Codinto 2 9:2 - El Nuevo Testamento en matsés

² Umbi chiondaid tantiashun: Aden nanuna, queshun mitsana musucshun sambededshun mimbi tauaquin dayun uaondac. Adsho issun nidaid Masedonia yacnouësh Esuquidistu tantiec iccuededquido mimbi nidaid Acaya yacnocquido icquin: Menenu, quequin chiaid chiombi. Utsin utsinquien sambededshun dayun uanuna, quequin ënden seta icbuedën mimbi naid umbi chiac Masedonia yacnocquido dadpen: Adombuembidi nabanembi, queuaposh.

Codinto 2 9:2 Iomraidhean Croise

Hechos 18:12

Adnubien aid nidaid cuëshë Acaya caid yacno Cadion cuëmëdquid chuiquid cobednadod icnubi Acaya yacnocquido isadaidbo dadpenshun: Pabado icsambo iquec, queshun bedshun cuidte chuiquid yacno Pabado buampanëdash.

Hechos 24:17

Adequi seta dadpen matanmec nidaid utsi utsiec yacno capucuennec tabadcuennequin: Edusaden yacnocquid isadaidbo bunec tabadec, quesho tantiash piucquid menenuec chopobi. Adembidi: Nuquin Papan bëdambuen dayun uabennioshi, quequin Nuquin Papa ismequin piucquid nibëdquido meneuanuec chopobi.

Doma 15:26

Edusaden yacnocquid Esus tantiaquido utsi utsiec aton piucquid nibëdquid iqueque. Nuquinabi sambudnuna. Ma buanshun menenu, queshun Esus tantiaquido icquin Acaya yacnocquidobëtambi Masedonia yacnocquidon: Nëid buanshun meneta, caoshi.

Codinto 1 16:15

Cun utsibo, nidaid Acaya caid yacnocquid Estepanas aton shubun icquidobëd abia Esus tantiaquido yanaccondash, quequin mibitedishun tantiec. Adquid yanshun Esus tantiaquid utsibo tantiaquin nashumbanquido nebi, queshun aidon nashumbanec.

Codinto 2 1:1

Pabado nebi. Nuquin Papa bunacpadombuen Esuquidistun: Ubi chuibennequid icta, caid nebi. Esus tantiaquidbidi Timoteo nuqui cun utsi caid ubëd iquec. Aidbëtambi mibi tantiembi, quequin shubu dadpen icquid Codinto yacnoshon Esus tantiaquin Nuquin Papa tantiaquido icsho mibitedi chuiquin dada uaimbi. Adembidi Esus tantiaquid utsibo nidaid cuëshë Acaya yacno tabadquidtedi icsho tantiembi, quequin chiec nebi.

Codinto 2 7:14

Mibi nidmenu, quequin naden Tito chiondambi. Ubi iuedquin nashunondacpadombuen Codinto yacnocquidon mibi iuedquin nashuntsiash, quequin chiondambi. Aden chiac mibi yacno Tito nidacsho umbi chuibocpadombuen mibitedishun nashunac caoc. Aden nashunaid tantiash: Abimbo chiombi, quepobi. Umbi mibi mua uainquiocquin chiondacpadequi mibitedi tabadaid tantiombi.

Codinto 2 7:4

Mibitedi caic: Mimbi chiacpaden nainquio icbuedëmbi nabanosh, quequin choquidën chioshi. Aden chuisho tantiashun: Nuquin Papan chiacpaden nabanquidquio aido nec, quequin utsibo chuibanembi. Adash uënësquio icbuedi mimbi naid tantiash bëdamboshë iquebi. Utsibon natiamiaid icshobi mibitedishun dayacquio icmequin ubi bëdambo icmioc.

Codinto 2 8:10

Umbibi tantiacpaden mibitedi chuinu. Tantia. Ënden seta utsi icbuedën mibi bunacpadombuen: Menenun sambededshun dayun uanuna, queshun dayacquiocquin mibitedishun tauapondac.

Codinto 2 8:11

Mibitedishun: Aden nanuna, queshun dayacquiocquin tauaondacpadombuembidi mimbi tantiactedi nainquin sambededta.

Codinto 2 8:19

Nidaid Masedonia caid yacnocquid Esus tantiec iccuededquidon: Umbi sambededshun dayun uaid Pabadobëd nidquin buanec nidta, caidbidi Titobëd nidquid nec. Ma Edusaden yacnocquido meniac: Nuquin Papa bëdamboshë iquec, ma quenu, queshun buanendambi. Adecbidi ambocquido: Pabado chedon ubi tantiaquin nashunec, ma quenu, queshun buanendambi.

Codinto 2 8:24

Aido chosho issun bëdambuen isquin tantiata. Ma umbi chuibenniacno Esus tantiaquidon mimbi naid chuisho tantiashun naden chuinu: Pabadon chiacpadombuen Codinto yacnocquid Esus tantiaquido bëdambuen naquido nec, ma quenu.

Codinto 2 8:8

Umbi chiacpadombuen meneta, quecpenquio nebi. Utsibon menequin nashunaid chuisho tantiashun mimbi atona nibëdquido tantiaquioquin menetiadquio ictsiash, quequin chiec nebi.

Tesadonica 1 1:7

Adec mibi bëdambuec tabadaid chuisho tantiash min nidaid cuëshë Masedonia caidën tabadquido Esus tantiaquido mibi yacpadquiec tabadtiadquio icpac caosh. Adembidi tantiash nidaid cuëshë Acaya caid yacno tabadquido Esus tantiaquidobidi yec bëdambuec tabadtiadquio icuapac caosh.

Ebedeo 10:24

Aden tantiec abi tantiaquid utsibobëd tantiananquiec bëdambuec tabadec nashunnannuna.