Codinto 2 6:6 - El Nuevo Testamento en matsés

⁶ Adquid icnubi icsambuen nainquio iquembi. Nuquin Papan Chiaid tantiaquidquio nebi. Tantiatiapimbo yec utsibo tabadshobi aido bëdambuen isquin adembidi Nuquin Papan Chiaid chuibennec nebi. Adembidi: Nashunquin chiac tantiabentsiash, queshun adquid nashunembi. Nuquin Papan Mayan Bëdan tantiamiaid yec bëdambuec tabadquin ismembi. Muainquio yec utsibobëd tantiananquiec bëdambuec tabadebi.

Codinto 2 6:6 Iomraidhean Croise

Doma 12:9

Muainquio yec utsibobëd tantiananquiota. Icsambuec tabadte bunenquio yec bëdambuec tabadta.

Doma 15:19

Nuquin Papan Mayan Bëdan tantiamiacpadombuen nadatiambocquin nabanquin ismiondambi. Adosho issun dadpenshun Esus tantiabenshun Nuquin Papan chiacpadombuen natiadquio yanondash. Shubu dadpen icquid Edusaden yacnouësh nidquin shubu dadpen icquid yacno yacnombuen chuibennequin nidaid cuëshë utsi Ididia caid yacno cuëscaquin Esuquidistun naid Chiaid Bëda chuibanondambi.

Codinto 1 12:8

Nuquin Papan Mayanën namiac bëdambuen tantiaquin chuibanquid utsi utsiec iquendac. Utsibobic Nuquin Papan Mayanën namiac ambi dadpenquio bëdambuen tantiaid chuibanquido iquendac.

Codinto 1 13:4

Padnuen utsibobëd tantiananquidquio utsibon chieshënaqui chieshtoenquio yec bëdambuec tabadquid nec. Adecbidi utsi tantiaquin bëdambuen nabanec tabadquid nec. Adecbidi utsina isash chieshëmënec tabadesa nec. Adecbidi: Ubentsëqui cumapenen tantiaquin naquidquio nebi, quesa nec. Adecbidi: Ubiuidtsëqui bëdambocquid nebi, quesa nec.

Codinto 1 2:16

Nuquin Papan chuiquin dada uamiampid nad iquec: ¿Tsuntsin Nuquin Icbon tantiaid tantiapec? ¿Tsuntsin: Naden naban, quequin tantiamepec? quequin chuipampic. Adquid nibëdnuc Esuquidistun tantiamiacpadombuen tantiaquido nuquitedi nendac.

Codinto 1 2:4

Adshunquio: Dadpen tantiaquidquio yec bëdambuec onquequidquio nebique. Umbimbo tantiamebennu, quenquio icquin Esus chuibanondambi. Adenquio icquin: Ma Nuquin Papan Mayanëmbi nadatiambocquin tantiamenu, queshun umbi chuibannubi Aidëmbi mibitedi tantiamiondash.

Codinto 2 1:23

Nuquin Papan tantiec, queshun abimbo caondambi. Mibi yacno Codinto yacno nidnu, quiondabi. Adashic: Aido chushcaquin natiamemane, quiash mibi yacno nidenquio iccondabi.

Codinto 2 11:11

¿Atotsi quiashini: Bec cho, quenquio icpe? ¿Mibitedi tantienquio icquindambi mibi: Bec cho, cainquio icpe? Codinto yacnocquido Pabadon tantiaquiec, quequin Nuquin Papan tantiec.

Codinto 2 11:4

Adec ubi tsadnubi Codinto yacno choshon utsibon Esuquidistu umbi chuibued utsi uain icsambuen chuibansho badedquio mibitedishun tantiashunec. Adembidi Nuquin Papan Mayampenquio caic: Mayan utsi iquec, quesho tantiash: Ubi mene, mibi quepec. Adembidi, Mibi bëdambo icmequid Esusbimbuecquid utsi iqueque. Aid tantiata, quequin umbi chiaid utsi uain chuisho tantiashun: Abimbo caic, quequin mibitedishun tantiec. Aden utsibon umbi chiondaid utsi uain chuisho tantiec, quesho tantiash Esuquidistu tantienquio yantsiash, quec tsadebi.

Codinto 2 11:6

Aido bëdambuec onquequin chuibanquid icnubi aid padquidpenquieni nechitec, quebuedi naden bëdambuen tantiembi. Esuquidistun: Ubi chuibenneta, quequin dadpenquio tantiamiacpadombuen mibitedi bëdambuen tantiamiondambi.

Codinto 2 12:15

Adembidi mibitedi tantiec: Ma Esuquidistu tantiaquidombo yampanu, quec chonoadbudec tsësiobudquimbi chuibanendambi. ¿Umbi tantiaidonquiobida mibitedishun ubi tantienquio icpe?

Codinto 2 13:10

Mibi yacno nidnumbi mibitedi tantiec tsadquin mimbi iste dada uaic nebi. Mibi yacno nidash puduedshun icsambuec tabadquid nibëdsho issun cumapenen chushcainquio ictsiambi. Nuquin Papan: Esus chuibennequid icta, caid icquin: Ma Esuquidistu tantiaquidquio yampanu, queshun chuibanec nebi. Mibitedi chushcaquin icsamete bunenquio iquebi.

Codinto 2 2:10

Aden umbi dada uaquin chiacpaden mimbi puduedmenquio yac ambi icsambuen naid ënsho issun ambi icsambuen naid nibëdacbimbuec bëshunshun bëdambuen isquin iuedosh, quesho tantiashun adombuembidi bëdambuen isuaimbi. Aidbëdi iccuededosh, quesho tantiash aidën icsambuen naid tantienquio yec bëshunebi Esuquidistun tantianubi.

Codinto 2 2:4

Uënësquio yec shubiquimbi mibitedishun iste dada uashun: Buanshun meneta, caondambi. Uënësquio icmenu, quenquio icquin: Pabadon tantiaidquio nuquitedi nec, quequin mibitedi tantiamenuen dada uaondambi.

Codinto 2 3:3

Pabadon chuibanac ubi tantiabenshun ma bëdambuec tabadte utsibon tantianu, quequin Esuquidistun tantiec. ¿Abi tantiaquido icsho issun bëdambuec tabadmenu, quequin ambi cuënoten dada uampidta mibitedi menediondash? Padenquio. Esuquidistu tantiabensho issun Nuquin Papa uënëstiapimbocquid icquin dada uacbimbuen aton Mayan Bëda abipadquidquio mibitedi meniondash.

Codinto 2 4:6

Taëecquiobi ëndenquimboshë: Inchëshquio icbuedi uëshëmbo yanta, capampic Nuquin Papan. Adombuembidi Nuquin Papan Chiaid pamumëdacbimbuen tantienquiocbuedi Nuquin Papan tantiamiaido nebi. Esuquidistu aton Papapadquidquio bëdamboshëcquid nec, quequin tantiaquin utsibo chuibanquido nebi.

Codinto 2 7:2

Adembidi ubëtabi ubipadquid tantiaquiota. Icsambuen nashunesa nebi. Adecbidi icsa uanesa nebi. Adecbidi muaquin utsin na bedesa nebi.

Cadasia 3:2

Mimbi tantiaid ubi chui. Tantianu: ¿Atotsi quiash Nuquin Papan Mayan Bëda mibëdi tabadanondash? ¿Nuquin Papan: Naden nata, quequin ambi Moises chuiquin dada uamiampidtedi mimbi nabansho isashta mibëd tabadanondash? ¿Umbi chuibanac: Abimbo caic, queshoda mibëd aton Mayan tabadanmiondash? Ai, umbi chuibanac Esusquio tantiabensho issun Nuquin Papan aton Mayan meniac mibëd tabadanondash.

Cadasia 3:5

Nuquin Papan aton Mayan meniaid icquin nadatiambocquin naquin mibitedi ismiondash. ¿Atotsi queshun Nuquin Papan aden namiondash? ¿Moisesën chiampicpadombuenuidi nashoda Nuquin Papan aton Mayan mibitedi meniondash? Padenquio. Umbi chuibanac: Abimbo caic, queshun Esusquio tantiabensho issumbien Nuquin Papan aton Mayan mibitedi meniondash.

Cadasia 5:22

Padnuen Nuquin Papan Mayanën tantiamiaid nadec tabadquid. Nuquin Papa tantiec utsibobëd tantiananec bëdambuec tabadquid. Esus tantiec cuishonquec tabadquid. Nuquin Papan ubi bëdambuen isec, quec bëdambuec tabadquid. Utsibon chieshënaqui badedquio chieshtoenquio yec tabadquid. Utsibo tantiaquin nashunec tabadquid. Bëdambuen tantiaquin nabanec tabadquid. Chieshtoenquio icquin Nuquin Papa tantiec tabadquid.

Epeso 3:4

Aden umbi dada uaondaid isec onquequin: Esuquidistu chuiquin Nuquin Papan matses tantiamenquio icpampidi tantiamiac nëbi Pabadon tantiec, quequin mimbi tantiec.

Epeso 4:2

Umbi tantiacpadombuenuidi naimbi, quenquio yec utsibobëd tantiananec nashunnanta. Ubi bunacpaden utsibon nainquio iquec, quiash chieshëmënenquio yec tantiananec bëdambuec tabadta.

Epeso 4:32

Adecbidi bëdambuec tabadquin utsibo uënësquio icquin tantiaquin nashunnanta. Esuquidistunuidtsëqui nac mimbi icsambuen naid tantienquio yec Nuquin Papa bëshunacpadquiec utsin mibi icsambuen naid tantienquio yec bëshunuata.

Codosas 1:27

Aden Nuquin Papan ambi matses tantiamenquio icpampidi bëdamboshëcquid Esuquidistu Isadaidpembo tantiamebempanëdash. Adoac Esuquidistu tantiaquido yansho issun Nuquin Papan cun matses caido yec bëdamboshëcquid yacno aidbëd tabadtequid nebi, quequin tantiaquin cainec tabadendac.

Codosas 2:3

Adembidi piucquid dadpen meniacbimbuen Esuquidistunuidtsëqui tantiamiac chiaid bëdamboshëcquid tantiabenshun bëdambuec tabadte tantiaquiendac, queshun Nuquin Papa chiannembi.

Codosas 3:12

Nuquin Papan mibitedi tantiaquioquin: Nëid cun matses canu, quequin tantiamiaido yec nadec tabadta. Utsibo tantiec uënësquiocquin nashumbanta. Adecbidi: Mimbia bedan bedembi, quequid icta. Adecbidi: Mibia nashunnu, quequid icta. Utsi icsambuen naid ënmenuec cumapenec chushquenquio icquin bëdambuen chuita. Tantesa uasho issun badedquio chieshtoenquio icquin bëdambuen chuiquin tantiameta.

Tesadonica 1 2:10

Esus tantiaquido icquin mibitedishun isnubi Nuquin Papan Chiaid niaquenquio yec bëdambuec tabadondabi. Utsibo: Pabado chedo icsambuec tabadquido nec, quetiapimbo icnuc bëdambuec tabadondabi. Adshobini mimbi ispondac. Adembidi Nuquin Papantsen ispanëdashi.

Timoteo 1 4:12

Mibi cania neque. Bëdambuec tabadta, mado. Ënden caniaidon: Caniampi icquin Nuquin Papan Chiaid mimbi tantienquio iquec, canushe. Bëdambuec tabadta. Esus tantiaquido utsibotsen ma ubi yacpadec bëdambuec tabadnu, quiash adta. Bëdambuec onquequinc matses tantiaquinc Esus tantiaquinc Nuquin Papan Chiaid niaquenquio icquinc caic bëdambuec tabadta.

Timoteo 1 5:2

Cun tabimbuecquid nec, queshun machobo bëdambuen chuibanta. Adembidi chido buntacbotsen: Cun chibibimbuecquid nec, queshun bëdambuen isquin: Nëid chudtiadquio icchitebi, quenquio icquin Nuquin Papan Chiaidquio chuibanta, mado.

Timoteo 2 3:10

Umbi mua uainquio icquin abimbo chuibanondaid mimbi tantiec. Ma Esus tantianu, quequin Esusën naid chuibanec bëdambuec tabadondabi. Esus tantiaquidquio icquin matses tantiaquin Esusën naid chuibenniondambi. Chieshënaqui chieshtoenquio iccondabi.

Timoteo 2 4:2

Aidën chiacpadombuen naquin Nuquin Papan Chiaidquio chuibanta, mado. Matses tantiate bunenquio icnuc chuibanquimbi utsibo tantiate bunquid icnuc adembi chuibanta. Esus tantiaquidon icsambuen nasho issun: Esus tantiaquido adesambo neque. Bëdambuequien tabadtiad, quequin chieshënenquio icquin chuita, mado. Utsibo bëdambuec tabadsho: Mibi bëdambuec tabadoc. Adquiequi tabadta, quequin chieshtoenquio icquin chuibanta. Bëdiactsëc tantiactsëcquido bëdambuen tantiamequin: Esus tantiaquidon nadoquid, quequin chuibanta, mado.

Tito 2:7

Bëdambuec tabadquin tantiamequin ismenu, quiash bëdambuec tabadta. Adembidi icsainquio yec bëdambuec tabadquin ismeta. Adembidi mamënshunmenquio icquin bëdambuen chuiquin tantiameta.

Santiaco 3:17

Padnuen Ambi tantiacpadombuen Nuquin Papan bëdambuen tantiamiaid yec nadquio iquec. Icsambuen nate bunesa nec. Adecbidi utsibobëd bëdambuec tabadquid nec. Adecbidi utsi nashumënquid nec. Adecbidi chushcanesa nec. Adecbidi utsi natiambo icsho uënësquiocquid nec. Adecbidi chuiquidën: Nanuna, cac badedquio: Ai, adonona, quequid nec. Adecbidi cuidmenquiocte bunquid nec. Adecbidi bëdambuen nabanquid nec. Adecbidi: Nëid bëdambuen isquimbi utsi chieshënembi, quesa nec. Adecbidi: Esus tantiaquid nebi, quec muesa nec.

Petedo 1 1:12

Naden Nuquin Papan tantiamepampic: Mibitedi nibëdanan umbi chuibued umbi cun matses caid icsho utsibon isendac, quequin Esus chote chuipampic. Aden chiampicpadec choshon Esusën chuibampondash. Adembidi nëbi Nuquin Papan abucshun chomiac aton Mayan Bëdan nadatiambocquin tantiamiacpadombuen Esus chuibennequidon aidën naid mibitedi chuibampanëdash. Aden chuibanaid icnuc Nuquin Papabëd icquidotsen Esusën naid tantiate buncuededec.

Petedo 1 1:22

Nëbi mibitedi ambi chiacpadec tabadquin ambi Chiaidquio tantiasho Nuquin Papan bëdambuen isaid yec bëdambocquid yanshun mibëtan Esus tantiaquido utsibo mimbi tantiaquiec. Adecbidi mua uananenquio yec utsibobëd tantiananquiota.

Uan 1 3:18

Cun bacuëbobimbuecquido icsho umbi tantiaido mibi neque. Utsibo tantiaquin nashunquid nebi, quec onqueuidequi onquenda. Utsi tantiembi, quequin mimbi tantiacpadombuen aid tantiaquin nashunquin ismeta.