Codinto 1 4:15 - El Nuevo Testamento en matsés

¹⁵ Mibitedi Esus tantiamenuen chuibanquido dadpenquio 10 midted icnubi min papabimbuecquid daëdpactsëc iquec. Ubien mibitedishun papabimbuecquid nec. Umbia: Esuquidistu abided cuidadec uënëspanëdash, quequin Chiaid Bëda chuibanac aid tantiaquido yanash Esuquidistubëd abentsëc yacbimbuec tabadquid mibitedi yanondac.

Codinto 1 4:15 Iomraidhean Croise

Doma 15:20

Esuquidistun naid Chiaid Bëda chuibanacmanombo chuibennetiadquio iquebi. Utsibomba Esusën naid chuibanacno nidte bunenquio iquebi.

Codinto 1 1:30

Adquid icnuc Nuquin Papanuidtsëqui tantiamiac mibitedi Esuquidistubëd abentsëc yacbimbuec tabadquido nec. Adembidi aidëmbi nuquitedi bëdambuenshë tantiaquid icmequin abimbo chuiquid icmec. Adoshon icsambuen naisabimbuecnuc Esusën Nuquin Papa nuqui bëdambuen ismec. Adoaid yec Esuquidistubëd bëdambocquid icsho cuidenquio ictequid Nuquin Papa yacno tabadtequido nuqui nendac. Esus abided cuidadaid icnuc Nuquin Papan nuqui cuidenquio iquendac,

Codinto 1 15:1

Tantia, cun utsibo. Esuquidistun: Ubi chuibenneta, caid icquin mibitedi umbi chuibanondaid bëshunenquio icquin tantiadonec tabadta. Umbi Esuquidistu abided cuidadec uënësaid Chiaid Bëda chuibansho tantiashun mimbi tantiabempondac. Adondashun chieshtoenquio icquin aid tantiadonec mibitedi tabadec.

Codinto 1 3:10

Nuquin Papan ubi bëdambuen isquin: Esuquidistu mimbia chuiban. Ma tantianu, cac mibitedi chuibanondambi. Shubu uanun buintad bëdambocquid teshun aidba tabëcacbimbuen umbia chuibanondambi. Adshumbic utsibontsen adombuembidi aidbidi chuibenneuaic. Aden chuibennequidon: ¿Adambi bëdambuen shubu uapoba? quiacbimbuen tantiac bëdambo ictsiash.

Codinto 1 3:6

Tiedën pete ëshë siacbimbuen mibitedi Nuquin Papan Chiaid: Ma Esuquidistu tantiaquiono, queshun chuibanondambi. Iuecash Apodotsen mibi yacno nidshun tiedën nidtsinaid: Ma bëdambuec caninu, queshun acte machiuindoniacbimbuen: Esuquidistu ma udictsëc tantiaquiono, quequin chuibanuapanëdash. Aden ubi daëdshun chuibannubi pete ëshë canimiacbimbuecnuc Nuquin Papan mibitedi tantiamebampanëdash.

Codinto 1 3:8

Tied icbon abi tied nitsinshunquidbëta abi neshcashunquid bëdambo icmequin menendac. Adoacbimbuen ambi bëdambuen nabanaidtedi tantiaquin ambi tantiacpaden bëdambo icmequin Nuquin Papan bëdambocquid menendac.

Codinto 1 9:12

Chuibanquid utsibo petebëta actequid menebanquimbi ubia mibi chuibanondaidquio icsho menetiadquidi menianenquio mibitedi icpondac. Aden petebëta actequid menenquio yaqui: Bec cho quetiadquidi: Umbi: Esuquidistu abided cuidadec uënëspanëdash, quequin Chiaid Bëda chuibansho tantiatiapimbo icnushe, quiash: Bec cho, quequin chienquio iccondambi.

Codinto 1 9:14

Adombuembidi abi tantiamequin Esuquidistu chuibanquido icsho: Ma ambi chuibanaidon nashunnu, quequin Nuquin Icbon tantiec.

Codinto 1 9:16

Ubiuidtsëqui bëdambocquid nebi, quenquio icquin Esuquidistu chuibennequid nebi. Esuquidistun: Ubi chuibenneta, cac aidquio chuibennec nebi. Aden aid chuibennenquio yanash Nuquin Papan cuidtequid ictsiabi.

Codinto 1 9:18

Cuishonquequin Esuquidistu chuibennec nebi. Esus chuibennequid Esus tantiaquidon nashunquid, quequin chiaid icnubi: Mitsana bec cho, quenquio icquin chuibennec nebi. Aden: Umbi tantiacpaden ubi mitsana mene, quenquio icquin Esuquidistu chuibennequidquio nebi.

Codinto 1 9:23

Adec tabadquin umbi Esuquidistu chuibanac aid tantiaquido yanash ubëdi bëdambuec tabadendac, quequin tantiembi.

Codinto 2 4:5

Umbi naid tantiamenuen chuibanesa nebi. Esuquidistu Nuquin Icbo nec, quequin chuibanquidquio nebi. Aid tantiaquid icquin mibitedi tantiamenuen chuiquin mibi nashunquid ubitedi nec.

Cadasia 3:24

Aden Moisesën chuiquin dada uampid niacniaquec icsambuec tabadsho Nuquin Papan ubi bëdambuen istiapimbo iquec, nuqui camenuen Ambi Chiaid Moises dada uamepampic. Adshumbic Esuquidistu choacsho aid tantiaquido Nuquin Papan bëdambuen isec, quequin nuqui tantiec.

Cadasia 3:25

Aden tantiaquin nëbi Moisesën isadaidbo chiampidtedi nasho Nuquin Papan matses bëdambuen istsiash, quenquio nuqui iquec. Esusuidtsëqui tantiasho Nuquin Papan nuqui bëdambuen isquin bëdambo icmec, quequin nuqui tantiec.

Cadasia 4:19

Cun bacuëbobimbuecquido icsho mibitedi tantiac uënësquio iquec. Anin paëmbo icnuc natiaquimbi aton bacuë tishacbimbuen natiaquin mibitedi tantiaquiembi. Esuquidistubimbuec icpashun, quequin tantiembi.

Timoteo 2 4:3

Iuecshun Nuquin Papan Chiaidquio matses dadpenshun tantiatiapimbo iquendac, quequin tantiashun aden abimbo chuibanta, mado. Aden tantiatiapimbo icquidën Nuquin Papan Chiaidpenquio chuisho tantiash: Ubi bunaidquio mimbi chieque. Tantianu. Ubi chiec cho, quequin muaquid utsi utsien abi yacno puduedmendac.

Tito 1:4

Umbi chuibanac Esuquidistu tantiaquid mibitsen yampondac, Tito. Adquid yec cun madobimbuecquid icsho mibi chuiquin dada uaimbique. Isec onqueta. Mibi tantiaquin mibi Nuquin Papabëd tabadmequid Esuquidistubëta Nuquin Papa naden chuiquin: Tito bëdambuen isquin bëdambuec tabadmeta, quequin chiannembi.

Pidemon 1:19

Aidtedi meneuaimbi, quequin abimbo chuiquin umbimbo cun mëdanten dada uaimbique. Isec onquequin tantiaquiota. Umbi nashunquin Esuquidistu chuibanac aid tantiaquid yanash Nuquin Papa yacno puduedtequid Pidemon nec, queshun ubi cuidquin mimbibi ubi mene, quetiadquidi mibi chienquio iquembi.

Santiaco 1:18

Chiaid Bëda Esusën naid abimbo chuibansho tantiashun ubi tantiabenquido chuca uaquin: Cun bacuëbo nec. Ëbëd tabadtequid nec, caindambi, quequin Nuquin Papan tantiapampic. Ambi matses uaidotedi chienquio icquin abi tantiaquidouidtsëqui tantiaquin aden chuipampic.

Petedo 1 1:23

Ambi chiaidquio tantiamequin chucauaido mibitedi nec. Dadan chudac bacuë usundoshon tishac chuca uaid ictiapimbo yec uënëstequid icnuc Nuquin Papan chucauaido mibitedi nec. Aden mibi chuca uaquid Nuquin Papa nibëdantiapimbo icquid icnuc ambi Chiaid adecbidi bënnudtiapimbo iquec.