Codinto 2 13:11 - El Nuevo Testamento en matsés

¹¹ Nëbi ënquimbi dada uaimbique. Tantia, cun utsibo. Bëdambuec cuishonquec tabadquid icnu, quec Nuquin Papan chiacpadec tabadta. Utsibobëd tantiananec bëdambuec tabadtedneta. Bëdambuec tabadnuna, cananta. Adec tabadsho isash mibitedi bëdambuec tabadmequid yec mibi tantiaquidquio Nuquin Papa mibëd iquendac.

Codinto 2 13:11 Iomraidhean Croise

Mateo 1:23

Dadan inacmaidëmbi bacuë usundoshon dada bacuë tishendac. Aidi Emanued cuënendac. Nuquin Papapadquidquiobidi matsesbëd tabadnuec choaid nec, quequin Emanued cuënendac, quequin Esus tishte chuiquin Nuquin Papan dada uamepampic.

Mateo 5:48

Abuc tabadquid Nuquin Papabimbuec bëdambocquid icta. Bëdambo icquidobëta icsambo icquidobi Nuquin Papan bëdambuen isquin tantiacpadombuembidi utsibotsen tantiata, quepanëdash Esus.

Madcos 10:49

Aden abi cuënsho tantiash nidtuidshun Esusën: Ubi cuënquid nëmbo bec cho, capanëdash. Adoaquien: Nëmbo bec cho, queque. Nidtoash nid, capanëdash utsibon.

Madcos 9:50

Sa bëdambocquid bëdambo iquec. Sa bëdambo icbuedi icsacsho ¿Mitsipaden bëdambo icmeuapec? Sa bëdambocquid casecac daëdacsho petiadquio yacbimbuec utsibobëd bëdambuec tabadta, quepanëdash Esus.

Ducas 9:61

Adshobien utsintsen nadopanëdash: Mibi tsibanec nidnun cun matsesba: Nidendabi, quequin chuitambono, Icbo, caquien:

Uanën dada uaid 17:23

Aidobëd ubi tantiananquiacpadec mibëd tantiananquiebi. Adec mibëd tantiananquiacpadec aido ubi tantiaquido utsibobëd tantiananquiendac. Adsho issun: Abembi adec tantianantiapimbo iquec. Nuquin Papan chomenëdaid Esusën namiaquien nec. Aton Papan Esus tantiacpadombuembidi Esus tantiaquido tantiec, quequin ubi tantiesabon tantiendac, Papa.

Hechos 15:29

Ambi papa canun nacnenaid ismequin pete sanaid penda. Adembidi min chidouidtsëqui chudquid icta. Adembidi min bënëuidtsëqui chudmequid icta. Adembidi nëish tëtaniaid penda. Adembidi tëshë codocaid intac icquid penda, quequin chiac umbi chiacpaden nabanec mibi bëdambo iquendac. Mibitedi tantiaquin aidtedtsëqui chiombi.

Hechos 18:21

Nuquin Papan tantiacpadec mibi isec padpidec chouatsiabi, quianec Epeso yacnouëshquio puduanec nidec cano dapa antabëdtoanec Pabado nidpanëdash.

Hechos 23:30

Aden Pabado quënën tsadunmeboshombic: Pabado cuessunnenu, quequin isadaidbon podquied cuëmanshun cainec, quesho tantiashun badedquio mibi yacno buanmembi. Adembidi: Pabado icsambocquid nec, quequin aid cuessunnenu, quequido mibi yacno nidmembi. Adoac ma ambibi Pabadon icsambuen naid mibi chuinu, queshun.

Doma 12:16

Utsibobëd tsidadash chieshënnanenquio yec bëdambuec tabadta. Ubiuidtsëqui bëdambocquid nebi, quenquio yec utsibobëd bëdambuec tabadta. Utsibon tantienquio icnuc ubentsëqui bëdambuen tantiaquidquio nebi, quenda.

Doma 12:18

Chieshëmënec icsambuec tabadte bunsho issun aid chuiquin: Bëdambuequien tabadtiad, quequin chuita.

Doma 14:19

Adquid icnuc aidën chiacpadec chieshëmënenquio yec bëdambuec tabadnuna. Esus tantiec chieshtoenquio yec bëdambuec tabadnuna, quec chuinannuna.

Doma 15:13

Nuquin Papa tantiaquido icsho mibitedi tantiaquin naden chiannembi: Aido bëdambuec tabadmequin cuishoncameta. Adembidi min Mayan Bëda nadatiambocquidën tantiamiacpadombuen cainec tabadmeta, quequin Nuquin Papa chiannembi.

Doma 15:33

Aden mibitedi tantiaquin nuqui bëdambo icmequid ma Nuquin Papa mibitedbëd icpanuna. Amen.

Doma 16:20

Mibitedi bëdambuec tabadmequid icquin mibi dëniacmequin Nuquin Papan matses icsambuen namequidquio Mayan Icsa Satanas cuenmendac. Ma Nuquin Icbo Esusën: Mibitedi tantiaquiembi, quequin mibitedi ismendac.

Codinto 1 1:10

Tantia, cun utsibo, Nuquin Icbo Esuquidistun namiaid icquin mibitedi chuinu. Mibëtan Esus tantiaquidobëd chieshënnanec cuëshcuëshëdec tabadenda. Adenquio yec Esus tantiaquid utsibobëd tsidadash tabadec: Naden nanuna, quec abentsëcshun tantiacbimbuen tantiec bëdambuec tabadta.

Codinto 2 1:4

Nuquitedi natiamiaid icsho issun Nuquin Papan uënësquio icquin bëdambo icmendac. Umbi icmiacpadombuembidi utsibo natiamiaid icsho issun umbi bëdambo icmiaidontsen: Ma aido bëdambo icmenu, queshun Nuquin Papan nuquitedi bëdambo icmendac.

Codinto 2 13:14

Adembidi: Nuquin Papan tantiaidquio nebi, quequin tantiaquiota. Adembidi: Aton Mayan Bëda ubëd iquec, quequin tantiec mibitedi tantiananquiota. Amen. Aidted chuiquin dada uaombi.

Codinto 2 13:9

Utsibon: Bëdambuen chuibanquidpenquio nec, ubi canubi: Mibi bëdambuec tabadsho isash bëdambo iquebi, quec tsadtsiabi. Mibi tantiaquin: Codinto yacnocquido icsambuen nainquio yec bëdambuec tabadquiduidquio icmeta, quequin ënenquio icquin Nuquin Papa chiannembi.

Epeso 4:12

Aden Ubi tantiaquidtedi ma chieshtoenquio yec bëdambuec tabadec nashunnanquid icmenu, quequin Esuquidistun ambi tantiacpadombuen adquido icmebanac.

Epeso 4:3

Nuquin Papan Mayan Bëdan utsibëd bëdambuec tabadte tantiamiacpadquiec Esuquidistu tantiaquid utsibobëd abentsëc yacbimbuec bëdambuec tabadta.

Epeso 6:23

Nuquin Papabëtan Nuquin Icbo Esuquidistun ma mibitedi bëdambuec tabadmequin Esus tantiaquido utsibobëd tantiananquidquio icmequin abi tantiaquidquio icmepanuna.

Pidipos 1:27

Naden mibitedi chuinu: Esuquidistun chiacpadec chieshtoenquio yec bëdambuec tabadta. Mibi yacno nidshun bëdambuec tabadsho isash: Umbi Esuquidistun naid chuibanac tantiabenondaido nec, quetsiabi. Adembidi mibitedi istanquidon mimbi naid chiec: Chieshtoenquio icquin Esus tantiec abentsëc yacbimbuec bëdambuec tabadosh. Adecbidi chieshtoenquioquin Esusën naid chuibansho tantiec bëdambuec tabadosh, quequin chuisho tantiate bunebi.

Pidipos 3:16

Nëbi Nuquin Papan tantiamiacpadec nuquitedi bëdambuec tabadnuna.

Pidipos 4:2

Tantia. Ebodiabëta Sintique chuinu. Amicananenda. Esus tantiaquid yec: Nuquin Icbo Esusën chiacpadomboen naic bëdambuec tabadnuna, cananec bëdambuec tabadta.

Pidipos 4:4

Nuquin Icbo Esus tantiec cuishonqueta. Esus tantiaquiec cuishonquequiota, caimbi.

Pidipos 4:9

Aden umbi: Naden naic tabadta, quequin chuibanondaid tantiaquin nabanta. Adembidi umbi nabansho mimbi isondaid tantiaquin nabanta. Aden nabanec tabadsho isash mibitedi bëdambuec tabadmequid Nuquin Papa mibëd iquendac.

Tesadonica 1 3:10

Aido istantiadquio iquebi. Mimbi chiaid bëdiactsëc tantiasho aidobëd tabadquin mibi tantiaquidquio icmenuen bëdambuen chuibantsiambique. Ubi ambo nidmeta, Papa, quequin Nuquin Papa ënenquiocquin badiadquidën badiadquidënquien chiannembi. Adembidi inchëshquidën inchëshquidënquien chiannembi.

Tesadonica 1 4:1

Tantia, cun utsibo. Bëdambo mibi iquec, Nuquin Papa camenuec bëdambuec tabadta, quequin umbi chiondacpadquiequi tabadta. Nuquin Icbo Esus tantiaquiec adec tabadta. Bëdambuec tabadosh, quesho tantiashun: Adquiequi tabadta, mibitedi caimbi.

Tesadonica 1 4:18

Umbi aden chuibued tantiashun abëtan Esus tantiaquid uënësaid tantiec uënësquio yec shubiquido bëdambo icmenuen umbi chuibambued chuita.

Tesadonica 1 5:13

Aido Nuquin Papan Chiaid bëdambuen tantiamequidombo nec, quequin tantiaquioquin bëdambuen ista. Adec chieshëmënenquio yec utsibobëdtsen bëdambuec tabadta.

Tesadonica 1 5:16

Aden Esus tantiec ënëdenquio yec cuishonqueta.

Tesadonica 1 5:23

Mibitedi tantiaquin Nuquin Papa naden chiannembi. Bëdambuec tabadmianquid icquin mimbi chiacpadombuen naic bëdambuec tabadquid icme. Adembidi aton tantiate yec aton mayan yec aton dada yec quenuc bëdambo icmequin bëdambuen dayun ua, Papa. Adoacsho Cun Icbo Esuquidistu choshon aido bëdambouidquio icsho istuidendac, quequin chiannembi.

Tesadonica 2 2:16

Nuquin Icbo Esuquidistubëtan Nuquin Papan nuqui tantiaquin bëdambuen isec. Adembidi: Nuquin Papa yacno Esusbëd iquendabi, quequin tantiamequin nuquitedi bëdambo icmec.

Tesadonica 2 3:1

Tantia, cun utsibo. Mibitedi ënquin chuinu. Ubitedi tantiaquin Nuquin Papa chianneta. Nidaid utsi utsiec yacno nidmeshun Pabadobëta abëd nidquido Esusën naid matses dadpenquio bëdambuen chuibanme. Mimbi bëdambuen chuimiac ubitedishun Esus tantiabenondacpadombuembidi ma utsibontsen dadpenshun Esus tantiabennu, quequin Nuquin Papa chianneta.

Tesadonica 2 3:16

Mibitedi tantiaquin Nuquin Papa naden chiannembi: Bëdambo icmianquidquio icquin Cun Icbonquio ma aido bëdambuec tabadquid icmepanuna, Papa. Aidobëd ma Esus tëshnanenquio icpanuna, Papa, quequin tantiaquin Nuquin Papa chiannembi.

Timoteo 2 2:22

Caniabon abi bunacpadombuen icsambuen naquid tanenda, mado. Adenquio yec bëdambuec tabadte bunquiota. Adec tabadquin matses ambi icsambuen naid ënmenuen abimbo chuita. Chieshtoenquio icquin Esus tantiata. Utsibobëd tantiananec bëdambuec tabadta. Nuquin Icbo Esus bëdambocquid nec, quequin tantiaquidobëtan Esus tantiata.

Ebedeo 12:14

Umbi aden chiaid tantiec utsibobëd chushcananenquio yec bëdambuec tabadta. Aden Nuquin Papan chiacpadombuen nanuna. Aidën chiaid niaquec tabadquin Nuquin Icbo bëisenquio nuqui ictsiandac.

Ebedeo 13:20

Bëdambuec tabadmianquid icquin Nuquin Papan aton Mado Esus matsesacsho matsesën uënës uaid icsho uincuenmiac nëish iua obeca abi dayun uacbimbuen abi tantiaquidtedi dayun uaquid yampanëdash. Abi tantiaquido caic: Aido bëdambuen isendambi, quequin chiaid ucudtiapimbo ictequid nec, quequin aton intac ismequin ënenquio icquin abi tantiaquido Nuquin Papa bëdambuen ismendac.

Santiaco 1:4

Aden natiamiaqui chieshtoenquio yec tabadsho bëdambuec tabadte bëdambuen tantiamequin ambi chiacpadombuen nabanquidquio mibitedi icmendac.

Petedo 1 3:11

Icsambuec tabadbuedi bëdambuec tabadnuna. Utsibo chieshënnansho issun: Padi, chieshënnanenquio yec bëdambuec tabadnuna, caindac.

Petedo 1 3:8

Tantia. Nëbi Esus tantiaquid abitedimbo chuinu. Nuquin Papan chiacpadombuen nanuna, quiash utsibobëd tantiananec bëdambuec isnanta. Cuishonquequidobëd cuishonqueta. Uënësquio yec shubiquidobëd shubita. Adec tantiananquiota. Umbi naiduidi naimbi, quenquio icquin utsibon chiacpadombuentsen nabanta.

Petedo 1 5:10

Aden utsibon chieshënquin natiamiaido yec iuec iuecpactsëc mibitedi mëyadec tabadendac. Adec tabadsho Nuquin Papan bëdamboshëcquid icmequin dayacquiocquid yacbimbuecnuc chieshtoenquio icquid mibi icmendac. Adembidi nuqui tantiaquidquio icquin ambi Esus tantiamiaido icsho abi yacno buanshun nuqui bëdamboshëcquid icmiac ënëdenquio yec Esuquidistubëd daëdash abentsëc yacbimbuecnuc tabadmendac.

Esusën Uan ismiaid 22:21

Ma Nuquin Icbo Esusën abitedi bëdambuen isquin bëdambo icmepanuna. Aidted chuiquin dada uaombi.