Codinto 1 14:3 - El Nuevo Testamento en matsés

³ Padnuen Nuquin Papan iuecshun natequid chiaid tantiaquin chuibanquidëmbien: Ma Esus tantiaquido bëdambuen tantiec chieshtoenquio yec tabadnu, queshun chuibanec. Adembidi utsibobëd tantiananquin nabanec: Ma dayacquio yec bëdambuec tabadnu, queshun chuibanec. Adembidi tantiananquin dayacquio icmiaid icquin natiamiaid utsibo icsho: Ma bëdambo yec cuishonquenu, queshun dayacquio icmequin chuibanec.

Codinto 1 14:3 Iomraidhean Croise

Ducas 3:18

Aden Chiaid Bëda Esusën naid chuibanquin: Adombuen tantiaquin nabanta, capanëdash Uan acten mentoanquidën.

Hechos 13:15

Ambo tabadnubien Nuquin Papan Moises dada uamiampidbëta Nuquin Papan oncamiampidën dada uamiampidtsen isec onquequin chuitanquin chuiquidon: Isedquido iqueque. Aid daëdi tabadacno nidshun: Ubitedi bëdambo icmenuen ¿ada chuibante bune? En chuiban. Tantianu, quequin Bednabebëta Pabado chuipanëdash.

Hechos 14:22

Aidtedi yacno chouaquin Esus tantiaquido naden chuibampanëdash: Natiamiantequid iquendac. Adquid icnuc Nuquin Papan namiacno tabadtequid nebi, quequin Esus tantiec chieshtoenquio yec tabadta, capanëdash Pabadon.

Hechos 15:32

Adnubien Udasbëtan Sidasën Nuquin Papan oncamiaido icquin Nuquin Papan Chiaid chuibanquin Antioquia yacnocquid Esus tantiaquido: Chieshtoenquio ictsiabi, camenuen bëdambo icmequin tantiamepanëdash.

Hechos 4:36

Adecbidi tsusedpa Debin tsiuecquid acte utsi nënantanquio nidaid nacnëdquid Chipide caid yacnoshon tishaid Edusaden yacno choash Ose tabadpanëdash. Aidi: Utsibo shubisho issun bëdambo icmequid nec, quequin Bednabe cuëmpanëdash Esus chuibennequidon.

Hechos 9:31

Aden Saudo nidmian Esus tantiaquido nidaid Udea yacnocquido yec nidaid Cadidea caid yacnocquido yec nidaid Samadia caid yacnocquido yec quec dacuëdenquio yec tabadpanëdash. Adec tabadec: Nuquin Papan Chiaid tantiabennu, quesho Nuquin Papan Mayan Bëdan tantiamiac bëdambuec tabadpanëdash. Adec tabadquin Esus chuibansho tantiash tantiesa icbuedi Esus tantiaquid dadpenquio yampanëdash.

Doma 12:8

Utsibic: Utsibo chieshtomenquio icquin Esus tantiameta, quequin chuiquid icquin: Bëdambuec tabadnuna, quequin chuibanta. Utsibic atona nibëdquido menequid icta, caid icquin cudasenquio icquin menianneta. Utsibic Esus tantiaquidon chuiquid icta, caid icquin Nuquin Papan namiacpadombuen Esus tantiaquido bëdambuen tantiaquin nabanmeta chieshenquio icquin. Utsibic daicsaido yec isedanquido yec aton shubu nibëdquido yec aton pete nibëdquido yec macho yec tsësio yec quesho bëdambuen nashunquid icta, caid icquin cuishonquequin nashumbanta.

Doma 14:19

Adquid icnuc aidën chiacpadec chieshëmënenquio yec bëdambuec tabadnuna. Esus tantiec chieshtoenquio yec bëdambuec tabadnuna, quec chuinannuna.

Doma 15:2

Utsibon ma bëdambuen tantiabenquiono, queshun aido tantiaquin nuquitedi nashunnannuna. Aden nashunac uditsëc Nuquin Papa tantiatsiash, quiash: Bëdambuec tabadnuna, quec chuinannuna.

Codinto 1 10:23

Mibitedi utsi utsiec: Ubi bunacpadembi nabanembi, quepec. Ai, abimbo mimbi caic. Aden naic abitedi bëdambocquidpenquio nec. Aden mibi bunacpaden naquin Esus tantiaquid utsibo mimbi bëdambuen tantiametiapimbo iquec.

Codinto 1 14:12

Adquid icnuc mibitedi Nuquin Papan Mayanën namiaid icte bunquidquio icquin: Esus tantiaquid utsibo: Ma chieshtoenquio yec bëdambuec tabadnu, quec aido nashunte bunquidquio icta.

Codinto 1 14:17

Puduedquid matses onquiacmaidën onquequin mimbi Nuquin Papa chuiquin mimbi bëdambuen chiec. Adnubi mibëd iccuedednuec matses utsi chobued mibi onquiaid tantienquio yec: Bëdambo iquec, quetiapimbo iquendac.

Codinto 1 14:26

Tantia, cun utsibo. Naden mibi chuinu. Mibitedi Esus tantiec iccuedednuc utsi utsiec cuëdënte cuëdënec. Utsimbic Nuquin Papan Chiaid tantiamequin chuibanec. Utsimbic: Nuquin Papan naden ushquin isacbimbuen ismioshi, quequin Nuquin Papan ismiaid chuibanec. Utsimbic abi onquiacmaid onquete utsin onquequin chuibanec. Utsimbic abi onquiacmaidën onquete utsin onquequin chuibansho tantienquiocsho issun aid onquete tantiaquidën: Ma utsibon tantianu, queshun chuibanec. Aden chuibanquin: Ma Esus tantiaquidtedi bëdambuen tantiec chieshtoenquio yec tabadnu, queshun aidtedi nabanec tabadta.

Codinto 1 14:31

Aden abitedishun Nuquin Papan: Umbi iuecshun natequid chuibanquid icta, caid icquin abentsëcshun abentsëcshunquien Nuquin Papan iuecshun natequid chuibanec. Chuibansho tantiash: Ma abitedi bëdambuen tantiabenash dayacquio yec tabadnu, queshun chuibanec.

Codinto 1 8:1

Mimbi dada uaquin chiaid issun nëbi umbi tantiacpaden chuinu. Ambi papa canun nacnenaid ismequin nëish iua pichicaquin ¿pete dasanaid petequidida nepec? quequin mibitedishun chiaid chuinu. Mimbi abimbo chiaid nad iquec: Nuquitedi ambi papa canun nacnenaid ismequin pichicaid iquec, quequin tantiec. Aden umbi tantiacpadenuidi naic ubiuidtsëqui bëdambocquid nebi, quepec. Padnuen mimbi tantiananquin nabannuc Esus tantiaquid utsibo bëdambuen tantiec bëdambuec tabadquid yanendac.

Codinto 2 1:4

Nuquitedi natiamiaid icsho issun Nuquin Papan uënësquio icquin bëdambo icmendac. Umbi icmiacpadombuembidi utsibo natiamiaid icsho issun umbi bëdambo icmiaidontsen: Ma aido bëdambo icmenu, queshun Nuquin Papan nuquitedi bëdambo icmendac.

Codinto 2 2:7

Adoacsho ambi icsambuen naid tantienquio yec bëshunshun aidi iueduaquin bëdambo icmequin nashunta. Iuedenquio icac natiaquiec uënësquioshë icnushe.

Epeso 4:29

Esus tantiaquido yec icsambuen chiec onquenda. Utsibo bëdambo icmenu, quequin tantiec bëdambuen chiec onqueta: Ma Nuquin Papan aidtsen bëdambo icmepanu, quiash.

Codosas 4:8

Adquid icsho: Ma mibitedi bëdambuen tantiamenu, queshun aidi mibi yacno nidmembi. Adoac nidshun umbi naidtedi chuibanac mibitedi ubi tantiec cuishonquendac.

Tesadonica 1 2:11

Amën aton mado: Naden na, quequin nëishmenquio icquin bëdambuen chiacbimbuen mibitedi abentse abentsen bëdambo icmenuen bëdambuen chuibanondambi. Adembidi mibitedi shubisho isash uënësquiocquimbi mibi bëdambo icmiondambi.

Tesadonica 1 2:3

Adembidi abimbo chuiquin Esusën naid chuibanondambi. Bëdambuen namenuen bëdambuen chuibanondambi. ¿Min piucquid bednuen mua uaquindambi mibitedi chuibandionda? Padenquio.

Tesadonica 1 4:1

Tantia, cun utsibo. Bëdambo mibi iquec, Nuquin Papa camenuec bëdambuec tabadta, quequin umbi chiondacpadquiequi tabadta. Nuquin Icbo Esus tantiaquiec adec tabadta. Bëdambuec tabadosh, quesho tantiashun: Adquiequi tabadta, mibitedi caimbi.

Tesadonica 1 4:18

Umbi aden chuibued tantiashun abëtan Esus tantiaquid uënësaid tantiec uënësquio yec shubiquido bëdambo icmenuen umbi chuibambued chuita.

Tesadonica 2 3:12

Chieshquido icsho Nuquin Icbo Esuquidistun chiaidquio mibi chuinu. Chieshuidequi tabadenda. Min petebëta mitsana utsi bednuec chonoadta.

Timoteo 1 1:4

Nadembidi chuibanta. Tsusedpabon ambembi chiampiduidi chiec tabadenda. Adembidi utsibon: Nuquin matsesën tishaid nepampic. Utsibic nuquin matsesën tishaid cuëmëdquid chuibampac caondash. Utsibic: Aidën tsiuecquidouidtsëqui bëdambo iquec, quequin dadpenquio chuibamposh. Aden chiaiduidi tantiec abembi chushcananec tabadenda, cata. ¿Adenuidi chuiquinda mimbi Nuquin Papan Chiaidquio bëdambuen tantiamepe? Nuquin Papan Chiaidquien chuitiad, cata. Aden chiac Nuquin Papa bunacpaden Esuquidistu tantiatsiash.

Timoteo 1 4:13

Mibi yacno nidec ubi puduedabi icnuc Esus tantiaquido iccuededacnoshon Nuquin Papan Chiaidquio isbanquin adenuidi chuibanta. Nuquin Papan chiacpadec chieshtoenquio yec bëdambuec tabadnuna, quequin Nuquin Papan Chiaidquio isbanquin matses bëdambuen tantiamequin chuibanta.

Timoteo 1 6:2

Iua utsitsen chuiquin: Mibi iuaquid Esus tantiaquidbidi icsho: Ubipadquid icnuc aidën chiacpadombuen natiapimbo iquebi, cainda. Ubipadquid umbi tantiaid cun buchi caid neque. Aidën chiacpadombuen nanu, quequin mibi iuaquid tantiaquin bëdambuen nashunta, quequin iuabo chuita.

Timoteo 2 4:2

Aidën chiacpadombuen naquin Nuquin Papan Chiaidquio chuibanta, mado. Matses tantiate bunenquio icnuc chuibanquimbi utsibo tantiate bunquid icnuc adembi chuibanta. Esus tantiaquidon icsambuen nasho issun: Esus tantiaquido adesambo neque. Bëdambuequien tabadtiad, quequin chieshënenquio icquin chuita, mado. Utsibo bëdambuec tabadsho: Mibi bëdambuec tabadoc. Adquiequi tabadta, quequin chieshtoenquio icquin chuibanta. Bëdiactsëc tantiactsëcquido bëdambuen tantiamequin: Esus tantiaquidon nadoquid, quequin chuibanta, mado.

Tito 1:9

Ambi tantiaid Nuquin Papan Chiaidquio utsi uainquiocquin tantiamequidquio nendac. Adquid icquin utsibo chieshtomenquio icquin tantiaquid icmenuen bëdambuen chuibanquid nendac. Tantiesabobi: Icsambuen naquid nebi, camenuen bëdambuen chuiquid nendac.

Tito 2:15

Umbi chuibuedtedi chuibanquin tantiameta. Mimbia tantiaquid icquin: Umbi chiacpadombuen nabanec tabadtedneta, quequin Quedetabo chuibanuata. Mimbi chiacpadombuen nainquiocsho issun: Aden naic tabadenda, quequin chuibanuata. Adec bëdambuec tabadquin bëdambuen chuibansho issun utsibon mibi icsambuen chuishuntiapimbo iquendac.

Tito 2:6

Adembidi caniabo chuiquin: Ubi bunacpadombuen naic icsatsiabi, queshun mimbi icsambuen tantiaidtedi nainquio yec bëdambuec tabadta, quequin chuibanta, Tito.

Tito 2:9

Adembidi iuabo chuiquin: Bëdambo iquebi, ubi iuaquid camenu, quequin aidën chiactedi nabanquin chushquenquio icquin nabanta, quequin chuibanta, Tito.

Ebedeo 10:25

Aden nabanec: Nuquin Papa tantiaquid utsibobëd iccuededtiapimbo iquebi, utsi utsiec quenubi adenquio icnuna. Adec iccuededec: Nuquin Papan chiacpadquiec bëdambuec tabadnuna, quec chuinannuna. Cuidnuen matsesën naid chuibante uëshë nëbimbobi yanec, quiash adec baded badedquiec chuinannuna.

Ebedeo 13:22

Cun utsibo, mibitedi bëdambuen tantiamenuen daëdpactsëc umbi chuiquin dada uabued chieshtoenquio icquin tantiadoneta.

Ebedeo 3:13

Nuquin Papan chiacpadec bëdambuec tabadnuna, quec badiadquidën badiadquidënquiec utsibobëd chuinannuna. Nuquin Papan dada uamequin chiacpaden nëbimbobi nanuna: Icsambuen namianquidën muaquin icsambuen namiac Nuquin Papan chiacpadombuen nainquiocquid icmane, queshun.

Petedo 1 5:12

Umbi daëdpactsëc chuiquin Sidbano dada uamebued mibi yacno buanmembi: Ma mibitedishun isnu, queshun. Aidi chieshtoenquio icquin Esus tantiaquidquio icsho umbi cun utsi caid nec. Ma nëid isash: Ubitedi tantiaquidquio icquin Nuquin Papan ubitedi bëdambuen isquin bëdambo icmec, quequin ma tantianu, quequin abimbo mibitedi chuibanondambique. Chieshtoenquio icquin Nuquin Papa tantiec tabadta.

Udas 1:20

Cun utsibo, umbi tantiaidombo mibitedi neque. Chieshtoenquio icquin Esus tantiaquiota. Adquid icquin aton Mayan Bëdan tantiamiacpadombuen Nuquin Papa chianneta.