Codinto 2 1:12 - El Nuevo Testamento en matsés

¹² Ubitedi bëdambuec tabadquin ismequid nebi, quequin tantiec bëdambo iquebi. Matsesën tantiamiacpadpenquio yec utsibobëd bëdambuec tabadobi. Nuquin Papanquio tantiamiacpaden ismec utsibobëd bëdambuec tabadobi. Adquiecbidi mibitedibëd tabadobi.

Codinto 2 1:12 Iomraidhean Croise

Hechos 23:1

Adoaquien isadaidbon chuiquid tapabo iccuededsho isquin naden Pabadon chuipanëdash: Cun utsibo, umbi naid chuibannu. Tantiata. Nuquin Papan isquin tantianubi ambi: Naden nata, quequin chiaid nabanquidquio nebi, quepanëdash.

Hechos 24:16

Aden tantiaquin Nuquin Papan: Bëdambuen mimbi naic, ma ubi canu, queshun bëdambuen nabanec tabadebi. Adembidi matsestedishun: Bëdambuen mimbi naic, ma ubi canu, queshun adombuembidi bëdambuen nabanec tabadebi.

Doma 9:1

Cun matses isadaidbo tantiaquid Nuquin Papa nec. Aden abi tantiaquid cun matsesën bëdambuen tantienquio iquec, quiash uënësquio yec shubitiadquio iquebi. Muainquio iquebi. Esuquidistu tantiaquid icsho Nuquin Papan Mayan Bëdan tantiamiaid icquin abimbo chiec nebi.

Codinto 1 1:17

Ubi tantiaquido acten mentobanta, quequin Esuquidistun chiambo iccondashi. Adoenquio icquin: Matsesën icsambuen naid bedshunec abided cuidadec Esuquidistu uënëspanëdash, quequin Chiaid Bëda chuibenneta, caid icquin aden chuibennec nebi. Bëdambuen tantiaquidquio nebi, quequin chienquio icquin: Nuquin Papa matses bëdambuen ismenuec Esuquidistu abided uënëspanëdash, quequin ma utsibontsen tantianu, queshun aidquio chuibennec nebi.

Codinto 1 12:8

Nuquin Papan Mayanën namiac bëdambuen tantiaquin chuibanquid utsi utsiec iquendac. Utsibobic Nuquin Papan Mayanën namiac ambi dadpenquio bëdambuen tantiaid chuibanquido iquendac.

Codinto 1 15:10

Adec ubi icshobi Nuquin Papa bëdambocquid icquin Esus tantiaquid yanmeshun abi bunacpadombuen bëdambuen isquin ubi ambembi nabanmenquio iccoshi. Adenquio icquin Esusën: Ubi chuibenneta, caid utsibon abitedi chuibennenquiocnobi umbimbo cumapenec chonoadquin chuibenniombi. Aden umbi tantiacpaden nainquiocquin Nuquin Papa bëdambocquid icquin nashunac dayacquiocquin chuibenniombi.

Codinto 1 2:13

Aden Nuquin Papan tantiamiaid icquin aton Mayanën tantiamiacpadombuen chuibanec nebi. Umbibi tantiabenshun cumapenen tantiaquid nebi, quenquio icquin chuibanec nebi. Aden chuibanenquio icquin Nuquin Papan Mayanën tantiamiaidquio icquin chuibanec nebi.

Codinto 1 4:4

Nëbi umbi icsambuen naid tantienquio iquembi. Aden tantiequi: Icsambuen naisambo nebi, quetiapimbo iquebi. Nuquin Icbombien umbi naidtedi tantiaquin abimbo chiendac.

Codinto 1 5:8

Adquid icnuc Esus tantiaquido icquin ambi icsambuen naid ënaid tantiamequin pan bidiscamiabicquid pec tabadquin nuquitedi: Icsambuen naquid iccondaidi nëbi bëdambuen naquin abimbo chuiquid icnuna. Adquid icquin icsamboshë icquido yec chieshëmënquido tabadacpaden nabanenquio icnuna.

Codinto 2 1:17

¿Otacquio tantiaquin: Nidenquio iquebi, quequin Esus tantiesabimbuec muaquindambi chuidionda? ¿Adembidi Esus tantiesabo bunacpaden nanuen muaquindambi chuidionda? Mambi adenquio icquin abimbo chiondac.

Codinto 2 11:3

Umbi chuibanac Esuquidistu tantiabuedombi nisi bëdambo isadacbimbuecquidën muaquin chiac Eban Nuquin Papan Chiaid niacquin tantienquio icpampicpaden muaquin chuibanac mimbi Esuquidistu tantienquio yampanundac, quec natiec tsadebi.

Codinto 2 2:17

Utsibombien dadpenshun piucquid bedteuidi bunquin Esus chuibennec. Piucquid bednu, quequin ubi yacpadquidon Esuquidistu chuibanenquio iquec. Padnuembi Nuquin Papan: Esuquidistu chuibenneta, caid icquin piucquid bedte bunenquio icquin Nuquin Papan isquin tantianubi muainquiocquin aidquio chuibennec nebi. Nuquin Papan namiaido yec Esuquidistubëd abentsëc yacbimbuec tabadquido ubitedi nec.

Codinto 2 4:2

Icsambuen nash dacuëdec ompodquidën nacbimbuen nainquio iquembi. Bëdambocquid danmianenquio icquin Nuquin Papan Chiaid utsi uaquin chuibanquin matses mua uainquiocquin abimbo chuibanembi. Aden umbi abimbo chiac tantiaquido yec: Pabado icsambuen naquid nec, quetiapimbo icnubi adembi bëdambuen chuibanembi. Nuquin Papan nuquitedi isec, quequin adembi abimbo chuibanembi.

Codinto 2 8:8

Umbi chiacpadombuen meneta, quecpenquio nebi. Utsibon menequin nashunaid chuisho tantiashun mimbi atona nibëdquido tantiaquioquin menetiadquio ictsiash, quequin chiec nebi.

Cadasia 6:4

Adenquio yec mibibi datantiadta. Adashic: Nuquin Papan chiacpadec tabadquid nebi, quiash adecbidi bëdambo icta. Utsibo icsambo icnubi ubiuidtsëqui bëdambocquid nebi, quenda.

Epeso 6:14

Aid cacunmec chieshtoenquiocquid icnuec Nuquin Papan Chiaidquio nacnëshëdacbimbuen abimbo tantiec tabadtedneta. Adecbidi ambi cudasënquin dayun uaid yec tsasimbocquid shictoncacbimbuec chieshtoenquio yec bëdambuec tabaduata.

Pidipos 1:10

Aden tantiamiac: Nadec tabadec bëdambo ictsiabi. Adec tabadenquio yec icsambo ictsiabi, quequin bëdambuen tantiendac. Aden tantiaquid yec chieshtoenquio icquin Esus tantiec bëdambuec tabadendac. Adec tabadnubi abi chote uëshën choshon Esuquidistun: Bëdambuec mibi tabadoc, mibi caindac.

Tesadonica 1 2:10

Esus tantiaquido icquin mibitedishun isnubi Nuquin Papan Chiaid niaquenquio yec bëdambuec tabadondabi. Utsibo: Pabado chedo icsambuec tabadquido nec, quetiapimbo icnuc bëdambuec tabadondabi. Adshobini mimbi ispondac. Adembidi Nuquin Papantsen ispanëdashi.

Timoteo 1 1:5

Adshumbic aidobidi naden chuita: Bëdambuen tantiaquid yec ma matses bëdambuec tantianannu, queshun Nuquin Papan Chiaidquio chuita. Adoac Nuquin Papabëta Esus bëdambuen tantiec tabadec matses bëdambuec tantianantsiash, cata, mado.

Tito 2:7

Bëdambuec tabadquin tantiamequin ismenu, quiash bëdambuec tabadta. Adembidi icsainquio yec bëdambuec tabadquin ismeta. Adembidi mamënshunmenquio icquin bëdambuen chuiquin tantiameta.

Ebedeo 13:18

Ubitedi tantiaquin Nuquin Papa chianneta. Nuquin Papan: Mimbi icsambuen naic, canushe, queshun bëdambuen tantiaquin naic tabadebi, quioshe. Adembidi bëdambuen tabadme, Papa, cata.

Santiaco 4:6

Aidëmbi nuquitedi tantiaquioquin nashunec. Adquid icnuc Nuquin Papan dada uamiampid nad iquec: Utsibo tantienquio icquin aton nauidtsëqui nasho: Icsambo iquec, caindac Nuquin Papan. Utsimbien atonauidtsëqui tantienquio icquin utsibotsen tantiaquin nashunsho Nuquin Papan bëdambuen isquin nashunendac, quequin chuiquin dada uamepampic.

Petedo 1 3:16

Aden chuibanquid yec: Ubiuidtsëqui bëdambo iquebi, quenquio icquin bëdambuen isquin chuibanta. Aden icsambuen naid ënash bëdambuen nabanec mibitedi tabadsho isash chieshëmënquid nadtsiash: Esus tantiec bëdambuec tabadquidobi icsambuen chuiquin muauachitombi, quec dacuëdendac.

Petedo 1 3:21

Aid acte cubudnëdaid tantiaquin acten mentomete nec, quequin nuqui tantiec. Nëbi nuqui bëdambuen isquin mënchicaido icquin acten mentomec. ¿Nuquin dadan icquid bëchish ucquinda nuqui acten mentomedi? Padenquio. Nuquitedi acten mentomec Nuquin Papa naden chuiquin: Umbi icsambuen nabanaidtedi bëchish ucacbimbuen mibi tantiembique. Ubi bëdambuen ista, quequin acten mentomec. Aden abi tantiasho Nuquin Papan uincuenmenëdaid icquin Esuquidistun nuqui cuidmenquio iquec.