Codinto 1 2:6 - El Nuevo Testamento en matsés

⁶ Padnuembi Esus tantiaquidquio icsho: Ma udictsëc tantiabennu, quequin bëdambuen tantiaquioquin chuibanendac. Esus tantiesabon: Umbi tantiaid dadpen tantiamenu, quequin chuibanacpadombuen chienquio iquembi. Adembidi chuiquid tapabon chiacpadombuen chienquio iquembi. Aidon chiaid nibëdanendac.

Codinto 1 2:6 Iomraidhean Croise

Mateo 13:22

Pete ëshë utsi nisanquid dadpen dëyucaid yacno paëdaidbimbuecquid nad iquec. Nuquin Papan Chiaid chuibansho tantiashun ambi dadpen tantiaiduidi tantiec chieshtoendac. Utsibic ambi bedteuidi tantiaquin nabanec abibi mua uadec chieshtoshon tantienquio yanuaindac. Adquido Nuquin Papan Chiaid tantiesabo yanshun bëdambuec tabadaid utsibo tantiamenquiocquid yanendac. Adquid nisanquidën bëtinac bacuëtiapimbo yacbimbuecquido nec.

Mateo 19:21

Adsho tantiashumbien Esusën: Nuquin Papan Chiaid nabanquidquio yec bëdamboshë icquid icte bunquin mimbi dayun uaidtedi uesquin menequin piucquid bedta. Aden bedshumbic piucquid nibëdquido mitsana uesquin menebanta. Adosho issun abëd tabadmenuen Nuquin Papan mibi bëdambuen istsiashe. Adota. Adotanec ubëd iquec cho, capondash.

Mateo 5:48

Abuc tabadquid Nuquin Papabimbuec bëdambocquid icta. Bëdambo icquidobëta icsambo icquidobi Nuquin Papan bëdambuen isquin tantiacpadombuembidi utsibotsen tantiata, quepanëdash Esus.

Ducas 16:8

Adoacsho tantiashun icbon: Cun piucquid icsambuen dayun uaquidën ambi naid tantiaquidquio nec. Cun icbon nidmiacsho umbi nashunaidon ubi bëdambuen isquin iuedtsiash, quepec. Aden Nuquin Papa tantiesabon aton piucquid bednuen ambi naid tantiaquidquio nec. Padnuen Nuquin Papa tantiaquidën aton piucquid bedte bëdiactsëc tantiatsec.

Codinto 1 1:28

Aden utsibon chieshënquin: Tantienquiocquid nec, caidi Nuquin Papan tantiamiaido nec. Adembidi: Chuiquid tapa ictiapimbo iquec, caidi ambi tantiamiaidobidi nendac. Aden abi tantiesabo: Bëdambo iquec, camenquiocnuen abi tantiaquido icmendac.

Codinto 1 12:8

Nuquin Papan Mayanën namiac bëdambuen tantiaquin chuibanquid utsi utsiec iquendac. Utsibobic Nuquin Papan Mayanën namiac ambi dadpenquio bëdambuen tantiaid chuibanquido iquendac.

Codinto 1 14:20

Cun utsibo, mibitedi bacuëbon tantiacpaden tantiec tabadenda. Bacuëbo tantiabenabictsëcquidën icsambuen naid tantienquio yacbimbuec tabadta. Adec tabadquin caniaidën tantiacpaden bëdambuen naic tabadquin ismeta.

Codinto 1 2:1

Cun utsibo, mibi yacno nidshun Nuquin Papan ambi matses tantiamenquio icpampidi cumapenen tantiaquidquio nebi, quenquio icquin mibitedi bëdambuen chuinuec nidondabi.

Codinto 1 2:13

Aden Nuquin Papan tantiamiaid icquin aton Mayanën tantiamiacpadombuen chuibanec nebi. Umbibi tantiabenshun cumapenen tantiaquid nebi, quenquio icquin chuibanec nebi. Aden chuibanenquio icquin Nuquin Papan Mayanën tantiamiaidquio icquin chuibanec nebi.

Codinto 1 2:8

Aden chiampid Nuquin Papan Chomiaid nec, quequin chuiquid tapabon tantienquio icpanëdash. Aidon: Nuquin Papan Chomiaid Esuquidistu nec, quequin tantiaquin: Nuquin Icbo bëdamboshëcquid nec, queshun cueste napotiaidën dectanmenquio ictsempanëdash.

Codinto 1 3:1

Cun utsibo, mibitedi: Esus tantiaquidombo nec, queshun mibi dadpen chuibantsenombi. Esus bëdambuen tantiabenabictsëcquido yec bacuëmpibimbuecquido nec, queshun daëdpactsëc tantiamequin mibitedi Esuquidistu chuibanombi.

Codinto 2 1:12

Ubitedi bëdambuec tabadquin ismequid nebi, quequin tantiec bëdambo iquebi. Matsesën tantiamiacpadpenquio yec utsibobëd bëdambuec tabadobi. Nuquin Papanquio tantiamiacpaden ismec utsibobëd bëdambuec tabadobi. Adquiecbidi mibitedibëd tabadobi.

Codinto 2 13:11

Nëbi ënquimbi dada uaimbique. Tantia, cun utsibo. Bëdambuec cuishonquec tabadquid icnu, quec Nuquin Papan chiacpadec tabadta. Utsibobëd tantiananec bëdambuec tabadtedneta. Bëdambuec tabadnuna, cananta. Adec tabadsho isash mibitedi bëdambuec tabadmequid yec mibi tantiaquidquio Nuquin Papa mibëd iquendac.

Codinto 2 4:3

Esuquidistu chuibansho utsin utsinquien pamunacbimbuen tantiatiapimbo iquec. Adquido Nuquin Papabëd tabadtiapimbo iquendac.

Codinto 2 4:4

Ad icnuc: Nuquin Papapadquidquiobidi bëdamboshëcquid Esuquidistu nec, quequin chuibansho tantiaquido icnushe, queshun icsambuen namianquid icquin Mayan Icsa Satanasën pamunacbimbuen utsi utsien tantiamenquio iquec.

Epeso 2:2

Adquid icquin Nuquin Papa tantiesabon nacpadombuen mimbi icsambuen nabampondac. Adombuembidi podobitsi icsabon chuiquid tapa Mayan Icsa Satanas bunacpadombuen nabampondac. Aidëmbi Nuquin Papan Chiaid niacmequin icsambuen nate matses bunmec.

Codosas 1:28

Aden ubi padquidobëtan Esuquidistu chuibenniac aid tantiaquid yansho issun: Esuquidistu tantiec bëdambuec tabadtedneta, quequin Nuquin Papan tantiamiacpadombuen chuibennec nebi. Abi yacno chosho Esuspadquid icmequin ambi bëdambuen isaido ma Nuquin Papan iuednu, queshun chuibennequid nebi.

Codosas 4:12

Epapadas mibi yacnoshon Esus tantiec mibëd iccuededondaid Esuquidistun namiaid icquin aid chuibanquidquio nec. Aidëmbidi: Aido cun utsibimbuecquido icsho tantiec tsadebique. Chui, quesho tantiashun dada uaimbi. Aidëmbidi ënenquio icquin mibitedi tantiaquin Nuquin Papa naden chiannec: Icsambuen namenuequid icnuc mibi bunacpaden tantiamequin mimbi Codosas yacnocquido chieshtomenquio icquin Esuquidistu tantiec tabadme, Papa, quequin Epapadasën Nuquin Papa chiannec.

Ebedeo 5:14

Padnuen caniaidën petembo piacbimbuen bëdambuen tantiendac. Adquidën: Naden nac bëdambo ictsiash. Naden nac icsambo ictsiash, quequin tantiaquidquio nendac.

Ebedeo 6:1

Aden ënden Esuquidistu chuibanac aid tantiabensho chuibanondaiduidtsëqui tantiec tabadenquio icnuna. Esus bëdambuen tantiaquidquio icnuen ambi chiaid utsi isban isbanec tantiaquidquio yannuna. Mibi chuibanac mimbi tantiondaid nad iquec: Esus tantiabenshun icsambuen naid ënta, quequin chuiquinc icsambuen naid ënenquiocsho Nuquin Papan cuidte chuiquinc Nuquin Papambo tantiate chuiquinc capanëdash.

Santiaco 3:15

Aden icsambuen tantiaquid Nuquin Papan tantiamiacmaid nec. Esus tantiesabon tantiacbimbuen tantiaquid nec. Adecbidi Mayan Icsa Satanasën tantiamiaid nendac.

Santiaco 3:2

Nuquitedi icsa uatanquido nendac. ¿Tsutsi bëdambuecuidi onquequid icpatsiash? Utsi icsambuen chuishunesa icsambuen naisa ictsiash. Adquid abibi datantiadquin icsambuen chiec onquenquiocquid iquendac.

Petedo 1 5:10

Aden utsibon chieshënquin natiamiaido yec iuec iuecpactsëc mibitedi mëyadec tabadendac. Adec tabadsho Nuquin Papan bëdamboshëcquid icmequin dayacquiocquid yacbimbuecnuc chieshtoenquio icquid mibi icmendac. Adembidi nuqui tantiaquidquio icquin ambi Esus tantiamiaido icsho abi yacno buanshun nuqui bëdamboshëcquid icmiac ënëdenquio yec Esuquidistubëd daëdash abentsëc yacbimbuecnuc tabadmendac.