Pidipos 2:12 - El Nuevo Testamento en matsés

¹² Cun utsibo, umbi tantiaido mibitedi neque. Tantia. Chuinu. Ubëd tabadquin umbi chiacpadombuen mimbi nadedniondacpadombuen ubi uanno nidan adembidi bëdambuen nata. Nuquin Papa dacuëdampambo icquidën chiaid niacmane, quiash aidën chiacpadombuen naic aidbëd tabadnush bëdambuec tabadta.

Pidipos 2:12 Iomraidhean Croise

Mateo 11:12

Acten mentoanquid Uanën tauaquin chuibansho cumapenen chieshënnëdacpadombuembidi umbi: Nuquin Papan namiacno tabadte iquec, quequin nëbi chuibansho: Ënmenu, caqui ënmetiapimbo iquendac.

Mateo 11:29

Cun Icbo ubi cata. Cun iuambo icquin umbi chiacpadombuen nasho mibi bëdambuen isquin dayacquiocquid icmembi. Adquid icquin mibi ancaisambo nebique. Cun Icbo ubi cata. Adsho mibi bëdambo icmendambi.

Hechos 16:29

Adoaquien seshunniadtsembuedën: Tabote bec cho, cac ambi namiaidën tabote bëacsho bedshun sananec badedi quënën puduedash dacuëdec uëdëquec Pabadobëd Sidas tabadacno choash danëshën sebudpanëdash.

Hechos 9:6

Nidtoanec shubu dadpen icquid Damasco yacno nidec nid. Amboshon umbi: Nata, cacpadombuen ambocquid mibi chuimembique. Nidec nid, capanëdash.

Doma 2:7

Abi tantiec bëdambuec tabadsho issun mabi Nuquin Papan: Mibi bëdambo iquec, canu, quiash abëd tabadte bunec ambi chiacpadec bëdambuec tabadquid uënësacsho Nuquin Papan ënëdenquiocnoc abëdi tabadmendac.

Codinto 1 15:58

Cun utsibo, umbi tantiaido icsho mibitedi chuinu. Umbi chuibambued utsi uainquiocquin tantiec chieshtoenquio yec chonoadbudec tabadquin Nuquin Icbo Esuquidistu ënenquio icquin nashunec tabadta. Nuquin Icbo Esuquidistubëd abentsëc yacbimbuec tabadquin nabanec chonoadaid ambembi nabanaidpenquio nec, quequin mimbi tantiec.

Codinto 1 2:3

Icsambocquid nebi, quiash mibitedi dacuëdampambo icsho isash uëdëquec dacuëdondabi.

Codinto 1 4:14

Umbi dada uaid isash mibitedi: Ma natiec uënësquio yannu, quenquio icquin: Cun bacuëbobimbuecquido yec umbi tantiaidombo icsho: Ma bëdambuec tabadnu, quequin chuiquin dada uaic nebi.

Codinto 2 7:15

Aid bëdambo iquec, queshun mibitedishun Tito iuedpanëdac. Aden iuedac: Naden nata, quequin umbi chiac cacuidanenquio icquin nabanosh, quequin Titon chioshi. Aidëmbi mibi bëdiactsëc tantiabuedëmbi mibitedi tantiaquiec.

Epeso 6:5

Tantia, iuabo. Mibitedi chuinu. Nidaidënshun mibi iuaquid yec min icbo neque. Aidën chiacpadombuen nabanta. Chieshënenquio icquin bëdambuen isquin nashunta. Esuquidistu nidaidën icsho nashunacbimbuen mibi iuaquidën chiacpadombuen nabanta.

Pidipos 1:27

Naden mibitedi chuinu: Esuquidistun chiacpadec chieshtoenquio yec bëdambuec tabadta. Mibi yacno nidshun bëdambuec tabadsho isash: Umbi Esuquidistun naid chuibanac tantiabenondaido nec, quetsiabi. Adembidi mibitedi istanquidon mimbi naid chiec: Chieshtoenquio icquin Esus tantiec abentsëc yacbimbuec bëdambuec tabadosh. Adecbidi chieshtoenquioquin Esusën naid chuibansho tantiec bëdambuec tabadosh, quequin chuisho tantiate bunebi.

Pidipos 1:29

Esus tantiaquido icsho natiamiaqui mibitedi bëdambo iquendac. Adecbidi Esuquidistu tantiec bëdambo icuaindac.

Pidipos 1:5

Umbi Esus chuibanac aid tantiaquid yanshun mimbi ubi nashunondac. Aden naondashumbic: Ma Pabadon matses utsibotsen Esusën naid chuibannu, queshun nëbi adembidi naquin mimbi piucquid bëmiac.

Pidipos 1:6

Nuquin Papan tantiamiac mimbi Esus tantiabenondac. Aden abi tantiasho mibitedi bëdambuec tabadmec. Adoac Esuquidistu nidaidën padpidec choacnobi cuësquec bëdambuec tabadquidquio yanendac.

Pidipos 2:19

Abi tantiaquid icsho Nuquin Icbo Esusën tantiamiac Timoteo mibi yacno nëbi nidmete bunebi. ¿Mitsipadec aido tabadeque? Istan, quequin nidmembi. Adoac mibitedi istanshun chuituidac cuishonquec bëdambo ictsiabi.

Pidipos 4:1

Tantia, cun utsibo, umbi tantiaidquio icsho mibitedi chuinu. Mibi iste bunquiebi. Umbi chuibanac Esus tantiabensho isash bëdamboshëcquid meniacbimbuec cuishonquiondabi. Ubi yacpaden chieshtoenquio icquin Nuquin Icbo Esus tantiec bëdambuec tabadta.

Pidipos 4:15

Min nidaid cuëshë Masedonia caid yacnouësh Esus chuibennenu, quec nidsho issun Esus tantiaquido icquin Pidipos yacnocshon mibitedishunuidtsëqui piucquid menenubi uanno shubu utsin icquidon menenquio iccondashi.

Tesadonica 1 1:3

Aidon Esus tantiaquin mimbi chiacpadombuen matses tantiaquin nashumbanondash, Papa, quequin Nuquin Papa chiannembi. Abi yacno abi tantiaquido buannuec Nuquin Icbo Esuquidistu padpidec choec, quesho utsibon chieshënaqui chieshtoenquio icquin Esusën naid abi chuibanondash, quequin ubëd icquidobëtan ënenquio icquin mibitedi tantiembi.

Timoteo 2 2:10

Aden chuibannubi Nuquin Papan ambi tantiamiaidtedi Esuquidistu tantiamendac. Aid tantiaquido uënësacsho cuidenquio icquin abëdi tabadmendac, quequin tantiec quënën tsadunondaid yequi chieshtoenquio iquebi.

Ebedeo 12:1

Aden Nuquin Papa tantiaquidombo yec uënësampidën dacuenadec tabadquin isacbimbuec nuqui tabadec. Aidon nampid tantiaquin Nuquin Papa tantiate bunquioquin: Cun dashcute iuëmbocquid chictanec cumapenec titinquetannu, quiacbimbuen nuqui icsambuen nabanaid ënnuna. Adembidi dayacquiocquin Nuquin Papan chiacpaden nabanec tabadnuna.

Ebedeo 4:1

Adec nuquin tsusedpabo Nuquin Papa tantienquio yec tabadash aidën chiacno tabadambo icpampic. Nëbi Nuquin Papan chiampicpadombuen chiembique. Chuinu. Tantia. Ubi yacno puduedash natienquio yec ubëd tabadtequid mibitedi iquendac, quequin chiampid icnuc aid yacno aidbëd tabadtiapimbo icchitomane, queshun Esuquidistu tantiaquionona.

Ebedeo 4:11

Nuquin Papabëd tabadtequid nebi, quequin tantiaquin Esuquidistu tantiaquionona. Nuquin Papan Chiaid tantiesa yanash tsusedpabo Nuquin Papan chiacno tabadambo yampicpadecbidi tabadtiapimbo icmane, queshun aid tantiaquionona.

Ebedeo 5:9

Aden tantiabenash matsesën icsambuen naid bedshunash abided cuidadquid icquin matses Nuquin Papan chiacpadombuen naquido Nuquin Papa yacno ënëdenquio icnuc tabadmequid yanquiopanëdash.

Petedo 1 2:11

Tantia, cun utsibo, umbi tantiaido icsho mibitedi chuinu. Nëid nidaidën iuec tabadtiapimbo icquido mibi nec. Adquid icnuc Esus tantiesabo abi icsate bunacpadec icsainda. Aden naic cuidadtequid yanmane, quiash bëdambuec tabadta.

Petedo 2 3:18

Aid tantiasho nuqui bëdambuen isec, quequin Nuquin Icbo Esuquidistu tantiabenshun ambi chiaid daëdpactsëc tantiabuedi dadpen tantiabenash tabadquin Esus tantiaquionona. Adshun: Nibëdantiapimboquid yec Mibi Bëdamboshëcquid nec, canuna ënenquio icquin. Amen. Aidted chuiquin dada uaombi.