawng a thawh sak poen, tite aka mingkung tah kaimi ni.

Caeltueih 4:12

Ahih rang bueng oen ni thlawnna he huh thai la a awm; dilai pum ah he Pathen kah peek ahih nawh atah mami aka thlawn thai a-u khat khaw awm nawh.

Caeltueih 9:2

Bawipa kah lawngpui aka vai thlaang thli te a huh atah hutaa khaw, tawngpa khaw ahimi boeih te tuuk thaina ham, a tuuk thlaang thli te Jerusalem la avan khuen koep thaina hamla Damaskas khawpui kah sinakok bok-im kah ahaamca thli tengah a yaak sakna ca te a bih.

Rom 15:16

Khrih Jesuh kah tuihyoeihthlaang la awmna te m'peek dawngah ni. Gental thlaangphun lawngah Pathen kah do koei luciik la a awmna ham oen ah Ciim Muithla rang oen Pathen tengah nawn koei thaihu la awmna ham Pathen tengkah, Awlthang Theen ka phawng vengah he khawsoeih angla bii ka bi.

Rom 5:2

Ahih lawngtah oengna rang oen mami he Pathen kah lungvatna khuila n' kuun puei u poen, te lungvatna khuiah tahe n'awm u. Tedawngah Pathen bawilenna n'bur haih u ai tila ngaiuepna oen n'tha thlue u.

Rom 5:21

Tedawngah thawlhna lawngtah duekna te a hawna tih a uk, tetih van angla doengna lawngtah Pathen kah lungvatna oen a uk tih mami kah Jesuh Khrih rang oen mami te dungyan hingna benla n'ceh puei u.

1Korin 15:45

Metihtiah Caciim lawngah, “Lamhacuek tawngpa Adam te thlaanghing la a sai.” ti, tede hukhueng Adam te tah hingna pekung Muithla ni.

Ephesa 2:18

Khrih rang oen ah Judah thlaang khaw, Gental thlaang khaw mami boeih lawngah Muithla pakhat dawng kalawng Pathen haiah m'pha thai u.

Kolosa 2:17

Te ang thaihu thli boeih tah hai ben ah aka thoeng koei mueithlip mai ni; ataktang tah Khrih ni.

Kolosa 2:9

Metihtiah Khrih thlaanghing pumsa dawngah Pathen kah pumsa asoepbirla awm tih,

Kolosa 3:4

Nangmi kah hingna tangtang tah Khrih ni, amah a law veng atah nangmi khaw amah oen haih na phumpho u vetih amah kah ruep-awmna te na dang u van ai.

Hebrew 7:25

Tedawngah amah teng kalawng Pathen teng aka law hue te tahe ah khaw, yoeyahla a thlawn thai, metihtiah ahih tah dungyan hing tih ahimi ham Pathen tengah reenna aka bih pe hamla awm.

Hebrew 9:8

He tila phung-alam oen saina dawng kalawng Ciim Muithla lawng aciimphanla n'cang puei tah adauben Riim-im te a awm hun roekk atah Huen Ciim Koek khuila kuunna lawngpui te awng u thlan hun ti he ni.

1Peter 1:21

Amah rang oen Pathen te nangmi lawng na oeng u tih, Pathen lawng amah te duekna kalawng a thawh sak tih ruep-awmna te a peek; tedawngah nangmi kah oengna oen ngaiuepna tah Pathen dawngah cak khak.

1Peter 2:4

Bawipa tengah law u lah, ahih tah aka hing lunghiim thlaanghing lawng aphu aka awm nawh angla a hoett de Pathen lawng aphu aka tlo lunghiim la a tuek poen.

1Peter 3:18

Metihtiah Khrih tah thlaangthawlh boeih yuengla vai at ah akhoek koeng la duek poen, nangmi te Pathen teng ceh puei ham thlaangthawlh yueng la thlaangdoeng te duek. Ahih te pumsa ben atah duek de, muithla ben atah hing koep tih,

1Johan 1:8

Mami lawng thawlhna ka khueh nawh n'ti u atah m'mah oen mah he, thailatna u tih mami khuiah awltak awm nawh.

1Johan 2:23

A-u khaw Capa aka hoett tah Pa te khaw a hoett: A-u khaw Capa te aka do tah Pa te khaw a do.

1Johan 5:20

Pathen Capa tah va law tih Pathen tangtang te mami lawng mingna hamla mami tengah yaakmingna te m'peek poen tite m'ming u. A Capa Jesuh Khrih oen pumkhatla awmna dawngah Pathen taktak oen mami pumkhatla m'awm u. Ahih tah aka soeng Pathen taktak la awm tih dungyan hingna la awm.

1Johan 5:6

Jesuh Khrih tah amah kah Baptisma huhna tui oen a duekna thisen oen ah aka law ni. Ahih tah tui bueng oen law nawh tih pahih bok la tui oen thisen oen ah va law. He tah soeng tangtang tila Muithla amah roe lawng sausi a deeng, metihtiah Muithla tah awltak la a awm dawngah ni.

2Johan 1:9

A-u khaw Khrih kah cangpueina dawngah aka awm nawh tih te voel ah aka cet lawngtah Pathen te khueh nawh. A-u khaw cangpueina dawngah aka awm khak tah pahih bokla Pa oen Capa te a khueh.

Olphong 1:5

duekna kalawng lamhacuekla aka tho, thincak sausi la aka awm, dilai sengpahrang boeih ukkung la aka awm Jesuh Khrih teng kalawng lungvatna oen ngaimawngna tah nangmi tengah awm hawn seh. Mami n'lungna tih a duekna oen mami he thawlhna kalawng aka loeih sak tih,

Olphong 19:11

Tecoengah vaan aka awng u te ka huh tih, te ah te marang bawk pakhat awm. Te marang bawk aka cit te tah Uep-awm oen Awltak a miingna; doengna oen awl a cek tih ceemraal khaw a tloek.

Olphong 20:15

Hingna cabu dawngah a miing a thut nawh thlaang boeih te tah haituilii khuila a voeih u.

Olphong 22:1

Tecoengah vanthlaang lawng hingna tui a laawngna tuiva te khaw n'huh sak. Te tuiva tah thlalang angla ciilrikla awm tih Pathen oen Tuuca kah bawingawlhcoen dawng kalawng va laawng tih khawpui khui alaklung ah te laawng.

Olphong 22:17

Muithla oen tuemnu hulaa lawng-ah, “Law lah!” tila a thui. A-u khaw he awl aka ya boeih lawngtah, “Law lah!” tila thui van seh. A-u khaw tui aka hall tah law uh; A-u khaw aka ngaih boeih tah hingna tui he ayoela lo uh.

Olphong 3:14

“Laudisia khaaw Khrihcabu kah vanthlaang tengah he tila thut lah: “Pathen lawng a suen thaihu boeih kah akungcuek la aka awm tih uep-awm oen ah ataktang sausi la aka awm Amen teng kah awl uenna tah he tila awm.

Olphong 3:7

“Filadelfia khaaw Khrihcabu kah vanthlaang tengah he tila thut lah: “He awl he tah aka ciim tih ataktang la aka awm tengkah awl ni. Ahih tah Devid kah caabi tukung la awm tih, ahih lawng thawhka a awng veng atah a-u lawngkhaw khai khoep thai nawh vetih ahih lawng thawhka a khaih khoep atah, a-u lawngkhaw awng thai manawh.