Codinto 1 3:18 - El Nuevo Testamento en matsés

¹⁸ Adec aid tabadtequid iquequi mibibi mua uadec tabadenda. Matsesën ambibi cumapenen tantiaquin chuibanaid tantiash: Tantiaquidquio nebi, quenda. Matses dadpen tantienquio icquidbimbuecquid icta. Matsesën tantiacpaden nainquiocquin abimbo tantiaquin nabanquid yec tantiaquidquio mibitedi yanendac.

Codinto 1 3:18 Iomraidhean Croise

Mateo 13:22

Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi dadpen tantiaiduidi tantiec chieshtoendac. Utsibic ambi bedteuidi tantiaquin nabanec abibi mua uadec chieshtoshon tantienquio yanuaindac. Adquido Nuquin Papan Chiaid tantiesabo yanshun bëdambuec tabadaid utsibo tantiamenquiocquid yanendac. Adquid nisanquidën bëtinac bacuëtiapimbo yacbimbuecquido nec.

Mateo 18:4

Aden umbi chiacpadombuen nëid bacuën nacbimbuen nasho mibi Nuquin Papan: Bëdamboshë iquec, caindac.

Madcos 10:15

Abimbo chiembique. Tantia. Nëid bacuën amë badedquio tantiacpadombuen Nuquin Papan Chiaid tantiesa yec Nuquin Papan namiacno puduedtiapimbo iquendac, quepanëdash Esus.

Ducas 18:17

Adombuembidi: Abimbo chiembique. Tantia. Nuquin Papan namiacno tabadte iquec, quequin chiac nëid bacuën badedquio tantiacbimbuen tantiaquid yec Nuquin Papan namiacno puduedtequid iquendac. Aden tantiesa ambo puduedtiapimbo iquendac, quepanëdash Esus.

Ducas 21:8

Adoaquien Esusën: Tantia. Mibi chuinu. Muaquidoba choendac. Aidon chuisho tantiash: Abimbuen cachitec, quec mua uadenda. Adquido choshon: Nuquin Papan Chomiaidquio Quidistu caid nebi, quequin muaquin chiaqui matses dadpenshun: Ai, abimbo mimbi caic, capendac. Aden chuibanquido icsho tsibanenda. Adembidi utsin: Nuquin Papan matses abitedi cuidte uëshë nëbi nec, quequin chuisho tantienda.

Doma 11:25

Cun utsibo, tantia. Chuinu. Nuquin Papan ambi matses tantiamenquio icpampidi nëbi tantiamequin mibitedi chuinu. Nuquin Papan isadaidbo pacuënnëdacbimbuecnuc icmiac tantiate bunenquio iquec. Nuquin Papan tantiactedishun matses utsibomba dadpenshun Esus tantiambic isadaidbontsen dadpenshun Esus tantiabenendac.

Doma 12:16

Utsibobëd tsidadash chieshënnanenquio yec bëdambuec tabadta. Ubiuidtsëqui bëdambocquid nebi, quenquio yec utsibobëd bëdambuec tabadta. Utsibon tantienquio icnuc ubentsëqui bëdambuen tantiaquidquio nebi, quenda.

Codinto 1 15:33

Mua uadenda. Matsesën chiaid nad iquec: Icsambuen naic tabadquidobëtan nabanquin bëdambuen nabanaid ënendac, quequin chuipanëdash.

Codinto 1 3:17

Nuquin Papa tabadte shubu bëdamboshëcquid mibitedi nec. Adquid icbuedi mibibi min dada icsauadquid icsho Nuquin Papan cuidtequid nendac.

Codinto 1 4:10

Ubitedi Esuquidistun: Ubi chuibennequid icta, caido icquin chuibansho tantiash: Ambembi chiec onquequido nec, quepec. Mibitedien Esus tantiaquido icsho: Bëdambuen tantiaquidquio nec, quequin mibi tantiec. Ubitedi caic: Tantienquiocquid nec, quenubi mibitedi: Tantiaquidquio mibi nec, mimbi ubi capec. Matsesën ubitedi tantienquio icnubi mimbitedi ubi tantiaquiec.

Codinto 1 6:9

¿Icsambuen naic tabadquido Nuquin Papan namiacno tabadtiapimbo iquec, quequin tantienquioda mimbi icpe? Mua uadenda. Nadquidtedi Nuquin Papa yacno tabadtiapimbo iquendac. Nëidic piucquid bedec chudadquido. Utsibic ambibi nacnenshun papa caquin tantiaquido. Utsibic aton bënëpenquio chudmequido. Utsibic aton chidopenquio chudquido. Utsibic chido daëdi dachudnanquido. Utsibic dada daëdi chichudnanquido.

Cadasia 6:3

Utsien: Chuiquidquio nebi. Ubiuidtsëqui bëdambocquid nebi, quec adquidpenquio yequi abibi mua uadquid nendac.

Cadasia 6:7

Nuquin Papa tantiaquid nebi, quequin ambembi muaquin chienda. Adec mibitedi muainda. Piacbobimbuec matses iquec. Tantienquio icquidën icbompin uestsaidi siac canienquio yec uënësec. Padnuen tantiaquidën ëshë bëdaidquio siac bëdambuec canitsiash. Tantienquio icquidbimbuec matses icsambo icquid iquec. Ambi icsambuen naid icbompin uestsaidbimbuec iquec. Icsauidequi tabadec uënësash Nuquin Papa yacno nidtiapimbo iquendac. Padnuen Esus tantiaquid Nuquin Papan Mayanën tantiamiacpadombuen naic tabadec uënësacsho Nuquin Papan ënenquiocquin abëdi tabadmendac.

Epeso 5:6

Muaquin ambembi chiec onquiaid tantiesa icta. Adquid ambi chiacpadombuen naisa icsho Nuquin Papan cumapenen cuidendac.

Timoteo 2 3:13

Padnuen chieshëmënquidobëd bëdambocquid danmianquiec muaquido icsambo icbuedi utsibontsen mua uaid icbuedi buëdanquiec muauannanec abitedi icsamboshë yanendac.

Tito 3:3

Ënden Esus tantiesa yec nadquio nuquitedi icpondac. Nuquin Papan chiacpadombuen naisa yec nuqui bunacpaden naic tabadec bënnudacbimbuec nuqui icpondac. Adecbidi nuqui bunacpaden nabanquin ëntiapimbocquin nuqui icsambuen nadednepondac. Icsambuec tabadquido yec utsin bëdambuen isquin namesho isash nuqui nëishpondac. Adecbidi utsibobëd nëishnanash nuqui chieshënnampondac.

Santiaco 1:22

Nuquin Papan Chiaid tantiashun nabanenquio iquequi: Ambi chiaid bëdambo iquec, quec mibibi mua uadenda. Nuquin Papan Chiaid mimbi tantiabocpadombuen nabanta.

Santiaco 1:26

Nuquin Papan Chiaid tantiaquidquio nebi, quebuedi: ¿Adabi bëdambuec onquepeba? quenquiocquin utsibo icsambuen chiannequid abibi muauadquin icsambuen chuiquid icsho Nuquin Papan bëdambuen istiapimbo iquendac.

Uan 1 1:8

Icsambuen naisambo nebi, quec nuquibi mua uadquid icquin abimbo chuibanquidpenquio nuqui nendac.