Mateo 7:13 - El Nuevo Testamento en matsés

^13-14 Adshumbic Esusën naden chuipanëdash: Nuquin Papabëd tabadnuec aid tantiec bëdambuec tabadta. Shëcuë pictsëcquidën matses abentse abentsec puduedacbimbuec abentse abentsec Nuquin Papa yacno puduedtequid iquendac. Padnuen antied tapan abi maisi nidacbimbuec matses dadpenquioshë abi tantiesabo yec Nuquin Papan icsambuen naquido cuidquin chian annëdënquequid nësecacno nidmendac, quepanëdash Esus.

Mateo 7:13 Iomraidhean Croise

Mateo 23:13

Adshumbic Moisesën chiampid tantiamequidobëta padiseobo naden chuipondash: Bëdambo icquid danmianquido yec icsambo icquido icsho Nuquin Papan cuidtequidombo mibitedi nendac. Nuquin Papan Chiaid tantienquio icquin aid yacno iuedanquid tantiesa mibitedi nec. Adquid yec mibi aid yacno puduedtiapimbo icquin mimbi chuibanquin mua uac utsibotsen aid yacno puduedtiapimbo icuaindac.

Mateo 25:41

Adoshombic Abitedishun Icbombo icquin ubi tantiesabo yec cun copioc tabadquidotsen naden chiendambi: Nuquin Papan cuidtequido icquin mibi icsaid ënte bunenquio icbuedo mibitedi neque. Nuquin Papan Mayan Icsa Satanasbëta podobitsi icsabo cuidacno ënëdenquio yec chian annëdënquiacno nid, caindambi.

Mateo 25:46

Adoac aido icsambuec tabadquido ënenquio icquin cuidacnombo nidnubi bëdambuec tabadquido Nuquin Papa yacno ënëdenquio yec tabadendac, quequin Esusën chuipondash.

Mateo 3:2

Adquid icquin naden Esus chote chuibampanëdash: Mimbi icsambuen naid ënash Nuquin Papa tantiec bëdambuec tabadta. Nuquin Papan namiaidquio choeque, quequin chuibampanëdash.

Mateo 3:8

Mentomete bunec Nuquin Papan Chiaid niac niacbuedi ënash Aid tantiec bëdambuec tabadta.

Ducas 14:33

Adquid icnuc ubi tantiaquidquio icnuen bëdambuen tantiata. Cun chuiquid nec, quequin tantiaquin mitsanatedi nianta. Adoesa ubi tantiaquid ictiapimbo iquendac, quepanëdash Esus abi tsibananquido chiec.

Ducas 9:33

Esusbëd icbuedi Moisesbëd Edias nidsho istanec Petedo nadpanëdash: Icbo, mibëd nëmbo choash tabadquin mibitedi isec bëdambo iquebi. Mibi nëmbo tabadte 3ted icnuc shubumpi uanu, mitsana yec Moisesëna yec Ediasëna yec quenuc, quepanëdash Petedo bëdambuen tantienquio yec.

Uanën dada uaid 10:9

Adquid icnuc: Obeca puduedte shëcuëbimbuecquid nebi. Ubiuidtsëqui tantiash Nuquin Papa yacno puduedtequid matses iquendac. Adquid icsho obeca icbon bëdambuen pemiacbimbuen bëdambuec tabadmendambi.

Uanën dada uaid 14:6

Adoaquien Esusën: Nuquin Papa yacno nidte tantiamequidquio nebi. Nuquin Papan Chiaiduidtsëqui chiec muesambo nebi. Adquid icnuc ubiuidtsëqui tantiash Nuquin Papa yacno tabadendac.

Hechos 3:19

Nëbi mimbi icsambuen naid ënshun Nuquin Papa tantiata. Ma mimbi icsambuen naidtedi tantienquio yec bëshumpanu.

Doma 9:22

Adombuembidi Nuquin Papan ambi tantiacpadombuen cuidendac. Nadatiambocquid icquin icsambuen naquido cuidquid nebique. Ismenu, quebuedi ambi cuidtequidobi baded cuidenquio iquec. Adoshombic ambi tantiacpadëmbi aido adec icsambuec tabadsho issun cuidquin chian annëdënquiacno nësecaindac.

Codinto 2 4:4

Ad icnuc: Nuquin Papapadquidquiobidi bëdamboshëcquid Esuquidistu nec, quequin chuibansho tantiaquido icnushe, queshun icsambuen namianquid icquin Mayan Icsa Satanasën pamunacbimbuen utsi utsien tantiamenquio iquec.

Codinto 2 6:17

Nadembidi chuiquin Nuquin Icbon dada uamepampic: Ubi tantiesabobëd tabadenquio yec cuenta. Umbi: Mishtemaid nec, caid mishenda. Adec icsambuen nainquio yec tabad. Adquid: Ubëd iquec cho, caindambi.

Cadasia 5:24

Esuquidistun iuabo icquin nuqui icsambuen naidbëta nuqui icsate bunaidtedi bedshun cueste napotiaidën dectanquin cuessunniacbimbuen nuquitedi ënondac.

Pidipos 3:19

Aidotedi cumapenec mëyadtequid yacno chian annëdënquiacno nidmequin cuidendac. Peteuidtsëqui tantiec icsambo icquin ambi natemaid naic: Bëdambo iquebi, quec tabadec. Aido: Icsambuen naquido nebi, quiash dacuëdtiadquidi Nuquin Papa tantienquio icquin nidaidën icquiduidtsëqui tantiec tabadec.

Uan 1 5:19

Esus tantiaquid icquin Nuquin Papan: Cun bacuëbo nec, caido nebi, quequin nuqui tantiec. Nuquin Papa tantiesabotedi Mayan Icsa Satanasën iuaquin namiaido nec, quequimbidi nuqui tantiec.

Esusën Uan ismiaid 12:9

Aden cuenmiaquien matses tabadacno nidaidën nisi dapabimbuecquid aton iuabobëdi budbudposh. Aidi ëndenquimboshë icpampid Mayan Icsa cashumbic Satanas quequin cuënaid neposh. Aidëmbi nëbi matses abitedimbo mua uaquin icsamequin iuate bunquiec.

Esusën Uan ismiaid 13:8

Bëdi dapabimbuecquid acte ëquëducuësh chobued chuiquid tapa icsho matses abitedishunquio: Nadatiambocquid yec bëdambo iquec, quequin tantiabededendac. Ëndenquimboshë matses uabi icquin Nuquin Papan tantiampicpadec abided cuidadec uënësaid Obecabimbuecquid tantiesabo nendac. Adquido yec Nuquin Papan: Ubëdi tabadtequido nec, quequin abi cuëmëdquid dadauate dapan dada uamiambo icquido nec, quequin aden ismeposhi.

Esusën Uan ismiaid 20:15

Ambobi abi tantiesabo yec aton cuëmëdquid abëd tabadmetequid dadauate dapan dada uabicquid icsho Nuquin Papan cuidquin nësecaposh.

Esusën Uan ismiaid 20:3

Adotanquin aidën iuabo tabadacno shëcuë ëquëducquiocquid anneposh. Adoshombic puduentiapimbo icnuc chuiquidën dada uaid bëbitaccaquin shëcuë bëtashquioposh. Seta dadpenquio midtedi matanmeshun bëtashaid chicquin badedquio puduenmenumbi adoposh. Aden seta midtedi matanmiabi icquin abi uidën uactedembi nidaid utsi utsiec yacno tabadquidtedi matses mua uaquin icsametiapimbo iquec, queshun chicten bidiacquin uidën uaquioposh.