Codinto 2 3:3 - El Nuevo Testamento en matsés

³ Pabadon chuibanac ubi tantiabenshun ma bëdambuec tabadte utsibon tantianu, quequin Esuquidistun tantiec. ¿Abi tantiaquido icsho issun bëdambuec tabadmenu, quequin ambi cuënoten dada uampidta mibitedi menediondash? Padenquio. Esuquidistu tantiabensho issun Nuquin Papa uënëstiapimbocquid icquin dada uacbimbuen aton Mayan Bëda abipadquidquio mibitedi meniondash.

Codinto 2 3:3 Iomraidhean Croise

Mateo 16:16

Simon Petedon: Quidistu Mesias caid Nuquin Papa uënëstiapimbocquidën Chomiaidquio yec Aidën Madombo mibi nec, caombi, capondash.

Codinto 1 3:5

¿Mitsipadquidibi Apodobëd nepe? Nuquin Papa nashunquid icquin Esuquidistu chuibennequid ubi daëdi nebi. Adquid icquin umbi chuibannac Esuquidistu tantiaquid mibitedi yanondac. Nuquin Icbon: Naden chuibanta, cacpadombuen ubi daëdshun chuibanoc.

Codinto 2 3:6

Umbi tantiaid chienquio icquin Nuquin Papan abimbo chuiquin ambi bëdambuen ismete chuca chiaid chiec nebi. Nuquin Papa matses bëdambuen ismequid Esuquidistu umbibi chuibennetiapimbo icsho Nuquin Papan Mayan Bëdan tantiamiac Esuquidistu chuibennequidquio nebi. Ambi: Naden nata, quequin chuiquin dada uamiampicpadombuen chuibanta, caidpenquio nebi. Ambi: Naden nata, quequin dada uampidtedi nabanenquio yec Nuquin Papa yacno matses tabadtiapimbo iquec. Padnuen Esus tantiasho aton Mayan meniaido yec Nuquin Papabëd tabadtequido nendac.

Codinto 2 3:7

Nuquin Papan: Naden nata, quequin cuënoten dada uaquin chiacpadombuenuidi nainquio icquid cuidtequid matses nendac, quequin chuiquin dada uaid meniac Moisesën bëtantete bëchamauanquiec chënquec macuësh budpampic. Budsho isadaidbon bëistiapimbo icpampic. Adec chënquebuedi badedquio chënquenquio yantequidi nepampic.

Codinto 2 6:16

¿Matsesën ambibi nacnenshun papa caid tantiaquidta aton Mayan Nuquin Papan meniaid icpadic? Padenquio. Abi tantiaquid yec abi tabadtequid nuquibi nec. Adec Nuquin Papa uënëstiapimbocquidbëd tabadtequido nuqui nec. Nuquin Papan dada uamiampid nad iquec: Ubi tantiaquidobëd iquendabi. Aidobëd capuendabi. Aidon Papa caid nendabi. Aido cun matses nendac, quepampic Nuquin Papa.

Tesadonica 1 1:9

Ambocquidombien ambo nidacsho ubitedi mimbi naid chioshi naden: Ambi papa canun ambi nacnenaidtedi aidon tantienquio yanac caosh. Adshumbic: Matses uaquid Nuquin Papambo uënëstiapimbocquid neque. Aidën chiacpadombuen nanuen aid tantiembi, quequin mimbi naidtedi tantiashun aidon chioshi.

Ebedeo 10:16

Chiaid utsi nëbi iquendac, quequin uëshë utsimbi chiaid chuca naden chiendambi: Umbi: Naden nata, quequin chiaid nate bunmendambi. Bëshunmenquio icquin tantiamendambi, quec Nuquin Icbo abi tantiaquido caic.

Ebedeo 8:10

Nadembidi Nuquin Papan chuipampic: Aden umbi isadaidbo nianondaid tantiaquin naden chiaid chuca aido chiendambi. Umbi: Naden nata, quequin chiaid chuca isadaidbo bëshunenquiocnoc tantiamendambi. Adoac umbi chiacpadombuen nate bunquiendac. Aden tantiamiash aidon: Cun Icbo, quequin cuënaid iquendabi. Adecbidi aido cun matsesquio iquendac.

Ebedeo 9:14

Esusën intaquëmbien Nuquin Papa yacnombo matses puduedmetequidquio nec. Nuquin Papan Mayan Bëda uënësesambo icquin dayacquio icmiac Esuquidistu icsambuen naisambo yequi matsesën icsambuen naid bedshunec abided cuidadec uënëspanëdash. Adec uënësaid icnuc nëbi naden nuqui tantiec: Umbi icsambuen naidtedi tantienquio yec bëshunquin ambi cuidtequid icbuedi Esusën mënchicaid icsho Nuquin Papan ubi cuidenquio iquec, quequin nuqui tantiec. Nuquin Papa uënëstiapimbocquidën namiaid icmenuec adec Esus uënëspanëdash.

Esusën Uan ismiaid 2:1

Naden chuiposhi: Epeso yacnoshon ubi chuibanquidën iste chuinu. Dada uata. Ubi uispa 7ted icquid cun mëdante abiucshun sananec tabote manitsintequid shocosh bëshpiu bëshpiucquid odo caid nacnenaid 7ted tabëcaid nënantanquio capuec nebique. Tantia, Epeso yacnocquido. Mibitedi chuinu.

Esusën Uan ismiaid 2:12

Naden padpiden chuiuaposhi: Pedcamo yacnoshon ubi chuibanquidën iste chuinu. Dada uata. Aton ana shëcuënuësh chështe aucbidaëdi cuënumboshë icquid cueshquebuedën naden chioshibique. Tantia, Pedcamo yacnocquido. Mibitedi chuinu:

Esusën Uan ismiaid 2:18

Naden padpiden Nuquin Papabëd icquidën chuiuaposhi: Tiatida yacnoshon ubi chuibanquidën iste chuinu. Dada uata. Nuquin Papan Madombo yec cute nëdënquequidbimbuec aton ëshë isquid isquidquio iquequi aton taë shocosh piumbocquidbimbuec nacnacquio icbuedën naden chioshibique. Tantia, Tiatida yacnocquido. Mibitedi chuinu.

Esusën Uan ismiaid 2:8

Naden padpiden chuiuaposhi: Esmidna yacnoshon ma ubi chuibanquidën iste chuinu. Dada uata. Ëndenquimboshë nidaid uabi yec ictednedi nebi. Nëbi adquid iquequi nibëdantiapimbo icquidquio nebi. Adquid yec abitedishun Icbombo icshobi chieshëmënquidon uënës uacsho chococaqui uincuenondaid nebique. Tantia, Esmidna yacnocquido. Mibitedi chuinu.

Esusën Uan ismiaid 3:1

Naden padpiden chuiuaposhi: Saddes yacnoshon ubi chuibanquidën iste chuinu. Dada uata. Nuquin Papan mayan 7tedbëta uispa 7tedbidi sananquin ismebuedën naden chioshibique. Tantia, Saddes yacnocquido. Mibitedi chuinu: Mimbi naidtedi tantiembi. Uënësacbimbuen mimbi ubi bëdambuen tantienquio iquec. Matsesën: Bëdambuen tantiaquidquio nec, mibi canubi umbien padenquio iquec.

Esusën Uan ismiaid 3:14

Naden padpiden chuiuaposhi: Daudisea yacnoshon ubi chuibanquidën iste chuinu. Dada uata. Tantia, Daudisea yacnocquido. Ubien Esusquio yec icsaisambo yec abitedishun naid tantiaquidquio nec. Adquid icquin Nuquin Papan bëdambuen iste tantiamequidquio yec abimbo chuiquidquio nebi. Nidaidbëta abitedi uaquid yec abitedishun Icbombo icquin mibitedi chuinu.

Esusën Uan ismiaid 3:22

Nëbi ubi tantiaquido utsibotsen chuinu. Umbi chuibocpadombuen cun Mayanën mibitsen tantiametsiashe. Bëdambuen tantiate bunquin umbi chuibued tantiata, quequin Esusën chuiposhi.

Esusën Uan ismiaid 3:7

Padpiden naden chuiuaposhi: Pidadedpia yacnoshon ubi chuibanquidën iste chuinu. Dada uata. Tantia, Pidadedpia yacnocquido. Icsaisambo yec abimbo chuiquidquio icquin Nuquin Papan Chomiaidën naden chuiposhi: Cun tsusedpa Dabid yampicpadquid matses namequidquio yec aid abentsëqui Nuquin Papa yacno puduedmianquid Mesias nec, utsibon: Padi, catiapimbo icnuc. Umbi shëcniaid utsin shëcnandotiapimbo iquec. Adembidi umbi shëcnandoaid utsin shëcnetiapimbo iquec.