Codinto 2 3:7 - El Nuevo Testamento en matsés

⁷ Nuquin Papan: Naden nata, quequin cuënoten dada uaquin chiacpadombuenuidi nainquio icquid cuidtequid matses nendac, quequin chuiquin dada uaid meniac Moisesën bëtantete bëchamauanquiec chënquec macuësh budpampic. Budsho isadaidbon bëistiapimbo icpampic. Adec chënquebuedi badedquio chënquenquio yantequidi nepampic.

Codinto 2 3:7 Iomraidhean Croise

Hechos 6:15

Aden muaquin chuiquin naimbudnubi chuiquid tapabobëtan utsibon Esteban bëisac Nuquin Papabëd icquidën bëtantete isadacbimbuec aton bëtantete uëshëbimbuec chënquesho bëisbededpanëdash.

Doma 10:4

Ënden Nuquin Papan: Naden nata, quequin chiacpadombuen matsesën nasho bëdambuen isembi, quedennedëmbi nëbi Esuquidistu tantiasho Nuquin Papan ambi chiampicpadombuen matses icsaisabimbuecnuc bëdambuen isendac.

Doma 4:15

Nuquin Papan: Naden nata, quequin chiampid niacacsho Nuquin Papan matses cuidendac. Ambi: Naden nata, quequin chiampid nibëdnuc aid niactiapimbo icnuc nuqui cuidenquio ictsiash.

Doma 5:20

Matses ambi icsambuen naid tantiamenuen ambi: Naden nata, quequin chiaid Moises dada uamepampic. Aidën chiaid chuisho tantiashi icsambuen naquido dadpenquio yampampic. Aden icsambuen naquido dadpenquioshë yansho issumbi Nuquin Papan matses tantiaquidquio icquin bëdambuen iste bumpampic.

Doma 7:10

uënësacbimbuec yanondabi. Adquid yec Nuquin Papan: Naden nata, quequin chiaid tantiaquin: Aidën chiacpadenuidi naic abi yacno ënëdenquio yec tabadebi, quequin tantiondambi. Adbuedi ambi chiampicpadec bëdambuecuidi tabadtiapimbo icsho ënenquio icquin cuidacno nësecatequid ictsenondabi.

Doma 7:22

Nuquin Papan: Naden nata, quequin Moises chuiquin dada uamiampid tantiate bunebi,

Doma 7:5

Esus tantiabi yec nuqui bunacpadenuidi naic icsapadennec. Aden nainda, quequin Nuquin Papan Moises chuiquin dada uamiampid tantiashi: Adequi icsate bunquiebi, quiash nuquitedi icsaquiopadennec. Adquid yec uënësacbimbuec icsho ënenquio icquin cuidacno nidmequin nuqui nësecatsempondash.

Codinto 1 13:10

Padnuen isaisambocquid yec bëdamboshëcquid chonoc nuqui abitedi tantiabi icbued ënëdendac.

Codinto 2 3:3

Pabadon chuibanac ubi tantiabenshun ma bëdambuec tabadte utsibon tantianu, quequin Esuquidistun tantiec. ¿Abi tantiaquido icsho issun bëdambuec tabadmenu, quequin ambi cuënoten dada uampidta mibitedi menediondash? Padenquio. Esuquidistu tantiabensho issun Nuquin Papa uënëstiapimbocquid icquin dada uacbimbuen aton Mayan Bëda abipadquidquio mibitedi meniondash.

Codinto 2 3:6

Umbi tantiaid chienquio icquin Nuquin Papan abimbo chuiquin ambi bëdambuen ismete chuca chiaid chiec nebi. Nuquin Papa matses bëdambuen ismequid Esuquidistu umbibi chuibennetiapimbo icsho Nuquin Papan Mayan Bëdan tantiamiac Esuquidistu chuibennequidquio nebi. Ambi: Naden nata, quequin chuiquin dada uamiampicpadombuen chuibanta, caidpenquio nebi. Ambi: Naden nata, quequin dada uampidtedi nabanenquio yec Nuquin Papa yacno matses tabadtiapimbo iquec. Padnuen Esus tantiasho aton Mayan meniaido yec Nuquin Papabëd tabadtequido nendac.

Codinto 2 3:8

Nëbien Nuquin Papa bëdambuen ismete chuca tantiamequid aton Mayan abipadquid meniaid ënëdenquioctequid yec bëdamboshë iquec.

Cadasia 3:10

Utsiboen: Moisesën chiampicpadombuenuidi nasho Nuquin Papan bëdambuen istsiashi, quequidëmbi abitedimbo nainquio icsho Nuquin Papan cuidtequido nendac. Naden Nuquin Papan Chiampid iquec: Umbi: Naden nata, quequin Moises chuiquin dada uamiampidtedi nainquio icsho cuidendambi, quepampic Nuquin Papa.

Cadasia 3:21

¿Min tsiuecquid tantiaquido bëdambuen isendambi, quequin Abadauan chiampid niacquinda Nuquin Papan Moises chuipampic? Padenquio. Ambi: Naden nata, quequin chiampidën ënëdenquio yec tabadtequid icnuc Nuquin Papan chiacpadombuen naic tabadenquio ictsempampic.

Ebedeo 12:18

Ënden: Nuquin Papabëd onquenu, queshun nuquin tsusedpabon nampicpadombuen mibitedishun nambo iquec. Aido ambi isaid macuësh tapa yacno chopampic. Aid macuësh nuamboshë nëdënquedopampic. Adec nëdënquenubi cuencuempambo yec inchëshquio icnubi cunquequid tapatsen icpampic.

Ebedeo 3:3

Esusquio abitedishun Icbombo icsho: Bëdamboshëcquid nec, matses dadpenshun caindac. Moisesien aden chuitiapimbo icpampic. ¿Mitsipadquio shubu uaquid icpec? Shubu uaquid yec shubun icbo nec. Adquidën aton shubun icquido namec. Shubun icquid namiaidbimbuecquid Moises nec. Esusien shubu icbobimbuecquid yec abitedimbo namequidquio nec.

Ebedeo 9:4

Aid quënë bëdamboshëcquid yacno tsadunaid bëdambo nuadnuc pichicate shocosh piu piupactsëcquid odo caidën dabiunaid icpampic. Aid quënë yacnobidi sandote dapa shocosh odo caidën dabiunaidbidi icpampic. Aid sandoten pete mana caid musucshun dayun uaid sedunte piu piupactsëcquid odo caidën dabiunaid icpampic. Aid sandote dapambidi Adonën cueste ënden teshun sananaid dëyucaid icuapampic. Aidën sandoaid utsi cuënote pada uashun Nuquin Papan: Naden nata, quequin chiaidtedi dada uaid icpampic.