Codinto 1 1:30 - El Nuevo Testamento en matsés

³⁰ Adquid icnuc Nuquin Papanuidtsëqui tantiamiac mibitedi Esuquidistubëd abentsëc yacbimbuec tabadquido nec. Adembidi aidëmbi nuquitedi bëdambuenshë tantiaquid icmequin abimbo chuiquid icmec. Adoshon icsambuen naisabimbuecnuc Esusën Nuquin Papa nuqui bëdambuen ismec. Adoaid yec Esuquidistubëd bëdambocquid icsho cuidenquio ictequid Nuquin Papa yacno tabadtequido nuqui nendac. Esus abided cuidadaid icnuc Nuquin Papan nuqui cuidenquio iquendac,

Codinto 1 1:30 Iomraidhean Croise

Mateo 1:21

Adoshombic dada bacuë tishacsho Esus cuënta. Aidëmbi matsesën icsambuen naid bedshunquin Nuquin Papa aton matses cuidmenquio iquendac, quequin Esus cuënta, quequin Nuquin Papabëd icquidën Ose ushquin ismepanëdash.

Ducas 11:49

Adquid icnuc ëndenquimbo abitedimbo tantiaquidquio icquin Nuquin Papan naden chuipampic: Umbi oncamiaidobëta umbi: Chuibennetan, quequin nidmiaido icsho utsi utsien mëyanquimbi utsi utsien cuessunnendac, quequin chuipampic.

Ducas 21:15

Umbi tantiamiacpadombuen mimbi bëdambuen chuibanendac. Adoac: Icsambocquid mibi nec, quetiapimbo yec mibi chieshënquido tabadendac.

Uanën dada uaid 1:18

Matsesën isacmaidquio Nuquin Papa nec. Padnuen aton Mado abentsëqui abipadquidquiobidi yec aton dayun tsadquidënquio matsessun Nuquin Papa bëdambuen nuqui tantiamepondash.

Uanën dada uaid 14:6

Adoaquien Esusën: Nuquin Papa yacno nidte tantiamequidquio nebi. Nuquin Papan Chiaiduidtsëqui chiec muesambo nebi. Adquid icnuc ubiuidtsëqui tantiash Nuquin Papa yacno tabadendac.

Uanën dada uaid 17:26

Aden Mibimbo tantiamenuec iuec ubëd icquidobëd tabadquin mimbi chiaidquio chuibanombi. Adembidi ënenquio icquin ubi tantiaquido tantiamendambi. Ënëdenquio yec aidobëd iquendabi. Adshobi abentsëc yacbimbuec mibëd ubi tantiananquiacpadecbidi aido utsibëd tantiananmeta, Papa, quequin Esusën Nuquin Papa chuipondash.

Uanën dada uaid 17:8

Mimbi namiacpadombuen Mimbi Chiaidquio umbi chuibansho tantiashun: Nuquin Papan Chomiaidquio nec, quequin aidon ubi tantiosh, Papa.

Uanën dada uaid 8:12

Adshumbic padpidembuen matses tantiamequin Esusën naden chuiuapondash: Nuquin Papan bëdambuen iste matses tantiamequidquio nebi. Umbi tantiamiac ubi tantiabenquido icsambuen nate bunenquio yanendac. Adash ubëd tabadtequid iquendac, quepondash Esus.

Hechos 26:18

Aden chuibanac utsin utsinquien pashuacbimbuec icbuedombi tantiendac. Icsambuen naquid nebi, quequin tantienquio icbuedëmbi: Icsambuen naquid nebique. Ubi icsaid tantienquio yec bëshunta, Papa, quendac adquid. Mayan icsa Satanasën iua icbuedi Nuquin Papan bacuëbo yanendac. Adquid yansho ambi icsambuen naid ënmiac Nuquin Papan bëdambo icmiaid ubi tantiaquid utsibobëd iquendac, quequin Esusën chuipondashi.

Doma 1:17

Esusën Chiaid Bëda chuibansho tantiashun Esus tantiaquid icsho Nuquin Papan bëdambuen isec, quequin nuquitedi tantiec. Naden chuiquin Nuquin Papan dada uamiampid iquec: Ambi chiacpadombuen naic tabadquin Abi tantiasho Nuquin Papan abëd tabadtequido icmendac, quequin dada uamepampic.

Doma 11:36

Nuquin Papan abitedi uapampic. Aidtedi atona nec. Ambi uaid abitedi iquec. Ambi uaidtedi ambi dayun uaidquio nec. Adquid icsho: Nuquin Papa bëdamboshë iquec, canuna ënenquio icquin. Amen.

Doma 12:5

Adecbidi nuquitedi dadpenquio icquid iquequi Esuquidistun dada yacbimbuec abi tantiaquidtedi iquec. Adash abentsëc yacbimbuec utsibobëd tsidadash tabadec dada abentsëcbimbuec iquec.

Doma 16:11

Adembidi cun matses isadaidbo Edodion chuiquin: Aidën mibi tantiec, cata. Utsitsen Nadsison shubun icquido Esus tantiaquidtedi chuiquin: Aidën mibitedi tantiec, cata.

Doma 16:7

Adembidi cun matses isadaidbo Andedonicobëta Unias chuita. Aido ubëtan Esusën naid chuibennesho chieshëmënquidon bedshun quënën tsadunondashi. Aidombien ambia Esuquidistu tantiabempanëdash umbi padabi icnubi. Adsho aidoba Esusën: Ubi chuibenneta, cac chieshtoenquio icquin chuibennequido nec, queshun Esus chuibennequid utsibon: Bëdambo iquec, caido nec.

Doma 4:25

Nuquin Papan tantiacpadec nuquitedi cuidmenquio icnuec nuqui icsambuen naid bedshunec abided cuidadec Esus uënëspanëdash. Adec uënësash uincueniaid tantiasho Nuquin Papan icsambuen naisabimbuecnuc nuqui bëdambuen isendac.

Doma 4:6

Aden matsesën abi bëdambuen ismete nainquio icshobi Nuquin Papan bëdambuen isac matses cuishonquetequid Nuquin Papan tantiamiac

Doma 5:19

Matses abentsëcshun Nuquin Papan Chiaid niacquin icsambuen naquin tauampicpadequi aton tsiuecquido dadpenquio icsaquidouidquio yanac. Padnuen Nuquin Papan Chiaid niaquesambo icquin Esusën abi tantiaquido icsho bëdambuen isquin dadpenquio icsaisabimbuecnuc icmendac.

Doma 5:21

Tauaquin matsesën icsambuen nasho cuidac uënëstequidouidquio yampampic. Adsho issun matses bëdambuen isnuen Nuquin Papan Ambi Chiaid niaquesambo Esusded cuidmepanëdash. Nëbi Nuquin Icbo Esuquidistu uidtsëqui tantiasho Nuquin Papan nuquitedi icsaisabimbuecnuc bëdambuen isquin ënëdenquio icnuc abëdi tabadmendac.

Doma 8:1

Nëbi Esuquidistubëd abentsëc yacbimbuec tabadquid icsho Nuquin Papan nuqui cuidenquio iquendac.

Doma 8:23

Adembidi nuquitedi natiamiac natiec tabadquid icshobi: Nëid Cun Mayambëd tabadquid nec, queshun Nuquin Papan bëdambuen isquin: Cun madobëd cun champi nec, queshun ambi tantiaid uëshën Nuquin Papan ubi uënëstiapimbo icquid icmendac, quequin tantiaquin natiamiaqui chieshtoenquio icquin nuquin dada chuca uate nuqui cainec.

Doma 8:9

Nëbi Nuquin Papan aton Mayan Bëda meniaid icquin mibi bunacpaden icsambuen nainquio yec bëdambuec tabadquido mibitedi nec. Nuquin Papan Mayan Bëda mibëd iquec. Esuquidistun Mayambëd tabadesa yec Esuquidistu tantiaquidpenquio nec.

Codinto 1 1:2

Aidbëtambi Codinto yacnoquid Nuquin Papan bëdambuen tantiamiac Esus tantiaquido icsho mibitedi tantiembi, quequin chiec nebi. Esuquidistunuidtsëqui bëdamboshëcquid icmequin tantiamiac Nuquin Papa tantiaquido mibitedi nec. Adoaido icquin utsi utsiec yacnoshon Esus tantiaquid utsibobëtan Nuquin Icbo Esuquidistu chiannequid nuquitedi nec. Aidi Nuquin Icbo yec aidon Icbobidi nec.

Codinto 1 1:24

Padnuen isadaidbobëtabi matses utsibo icshobi Nuquin Papan tantiamiaido iquendac. Adquido icquin Ambi Chomiaid Esuquidistu abided cuidadaid chuisho tantiaquidën: Nuquin Papan abitedimbo tantiaquid icquin nadatiambocquin naid nec, quequin tantiec.

Codinto 1 12:18

Nuquin Papan ambi tantiacpadombuen matsesën dadan icquid tabëcquin uidënuaid iquec.

Codinto 1 12:27

Mibitedi Esus tantiaquin utsi utsien nabanquido yec Esuquidistun dadabimbuecquido nec.

Codinto 1 12:8

Nuquin Papan Mayanën namiac bëdambuen tantiaquin chuibanquid utsi utsiec iquendac. Utsibobic Nuquin Papan Mayanën namiac ambi dadpenquio bëdambuen tantiaid chuibanquido iquendac.

Codinto 1 4:15

Mibitedi Esus tantiamenuen chuibanquido dadpenquio 10 midted icnubi min papabimbuecquid daëdpactsëc iquec. Ubien mibitedishun papabimbuecquid nec. Umbia: Esuquidistu abided cuidadec uënëspanëdash, quequin Chiaid Bëda chuibanac aid tantiaquido yanash Esuquidistubëd abentsëc yacbimbuec tabadquid mibitedi yanondac.

Codinto 1 6:11

Ënden mibitedi utsi utsiec adquido iccondaidi nëbi abi tantiaquido yansho issun acten mentoaido iquec. Adembidi mibitedi Nuquin Papan bëdamboshëcquid icmequin Nuquin Icbo Esuquidistu tantiaquid icsho mibi isaisabimbuecnuc bëdambuen isec. Adembidi Nuquin Papan aton Mayan meniaido mibitedi nendac.

Codinto 2 12:2

Ënden seta 14ted matanmiash Nuquin Papan abucquio abi yacno indoac isondambi. Nuquin Papan dadachobi abuc indopondashi, quetiapimbo iquebi. Tantienquio iquembi. Adecbidi cun mayanuidtsëqui indondash, quetiapimbo icuaibi. Tsaun. Tantienquio iquembi. Nuquin Papambien tantiec.

Codinto 2 4:6

Taëecquiobi ëndenquimboshë: Inchëshquio icbuedi uëshëmbo yanta, capampic Nuquin Papan. Adombuembidi Nuquin Papan Chiaid pamumëdacbimbuen tantienquiocbuedi Nuquin Papan tantiamiaido nebi. Esuquidistu aton Papapadquidquio bëdamboshëcquid nec, quequin tantiaquin utsibo chuibanquido nebi.

Cadasia 1:4

Matses abitedi icsamboec tabadsho isash nuqui icsambuen naid bedshunash Nuquin Papa bunacpadec abi tantiaquido cuidmenquio icnuec abided cuidadec Esuquidistu uënëspanëdash.

Cadasia 3:13

Abitedishun Moisesën chiampiduidi natiapimbo yec icsambuec tabadsho isash abided cuidadec uënësquin Esuquidistun nuquitedi icsambuen naid bedshunquin bëdambo icmepondash. Naden chuiquin Nuquin Papan dada uamiampid iquec: Cueste napotiaidën dectanmiaid Nuquin Papan cuidaidquio nec, quequin dada uamepampic.

Epeso 1:10

Aden ambi tantiampicpaden Nuquin Papan abuc icquidobëta nidaidën icquido abitedi tsidadmeshun aidon Icbo Chuiquid Tapa abentsëcquiobi Esuquidistu icmendac.

Epeso 1:14

Aden aton Mayan meniaid icquin: Abëdi tabadmequin nuquitedi bëdamboshëcquido icmendac, quequin nuqui tantiec. Adoshon icsambuen namete nibëdacno abëd tabadmequin Nuquin Papan ambi cun matses caido icsho nuquitedi aton Mayan menendac. Aden tantiec: Nuquin Papa nadatiambocquid yec bëdamboshëcquid nec, quequin aid tantiec ma abitedi cuëdëmpanuna.

Epeso 1:7

Matses bëdambuen iste bunquidquio icquin Nuquin Papan namiac Esuquidistu aton intac chididiquec uënësaidën nuquitedi icsambuen naid bedshunquin nuqui icsambuen naid tantienquiocnoc Nuquin Papa bëshunmendac.

Epeso 2:10

Nuquin Papan uaido nuqui nec. Adoshon Aidënquiobi nuquitedi Esus tantiaquido icmiac. Aden chucauaido yec bëdambuec tabadquin utsibo tantiaquin nashunquid nuquitedi nec. Nuquin Papa ëndenquimbo: Ma utsibo nashunnu. Esuquidistu tantiaquido icmendambi, quepampic.

Epeso 4:30

Nuquin Papan Aton Mayan Bëda mibi meniaid icsambuen naquin uënësquio icmenda. Cuna nec, queshun dada uatanquin siacbimbuen Nuquin Papan Aton Mayan Bëda mibitedi meniac. Nuquin Papan ambi tantiaid uëshëmbi ubi icsambuen naisambo icmequin abi yacno tabadmendac, quequin ma tantianu, queshun Aton Mayan Bëda meniaid mibëd iqueque. Bëdambuen chuita.

Epeso 5:26

Adec abided cuidadec uënëssun: Ubi tantiaquido bëdamboshëcquid icmenu, queshun ambi Chiaid tantiamequin abi tantiaquido acten mentoadmendac.

Pidipos 3:9

Esuquidistubëd daëdash aidbëd abentsëc yacbimbuecquid nebi. Adquid yec Moisesën chiampicpadombuen naquin aidën chiacpadombuen nainquio icchitembi, quequin tantiec nadondabi. Nuquin Papambien Esuquidistu umbi tantiasho ubi bëdambuen isquin ambi chiacpadombuen ubi namec, quequin tantiabenondambi.

Codosas 1:14

Nuqui icsambuen naid Nuquin Papa bëshunmenuec aton Mado abided cuidadec uënëspanëdash.

Codosas 3:16

Esuquidistun naid chuibanaid bëdamboshëcquid tantiaquido mibitedi neque. Aid bëshunenquio icquin tantiec bëdambuec tabadta. Adembidi bëdambuen tantiaquin Esus tantiaquid utsibobëd tantiananec Esuquidistun chiaid chuinanec: Bëdambuec tabadnuna, quec chuinanta. Aden naic chuiquid tapa Dabidën dada uampid cuëdëntebëta cuëdënte utsi Nuquin Papan mibi bëdambo icmiaidbëtabi ambi naid utsi chiec cuëdëndedneta.

Tesadonica 1 5:23

Mibitedi tantiaquin Nuquin Papa naden chiannembi. Bëdambuec tabadmianquid icquin mimbi chiacpadombuen naic bëdambuec tabadquid icme. Adembidi aton tantiate yec aton mayan yec aton dada yec quenuc bëdambo icmequin bëdambuen dayun ua, Papa. Adoacsho Cun Icbo Esuquidistu choshon aido bëdambouidquio icsho istuidendac, quequin chiannembi.

Tito 2:14

Nuqui cainaid nuqui icsambuen naidtedi bedshunec abided cuidadec Esus uënëspanëdash. Adec uënësaid tantiaquid yansho: Cun matses caido yec bëdambuec tabadquid nendac, quequin chiaid tantiameta, Tito.

Ebedeo 9:12

Matsesën nëish iua cuessunneshun intac bedshun buanec Nuquin Papa tabadte shubu uashunaid quënë bëdamboshëcquidën puduedenquio Esuquidistu icpanëdash. Aidi matsesën icsambuen naid bedshunash abided cuidadec uënësacsho cudan siac aton intac chiuidash Nuquin Papa yacnombo aid ismec puduedpanëdash. Adec abentsequi puduedshun abi tantiaquido nuqui icsho ënenquio icquin Nuquin Papa bëdambuen ismequin nuqui icsambuen naidtedi bëshunmec.

Santiaco 1:5

Bëdambuen tantienquio iquembique. Ubi dadpen bëdambuen tantiaquid icmeta, quequin Nuquin Papa chuita. Aden abi chuisho: Ma bëdambuen tantianu, queshun chushcainquio icquin mibi dadpenquio bëdambuen tantiamendac.

Petedo 1 1:2

Ëndenquimbo Nuquin Papa: Umbi tantiactedi ubi tantiaquid icmendambi, quepampic. Nëbi ambi tantiampicpadombuen aton Mayanën tantiamiac: Aidën chiacpadombuen nate bunebi, quec mibi bëdambuec tabadte bunendac. Icsambuen naquid icsho cuidmenquio icnuec abided cuidadec intac chididiquec uënësondaid Esuquidistun Nuquin Papa bëdambuen ismequin bëdambuec tabadquid ma mibitedi icmepanuna.

Petedo 2 1:1

Simon Petedo nebi. Abëd icquid yec aton iuambo icsho Esuquidistun: Ubi chuibenneta, caondaidquio nebi. Umbi tantiaidbidi bëdamboshëcquid Esuquidistu tantiaquido icsho mibitedi tantiembi, quequin chuiquin dada uaic nebi. Nuquin Papapadquidquiobidi yec Nuquin Papa matses cuidmenquiocquid Esuquidistu nec. Adquid icquin abimbo chuiquin cuidquidquio nec.

Uan 1 5:6

Esuquidistu nidaidën choacsho: Nuquin Papan Madombo nec, quequin tantiamenuen Uan acten mentoanquidën acten mentopanëdash. Adembidi tantiamenuec cueste napotiaidën dectanac intac chididiquec uënëspanëdash. Adsho issun Nuquin Papan Mayanën: Aid Nuquin Papan Madombo nec, quequin chiaid abimbo nec.

Esusën Uan ismiaid 14:4

Aido nidaidën tabadec: Icsamane, queshun utsibon papa canun nacnenaid tantienquiocquido neposh. Adembidi utsibon Obecabimbuecquid tantiatiapimbo icnubi aid tantiaquidombo icnëdaid neposh. Adquid icquin Obecabimbuecquid ënenquio icquin abi nidacsho tsibanquin tantiaquidombo neposh. Adnëdaid icquin nëish iua pichicaquin ismiacbimbuen Nuquin Papabëta Obecabimbuecquid cuishoncamequioposh.

Esusën Uan ismiaid 5:9

Adashic nadec cuëdënte chucan cuëdëncuededposh: Mimbiuidtsëqui Nuquin Papan sananaid dada uaid bedshun bitaccaid chicquin isbanquin Nuquin Papan chiacpadombuen namendac. Nuquin Papan chiacpadec matses cuidmenquio icnuec mibided cuidadec intac chididiquenuc uënës uaondaid mibi nec. Nëbi icsambo icbuedombi abi icsaid bedshunquid tantiasho Nuquin Papan bëdambuen isendac nëidtedi: Nëidic matses utsibo dadpenquio. Nëidic onquete utsin utsinquiec onquequido. Nëidic shubu daëdpactsëcquido utsi utsiec yacnocquido. Nëidic nidaid utsi utsiec yacno tabadquido. Aidtedishun abi tantiasho Nuquin Papan bëdambuen isendac.