Tito 3:1 - El Nuevo Testamento en matsés

¹ Esuquidistu tantiaquido ma bëshunenquio icnu, quequin naden chuibanta, Tito. Min nidaidën icquid min chuiquid tapan chiaid naquimbi adembidi min chuiquid utsibon chiaid chieshenquio icquin bëdambuen nabanta. Adembidi utsibo tantiaquin bëdambuen nashunta, quequin chuibanta.

Tito 3:1 Iomraidhean Croise

Mateo 22:21

Adoaquien: Ma nuqui iuaquid chuiquid tapambo Sesad neyoc, quepondash. Adsho tantiashumbien Esusën: Ai, aidëna neque. Aid: Bec cho, quesho meneta. Adembidi Nuquin Papa Nuquin Icbombo icquin: Naden nata, cacpadombuen nabanta, quequin Esusën chuipondash.

Codinto 1 15:58

Cun utsibo, umbi tantiaido icsho mibitedi chuinu. Umbi chuibambued utsi uainquiocquin tantiec chieshtoenquio yec chonoadbudec tabadquin Nuquin Icbo Esuquidistu ënenquio icquin nashunec tabadta. Nuquin Icbo Esuquidistubëd abentsëc yacbimbuec tabadquin nabanec chonoadaid ambembi nabanaidpenquio nec, quequin mimbi tantiec.

Epeso 2:10

Nuquin Papan uaido nuqui nec. Adoshon Aidënquiobi nuquitedi Esus tantiaquido icmiac. Aden chucauaido yec bëdambuec tabadquin utsibo tantiaquin nashunquid nuquitedi nec. Nuquin Papa ëndenquimbo: Ma utsibo nashunnu. Esuquidistu tantiaquido icmendambi, quepampic.

Pidipos 1:11

Adec mibitedi Esuquidistu tantiec bëdambuec tabadsho isash: Bëdambocquido nec, quetsiash utsibo. Adash: Aido bëdambuec tabadmequid yec Nuquin Papa bëdamboshëcquid nec, quendac, quequin mibitedi tantiaquin Nuquin Papa chiannembi.

Codosas 1:10

Aden Nuquin Papan abi bunacpaden nate mibi tantiamiac mibitedi utsibobëd nashunnanec bëdambuec tabadendac. Adshun: Nadquio Nuquin Papa iquec, quequin bëdiactsëc tantiabuedi canidoacbimbuen bëdambuen tantiaquidquio yanendac. Adsho isash: Bëdambo iquebi, quendac Nuquin Icbo Esus.

Timoteo 1 2:2

Adembidi Nuquin Papa chuiquin: Chuiquid Tapambobëta chuiquid tapa utsibotedi bëdambuen tantiame. Adoac aidon bëdambuen namiac cuessun secananenquio yec matses abitedi bëdambuec tabadtsiash, Papa, quequin Nuquin Papa chianneta.

Timoteo 1 4:6

Umbi chuiboedtedi Esus tantiaquido chuibanquin mimbi bëdambuen naindac, mado. Madompi icsho pete pemiacbimbuen min matsesën Nuquin Papan Chiaidquio mibi chuibampanëdash. Aidën chiaid tantiaquidquio yanquin umbi chiacpadombuen mimbi chuibanendac.

Timoteo 1 5:10

Matses nashunquidquio nec, utsibon cadenned. Aton bacuë bëdambuen caniuadenned. Isedanquido aton shubu yacno chosho bëdambuen isquin nashundenned. Esus tantiaquido tantiaquin acten tapandenned. Matses daicsabudaidbëta nënquido natiamiaido nashundenned. Adec bëdambuec tabadtenned icsho issun: Ma Esus tantiaquidon nashunnu, cata.

Timoteo 2 1:6

Aden tantiaquid icsho mimbi tantiondaid padpiden mibi chuinu. Naden chiondambi: Min Mayan nëidbëd tabadmequin cuesambo icmequin Esus chuibanme, Papa, quequin mibi mamishquin Nuquin Papa chiondambi. Adoac aton Mayan mibëd tabadmiaid icquin dacuëdenquio icquin Esus chuibanta, mado.

Timoteo 2 2:14

Umbi dada uaquin chuibued mibëd icquido naden chuibanta, mado. Nuquin Icbon isnubi Esusquio chienquio yec ambembi chiaid chiec mibi chushcananeque. Adenda. Adec chushcanansho tantiashun matsesën icsambuen tantieque. Padi, cata, mado.

Timoteo 2 2:21

Adquid icnuc Esus tantiaquidquio icte bunebique. Nëbi muaquin chuisho tantiatiapimbo icquin Nuquin Icbon chiacpadombuen naimbi, quiash Nuquin Icbon iuambo yantsiash shocosh bëdambocquid yacbimbuec. Adsho Nuquin Icbon bëdambuen nametsiash.

Tito 1:16

Aido: Nuquin Papa tantiaquid nebi, quebuedi utsibo ismec Nuquin Papa tantiesabimbuec tabadec. Nuquin Papan Chiaid niacquid yec chieshëmënquido nec. Bëdambuen tantiatiapimbo icquido icquin bëdambuen natiapimbo icquido nendac, Tito.

Tito 2:14

Nuqui cainaid nuqui icsambuen naidtedi bedshunec abided cuidadec Esus uënëspanëdash. Adec uënësaid tantiaquid yansho: Cun matses caido yec bëdambuec tabadquid nendac, quequin chiaid tantiameta, Tito.

Tito 3:14

Adec nashunnanec nuquitedi bëdambuec tabadquin ismiac adecbidi utsibo nashunnanec tabadec Esuquidistu tantiaquid yanendac, quequin chuibanta.

Tito 3:8

Umbi: Aden chuita, quequin chiaidtedi abimbo chiaid nec, Tito. Aid tantiaquin ënenquio icquin chuibanta. Nuquin Papa tantiaquido yec ma bëdambuen nabanec tabadnu, quequin umbi chiacpadombuen Nuquin Papa tantiaquidtedishun nac bëdambo ictsiash, queshun chuibanta.

Ebedeo 13:21

Aden abi tantiaquido icsho Esusën nëish iua obeca dayun uacbimbuen dayun uaquin Nuquin Papan ambi tantiacpadombuen bëdamboshëcquiduidquio icmendac. Adoac Nuquin Papa bunacpadombuen ma napanuna. Adembidi abi bunacpadombuen ma icmepanuna, queshun Esuquidistunuidtsëqui nac. Esuquidistu bëdamboshëcquidquio yec nibëdantiapimbocquid nec, quequin ënenquio icquin chiannenuna. Amen.

Petedo 2 1:12

Umbi aden chuibuedtedi mibitedishun tantiondac. Aden tantiash chieshtoenquio yec Esus tantiec bëdambuec mibitedi tabadanondac. Aden abimbo chiaid tantiondaid icsho mibi adembi chuiquin tantiamedednendambi.

Udas 1:5

Tantia. Nuquin Papan cuidampid mimbi tantianëdaidi mibitedi padpiden chuiuanu. Equipito yacnoshon isadaidbotedi buanmepampic. Adoac iuectanquin ambi buanmiaidombi Ambi Chiaid niacniacsho issun Nuquin Papan abi tantiesabotedi uënësmepampic.