Codinto 2 11:3 - El Nuevo Testamento en matsés

³ Umbi chuibanac Esuquidistu tantiabuedombi nisi bëdambo isadacbimbuecquidën muaquin chiac Eban Nuquin Papan Chiaid niacquin tantienquio icpampicpaden muaquin chuibanac mimbi Esuquidistu tantienquio yampanundac, quec natiec tsadebi.

Codinto 2 11:3 Iomraidhean Croise

Mateo 24:24

Adquid uëshë icnuc: Nuquin Papan Chomiaid Quidistu nebi, quec muaquid utsi utsiec yanendac. Adecbidi: Nuquin Papan oncamiaid nebi, quec muaquid utsi utsiec iquendac. Aidon: Ubi tantiaquid icmenu, quequin ubi chieshënquidombi nadatiambocquin nabanquin ismendac. Adosho issun Nuquin Papan tantiamiaidonquiobi utsin utsinquien ubi tantienquio ictsenendac.

Uanën dada uaid 8:44

Min papabimbuecquid Mayan Icsa Satanas nec. Aid bunacpadenuidi nate bunquid yec aidën mado mibitedi nec. Ëndenquimboshë Nuquin Papan tauambuen matses uambi Mayan Icsa Satanas cuessunnianquidquio yampampic. Adquid iquec Nuquin Papan chiacpadombuen namenquio yec chieshëmënec cumapenec muaquidquio nec. Aton padibi icquid yec bëdambuen chuimenquio icquin matses muamequidquio nec.

Doma 12:8

Utsibic: Utsibo chieshtomenquio icquin Esus tantiameta, quequin chuiquid icquin: Bëdambuec tabadnuna, quequin chuibanta. Utsibic atona nibëdquido menequid icta, caid icquin cudasenquio icquin menianneta. Utsibic Esus tantiaquidon chuiquid icta, caid icquin Nuquin Papan namiacpadombuen Esus tantiaquido bëdambuen tantiaquin nabanmeta chieshenquio icquin. Utsibic daicsaido yec isedanquido yec aton shubu nibëdquido yec aton pete nibëdquido yec macho yec tsësio yec quesho bëdambuen nashunquid icta, caid icquin cuishonquequin nashumbanta.

Codinto 2 1:12

Ubitedi bëdambuec tabadquin ismequid nebi, quequin tantiec bëdambo iquebi. Matsesën tantiamiacpadpenquio yec utsibobëd bëdambuec tabadobi. Nuquin Papanquio tantiamiacpaden ismec utsibobëd bëdambuec tabadobi. Adquiecbidi mibitedibëd tabadobi.

Codinto 2 11:20

Aidon mibi caic: Iuanu. Ubi nashunta, quesho tantiash icsambuen tantiaquidbimbuec mibi iuadte bumpec. Adembidi mibi chiec: Bec cho, quesho icsambuen tantiaquidën nacbimbuen mimbi menebanec. Muaquin chiac: Mibi muaquid nec, quenquio yec mibi tabadec. Mibi icsambuen chuishunquin mamënshunaqui mibi: Padi, quenquio iquec. Aton iuabimbuecnuc mibi mëyanquin tancuesaqui: Min iuapenquio nebi, quenquio mibi iquec.

Codinto 2 11:29

Esuquidistu tantiaquid nënec daicsabudsho isash aid daicsaidbimbuec uënësquio ictednebi. Esuquidistu tantiaquid icsambuen namiosh, quesho tantiash: Icsambuen namequid cuidpashun, quec chieshec tsadtedniobi.

Codinto 2 2:17

Utsibombien dadpenshun piucquid bedteuidi bunquin Esus chuibennec. Piucquid bednu, quequin ubi yacpadquidon Esuquidistu chuibanenquio iquec. Padnuembi Nuquin Papan: Esuquidistu chuibenneta, caid icquin piucquid bedte bunenquio icquin Nuquin Papan isquin tantianubi muainquiocquin aidquio chuibennec nebi. Nuquin Papan namiaido yec Esuquidistubëd abentsëc yacbimbuec tabadquido ubitedi nec.

Codinto 2 4:2

Icsambuen nash dacuëdec ompodquidën nacbimbuen nainquio iquembi. Bëdambocquid danmianenquio icquin Nuquin Papan Chiaid utsi uaquin chuibanquin matses mua uainquiocquin abimbo chuibanembi. Aden umbi abimbo chiac tantiaquido yec: Pabado icsambuen naquid nec, quetiapimbo icnubi adembi bëdambuen chuibanembi. Nuquin Papan nuquitedi isec, quequin adembi abimbo chuibanembi.

Cadasia 1:6

Tantienquio yanosh, quequin mimbi naid chuisho tantiash tantiadempambo ictanobi. Nuquin Papan mibi bëdambuen iste bunquin tantiamiac Esus tantiec mibitedi tabadanondac. Adondaidi utsibon icsambuen chuibanaquien mimbi Esus tantienquio yanchitac.

Cadasia 2:4

Esus tantiaquid danmianquiec muaquido ubitedi tabadacno ompodash puduedpaccondash. Esuquidistu tantiasho Nuquin Papan nuquitedi bëdambuen isec, quequin cun tsusedpan chiaid niacsho tantianu, quiash umbi chuibanacno puduedpaccondash. Adec puduedshun tantiashic: Mimbi icsambuen chiec. Nuquin tsusedpa Moisesën chiampidtedi nasho Nuquin Papan bëdambuen istsiash, quenuen tantiec tabadpaccondash.

Cadasia 3:1

Nidaid cuëshë Cadasia yacnocquido bëdambuen tantiondaidëmbi pacuënnëdacbimbuen ¿Tsuntsin: Esus tantienda, cac tantienquio yano? Cueste napotiaidën dectanac abided cuidadec uënësaid Esusënuidtsëqui Nuquin Papa nuqui bëdambuen ismec, quequin mambi chuibanondac.

Cadasia 4:11

Mibitedi caic: Icsambuen naic tabadosh, utsibo quesho tantiash: Esus chuibanec abembi chonoadondabi, quiash dacuëdebi.

Epeso 4:14

Adec tabadquido yec bacuëmpin utsi utsien tantiacpaden tantiaquidpenquio nuqui nendac. Cunquequidën ëquë ëquëen tsidunacbimbuen muaquidon utsi utsien chuibansho tantiash badedquio: Abimbo caic, quec mua uadec. Aido icsambuen tantiaquido icquin chuisho tantienquio iquendac.

Epeso 4:22

Aden chuibanac Esus tantiabenash ënden mibi tabadnëdacpadec tabadenda. Icsambuen naquid iquequi: Bëdambocquid nebi, quec mibibi mua uadnëdacpadec tabadenda.

Epeso 6:24

Ënenquio icquin Nuquin Icbo Esuquidistu tantiaquid abitedi Nuquin Papan bëdambuen isquin ma chieshtoenquiocquid icmepanuna, quequin tantiembi. Aidted chuiquin dada uaombi.

Codosas 2:18

Nuquin Papabëd icquido tantiaquid utsibon: Ubien bëdamboshëcquid nec, quesa nebi, quequin muaquin chuisho tantienda. Ushquin isacbimbuen isombi, quequin muaquin chuisho adembidi tantienda. Adembidi: Ubien dadpen tantiaquidquio nec, quequin chuisho tantienda. Aidon: Umbi tantiacpaden nainquio yec mibi icsambo iquec, quequin icsambuen chuisho tantienda.

Codosas 2:4

Aden umbi chianniaid icnuc utsibon abimbo chiacbimbuen chuiquin: Umbi chiaid tantiata, quequin muaquin Esuquidistupenquio chuibansho ma tantienquio mibitedishun icpanu, quequin tantiaquin aden mibitedi chiec nebi.

Codosas 2:8

Naden muaquidon icsambuen tantiamenushe. Abimbo tantiaquiec tabadta. Ëndenquio ambibi tantiaquin matsesën chiaid ambembi chiec onquiampicpaden nëbi icquidën Esuquidistu chuibanenquio icquin chuisho tantiashun: Nuquin Papan Chiaidpenquio chiec nec, quequin tantiata. Adembidi Mayan Icsa Satanasën icsambuen namenuen tantiamiacpadombuen aidon muaquin chiaid tantienda.

Tesadonica 1 3:5

Umbi istanenquio yac utsin chieshënac ¿adecbidida Tesadonica yacnocquido chieshtoenquio icpatsiashba? quequinuidtsëqui tantiec tsadtiapimbo iquebique. Istan, caondambi Timoteo chuiquin. Ubitedi adometsiash, quequin tantienquio icshobi: Icsamequin tannu, quequid Mayan Icsa Satanasën namiac chieshtoshon Esus tantienquio yanacsho isash abembi chonoadquin chuibanondambi, quequin tantiamane, queshun: ¿Ada umbi chuibanac Esus tantiabenondaido bëdambuec tabadeque? Istan, caondambi Timoteo chuiquin.

Timoteo 1 1:3

Tantia. Mibi chuinu, mado. Nidaid cuëshë utsi Masedonia caid yacno nidquin umbi chiondacpadquiec Epeso yacno icta. Mibi yacnocquidon: Nuquin Papan Chiaidquio chuinu, quebuedombi aid abimbo chienquio icsho tantiashun naden chuita: Nuquin Papan Chiaid chuiquimbi muaquin ambembi chiaid utsibëta natsusuaquin chuibanenda, cata.

Timoteo 1 2:14

Aden dadabëta chido uacsho issumbien Mayan Icsa Satanasën: Icsambuen namequin tannu, queshun mua uac icsambuen naquin chidomba Nuquin Papan Chiaid niacpampic. Adan padabi icpampic. Aden tantiaquin: Dadan chido chuibanquid nec, caimbi.

Timoteo 2 3:13

Padnuen chieshëmënquidobëd bëdambocquid danmianquiec muaquido icsambo icbuedi utsibontsen mua uaid icbuedi buëdanquiec muauannanec abitedi icsamboshë yanendac.

Tito 1:10

Tantia. Chuinu. Nuquin Papan chiacpadombuen naisabo dadpen iquec. Abimbo caic, camenuec abimbo chiacbimbuec aido onquec. Dadpenshun isadaidbon nacpadombuen ma nanu, quequin: Shui dëbid dëtemeta, quequin muaquin chuibanec.

Ebedeo 13:9

Esusën naidquio chuinu, quequidën utsi chiec muaquin chuibansho tantienda. Padnuen mibi bëdambuen isquin nashunquid: Nuquin Papa tantiaquidquio ma yannu, quequin mibi chuibanquidën chuibanacpadombuen nabanta. Utsibic: Nëid petemaid nec. Nëid petequid nec, quequin tantiaquin naquid yec Nuquin Papa tantiaquidquio yanenquio mibi ictsiac.

Petedo 2 3:17

Tantia, cun utsibo. Umbi tantiaido icsho mibitedi chuinu. Abimbo tantienquio icquin Nuquin Papan Chiaid niac niacquidon muaquin chuibanendac, ubi quesho tantiashun: Esus tantienquio yanmane, queshun ënenquio icquin aid tantiec bëdambuec tabadta.

Petedo 2 3:3

Naden chiaidtsen mibitedishun tantiata: Esus nidaidën padpidec chote nëbi yannuc Esus tantiesabon abi icsate bunaiduidi naic tabadquin mibitedi icsambuen chuishunquin mamënshunendac.

Uan 1 2:18

Tantia. Cun bacuëbobimbuecquido icsho mibitedi padpiden chuinu. Nëbi nëid nidaid naimëdbudendac. Adec naimëdbudabicnuc Esuquidistu chieshënquidquio icsamboshëcquid choendac, quequin chuibansho mimbi tantiondac. Adecbidi Esus chieshënquidombo utsibo dadpenquio chochoacsho issun: Nëbi nëid nidaid naimëdte yanec, quequin nuqui tantiendac.

Uan 1 4:1

Tantia, cun utsibo. Umbi tantiaido icsho mibi chuinu. Matsesën: Nuquin Papan Mayan Bëdan tantiamiaidquio nebi, quequin chuibansho: Abimbo chiec, quequin badedquio tantienda. ¿Nuquin Papan Mayanën tantiamiaidënquiobida chuipec? quequin aidën chuibansho tantiata. Nuquin Papan oncamiaid nebi, quequin chuiquido nidaid utsi utsiec yacnoshon dadpenshunquio ambembi chuibaneque.

Udas 1:4

Esus tantiaquido danmianquiec mibitedi icsambuen namenuec mibi yacno muaquido puduedac caosh. Ambi ëndenquimbo chuiquin dada uamiampicpadombuen Nuquin Papan cuidtequidombo aido nendac. Adquido icquin: Esuquidistu Nuquin Icbopenquio neque. Aidën chiaid nainquio icnuna. Nuquin Papan bëdambuen isaidombi Ambi Chiaid niacniacquin abi bunaiduidi naquin ambi natemaidi nasho issun nuqui cuidenquio iquec, quequin chiec cumapenec muaique. Aden chiec muasho tantienda.

Esusën Uan ismiaid 12:15

Adnubien nisi dapabimbuecquidën: Aid chido cuessunnechitono, quequin aton ana shëcuënshun chomequin acte dapa chido yacno nua chomeposh.

Esusën Uan ismiaid 12:9

Aden cuenmiaquien matses tabadacno nidaidën nisi dapabimbuecquid aton iuabobëdi budbudposh. Aidi ëndenquimboshë icpampid Mayan Icsa cashumbic Satanas quequin cuënaid neposh. Aidëmbi nëbi matses abitedimbo mua uaquin icsamequin iuate bunquiec.

Esusën Uan ismiaid 20:2

Adshumbic nisi dapabimbuecquid bedposh. Aidi ënden icpampid Mayan Icsa cashumbic Satanas caid neposh. Bedtanquimbic shocosh bucu nacnenaid ambi sananaidën datanetanquin uidën uaposh, ma seta midtedi matanmec tsadnu, queshun.