Codinto 1 13:4 - El Nuevo Testamento en matsés

⁴ Padnuen utsibobëd tantiananquidquio utsibon chieshënaqui chieshtoenquio yec bëdambuec tabadquid nec. Adecbidi utsi tantiaquin bëdambuen nabanec tabadquid nec. Adecbidi utsina isash chieshëmënec tabadesa nec. Adecbidi: Ubentsëqui cumapenen tantiaquin naquidquio nebi, quesa nec. Adecbidi: Ubiuidtsëqui bëdambocquid nebi, quesa nec.

Codinto 1 13:4 Iomraidhean Croise

Mateo 27:18

Naden tantiaquin Pidaton chuipanëdash: Esus chieshënquidon: Ubi chuiquid tapa icmenquio icquin Esus chuiquid tapa icmenushe, queshun chieshënquin isadaidbon chuiquidon Esus uënës uamete bunec, quequin Pidaton aden chuipanëdash.

Hechos 7:9

Aden chiashic: Acobon mado 12ted nuquin tsusedpabo icpampic. Acobon mado chido utsin tishaid Ose icpampic. Aidi aton papan tantiaidquio icsho isash nëishshun chieshënquin aton utsibon bedshun piucquid bedquin matses utsi menepampic. Aden meniac nidaid utsi Equipito yacno Ose buampampic. Aden buanacsho abëd icquin Nuquin Papan Ose bëdambuen namepampic.

Doma 1:29

Aido nadquido nec. Nëidic utsi icsambuen nambo icquidobi muaquin cuidmequido. Nëidic icsambuecshë tabadquido. Nëidic aton chidopenquio chudquido. Nëidic aton bënëpenquio chudmequido. Nëidic dada aton dada utsibëdi chichudnanquido. Nëidic chido aton chido utsibëdi dachudnanquido. Nëidic dadpen bunquin bedquido. Nëidic chieshëmënquido. Nëidic utsina isash natiambo bunec chieshëmënquido. Nëidic cuessunnianquido. Nëidic chushcananquido. Nëidic muaquido. Nëidic icsamboshë icquido. Nëidic utsibo icsaiduidi chuiquido.

Doma 13:13

Icsambuen nainquio yec bëdambuec tabadquid nebi, queshun peteuidi nua penquio yec tabadquinc tantiadennuen acte paë uaid aquenquio icquinc utsin chido chudenquio icquinc utsin bënë chudmenquio icquinc canuna. Adecbidi utsina isash cuna adquid nibëdec, quiash chieshëmënec tabadenquio icnuna. Adembidi utsin namesho isash chieshëmënenquio icnuna.

Codinto 1 3:3

Esus tantiesa tabadacpadec chushcananquido yec Esus bëdambuen tantiabenabictsëcquido mibitedi nec. Adquido iquec Nuquin Papa tantiesabon tantiacpaden tantiaquido mibitedi nec.

Codinto 1 4:18

Mibitedi utsi utsiec: Pabado ubi isec chotiapimbo iqueque. Umbimbo chuibannu, quequin chuibanec.

Codinto 1 4:6

Tantia, cun utsibo, mibitedi chuinu. Ma Nuquin Papan Chiaid utsi uaquin chienquio icnu, queshun Apodon naidbëta umbi naid chuibanembi. Adembidi icsambuen tantienda. Ubi chuibanquid bëdamboshëcquid nec. Aidpadquid utsi nibëdec, quenda.

Codinto 1 5:2

Adquid icnuc mibitedi: Ubiuidtsëqui bëdambocquid nebi, quenquio yec uënësquio yec tabadta. Aden icsambuen naquid icsho issun aid dada mibitedi iccuededacno tabadmenquio icquin uënësquio icquimbi ëndembi cuenmepatecnëdan, caimbi.

Codinto 1 8:1

Mimbi dada uaquin chiaid issun nëbi umbi tantiacpaden chuinu. Ambi papa canun nacnenaid ismequin nëish iua pichicaquin ¿pete dasanaid petequidida nepec? quequin mibitedishun chiaid chuinu. Mimbi abimbo chiaid nad iquec: Nuquitedi ambi papa canun nacnenaid ismequin pichicaid iquec, quequin tantiec. Aden umbi tantiacpadenuidi naic ubiuidtsëqui bëdambocquid nebi, quepec. Padnuen mimbi tantiananquin nabannuc Esus tantiaquid utsibo bëdambuen tantiec bëdambuec tabadquid yanendac.

Codinto 2 12:20

Mibi yacno nidshun isac mibitedi bëdambuec tabadenquio icchitotsiash, quequin dacuëdquin umbi tantianubi mimbi: Pabadon ubi chushcanushe, quequin tantiabededtsiash. Mibitedi nadec tabadsho chushcatsiambi. Nëidic chushcananquido. Utsibic utsin na dadpen icsho isash bedte bunec chieshëmënquido. Utsibic nëishëmënquido. Utsibic: Ubiuidtsëqui bëdambo iquebi, quequido. Utsibic utsi icsambuec tabadaid chuinanquido. Utsibic: Utsibo icsaiduidi chuiquido. Utsibic: Ubi bëdambocquid icnubi aid icsambocquid nec, quequido. Utsibic ambi tantiacpadpenquiocquid icsho isash cumapenec cuëdcuededquido. Adoquido icsho chushcatsiambi, quequin chuiquin dada uaic nebi.

Codinto 2 6:6

Adquid icnubi icsambuen nainquio iquembi. Nuquin Papan Chiaid tantiaquidquio nebi. Tantiatiapimbo yec utsibo tabadshobi aido bëdambuen isquin adembidi Nuquin Papan Chiaid chuibennec nebi. Adembidi: Nashunquin chiac tantiabentsiash, queshun adquid nashunembi. Nuquin Papan Mayan Bëdan tantiamiaid yec bëdambuec tabadquin ismembi. Muainquio yec utsibobëd tantiananquiec bëdambuec tabadebi.

Cadasia 5:26

Ubiuidtsëqui bëdambocquid nebi, quenda. Chuiquid dëniacte bunec chieshëmënec tabadenda. Utsina isash aid bunquiec nëishnanenquio yec bëdambuec tabadnuna.

Epeso 4:2

Umbi tantiacpadombuenuidi naimbi, quenquio yec utsibobëd tantiananec nashunnanta. Ubi bunacpaden utsibon nainquio iquec, quiash chieshëmënenquio yec tantiananec bëdambuec tabadta.

Epeso 4:32

Adecbidi bëdambuec tabadquin utsibo uënësquio icquin tantiaquin nashunnanta. Esuquidistunuidtsëqui nac mimbi icsambuen naid tantienquio yec Nuquin Papa bëshunacpadquiec utsin mibi icsambuen naid tantienquio yec bëshunuata.

Pidipos 1:15

Aidon ubi bëdambuen tantiaquin Esuquidistun naid chuibanec. Aid tantiembi, queshun aidën naid chuibennesho bedshun quënën tsadunac chuibantiapimbo icnuc: Umbitsen chuibannu, quequin ubi bëdambuen tantiaquin Esuquidistun naid chuibanac caosh. Nuquin Papan namiac quënën tsadunaid icquin: Esusën naid chuiquin: Abimbo caimbi, quequin utsibo chuibanac, quequin aidon umbi naid tantiac caosh. Padnuen utsibon ubi chieshënquimbi: Umbimbo bëdambuen namenu, quequin Esuquidistun naid chuibanac caosh.

Codosas 1:11

Nadembidi Nuquin Papa chiannembi. Mibi nadatiambocquid yec bëdamboshëcquid icquin Codosas yacnocquido dayacquio icmequimbi utsibon chieshënquin natiamesho issun chieshtoenquiocquido icmeta. Adoac mibi tantiec cuishonquequid iquendac, Papa.

Codosas 2:18

Nuquin Papabëd icquido tantiaquid utsibon: Ubien bëdamboshëcquid nec, quesa nebi, quequin muaquin chuisho tantienda. Ushquin isacbimbuen isombi, quequin muaquin chuisho adembidi tantienda. Adembidi: Ubien dadpen tantiaquidquio nec, quequin chuisho tantienda. Aidon: Umbi tantiacpaden nainquio yec mibi icsambo iquec, quequin icsambuen chuisho tantienda.

Codosas 3:12

Nuquin Papan mibitedi tantiaquioquin: Nëid cun matses canu, quequin tantiamiaido yec nadec tabadta. Utsibo tantiec uënësquiocquin nashumbanta. Adecbidi: Mimbia bedan bedembi, quequid icta. Adecbidi: Mibia nashunnu, quequid icta. Utsi icsambuen naid ënmenuec cumapenec chushquenquio icquin bëdambuen chuita. Tantesa uasho issun badedquio chieshtoenquio icquin bëdambuen chuiquin tantiameta.

Tesadonica 1 5:14

Cun utsibo, mibitedishun nabante chuinu. Chieshquid icsho: Mibitsen chonoadta, cata. Utsibo chieshtotiadquio icsho: Esus tantiec bëdambo icnuna, cata. Esus bëdiactsëc tantiactsëcsho bëdambuen chuiquin Esus tantiamequiota. Dada padishquio icquid icsho nashunta. Badedquio chieshtoenquiocquin abitedi bëdambuen ista.

Timoteo 1 6:4

Aden icsambuen tantiaquidën bëdambuen chuibantiapimbo iquec. Umbi chiaiduidtsëqui bëdambo iquec, quequin abimbo chiaid tantiesambo nec. Utsibëd chushcanante bunquid nec. Utsi nëishmequid nec. Adquidbëd chushcananec muauannanec icsambuec chuishunnansho isash: Abimbo chuiquid nec, quetiapimbo iquendac.

Timoteo 2 2:25

Esus tantiesabon: Mimbi Nuquin Papan Chiaid chuisho tantiatiapimbo iquebi, caqui adembi chieshtoenquio icquin Nuquin Papan Chiaidquio mimbi chuibanendac. Nuquin Papan Ambi Chiaidquio tantiamiac: Icsambuen naombi, quequin ma Esus tantiesan tantiabennu, quequin abi chuibanendac.

Timoteo 2 3:10

Umbi mua uainquio icquin abimbo chuibanondaid mimbi tantiec. Ma Esus tantianu, quequin Esusën naid chuibanec bëdambuec tabadondabi. Esus tantiaquidquio icquin matses tantiaquin Esusën naid chuibenniondambi. Chieshënaqui chieshtoenquio iccondabi.

Timoteo 2 4:2

Aidën chiacpadombuen naquin Nuquin Papan Chiaidquio chuibanta, mado. Matses tantiate bunenquio icnuc chuibanquimbi utsibo tantiate bunquid icnuc adembi chuibanta. Esus tantiaquidon icsambuen nasho issun: Esus tantiaquido adesambo neque. Bëdambuequien tabadtiad, quequin chieshënenquio icquin chuita, mado. Utsibo bëdambuec tabadsho: Mibi bëdambuec tabadoc. Adquiequi tabadta, quequin chieshtoenquio icquin chuibanta. Bëdiactsëc tantiactsëcquido bëdambuen tantiamequin: Esus tantiaquidon nadoquid, quequin chuibanta, mado.

Tito 3:3

Ënden Esus tantiesa yec nadquio nuquitedi icpondac. Nuquin Papan chiacpadombuen naisa yec nuqui bunacpaden naic tabadec bënnudacbimbuec nuqui icpondac. Adecbidi nuqui bunacpaden nabanquin ëntiapimbocquin nuqui icsambuen nadednepondac. Icsambuec tabadquido yec utsin bëdambuen isquin namesho isash nuqui nëishpondac. Adecbidi utsibobëd nëishnanash nuqui chieshënnampondac.

Santiaco 4:5

Adquid chuiquin naden dada uamiampid iquec. Nuquin Papan nuquitedi tantiaquin aton Mayan meniash nuqui cudasendac, quequin chuipampic.

Petedo 1 2:1

Nuquin Papan Chiaid tantiashi chieshëmënec tabadenda. Utsi mua uainda. Esus tantiaquid nebi, quiashi icsambuec tabadenda. Utsina isash adquid cuna nibëdec, quec chieshëmënec tabadenda. Utsibon icsambuen naiduidi chiec tabadenda.

Petedo 1 3:8

Tantia. Nëbi Esus tantiaquid abitedimbo chuinu. Nuquin Papan chiacpadombuen nanuna, quiash utsibobëd tantiananec bëdambuec isnanta. Cuishonquequidobëd cuishonqueta. Uënësquio yec shubiquidobëd shubita. Adec tantiananquiota. Umbi naiduidi naimbi, quenquio icquin utsibon chiacpadombuentsen nabanta.

Petedo 1 4:8

Nëbi mibëtan Esus tantiaquid utsibobëd tantiananquiota. Adec mibëd tantiananquidën mibi icsambuen nashunsho isash adecbidi tantiananquiec aidën icsambuen naid tantienquio yec bëshunendac.

Petedo 2 1:7

Aden Nuquin Papabëta Esus tantiaquido yec tantiananec nashunnanquionona. Adec nashunnanec tabadquin nuquin shubun icquido tantiaquiacbimbuen matses abitedi tantianuna.

Uan 1 4:11

Tantia, cun utsibo. Umbi tantiaido icsho mibi chuinu. Aden Nuquin Papan nuqui tantiaquiec, quequin chuisho tantiash Esus tantiaquido yec utsibobëd tantiananquionona.