Codinto 2 4:4 - El Nuevo Testamento en matsés

⁴ Ad icnuc: Nuquin Papapadquidquiobidi bëdamboshëcquid Esuquidistu nec, quequin chuibansho tantiaquido icnushe, queshun icsambuen namianquid icquin Mayan Icsa Satanasën pamunacbimbuen utsi utsien tantiamenquio iquec.

Codinto 2 4:4 Iomraidhean Croise

Mateo 13:22

Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi dadpen tantiaiduidi tantiec chieshtoendac. Utsibic ambi bedteuidi tantiaquin nabanec abibi mua uadec chieshtoshon tantienquio yanuaindac. Adquido Nuquin Papan Chiaid tantiesabo yanshun bëdambuec tabadaid utsibo tantiamenquiocquid yanendac. Adquid nisanquidën bëtinac bacuëtiapimbo yacbimbuecquido nec.

Uanën dada uaid 1:14

Aden abimbo chuiquin Nuquin Papa tantiamianquidquio Esus matsespanëdash. Nuquin Papan Mado abentsëcquiobi yec bëdamboshëcquid nepondash. Aidëmbi ubitedibëd tabadquin nadatiambocquin nabanquin matses tantiaquin nashunquid yec bëchamauanquiecsho ispondambi. Aden Esusën Nuquin Papambo tantiamepondashi.

Uanën dada uaid 1:18

Matsesën isacmaidquio Nuquin Papa nec. Padnuen aton Mado abentsëqui abipadquidquiobidi yec aton dayun tsadquidënquio matsessun Nuquin Papa bëdambuen nuqui tantiamepondash.

Uanën dada uaid 12:31

Nëbi abi tantiesabo Nuquin Papan cuidtequido yanendac. Adembidi matses dadpenquio icsambuen namequid Mayan Icsa Satanas chedo Nuquin Papan cuenmetequid yanendac.

Uanën dada uaid 12:35

Adoaquien Esusën: Nadquid nebi, quenquio icquin utsi chiacbimbuen naden chuipondash: Mibi bëdambuen tantiamequid nëbi abi mibëd iqueque. Aid tantiata. Adbuedi uëshë budacbimbuec isadenquio yanendac. Aid nibëdnuc inchëshën tantienquio yec capuacbimbuen mimbi bëdambuen tantienquio iquendac.

Uanën dada uaid 12:40

Nuquin Papan namiac min matses pamumëdacbimbuen tantiate bunenquio iquendac. Bëchicqueshun isenquio yacbimbuen isquimbi tantiatiapimbo iquendac. Umbi chiaid tantiaquin umbi nabansho issumbi ubi padpiden tantiauatiapimbo iquendac. Aden ambi icsambuen naid ënsho bëdambuen ismane, quiash Nuquin Papa chushquiaid Isayasën chuipampic.

Uanën dada uaid 12:45

Adembidi ubi isquin: Adquiobidien abi chomequid Aton Papa iquec, quequin ubi tantiaquidën tantiendac.

Uanën dada uaid 14:30

Nëbi mibi utsi dadpen chuibantiapimbo iquebi. Ubi tantiesabon icbo Mayan Icsa Satanas ubi bedmec choec. Ambembi aidën ubi dëniacquin uënës uametiapimbo ictsiash.

Uanën dada uaid 15:24

Adembidi Nuquin Papa yacnouësh choambo icquin umbi nadatiambocquin nabanquin aido ismiabi icnuc Nuquin Papan: Cun Mado chieshënec mibi icsambo iquec, cainquio ictsenosh. Mambi utsibon nabanacmaidquio nabamboc. Aden nabansho issumbi ubi chieshënquin Cun Patsen chieshënec.

Uanën dada uaid 16:11

Adembidi tantiamiac: Matses dadpenquio iuaquid Mayan Icsa Satanas Nuquin Papan cuidendac, quequin matsesën tantiendac, quepondash Esus.

Uanën dada uaid 8:12

Adshumbic padpidembuen matses tantiamequin Esusën naden chuiuapondash: Nuquin Papan bëdambuen iste matses tantiamequidquio nebi. Umbi tantiamiac ubi tantiabenquido icsambuen nate bunenquio yanendac. Adash ubëd tabadtequid iquendac, quepondash Esus.

Hechos 26:18

Aden chuibanac utsin utsinquien pashuacbimbuec icbuedombi tantiendac. Icsambuen naquid nebi, quequin tantienquio icbuedëmbi: Icsambuen naquid nebique. Ubi icsaid tantienquio yec bëshunta, Papa, quendac adquid. Mayan icsa Satanasën iua icbuedi Nuquin Papan bacuëbo yanendac. Adquid yansho ambi icsambuen naid ënmiac Nuquin Papan bëdambo icmiaid ubi tantiaquid utsibobëd iquendac, quequin Esusën chuipondashi.

Hechos 26:23

Nuquin Papan Chomiaid Quidistu Mesias caid mëyanquin uënës uaqui daëdec ushash abia uincuenshun: Ubi tantiaquid ubëdi tabadendac, quequin aton matses isadaidbobëta isadaidpembo tantiamequin Quidistun chiendac, quequin chiampicpadembi chuipanëdash, quepanëdash Pabado iccuededquido chiec.

Codinto 1 10:20

Aden chienquio icquin naden chiec nebi. Ambi nacnenaid tiboquesa icnuc Mayan Icsa Satanasën iua podobitsi icsa tantiaquin Esus tantiesabon Nuquin Papa tantienquio icquin nëish iua pichicamepec. Aden naquidobëd: Pambid penu, quiash Mayan Icsa Satanasën iua podobitsi icsabobëd tabadenda.

Codinto 2 2:11

Aden nainquiocsho issun nuqui chieshënquid Mayan Icsa Satanasën nuquitedi icsa uabudnushe, queshun ambi icsambuen naid ëmbued bëdambuen isquin puduedmeta.

Codinto 2 2:12

Chiaid Bëda Esusën naid chuibannuec shubu dadpen icquid Todoade yacno ubi choacsho isash: Tantianu, quec chochoquid dadpen icpondash.

Codinto 2 3:11

Aden: Naden nata, quequin chiaid Moisesën bedshun bëdambuen chuibanaid ënëdtequid icnubi bëdambo icmiantequid Nuquin Papan Chomiaid yec bëdamboshëcquid nec, quequin umbi chuibanaidquio nibëdantiapimbo icquid nec.

Codinto 2 3:14

Nuquin Papan dada uaid Moisesën chuibanac tantiate bunesa aton matses isadaidbo icpampic. Adquiobidi pamumëdacbimbuec isadaidbo abi tabadec. Nuquin Papan Chiampid isec onquec nëbi adquiobidi abi bëdambuen ismenuen nate tantiesa nec. Padnuen Esuquidistu uidtsëqui tantiaquidën Nuquin Papa bëdambuen ismete tantiec.

Codinto 2 3:18

Adquid icnuc: Umbi icsambuen naid bedshunash Esuquidistuded cuidadpanëdash, quequin tantiabenash Esusbimbuec bëdambocquid nuquitedi yanendac. Adsho aidënquiobi icsambuen naisa icquin abipadquid nuqui meniac aton Mayanën nuqui bëdamboshëcquid icmebanendac.

Codinto 2 4:6

Taëecquiobi ëndenquimboshë: Inchëshquio icbuedi uëshëmbo yanta, capampic Nuquin Papan. Adombuembidi Nuquin Papan Chiaid pamumëdacbimbuen tantienquiocbuedi Nuquin Papan tantiamiaido nebi. Esuquidistu aton Papapadquidquio bëdamboshëcquid nec, quequin tantiaquin utsibo chuibanquido nebi.

Cadasia 1:4

Matses abitedi icsamboec tabadsho isash nuqui icsambuen naid bedshunash Nuquin Papa bunacpadec abi tantiaquido cuidmenquio icnuec abided cuidadec Esuquidistu uënëspanëdash.

Epeso 2:2

Adquid icquin Nuquin Papa tantiesabon nacpadombuen mimbi icsambuen nabampondac. Adombuembidi podobitsi icsabon chuiquid tapa Mayan Icsa Satanas bunacpadombuen nabampondac. Aidëmbi Nuquin Papan Chiaid niacmequin icsambuen nate matses bunmec.

Epeso 6:12

Matses isadacpadquidpenquiobëd cuesnanacbimbuecquido nuquitedi nec. Mayan Icsa Satanasën iuabo isadesabëd cuesnanacbimbuen nuquitedi naic. Aidtedi abuc tabadec. Aidotedi nidaidënshun nadatiambocquin nabanquidquio yec: Abitedishun chuiquid tapa nebi, quequin icsambuen namequin iuanu, quequid aido nendac.

Pidipos 2:6

Nadquid Esus icpanëdash: Nuquin Papa padquidquiobidi Esuquidistu nepanëdash. Adquid yec: Mibëtambi namec bëdambo iquebi, quenquio icquin Nuquin Papan chiacpadombuen napanëdash.

Codosas 1:15

Nuquin Papa isadesambo icnubi abipadquidquiobidi yec Aton Mado matsesacsho Esuquidistu matsesën ispanëdash. Abitedi uabi yequi Esuquidistu abitedimbo namequid icnush aton Papabëd icpampic.

Codosas 1:27

Aden Nuquin Papan ambi matses tantiamenquio icpampidi bëdamboshëcquid Esuquidistu Isadaidpembo tantiamebempanëdash. Adoac Esuquidistu tantiaquido yansho issun Nuquin Papan cun matses caido yec bëdamboshëcquid yacno aidbëd tabadtequid nebi, quequin tantiaquin cainec tabadendac.

Timoteo 1 1:11

Adombuembidi: Esus bëdamboshëcquid yec abided cuidadec uënësaid tantiasho Nuquin Papan bëdambuen isendac, quequin Nuquin Papa bëdamboshëcquid icquin Esus chuibanquid icmiondashi.

Tito 2:13

Cun Icbo Esuquidistu ubi Nuquin Papa cuidmenquiocquid bëdamboshëcquid chote uëshë chonoc cuishonquendabi, quequin caimbudec bëdambuec tabadta, quequin chuiquin tantiameuata.

Ebedeo 1:3

Aidi aton Papapadquiobidi bëdamboshëcquidquio yec bëchamauanquiecquid nadatiambocquid neuaic. Aidëmbi nadatiambocquin Nuquin Papabëtan ambi tantiacpadombuen ambi uaid abitedimbo abi icmec nibëdantiapimbocnoc. Aidi matsesën icsambuen naid bedshunquin Nuquin Papa matses bëdambuen ismenuec abided cuidadec uënësashic abuc nidash Nuquin Papan dayun abiucquio tsadtuidpanëdash.

Ebedeo 6:4

Aden tantiamiac Esuquidistu tantiaquid icbuedi aid tantiesa yanuash Esus tantiaquid icuatiapimbo iquendac. Ënden Nuquin Papan abi tantiaquid icsho aton Mayan Bëda meniaid icbuedi caimbi.

Petedo 2 1:19

¿Umbentsëquidambi Esus chuibanquin nape? Padenquio. Ëndenquimboshë Esus chote tantiamequin Nuquin Papan Ambi Chiaid ambi oncamiaido dada uamepampic. Inchëshquio yacno tabote taboshon dectanac uëshëmbo chënquebuedi badiadec uëshëmbo yanec chënquecunnuc tabote taboaid mibitedishun istiapimbo iquec. Uispa dapa badiadte anoentsëc choec chënquecunacbimbuen Esuquidistun nidaidën chouashon Nuquin Papan oncamiaidon dada uampid chuiquin bëdambuen mibitedi tantiamepondash.

Uan 1 2:11

Abëtan Esus tantiaquid utsi chieshënquidien icsambuec tabadquid nec. Adquid yec inchëshën bëdnudshun podquied tantienquio yec capucuenniacbimbuen bëdambuen naquin tantienquio icquin icsambuen naic tabadendac.

Uan 1 2:8

Padnuen mimbi ënden tauaquin tantiondaid icnubi chiaid chuca Esuquidistun chuibampondash. Ubëd tabadquin utsi bëdambuen isquin tantiaquioquin Aidën ismepondashi. Adecbidi aid tantiaquido yec utsibotsen tantiaquidquio mibitedi nendac. Aden nabanquin icsambuen nainquio mibitedishun yanendac. Inchëshquio yanaid uëshëmbo yantebimbuec mibi iquendac.

Uan 1 5:19

Esus tantiaquid icquin Nuquin Papan: Cun bacuëbo nec, caido nebi, quequin nuqui tantiec. Nuquin Papa tantiesabotedi Mayan Icsa Satanasën iuaquin namiaido nec, quequimbidi nuqui tantiec.