Pidipos 2:1 - El Nuevo Testamento en matsés

¹ Abi tantiasho Esuquidistun: Utsibo chieshtomenquio icquin bëdambuen nabanmeta, caid icquin utsibobëd tantiananquin nabanquin dayacquio icmendac. Adecbidi mibitedi tantiananquin dayacquio icmiaid icquin natiamiaid utsibo icsho bëdambo icmendac. Adembidi Nuquin Papan aton Mayan abëd icmequin bëdambuec tabadquid icmiaidobidi nendac. Adecbidi utsibo natiasho issun nashunte bunquid icta.

Pidipos 2:1 Iomraidhean Croise

Ducas 2:25

Adnubien Edusaden yacnocquid Simeon cuëmëdquid Nuquin Papan: Naden nata, quequin Moises chiampid tantiaquin naquidquio icpanëdash. Aidi isadaidbon chuiquid tapa abentsëcquiobi Nuquin Papan Chomiaidquio cainquidquio icpanëdash. Aidi Nuquin Papan aton Mayan Bëda meniaidquio nepanëdash.

Uanën dada uaid 14:18

¿Shiadi mëyadacbimbuec icnudambi mibitedi niampe? Padenquio. Mibëd icnuec chouaindabi.

Uanën dada uaid 14:27

Cun Pa yacno nidshun Cun Mayan mibëdi tabadmequin dacuëdenquio yec bëdambuec tabadquid mibi icmendambi. Ubi tantiesabombien mibi adquid icmetiapimbo iquendac. Umbi aden nate chuisho tantiash dacuëdec tabadenda.

Uanën dada uaid 17:13

Nëbi mibi yacno nidendabi, quequin nëidobëd nidaidën abi tabadquin mibi otacquio chienquio iquembi. Aden umbi chuisho tantiash ubëd icquido ubi cuishonquiacpadquiecbidi ma cuishonquequiono, quequin mibi chiec nebi, Papa.

Hechos 2:46

Adecbidi badiadquidën badiadquidënquiec Nuquin Papa tabadte shubu dapa yacno nidash iccuededpanëdash. Adecbidi shubu utsi utsiec yacno nidash iccuededquin Esus uënës uaid tantiaquin pan cuëshcuëshshun pebededpanëdash. Adecbidi bundoshon pete pec cuishonquecuededuapanëdash.

Hechos 4:32

Aden chuibanequi shubu abentsëquën tabadacbimbuec tabadec Esus tantiaquido dadpenquio: Cunauidtsëqui nec, quenquio yec menenampanëdash. Adecbidi: Abitedishuna nec, quec tabadcuededuapanëdash.

Doma 5:5

Aden chieshtoenquio icquin cainquin abi tantiaquid icsho Nuquin Papan ¿ada cacunmepec? Padenquio. Nuquin Papan nuquitedi tantiaquidquio icquin aton Mayan Bëda nuquibëd tabadmec, quequin nuquitedi tantiec.

Doma 8:26

Adembidi Nuquin Papan Mayan Bëdan nuquitedi uidëmpentsëcquiocquid icshobi nashunec. Nuquin Papa bëdambuen tantiaquin chuinu, caqui: Tantiadenquio iquec, quiash shubitiadquio icsho issun aton Mayanën nuqui tantiaquin Nuquin Papa onquenquio icquin tantiamec.

Codinto 1 12:13

Adecbidi isadaidbo yec matses utsibo yec utsin iuaido yec matsesën iuacmaido yec quec Esus tantiaquido iquec. Adquido icsho acten mentoaido yec abentsëc yacbimbuec nuquitedi tabadnubi Nuquin Papan Aton Mayan abentsëcquiobi nuqui meniaid nuquibëd tabadec.

Codinto 1 15:31

Cun utsibo, badiadquidën badiadquidënquien ubi cuessunnete utsibo bunec, quequin abimbo chiec nebi. Adembidi abimbo chuiquin: Nuquin Icbo Esuquidistu tantiaquid yanondash, quequin mibitedi tantiec: Bëdambo iquebi, quec cuishonquec tsadebi.

Codinto 1 3:16

Mibitedi Nuquin Papa tabadte shubu nec. Adquid icnuc: Nuquin Papan Mayan ubëd iquec, quequin ¿tantienquioda mimbi icpe?

Codinto 2 13:14

Adembidi: Nuquin Papan tantiaidquio nebi, quequin tantiaquiota. Adembidi: Aton Mayan Bëda ubëd iquec, quequin tantiec mibitedi tantiananquiota. Amen. Aidted chuiquin dada uaombi.

Codinto 2 2:14

Bëdamboshëcquid mibi nec, Papa. Adquid icquin mimbi ënenquio icquin ubitedi tantiaquin Mimbi Chiaidquio chuimiac Esuquidistu tantiaquido yansho isash cuishonquebi. Esuquidistu chuibenneta, caid ubitedi nebi. Esuquidistubëd icsamboshëcquid dëniacquido nebi. Umbi chuibanaid nuadte bëdabimbuecquid nec. Nuadte bëda pushudec bëdambo nuadsho uanno uannoec tabadquidon shëdec. Adoacbimbuen ubipadquidon chuibennesho uanno uannoec tabadquidon tantiec.

Cadasia 4:6

Aden Aton Mado tantiaquidotedi: Cun bacuëbo nec, queshun Nuquin Papan Aton Madon Mayan meniac nuquibëd tabadec. Aden meniac aidbëd tabadquin bacuën amë: Ubi, papa, cacbimbuen Nuquin Papa nuqui chiannec.

Cadasia 5:22

Padnuen Nuquin Papan Mayanën tantiamiaid nadec tabadquid. Nuquin Papa tantiec utsibobëd tantiananec bëdambuec tabadquid. Esus tantiec cuishonquec tabadquid. Nuquin Papan ubi bëdambuen isec, quec bëdambuec tabadquid. Utsibon chieshënaqui badedquio chieshtoenquio yec tabadquid. Utsibo tantiaquin nashunec tabadquid. Bëdambuen tantiaquin nabanec tabadquid. Chieshtoenquio icquin Nuquin Papa tantiec tabadquid.

Epeso 4:4

Esuquidistu tantiaquidtedi abentsëc yacbimbuecquid nec. Abentsëcquiobi aton Mayan iquec. Adquiecbidi Nuquin Papan tantiamiaido icquin ambi matses abi yacno tabadmete nuqui cainaid abentsëcquiobi iquec.

Pidipos 1:8

Esuquidistun tantiamiacpadombuen mibitedi tantiec: Aido uënësquio iquec, ubi quesho Nuquin Papan: Abimbo caic, quequin tantiec.

Pidipos 3:3

Shui dëbid dëtemequidbimbuecquido yec nuquitedi Esus tantiaquidombo nec. Adquido icsho aton Mayanën tantiamiac Nuquin Papa tantiaquido nuqui nec. Adash: Esuquidistuna nebi, quiash nuquitedi cuishonquendac. Aden tantiaquid icquin: Shui dëbid dëtemequin Nuquin Papa bëdambuen ismembi, quetiapimbo nuqui iquec.

Codosas 2:2

Ma ënenquio icquin Esuquidistu tantiaquidombo yampanu, queshun dayacquiocquin chiannec nebi. Abentsëc yacbimbuec tantiananquido ma yampanu, queshun adembidi chiannembi. Adquido yanshun ma bëdambuen tantiapanu. Adembidi: Ëndenquimbo Nuquin Papan matses tantiamenquio icpampidi Esuquidistu nec, quequin ma tantianu.

Codosas 3:12

Nuquin Papan mibitedi tantiaquioquin: Nëid cun matses canu, quequin tantiamiaido yec nadec tabadta. Utsibo tantiec uënësquiocquin nashumbanta. Adecbidi: Mimbia bedan bedembi, quequid icta. Adecbidi: Mibia nashunnu, quequid icta. Utsi icsambuen naid ënmenuec cumapenec chushquenquio icquin bëdambuen chuita. Tantesa uasho issun badedquio chieshtoenquio icquin bëdambuen chuiquin tantiameta.

Ebedeo 6:18

Adec Nuquin Papa muatiapimbocquid icquin: Umbi chiacpadombuen naimbi, quequin chiaid utsi uatiapimbo iquec. Aden abimbo chuiquidquio nec. Adquid nec, quequin chiaid tantiashun nuqui: Ubi bëdambuen isquin dayun uata, Papa, quequin Ambi chiacpadombuen naindac. Adembidi abi tantiaquido caic: Ubi yacno mibi ubëd tabadendac, quequin chiampid utsi uatiapimbo iquec, quequin caimbudquid nuqui nendac.

Petedo 1 1:2

Ëndenquimbo Nuquin Papa: Umbi tantiactedi ubi tantiaquid icmendambi, quepampic. Nëbi ambi tantiampicpadombuen aton Mayanën tantiamiac: Aidën chiacpadombuen nate bunebi, quec mibi bëdambuec tabadte bunendac. Icsambuen naquid icsho cuidmenquio icnuec abided cuidadec intac chididiquec uënësondaid Esuquidistun Nuquin Papa bëdambuen ismequin bëdambuec tabadquid ma mibitedi icmepanuna.

Uan 1 3:24

Aden ambi chiacpadombuen naquidbëd abentsëc yacbimbuec Nuquin Papa iquec. Adecbidi matses Nuquin Papabëd abentsëc yacbimbuecbidi icuaic, quequin Nuquin Papan aton Mayan meniaid nuquibëd icquin nuqui abimbo chiaid tantiamec.

Uan 1 4:12

Nuquin Papa matsesën isambo iquec. Adquid icnuc aid tantiaquid yec utsibobëd tantianansho isash Nuquin Papa nuquibëd tabadquin ambi tantiacpadombuen utsibobëd tantiananquidquio nuquitedi icmendac.

Uan 1 4:16

Naden nuquitedi tantiec: Tantianquidquio icquin Nuquin Papan nuqui tantiec. Adecbidi aton matsesbëd tantiananquidquio yec Nuquin Papabëd cuëshëdenquiocquid nec. Adecbidi nuquibëd Nuquin Papa iquec.