EEWEDEO 3:6 - Wanaadi A'deddu

⁶ Quidiito mmaja chäänönge na dea Wanaadi sotoi edai’chädööcomo jäcä. Yaawääne’, Wanaadi nnedööjeene töwö na, dhanoonöje mma’da. Ñanno cönwanno Wanaadi sotoi tädai’chaamo, yaatameedö jona tödööene ejääduqueejö’da cöweiya’comjäcä cöneecamjödööcomo jäcä, ta’cwaiñe cöweiya’comjäcä mmaja yää cönwomoocödööcomo jäcäinchädä.

EEWEDEO 3:6 Iomraidhean Croise

MATEO 10:22

Tameedä soto aquiiñeme’cato’de sootoije aweichöcoomo jo’tädööje. Ñäädä yaatameedö jonaane shinchänei nääwanaaca’de.

MATEO 16:18

Äwwä yääje wä’döa, Peedhodo amäädä, “täju”, quee töwä’döse yeichö. Amäädä anöngato dea sootoije wödööaato’de, täju de’wä maa amäädö töweiye naichöje. Wäämanä wwä oto’jodheinchajo’da naato’de tönwanno.

MATEO 24:13

Yaawä ñäädä yaatameedö jonaane shinchänei nääwanaaca’de.

DOMAANO 11:22

Eneecä’ma aashicha Wanaadi weichö, tumjunne’da yeichö mmaja. Ñanno cönsadiijamöichodö jäcä tumjunne’da töwö cönä’jaacä; äjääcä mmaane aashicha töwö na. Aashicha Wanaadi weichö woije dea aweiya’jäcä chäänönge eijai ma. Yääje’da aweiya’jäcä mmaane amäädä mmaja mataacä’ja’dede.

DOMAANO 12:12

Ta’cwaiñe eichäcä onwomoocödööcomo jäcä. Aashicha shinchätääcä äwäntunamjödööcomo. Yeichöje Wanaadi wwä adha’deutäcä.

DOMAANO 15:13

Ñäädä Wanaadi, cönwomoocödööcomo u’neije na; töwö adha’cwaniiyöcoomo nu’a, täncanoode’da aweicho’como mmaja, täcamjödö jäcäinchädä. Yaawä Epíiditu Santo woije wo’womo’nä ’je eijai maato.

DOMAANO 5:2

Quidiito woije Wanaadi jadoonoje cä’dötääne ecamjödö que; yääje yeijäcä Wanaadi nutuudu aashichaato cöwwäiñe na. Yää Wanaadi nutuudu aashichaato cöwwäiñe yeijäcä ejääduqueejö’da caato; ta’cwäiñe mmaja caato dea cowaanäcäiñe yeijäcä aashicha Wanaadi weichö cöwwoncomooje yeichojo.

1 CODINTIYO 3:16

¿Odhoowanääcäiñe’da ca’ nai Wanaadi weichojooje aweichöcoomo, Epíiditu Santo ataacaiñe yeichö mmaja?

1 CODINTIYO 6:19

¿Odhoowanääcäiñe’da ca’ nai Epíiditu Santo weichojooje adheejöcoomo weichö, ñäädä Wanaadi nutuudu ataacaiñe naadö? Ännödööcomoojönö mädä adheejöcoomo;

2 CODINTIYO 6:16

¿Aaquene mmaja Wanaadi weichojo oojodöödö deeade’ chu’taajä acä? Änwanno Wanaadi nudooto weichojooje maato. Töwö Wanaadi chea cönä’döaacä: Öwö yo’tacaiñe wa’de; chääjadäiñe wäämannä’a’de. Yaanadiiyöcoomoje wa’de; tönwanno naato’de sootoije; quee Wanaadi cönä’döaacä.

CAADATA 6:10

Yääje yeijäcä, tödööjai caatoodawäädä, aashichaato cöödötäiye tameedä soto jäcäiñe; quedeiyentecoomo jäcä jooje’cä jeene aashichaato tödööjai caato.

CAADATA 6:9

Yääje yeijäcä chincha’da queicho’ñojo aashichaato tödöödö jäcä. Chu’nädö aca yä’döa’jäcä aashichaato nä’tua’de cöwwäiñe, ejääduqueejö’da cöweiya’comjäcä.

EUJEESIYO 3:12

Quidiito jadä cöweichomjäcä, töneecanö’e cöweichomjäcä mmaja, tösaade’da Wanaadi wwadäädä täjai caato.

CODOOSENSE 1:23

Töwö mädääje ayöödöaato’de ecamjödööje dea aweiya’comjäcä, jäduuje aweiya’comjäcä mmaja, wo’womo’nä jonno ääsecaajo’da aweiya’comjäcä mmaja, yää aashichaato wätunnä necammajäätödö metaatäneedö jonno. Yää aashichaato wätunnä tameedä soto wwäiñe nätääcammajä’a, öwö Paudo ecammajä’neije waadö.

1 TEESADOONISENSE 5:16

Ta’cwaiñe eichäcä yeichöje.

2 TEESADOONISENSE 2:16

Cumöötoncomo Wanaadi cujummatääne aashicha töweichö woije. Töwö cuntui cöwwäiñe cöwä’wa’doto’como yeichöödoto, ta’cwaiñe cöwo’womo’to’como mmaja. Töwö Wanaadi chea, Cädhaajotoncomo Jesuuquidiito mmaja, äjäädu’taato adheewanööcomo jäcä. Tönwanno ä’wa’taato tameedä aashicha awa’deuto’como jäcä, aashichaato tödöödö jäcä mmaja.

1 TIIMOTEO 3:15

numa tä’da weiya’jäcä odhoowanääcä yeichö wetä Wanaadi sotoije weiñä, yää Wanaadi nudooto ecaanö’neije weiñä. Yää Wanaadi sotoije weiñä chäänöngato a’deu a’täije na, chä’sejöije mmaja.

EEWEDEO 1:2

Eduuwa, anooto ataamejai yä’döa’jäcä, töwö cöna’deuwöi Tönnedö ai chaja. Tönnedö ai Wanaadi cönnöi tameedä yeichö wa’cä; chäwwä cöneecammai chea tameedä iiñödööje yeichojo.

EEWEDEO 10:19

Yääje yeijäcä jimmä, Jesuuquidiito aquiiyö jäcäinchädä tösaade’da omomjai caato eduuwa yää Aashichaato Jaiñoone taca.

EEWEDEO 10:21

Jesuuquidiito ñäädä cöjääcäinchädäiñe Wanaadi wwä töwa’deuwemö o’jodhaato, Wanaadi sotoi edhaajotoncomo.

EEWEDEO 10:23

Yäätäädä cötö’tajäätödööcomo cöödöto’ñojo cöwo’womoocödööcomo jäcä, cöweejäduuqueancädäiñe’da, cowaanäcäiñe yeijäcä chäänönge Wanaadi wwä tödöötojo yää cöwwäiñe töneecamma’jödö.

EEWEDEO 10:35

Yääje yeijäcä aneecamjödööcomo mäncuna’matäi; yää aneecamjödööcomo eje’jödö adai’jä na’de.

EEWEDEO 11:1

¿Aaquene töwä’dö’se yeichö mädä ecamjödö ’je weiñä quee ’ja? Ecamjödö yää töwoomo’quemö töwwä yä’tutoojo towaanäcä weiñä, äänejöönö ene’ju’tojo mmaja.

EEWEDEO 3:14

Cönwanno Quidiito jadoncomooje caato, yaatameedö jona tödööene ejääduqueejö’da cöweiya’comjäcä cöneecamjödööcomo jäcä, yää yaajäntä’jödö jonnoto’jödöödä queecanö’täneedö.

EEWEDEO 4:11

Yääje yeijäcä cä’jädu’tätäiye cönwanno, yää wäädeetatoojo ejoodödö wetä, anejja mma cantawäiñe ecoone’ma’no, ñanno aneecanö’jöncomo’jödö cöneecone’maichodööje mmaja.

EEWEDEO 4:14

Ñäädä Jesuuquidiito, Wanaadi nnedö o’jodhaato, Tumö wwä cöjääcäinchädäiñe töwa’deuwemööje na. Töwö Wanaadi döiña cöntäma. Yääje yeijäcä chäänöngeedä queichäiye cöneecamjödööcomo jäcä.

EEWEDEO 4:16

Yääje yeijäcä tösaade cöweiyancädäiñe’da täjai caato cujummaneichomo Wanaadi mudei wwadäädä, wentumje cäne’matäiye töwö yaawä, aashicha töweichö woije cö’wa’tätäiyede jäduuje’da cöweichawäiñe.

EEWEDEO 6:11

Mädääje dea tameedä aweichonse ñaa na, yaatameedö jonaane, chäänönge äwwäiñe yä’dödö wa’cä yää onwomoocödööcomooje naadö.

EEWEDEO 6:18

Mädääje na; aacä enwacaamajaichojöönö töweiye na, yää Wanaadi necamma’jödö, töjoi yääcamma’jödö mmaja. Yääje töwääcamma’jödö weijäcä Wanaadi ätäncu’täjai’cha na. Yääje yeijäcä cönwanno, Wanaadi wwä yoowontäja’como, yää jäcä ä’wadi’ñäjai caato, chäänönge ecaanö’jai caato dea cöwo’womoocödööcomo, yää cöwwäiñe u’ajä naadö.

EEWEDEO 7:19

Yää waanontänä, Moisé nimennä’jödö, chäänönge ännö’da cöneiyacä. Yää nwacaanoje na eduuwa aashichaato jaiñoone; yää jäcäinchädä Wanaadi wwadäädä cöötaato.

1 PEEDHODO 1:8

Ñäädä Jesuuquidiito mijummaato eneedö’jo’da; eduuwa aneene’da aweichaameiñe mmaja mecaanö’ato, ta’cwaiñe aweiyancädäiñe, yää ecammadö e’jodhaato a’cwani aashichaato que.

1 PEEDHODO 2:5

Änwanno mmaja täju yeichöödoto töweiye naichöje maato. Wanaadi woije oojodö’täcä Epíiditu Santo ewöötöje aweichöcoomo wetä, maa amääajä töweiye naichöje, Wanaadi wwä töwa’deuwaamo shooma’comooje aweichöcoomo wetä mmaja. Yaawä Jesuuquidiito ai Wanaadi wwono saaquidiijiisiyo aashichaato u’jai maato, Wanaadi wacö’je.

1 PEEDHODO 4:17

Eduuwa nä’döi wäntunaanö’nä waajontotoojo cu’nädö aca, Wanaadi sotoi jäcäiñe naajäntaadö naane’. ¿Aaquene mmaja aneemaichädööto deeade’ ñanno Wanaadi wätunnäi aashichaato ännöjöncomo, cöjääcäiñede naajäntaane’?

APOOCADIISI 2:18

Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Tiiyatiida ñancomo quedeiyente edai’chäneichomo wwadäädä: “Edääje nä’döa Wanaadi nnedö, ñäädä wa’to nöngato chäänudu, oodo encaimaajä nöngato i’judu:

APOOCADIISI 2:25

Yää äwwäiñe naadö mmaane täijeene ajäichäcä, adöiña öötädö wa’cä.

APOOCADIISI 2:26

Ñäädä e’jodheinchanei’jödö, yaatameedö jonaane ya’deddu tödöönei’jödö, wödööa’de sotoocomo cajiichaanaichomooje,

APOOCADIISI 3:11

Eduuwa mma wöta adöiña. Täijeene ajäichä yää äwwä naadö, adheeje’jödö que mma mätänwajiiñajo’no.