Mateo 14:3 - El Nuevo Testamento en matsés

^3-4 Naden Edodes Antipasën Uan cuessunnemepanëdash. Uanën: Mimbi bedaid Edodias min chidopenquio nec. Min utsi Uedipon chidobi bedquin Nuquin Papan Chiaid niacquin mimbi icsambuen nac, quequin chiac chieshënquin Edodesën Uan bedmeshun quënën tsadunmepanëdash.

Mateo 14:3 Iomraidhean Croise

Mateo 11:2

Adnubien Uan acten mentoanquid quënën tsadunmiac tsadquimbi Esusën nabanaid chuisho tantiapanëdash. Adshun abëd icquido chuiquin: Esus chuitan, quequin nidmiac chochoshon Uambëd icquidon naden Esus chuituidpanëdash:

Mateo 14:6

Adshumbic Edodesën: Ubi tishaid uëshë nëbi iquec, queshun matses dadpen chochomeshun aton shubun puduedmeshun pemepanëdash. Adnubien ambi inaid Edodiasën champin Edodesën chochomiaido shëcshëcquec bidiadtannequin ismepanëdash. Adsho issumbic Edodesën: Bëdambuen mimbi naoc, champi,

Mateo 4:12

Adashic: Mibi acten mentondaid Uan bedmeshun quënën tsadunmiac caosh, quesho tantiash aton nidaid Cadidea yacno Esus nidpanëdash.

Madcos 6:14

Adnubien utsibo: Chuibanquimbi Esusën nadatiambocquin nabanosh, quequin isbuedon chuisho chuiquid tapa Edodes Antipasën tantiapanëdash. Adembidi dadpenshun chuisho Esusën nabanaid tantiapanëdash. Aden tantiashun: Uan acten mentoandedned mapi butemiondaid uincuempash icnui. Adec uincuenshumbien nadatiambocquin nabanchitash, quecuededpanëdash tantiaquido.

Madcos 6:17

Ënden aidëmbi Uan bedmeshun shocosh bucu nacnenaidën tanemeshun quënën tsadunmepanëdash. Aidëmbi aton utsi Uedipon chido Edodias bedacsho issun Uanën:

Madcos 6:19

Adoacsho issumbien aton chido Edodiasën Uan chieshënquin: Cuessunnemetiadquidi mibi nec, capanëdash aton bënë Edodes cain. Adoac aid cuessunnemete bunequi cuessunetiapimbo icpanëdash.

Madcos 6:22

Aden chochomiash aidobëd pec tabadnubien aton chidon champi puduedash shëcshëcquec bidiadtanepanëdash. Adec shëcshëcquec bidiadtanesho isash: Bëdambuen mimbi naoc, quecuededpanëdash Edodesbëdi ambi chochomiaido champi caic. Aden chuisho tantiashumbien Edodiasën champi chuiquin: Mibi bunaidquio mibi menenu. Ubi chui.

Madcos 8:15

Aden potequimbi Esusën naden chuipanëdash: Padiseobobëd icquidonabëd Edodes Antipasbëd icquidona pan bidiscametebimbuecquid iqueque. Tantechoquiota, quequin chuipanëdash Esusën.

Ducas 13:1

Aden Esusën chuibansho tantianuec nidanneshun abentsëcshun naden Esus chuituidpanëdash: Nidaid cuëshë Cadidea yacnocquidon Nuquin Papan chiacpadombuen abi ismequin nëish iua pichicatequid cuessunnesho Pidaton aid pichicaquido cuessunnemiosh, quiosh. Aden cuessunniac aidon intac ambi nëish iua cuessunniaidën intacbëta nactsusuaposh, quequin chuipanëdash.

Ducas 13:31

Aden Esusën chuibannubien padiseobo utsi utsiec chochoshon: Chuiquid tapa Edodes Antipas mibi cuessunnemete buneque. Nëuëshquiobi nidec nid, capanëdash Esus chuiquin.

Ducas 23:11

Adoshombic Edodesën aton sondadobëtan Esus icsambuen chuiquin mamënshumbededtanquin chuiquid tapabimbuec isadnuc dashcute dapa dasiuinshumbic Pidato yacno Esus buanmeuapanëdash.

Ducas 23:7

Adoaquien: Ai, nidaid Cadidea yacnocquid Esus nec, quepanëdash. Aden chiac: Nidaid Cadidea yacnocquidon chuiquid Edodes Antipas nec, quequin tantiaquin Pidaton aid yacno Esus buanmepanëdash: Edusaden yacno Edodes choash tabadec, quesho tantiashun.

Ducas 3:1

Adashic seta 15ted matanmec Tibedio Sesad cuëmëdquid Doma yacnocquidon chuiquid tapa empedadod caid icpanëdash. Ponsio Pidato cuëmëdquid nidaid cuëshë Udea yacnocquidon chuiquid cobednadod icpanëdash. Edodes Antipas cuëmëdquid nidaid cuëshë Cadidea yacnocquidon chuiquid tapa icpanëdash. Edodesën utsi Uedipo cuëmëdquid nidaid Itudeya caid yacnocquidobëtan nidaid Tadaconitide yacnocquidon chuiquid cobednadod icpanëdash. Disanias cuëmëdquid nidaid Abidene yacnocquidon chuiquid icpanëdash.

Ducas 8:3

Abëd nidquid utsi Uana icpanëdash. Aidën bënë Cusa cuëmëdquid chuiquid tapa Edodes Antipas aton chuiquid icsho aid dadpen nashunquid icpanëdash. Abëd nidquid utsibic Susana icpanëdash. Adecbidi chido utsibo dadpen atona dadpen icnuc Esus nashunquin menedednepanëdash.

Hechos 12:1

Adnubien Edusaden yacno tabadquid Doma yacnocquidon chuiquid tapa icmiaid Edodes Aquidipa cuëmëdquid icpanëdash. Aidëmbi Esus tantiec iccuededquido utsi utsien cumapenen mëyanmequin bedmeshun quënën tsadunmepanëdash.

Hechos 4:27

Aden chiaid mimbi Dabid dada uamiampicpadembi nëbi Edusaden yacno isadaidpembon chuiquid daëd Edodesbëd Ponsio Pidato aton matsesbëd icnubi isadaidbo chedo iccuededquin Mimbi Chomiaid icsaisambo Esus mimbi Mesias icmiaid chieshënquin uënës uamenuec onqueuapanëdash.