CODOOSENSE 3:16 - Wanaadi A'deddu

¹⁶ Ätö’tajäätödööcomo acaadä Quidiito a’deddu tödöötäcä; yäätä ejannä’catääcä. Ajimmotoncomo owaanomaatäcä, yäätuujatääcäde tameedä asejjedööcomo que. Adheewanööcomo jäcä aashicha Wanaadi jäcä ätö’tajä’ancädäiñe adheecanta’ñätääcä saadomo jäcä, anejja wecanta’ñotoojo jäcä mmaja, ätö’tajäätödööcomo ai mmaja.

CODOOSENSE 3:16 Iomraidhean Croise

MATEO 26:30

Yaawä tooniye töweecanta’ñä’jejeiñe, cöntonto yaawä Odiiwo ’jödö ña.

DUUCA 2:51

Chääjadäiñe Jesuuquidiito cönennacai yaawä Naasade ña. Yoijeiñe töweiye cönä’jaacä. Yeenö chö’taqueejö’da cönä’jaacä tameedä yää jäcä.

JUAN 15:7

“Jaadä dea aweiya’comjäcä, neecammajäätödö chö’taqueejö’da aweiya’comjäcä mmaja, yaawä tameedä ane’catäädöcoomo äwwäiñe nä’tua’de.

DOMAANO 10:17

Mädääje na; ecamjödö töweiye nai ecammajäätödö etaadö que; yää tätaajä’emö yää Quidiito wätunnäi.

DOMAANO 15:14

Jimmä, öwö yoowanääcä na aashichaato tönnöe aweichöcoomo, töseedujä’ne aweichöcoomo mmaja, änwannoje dea ä’wätuujajai aweichöcoomo mmaja.

1 CODINTIYO 14:15

¿Aaquene eijai wanä yääje yeiya’jäcä? Edääje eijai wa: Wanaadi wwä a’deujai wa do’tadö que, yaawääne’ tö’tajäätödö que mmajaane’. Ecanta’ñäjai wa dea do’tadö que, tö’tajäätödö que mmaja.

1 CODINTIYO 14:26

Mädääje na jimmä; awe’jummadaawäiñe awaadäiñe tödööjai maato. Anejja wecanta’ñänä dha’me eijai ña, anejja ’quene woowanoomanä dha’me, anejja mmaane töwwä Wanaadi neneejodö, anejja a’deucwe wa’deunä jeiñe mma, yää ecammajo’tojo jeiñe mma. Tameedä yää tödööjai maato quedeiyentecoomo wä’jädu’toto’comooje.

EUJEESIYO 1:17

Wanaadi nödöödö jäcä asejjetaato’como töne’ca’e wäänene Cädhaajotoncomo Jesuuquidiito wwä. Tameedä Wanaadi nödöödö tö’tamme’tojo töne’ca’e wäänene dea; yaawä aashicha’cä jeene Wanaadi odhoowanääcäiñe eijai ña.

EUJEESIYO 5:17

Tämje’daiñe eichäcä; Cajiichaana woijato odhoowanääcäiñe yeichojo encano’tätääcä.

EUJEESIYO 5:19

Änwannoje dea Cajiichaana jäcä töwa’deujä’e eichäcä, chäwwonooje töweecanta’ñä mmaja, saadomo jäcä, anejja wecanta’ñotoojo jäcä mmaja; aashicha Cajiichaana miya’deme’täiye, adheewanööcomo jadäädä.

EUJEESIYO 5:26

Töwö Quidiito cönä’tui quedeiyentecoomo shoomadööcomo wetä, tuna que choccadööcomo que, ta’deddu que choccadööcomo que mmaja.

CODOOSENSE 1:28

Näädä Quidiito töneecammajä’e ñaa weneene. Tameedä soto töwätuujaiñe ñaa weneene dea, tönoowanoomaiñe mmaja, chäänönge chäwwäiñe etaadö wetä, tameedä chäänönge yeichöcoomo wetä mmaja Quidiito jadä.

CODOOSENSE 1:9

Yääje yeijäcä yääje aweichöcoomo ñaa wwä eta’jödö jonnoto’jödöödä Wanaadi wwä äjääcäiñe töwa’deuwödö ane’nomja’da ñaa na. Töne’ca’e ñaa weneene Wanaadi woijato odhoowanääcäiñe yeichojo, Wanaadi nödöödö jäcä tösejjeque aweicho’como mmaja, towaanojo’ne aweicho’como mmaja.

CODOOSENSE 4:6

Aashicha adha’dedducoomo tödöötäcä, tösejjejä’nato töweiye naichöje; oowanoomatääcä tameedä adheecamma’jonnamo eccujäätödööcomo jäcä.

1 TEESADOONISENSE 1:8

Yääje yeijäcä ojonnoiñe Cajiichaana a’deddu cöneecatai Maasadooniya ña, Acaaya ña mma’da. Tameedä yeichö wa’cä tacaade maato, Wanaadi töneecanö’e aweichöcoomo. Yääje yeijäcä adheecadööcomo täcammajä’emje’da ñaa wwä na.

1 TEESADOONISENSE 4:18

Yääje yeijäcä ä’wa’däätäcä edä ecammajäätödö que.

2 TEESADOONISENSE 3:15

Tutu’de’tä deja mma mäntu’de’tätäi’che; töwäätuuja mmaane yäätuujatääcä’de, töweichacoono yäätuujadö töweiye naichöje deaane.

1 TIIMOTEO 6:17

Yäätuujacooto edä nono de’woncomo tönsomaaca’como, o’jodhe chö’tajäätö’da yeichöcoomo wetä, mösooma jäcä jooje chö’tajäätödööcomo queiñe mmaja, töwaatameemö mma yeijäcä yää mösooma. Wanaadi jäcääne chö’tajä’jai ñaato, ñäädä nudooto, aashicha cöweicho’comooje ewontancädä’da cöwwäiñe tameedä u’nei.

2 TIIMOTEO 3:15

Mude’cä’cäje aweichö jonnoto’jödöödä Wanaadi a’deddu odhoowanääcä na. Yää Wanaadi a’deddu asejje’täjai ña, adhe’se’täjai ña dea äwääwanaacatoojo wwadäädä, Jesuuquidiito ecamjödö jadä tödööa’jäcä.

TIITO 3:6

Cäwaanacaaneichomo Jesuuquidiito jäcäinchädä töwö Wanaadi Epíiditu Santo cuntui cöwwäiñe, ewontancädä’da.

SANTIYAACO 1:5

Anejja adhantawäiñe tösejjeque’da tötö’ta’jäcä, Wanaadi wwä nane’cato’ñojo, ä’tuiye chäwwä. Töwö Wanaadi tameedä soto wwäiñe tunu’e, ewontancädä’da, euwancädä’da mmaja.

SANTIYAACO 3:17

Dha’daane ñäädä caju ñano sejje ’jano. Masuuduije’da töwö, ätäuwö’da mmaja, aashicha soto tönnöe mmaja, soto jäcäiñe ta’cwaiñe mmaja, töweichacoono wa’deuwödö eta’se’da’da mmaja, wentumje äneetä mmaja, aashichaato tönnöe mmaja, ätäncu’tä’da mmaja. Yääjönö wa’cä äänejo’da mmaja na dea ñäädä caju ñano sejje ’jano.

SANTIYAACO 5:13

Anejja adhantawäiñe yäntunaanö’a’jäcä Wanaadi wwä na’deuwö’ñojo ñäädä. Anejja ta’cwaiñe yeiya’jäcä Wanaadi wwä necanta’ño’ñojo.

1 JUAN 2:14

Äwwadäädäiñe wimennäi änwanno yuumötoncomo, ñäädä yaajäntä’jödöödoto jadoonoje aweijäcäiñe. Äwwadäädäiñe wimennäi änwanno ääjömannamo, jäduuje aweijäcäiñe, Wanaadi a’deddu ataacaiñe yeijäcä mmaja, odo’sha e’jodheincha’jödö weijäcä mmaja äwwäiñe.

1 JUAN 2:24

Yääje yeijäcä ataacaiñeedä shoomatääcä yää yaajäntä’jödö jonnoto’jödöödä aneeta’jocoomo. Yää yaajäntä’jödö jonnoto’jödöödä ataacaiñe dea yeiya’jäcä änwanno mmaja Iiñedö jadoonoje maato’de, Cumöötoncomo jadoonoje mmaja.

1 JUAN 2:27

Änwanno Epíiditu Santo ’je maato, ñäädä Jesuuquidiito nutuudu äwwäiñe. Yääje yeijäcä odhoowanoomaneichomo tujunne’da na, töwö Epíiditu Santo dea tameedä odhoowanoomatäiñe yeijäcä. Chäänönge ñäädä Epíiditu Santo nowaanomaadö, wätäncu’tänääjönö. Yääje yeijäcä Quidiito jadä eichäcä, Epíiditu Santo nowaanomaadö nönge deaane.

2 JUAN 1:2

Mämjummaato chäänöngato cöwwäiñe naadö woije, yää yeichöödäje cöwwäiñe naadö.

APOOCADIISI 14:3

Wecanta’ñotoojo eduuwaato jäcä cöneecanta’ña’to mude je’taca, ñanno aacäicheea’como amoode’na’como je’tacaiñe mmaja, inchoncomo je’tacaiñe mmaja. Anejja oowanoomajai’cha cönä’jaacä yää wecanta’ñotoojo jäcä; ñanno 144 miide mmaane, ñanno nono de’woncomo antawonnoiñe yääwanaaca’como.

APOOCADIISI 15:3

Tönwanno cöneecanta’ña’to Oweeja nnedö’cä wecanta’ñotoojo jäcä, Moisé wecanta’ñotoojo jäcä mmaja, ñäädä Wanaadi anoonö. Edääje cöneecanta’ña’to: Adai’joto tönnöe määnene, tönoiñato mmaja, amäädä Cajiichaana Wanaadi jäduujato. Chäänönge töweiye määnene amäädä, aashicha mmaja, amäädä soto cajiichaanaichomo.

APOOCADIISI 19:10

Yaawä tä’mudhe wä’döne ñäädä amoode o’wawä, ya’demeecödööje. Töwö cönä’döaacä öwwä yaawä: —Mädääje’daane; Wanaadi anoonö mmaja öwö dea, anöngato mmaja, ajimmä nönga’como mmaja, ñanno chäänönge Jesuuquidiito a’deddu ecammajä’nnamo. Wanaadiiñe ya’deme’cä; quee cönä’döaacä. Ñanno Jesuuquidiito a’deddu ecammajä’nnamo ñanno Wanaadi nutuudu woije töneecammajä’e weneenetoodö.

APOOCADIISI 5:9

Edääje cöneecanta’ña’to; eduuwaato wecanta’ñotoojo jäcä: Ñäädä mma amäädä aashichaato, jajeeda eijaicho, ajoijo’jödö ajämjacaajaicho mmaja. Mädä tödööjai ma äwääma’jödö weijäcä, adhaaquiyö que Wanaadi sotoije ñaa ejeema’jödö weijäcä mmaja, tameedä soto weichöcoomo wa’cä, tameedä aata’deucwemjöncomo’jödö, tameedä jata weichö waadoinchomo’jödö, tameedä nono weichö de’woncomo’jödö.