Codinto 2 1:7 - El Nuevo Testamento en matsés

⁷ Utsin natiamiaid icquimbi chieshtoenquio icquin abi Esus tantiec, quequin mibitedi tantiec tabadebi. Ubitedi natiamequin chieshënacpadembidi mibitedi chieshënquin natiamesho issun Nuquin Papan nuquitedi bëdambo icmequin chieshtoenquio icmendac, quequin tantiembi.

Codinto 2 1:7 Iomraidhean Croise

Mateo 23:30

Adoshombic: Nëmbo cun tsusedpabon chieshënquin cuessun secampid chococac. Aidbëd tabadquin umbien Nuquin Papan oncamiaido cuessunnemenquio ictsennëdac, queshun mimbi aido chocoquiacno nacnempec.

Codinto 1 10:13

Esus tantiaquidquiobida neque. Isnu, queshun mëmuntiapimbo icnuc utsibo natiamiampicpaden mibitedi tanquin natiamiambo iquec. Abi tantiaquid icsho Nuquin Papan mëmuntiapimbo icnuc tanmequin mëyadmetiapimbo iquec, quequin nuqui tantiec. Adec natiamiantequid icnuc chieshtonoshe, queshun Nuquin Papan mibitedi tantiaquin chieshtomenquiocquin dayacquio icmendac.

Codinto 2 1:14

Aden umbi dada uaid isquin bëdambuen abitedi tantiabi icbuedëmbi Nuquin Icbo Esuquidistu padpidec chouanuc mibitedishun bëdambuen tantiendac. Pabado bëdambuec tabadquidquio nec, quequin mibitedishun chiendac. Umbitsen adembidi: Codinto yacnocquid Esus tantiaquido bëdambuec tabadquido nec, quequin chiendambi.

Codinto 2 12:20

Mibi yacno nidshun isac mibitedi bëdambuec tabadenquio icchitotsiash, quequin dacuëdquin umbi tantianubi mimbi: Pabadon ubi chushcanushe, quequin tantiabededtsiash. Mibitedi nadec tabadsho chushcatsiambi. Nëidic chushcananquido. Utsibic utsin na dadpen icsho isash bedte bunec chieshëmënquido. Utsibic nëishëmënquido. Utsibic: Ubiuidtsëqui bëdambo iquebi, quequido. Utsibic utsi icsambuec tabadaid chuinanquido. Utsibic: Utsibo icsaiduidi chuiquido. Utsibic: Ubi bëdambocquid icnubi aid icsambocquid nec, quequido. Utsibic ambi tantiacpadpenquiocquid icsho isash cumapenec cuëdcuededquido. Adoquido icsho chushcatsiambi, quequin chuiquin dada uaic nebi.

Codinto 2 7:9

Adecbidi nëbi bëdambo iquec cuishonquebi. Dada uaquin mimbi uënësquio icmiac ambi icsambuen naid ënquin Nuquin Papan chiacpaden nabanec tabadosh, quequin Titon chioshi. Aden chuisho tantiashun: Nuquin Papan namiacpaden mibi uënësquio icmequin mibi icsabudmiambo iccombi. Uënësquio icmiaqui mibi bëdambo yanoc.

Timoteo 2 2:12

Aden chieshënquin natiamiaqui chieshtoenquio icquin abi tantiec uënësacsho Esusën ambi namiacno tabadmendac. Esus tantiaquidpenquio nebi, quequid icsho: Adembidi Umbi tantiacmaido nec, quequin Esusën Nuquin Papa chiendac.

Timoteo 2 3:11

Aden chuibennesho issun chieshënondashi. Nëidted shubu dadpen icquid yacnoshon ubi chieshënondaid mimbi tantiec. Antioquia yacnoshon. Adembidi Iconio yacnoshon. Adshobini shubu dadpen icquid utsi Disteda yacnoshonquio cuessunneuidquiopondash. Adshobi Nuquin Icbon nac uënësenquio icpondabi.

Santiaco 1:12

Adecbidi natiamiantequid icnuc Nuquin Papan Chiaid niaquenquio yec chieshtoenquio icquin abi tantiaquid icsho Nuquin Papan bëdambo icmendac. Adoshombic ambi chiampicpadombuen: Bëdamboshëcquid menequin Umbi chiaid niaquenquio yec mibi ubi tantiaquiec tabadoque. Ubëd ënëdenquio yec tabadtequid mibi icmenu, caindac Nuquin Papan abi tantiaquido chuiquin.

Esusën Uan ismiaid 1:9

Esusbëd iccondaidquio Uan nebi. Mibëtan Esus tantiaquid yec min utsi nebi. Esus tantiaquid icsho Nuquin Papan namiaido yec aidbëd tabadtequido nuqui nec. Esus tantiasho mibi natiamequin chieshënacpadembidi Esus tantiesabon chieshëmpondashi. Adoaqui Esusën namiacpadec chieshtoenquio icquin abi Esus chuibenniondambi. Adsho issun Esus chieshënquidon quënën tsadunacbimbuen cuenmenquio icnuen acte dapa mad caid nidaid nacnëdquid tapa Padmos caidën tsadunondac abi tsadec nebi.