Tesadonica 1 4:3 - El Nuevo Testamento en matsés

³ Nuquin Papa bunacpadquiec bëdambuec tabadquido nadquiec tabadquid nendac. Chido utsi chudenquio icquin aton chidouidtsëqui chudquid nendac. Adembidi chidon dada utsi chudmenquio icquin aton bënëuidtsëqui chudmequid nendac.

Tesadonica 1 4:3 Iomraidhean Croise

Mateo 12:50

Cun Pa abuc tabadquidën chiacpadombuen nabanec tabadquid icsho dada cun utsibo caquimbi chido cun chu catanquimbi utsi cun ta caimbi, quepondash Esus.

Mateo 15:19

Nëidic icsambuen tantiaquido. Nëidic cuessunnianquido. Nëidic aton chidopenquio chudquido. Nëidic aton bënëpenquio chudmequido. Nëidic ambi natemaidi naic chudnanquido. Nëidic ampequido. Nëidic mua uanquido. Nëidic icsambuec chuishumënquido.

Mateo 5:32

Utsitsen mibi chuinu. Aton chidon dada utsi chudmesho istuidshun Moisesën chiacpadombuen naic icsainquio ictsiash. Aton chido dada utsi chudmesa icshobi aton bënën ambembi dada uaid menequin aton chido cuenmiac icsambo iquec. Aden cuenmequin chido icsametsiash. Chido cuenmiaid bedquidtsen dada icsaindac, quepanëdash Esus.

Mateo 7:21

Utsitsen Esusën naden chuipanëdash: Ubi caic: Icbo, Icbo, Cun Icbo mibi nec. Mibi tantiaquid nebique. Mibi yacno ubi puduedme, Icbo ¿quequidtedida Nuquin Papan namiacno puduedpatsiash? Padenquio. Cun Pa abucquidën chiacpadombuen naquidoen aid yacno puduedendac.

Madcos 3:35

Adashic: Nuquin Papan chiacpaden nabanec tabadquid icsho dada cun utsi caquimbic chido cun chibi catanquimbi utsi: Cun ta nec, caimbi, quepanëdash Esus.

Uanën dada uaid 4:34

Adsho tantiash Esus: Ubi cuishoncamete petebimbuecquid utsi iquec. Ubi chomiondaid Nuquin Papan chiacpadombuen naic bëdambo iquebi. Ambi chiaidtedi chonoadquin nainnuec nebi, quepondash.

Uanën dada uaid 7:17

Nuquin Papan chiacpadombuen nate bunquidën bëdambuen tantiatsiash. Umbi Nuquin Papan Chiaid chuisho tantiash: Nuquin Papan Chiaidquio chiec nec, quequin tantiatsiash. Umbi ambembi chuisho tantiash: Nuquin Papan Chiaidpenquio chiec nec, quequin abimbo tantiatsiash.

Hechos 15:20

Nadenuidtsëqui dada uaquin isadaidpembo chuinuna. Ambi papa canun nacnenaid ismequin pete sanaid penda. Adembidi min chidouidtsëqui chudquid icta. Adembidi min bënëuidtsëqui chudmequid icta. Adembidi nëish tëtaniaid penda. Adembidi tëshë codocaid intac icquid penda, quequinuidtsëqui isadaidpembo chuibannuna.

Hechos 15:29

Ambi papa canun nacnenaid ismequin pete sanaid penda. Adembidi min chidouidtsëqui chudquid icta. Adembidi min bënëuidtsëqui chudmequid icta. Adembidi nëish tëtaniaid penda. Adembidi tëshë codocaid intac icquid penda, quequin chiac umbi chiacpaden nabanec mibi bëdambo iquendac. Mibitedi tantiaquin aidtedtsëqui chiombi.

Hechos 20:32

Bëdambuen chuibanombi, quequin tantiaquin mibi nianembi. Esus tantiaquid nec, quequin Ambi Chiaid Nuquin Papan mibi bëdambuen tantiamendac. Aden tantiamequin mibi tantiaquioquin ambi chiampicpadombuen mibitedi bëdambo icmendac.

Hechos 26:18

Aden chuibanac utsin utsinquien pashuacbimbuec icbuedombi tantiendac. Icsambuen naquid nebi, quequin tantienquio icbuedëmbi: Icsambuen naquid nebique. Ubi icsaid tantienquio yec bëshunta, Papa, quendac adquid. Mayan icsa Satanasën iua icbuedi Nuquin Papan bacuëbo yanendac. Adquid yansho ambi icsambuen naid ënmiac Nuquin Papan bëdambo icmiaid ubi tantiaquid utsibobëd iquendac, quequin Esusën chuipondashi.

Doma 1:29

Aido nadquido nec. Nëidic utsi icsambuen nambo icquidobi muaquin cuidmequido. Nëidic icsambuecshë tabadquido. Nëidic aton chidopenquio chudquido. Nëidic aton bënëpenquio chudmequido. Nëidic dada aton dada utsibëdi chichudnanquido. Nëidic chido aton chido utsibëdi dachudnanquido. Nëidic dadpen bunquin bedquido. Nëidic chieshëmënquido. Nëidic utsina isash natiambo bunec chieshëmënquido. Nëidic cuessunnianquido. Nëidic chushcananquido. Nëidic muaquido. Nëidic icsamboshë icquido. Nëidic utsibo icsaiduidi chuiquido.

Doma 12:2

Esus tantiesabon nacpadombuen naic tabadenda. Adembidi aidon tantiacpadombuen nainquiocquin bëdambuen tantiabenash mibitedi bëdambuec tabadquid yanendac. Adash Nuquin Papa bunacpadec tabadquin bëdambocquid yec abi bunaidquio yec icsambocquidpenquio yante yec quequin mibitedishun tantiendac.

Doma 6:22

Nëbi mimbi icsambuen naid ënshun Nuquin Papa tantiaquin aidën chiacpaden nabanec mibitedi tabadec. Adec tabadquin bëdambuen nabanec mibi bëdambouidi iquec. Aden nabanec tabadsho Nuquin Papan ënenquiocquin abëdi tabadmendac.

Codinto 1 1:30

Adquid icnuc Nuquin Papanuidtsëqui tantiamiac mibitedi Esuquidistubëd abentsëc yacbimbuec tabadquido nec. Adembidi aidëmbi nuquitedi bëdambuenshë tantiaquid icmequin abimbo chuiquid icmec. Adoshon icsambuen naisabimbuecnuc Esusën Nuquin Papa nuqui bëdambuen ismec. Adoaid yec Esuquidistubëd bëdambocquid icsho cuidenquio ictequid Nuquin Papa yacno tabadtequido nuqui nendac. Esus abided cuidadaid icnuc Nuquin Papan nuqui cuidenquio iquendac,

Codinto 1 7:2

Ambi natemaidi naic piucquid bedec chudadquido dadpen iquec. Adquid chudec icsamane, queshun dadan min chido bedta. Adembidi chidon min bënë bedmeta.

Codinto 2 12:21

Adecbidi padpidec mibi yacno niduashun adquid icsho issun: Umbi Esuquidistu chuibanondaido nec, quesho Nuquin Papan tantiamiac natiaquiec bëpiumane, queshun dada uaic nebi. Icsambuen nadednequidën ambi icsambuen naid ënabi icsho isash shubimane, queshun dada uaic nebi. Ambi natemaidi naic chudnanquin ambi icsambuen naid ënenquio icquin ambi icsambuen naid utsi dadpen ënenquio icpec, quiash shubiendabi.

Cadasia 5:19

Nadquio icsateuidi bunquid matses iqueque. Tantia. Chuinu. Nëidic aton chidopenquio chudquido. Nëidic aton bënëpenquio chudmequido. Nëidic ambi natemaidi naic chudnanquido. Nëidic abi bunaiduidi naquin mëmunesabo. Nëidic chuitemaid chuiquin icsamete bunquido.

Epeso 5:17

Mimbi icsambuen tantiacpaden nabanenda. Aden nainquiocquin: ¿Mitsipadec Nuquin Papa bunacpadec tabadte icpec? quequin tantiec tabadta.

Epeso 6:6

Min icbon isnuc aidën chiacpadombuen mimbi bëdambuen nabanacpadombuembidi min icbon isenquiocnoc adembidi nabanuata. Esuquidistu: Cun Icbo nec, quequin chieshenquio icquin Nuquin Papa bunacpadombuen naimbi, quequin nidaidënshun min icbon chiacpadombuen nabanta.

Codosas 1:9

Aden Epapadasën chuiboc mibitedi tantiaquin ubitedishun ënenquio icquin naden Nuquin Papa chiannembi: Mimbi tantiacpadombuen min Mayanën bëdambuen tantiamiac: Nuquin Papan chiacpadombuen nate bunebi, quequin ma bëdambuen tantianu. Tantiamequiota, Papa, quequin chiannembi.

Codosas 3:5

Adec Esuquidistubëd tabadec bëdamboshëcquid iquendabi, quequin tantiaquin mimbi icsambuen nabanaidtedi cuessun secacbimbuen mibitedishun ëmbanta. Adshun: Umbi chudtemaid chudnu, quenquio icquin ënta dadan. Umbi chudmetemaid chudmenu, quenquio icquin ënta chidon. Aden natemaid bunmec dasiuidenda. Adembidi mimbi icsambuen nate bunaidtedi ënta. Adembidi mitsana dadpen bedteuidi bunaid ënta. Mimbi: Bednu, quequinuidi tantiaid matsesën ambibi nacnenshun: Papa, quequin tantiacbimbuecquid mibi bedte bunaid nendac.

Codosas 4:12

Epapadas mibi yacnoshon Esus tantiec mibëd iccuededondaid Esuquidistun namiaid icquin aid chuibanquidquio nec. Aidëmbidi: Aido cun utsibimbuecquido icsho tantiec tsadebique. Chui, quesho tantiashun dada uaimbi. Aidëmbidi ënenquio icquin mibitedi tantiaquin Nuquin Papa naden chiannec: Icsambuen namenuequid icnuc mibi bunacpaden tantiamequin mimbi Codosas yacnocquido chieshtomenquio icquin Esuquidistu tantiec tabadme, Papa, quequin Epapadasën Nuquin Papa chiannec.

Tesadonica 1 4:2

Nuquin Icbo Esusën tantiamiac aid tantiata, quequin mimbi nabante mibitedi chuibanondambique. Aid tantiaquiec bëdambuec tabadta.

Tesadonica 1 4:4

Aden Nuquin Papan Chiaid niaquenquio yec abi bunaid mëmunec dada ambi inaidquio aton chidobëduidtsëqui iquec bëdambuec tabadsho matsesën: Bëdambuec tabadquido nec, canubi Nuquin Papantsen: Bëdambo iquec, caindac.

Tesadonica 1 5:18

Nadec tabadquin: Nuquin Papa bëdambo iquec, cata. Bëdambuec tabadquin nac bëdambo ictsiash. Daicsabudshumbi adembidi nac bëdambo ictsiash. Paëmbo icnubi adembidi. Mitsana icnuc adembidi. Mitsana nibëdnubi adembidi. Utsibon chieshënaqui adembidi: Mibi bëdamboshë iquec, Papa, cac bëdambo ictsiash. Aden Nuquin Papan: Ma Esus tantiaquidon adono, quequin tantiacpadembi mibitedishun chiannendac.

Tesadonica 1 5:23

Mibitedi tantiaquin Nuquin Papa naden chiannembi. Bëdambuec tabadmianquid icquin mimbi chiacpadombuen naic bëdambuec tabadquid icme. Adembidi aton tantiate yec aton mayan yec aton dada yec quenuc bëdambo icmequin bëdambuen dayun ua, Papa. Adoacsho Cun Icbo Esuquidistu choshon aido bëdambouidquio icsho istuidendac, quequin chiannembi.

Tesadonica 2 2:13

Tantia, cun utsibo. Nuquin Icbon tantiaidombo icsho mibitedi naden chuinu: Ëndenquimboshë matses uabi yequi Nuquin Papa nuqui caic: Ubi yacno tabadmenuen Esus tantiameshun aido bëdambo icmendambi, quepampic. Adshumbic ambi chiampicpadombuen aton Mayanën tantiamiac Nuquin Papan Chiaidquio tantiash Esus tantiec mibi bëdambuec tabadcuenondac. Abi bëdambuec tabadosh, quesho tantiashun Nuquin Papa naden chiannembi: Aden aido bëdambuen namequid yec mibi bëdamboshë iquec, Papa, quequin chiannembi mibitedi tantiaquin.

Tito 2:14

Nuqui cainaid nuqui icsambuen naidtedi bedshunec abided cuidadec Esus uënëspanëdash. Adec uënësaid tantiaquid yansho: Cun matses caido yec bëdambuec tabadquid nendac, quequin chiaid tantiameta, Tito.

Ebedeo 10:36

Utsin mëyanquin natiamiaqui Nuquin Papan Chiaid chieshtoenquio icquin tantiadedneta. Adec tabadquin abi bunacpadombuen nabanacsho ambi chiampicpadombuen Nuquin Papan abi yacno mibitedi tabadmendac.

Ebedeo 12:16

Nuquin Papan Chiaid niacquin min chidopenquio chudenda. Chidon min bënëpenquio chudmenda. Mimbi chudtemaidi chudenda. Aden naquidon Nuquin Papan Chiaid niaquendac. Adembidi Esaun aton papan bëyucquid icsho abi chuitequidi chieshëmpampic. Bundoshon pete bunquin aton utsi chiec: Nuquin pan ubi bëyucquid icsho bëdambuen chuitequid chienquio icquin mibimbo ma chuinu. Pete bec cho, quequin icsambuen tantiaquin pete bedpampic.

Ebedeo 13:21

Aden abi tantiaquido icsho Esusën nëish iua obeca dayun uacbimbuen dayun uaquin Nuquin Papan ambi tantiacpadombuen bëdamboshëcquiduidquio icmendac. Adoac Nuquin Papa bunacpadombuen ma napanuna. Adembidi abi bunacpadombuen ma icmepanuna, queshun Esuquidistunuidtsëqui nac. Esuquidistu bëdamboshëcquidquio yec nibëdantiapimbocquid nec, quequin ënenquio icquin chiannenuna. Amen.

Ebedeo 13:4

Min chido bedash aidbëd abentsëc yacbimbuec bëdambuec tabadta. Adquid yec: Cun chidopenquio chudnu, quesa iquec chido utsi isuidquid icta. Adecbidi chido yec: Dada utsi chudmenu, quesa icta. Adecbidi abitedishun natemaidi naic chudnanquin nanu, quesa icta. Aden mimbi isuidenquio icquin nabansho issun Nuquin Papan mibi cuidendac.

Petedo 1 1:2

Ëndenquimbo Nuquin Papa: Umbi tantiactedi ubi tantiaquid icmendambi, quepampic. Nëbi ambi tantiampicpadombuen aton Mayanën tantiamiac: Aidën chiacpadombuen nate bunebi, quec mibi bëdambuec tabadte bunendac. Icsambuen naquid icsho cuidmenquio icnuec abided cuidadec intac chididiquec uënësondaid Esuquidistun Nuquin Papa bëdambuen ismequin bëdambuec tabadquid ma mibitedi icmepanuna.

Petedo 1 4:2

Aden mimbi tantiacpadombuen nainquio icquin Nuquin Papan tantiacpaden nate bunquidquio mibitedi iquendac.

Uan 1 2:17

Adec Esus tantiesabo icquin ambi icsambuen naidbëdi abi bunaidtedi nibëdanendac. Padnuen Nuquin Papan chiacpadombuen naic tabadquid ënëdenquio yec Icbobëd tabadtequid nendac.

Esusën Uan ismiaid 21:8

Adoshombic nadquidtedi cuidendambi. Nëidic dacuëdquin ubi tantiauidbuedo. Nëidic Esus tantiesabo abitedi. Nëidic chieshëmënquido. Nëidic chieshëmënec cuessunnianquido. Nëidic aton dada utsibëdi chichudnanquido. Nëidic chido daëd dachudnanquido. Nëidic aton chidopenquio chudquido. Nëidic aton bënëpenquio chudmequido. Nëidic nënëchoquido. Nëidic ambibi nacnenaidi papa caquin tantiaquido. Nëidic mua uanquido. Aidotedi chian dapa ënëdenquio yec annëdënquequid icsamboshë nuadquid asupede caid padpidec uënëste caid yacno nësecaindambi, queposh.

Esusën Uan ismiaid 22:15

Adec aido tabadnubi nadquidtedi ambo puduedtiapimbo yec umanucquio tabadendac. Nëidic icsambocquid yec chieshëmënquido. Nëidic nënëchoquido. Nëidic aton dada utsibëdi chichudnanquido. Nëidic aton chidopenquio chudquido. Nëidic aton bënëpenquio chudmequido. Nëidic aton chido utsibëd dachudnanquido. Nëidic chieshëmënec cuessunnianquido. Nëidic ambi nacnenaid papa caquin tantiaquido. Nëidic abi bunaiduidquio naic mua uanquido. Adquidotedi Nuquin Papa yacno puduedtiapimbo iquendac.