Números 12:8 - Sharanahua: Diospan Tsain

⁸ Unfin a fu tsainmisiquin uncai ahuara futsahuunoa yoitamarocon un ahuun ointaifin shafacaficoin yoimisi. Unfin Moisés ismamisiquin unmain ahuu cuscaraquin. Nanton ua oinmisi. ¿Ascacun ahuuscai man uqui ratuamamun nan uhuun oinmati Moiséshuunoa tsain chaca huai? —ishon ato Upa Diosin yoini.

Números 12:8 Iomraidhean Croise

Génesis 32:30

—Un Diosi fuso oinfiaitocai ua namamanamaran, —ishon Jacob yoini. Ascashon nannoa nan mai anuni Penuelran ishon yoini.

Éxodo 19:19

Nantianri manutifo nai ariashu fasi achacoin chaan chaan ini. Ascano Moisés nocon Ifo Diosi cunani. Ascaiton nocon Ifo Diosin cumaiton nicafo nan nai turuica nicatsaton cumani. Ascano nantian ahuun oi nicanifo.

Éxodo 20:4

Ahuara rami huayamacahuu “Uhuun diosiran” ishon yoiyamacahuun, Ascarafocai nocon diosima. Ahuara nai murannoa cuscarafo rami huashon, “Uhuun diosiran,” iyamacahuu. Ahuara mai anoa cuscarafori rami huashon, “Uhuun diosiran,” iyamacahuu. Ahuara unu murannoa cuscarafori rami huashon, “Uhuun diosiran,” huayamacahuu.

Éxodo 33:11

Ascatan pano pushu ichananti murannoashu nocon Ifo Diosin Moisés fu yoinonanni. Nan a fu rafua fu yora tsaintiro cusca ai nocon Ifo Diosin Moisés fu tsainni. Tsainquin unutan Moisés afanan ahuun caifo icano nasoni. Ascano nan Moisés fu rafumisi Josué Nunpan facu nan ichananti pano pushu muran nituyoni.

Éxodo 33:19

Nannori cufiainton nicaquin nocon Ifo Diosin Moisés cumani, —Un fasi sharacoinshon un mia finonmani. Un mia finonmanaitian uhuun anu un mia yoi. Nan un ato catoanfofin un ato shinaincai. Ascashon un ato shara huatiro. Nanscarifiaquin nan un atohuun ramapaiyaifin un atohuun ramapaitiroquin.

Éxodo 33:23

Ascano nan uhuun mucu un finifoannaitian min uhuun puchi fusti oinshquin. Ascafia mincai uhuun fuso ointiromaran, —ishon Ifo Diosin Moisés yoini.

Éxodo 34:30

Ascano Aarón yafi Israelifo icano Moisés nocoaiton oianfo ahuun fuso fasi chashacoiaiton oincani fasi aqui ratucoinnifo. Moisés chaimacai Israelifo aqui funifoma fasi ratucani.

Números 14:14

Nan mai shara icafoannoshon mihuunoa nicamisifo. Min no fu imisi cuscan nan yorafoan nicamisifo. Man mia yora futsafoan nica min noco ashoan cusca. Min nai coinmanhuan rufofo noco iyoshonaino acachori non shafata cani. Ascanori yamu chii urumanhuanri noco iyoshoni. Nan manifotiton min noco ashoain cusca nicamisifo.

Mateo 13:35

Nannori Diosin tsain yoimisiton nan Jesús yoinon pacoai cuscan cunuqui isca huani, “Un ato ahuara futsahuunoa ato yoi ato tapimashquin. Upa Diosin nantifi onihuani chain tsoan ascara nicayomisima cuscarafo un ato yoishquiran,” ishon yoini cuscacoin man aa.

Lucas 10:16

Asca huatan Jesús ahuun tanamisifo afanan ato yoiqui isca huani, —Tsoan man yoiai cuscacoin mato nicaquifin nan uacoin nicai cafisca huaiquin. Ascan tsoan mato nicacasmaquifin uarifi nicacasmaiquin. Ascan tsoan ua nicacasmaquifin nan ua nichini uhuun Upan Diosiri nicacasmaiquin, —ishon Jesús ato yoini.

Juan 1:18

Tsoancai Upa Dios oinmisima. Ascafia ahuun Facu fu rafumisiton ahuunoa noco yoimisiquin. Ahuunshon non tapitiro ahuu cuscaramain Upa Diosiquin.

Juan 15:15

Nan ufu rafuafosi un shinain cuscan un ato tapimatiro. Manfin ufu rafumisiquin. Ascan nantifi uhuun Upan ua yoimisi cuscan un matori tapimana. Ascacucai man afanan uhuun oinmatiforan un mato huaima. Man ufu rafumisiran un mato huashquicain.

Juan 15:24

Diosihuunshon tsoa futsan atiroma cuscan un ato ismamisi. Ascafiacai aton chaca shatuafoma. Un ato ismayamaino aton chaca atohuun nuucuanama. Tsoa futsan atiroma cuscan un ato ismafafaini. Man oinfiacashon ua noicasmafain uhuun Upari noicasmafo.

1 Corintios 13:12

Fuisiti matacoiannocai nocon fuso cuscaracoin non ointiroma. Nanscarifiai natian Jesús icai cuscacoincai non onancoiantaima. Chipo aqui nocoshon ahuun fusocoin non oincointiro. Nantiantari aficoinmain ua onancoiaintofin urifi un onancoinyaino.

2 Corintios 3:18

Ascan noncai fufopomua cuscarama. Nocon Ifoan tsain non oinsharatiro. Nonfin fuisiti cuscarafoquin. Futsafoan noco oinquin nocon Ifo Jesús fasi shara ointirofo. Ahuun Yoshin Sharapan nocon nomuran noco iquifain nocorifi fiananan huaa non nocon Ifo cuscara shara non inon.

Deuteronomio 34:10

Nan Moisés Diosin tsain yoimisi cuscaracai afanan tsoan imisima. Diosin fu Moisés oinonanpaoni a furi tsainpaoni. Tsoan futsacai Moisés cuscara Diosi fu tsainmisima.

Deuteronomio 4:15

Diosin mato yoiaitiancai machi Horeb anoshon ahuun caya man oinnima.

Colosenses 1:15

Ascan noncai Upa Dios non ointiromafiano Furun Jesús mai ano oni. Ascashon Furunmun noco tapimani ahuu cuscaramain Apa Diosiquin. Ascan Furun Jesusfin nan Apa cuscaracoin. Ahuun ointi cuscarari. Ahuashtacai oniataima Apa Dios fu nai muran iyopaoni.

1 Tesalonicenses 4:8

Ascacufin tsoan un mato yosimisi cuscan nicayamai atocai nocofunu fustisi nicacasmaima. Dioscoinrifi nicacasmamisi. Nanton ahuun Yoshin Shara mato inan mato amapaiyai cuscan man tapinon.

1 Timoteo 6:16

Arus fusti niaifocoin ipanaca. Nancai napanacama. A icarifi chashacoianquin. Ascano tsoacai aqui nocotiroma. Tsoanricai ointamari ointiroma. Ascacun non ahuunoa yoisharanon. Aafin curushcoin ipanacaquin. Nanscasiai.

Hebreos 1:1

Uhuun yoramishtichin un mato cunu fomai man tapinon. Upa Diosin noco shunifo yoipaiyai cuscan ahuun tsain yoishomisifo yoiyopaoni ato tapimanonfo. Namapahuunshon ato yoifain namapan cuscarahuunshon ato yoifain ahuun nai oinmatihuunshon ato yoifain ahuun oicoinin ato yoipaoni.

Hebreos 1:3

Nanton Apa Diosin cuscaracoin. Noco ismacoin ahuu cuscaramain Apa Diosiquin. Apa shara imisi cuscan arifi nanscaracoin. Furunmun ahuun tsainmansi ahuamamishti huatiroquin. Ascan ahuun curushhuunshon ahuun tsainmansi onihuafoti yonotiro afin apaiyai cuscan anonfo. Ahuun tsainmansi nantifi onihuafoti cushusharafafainmisi. Nanfin nocohuunoashu nani nocon chaca noco soashoshquin non a cuscara shara inon. Ascashu Apa ari cani a futan nantifi iquifafainshquin.

2 Pedro 2:10

Nan aton nomuran shinanchacamisifoan ahuara chaca fusti huapaiyaifo cuscan huamisifo. Nanfoan noco Ifo Cristo nicacasmamisifo. Ascan nan cuscara yorafo Diosin ato onaintimaquin finacoinshquin. Nan cacapaimisifoan shinanquin isca huamisifo, —Tsoancai noco yonotiroma, —ishon shinanfafaimisifo. Diospan nai oinmati sharafori roafiaicai tsoa musutirofoma.

Judas 1:8

Nanscarifiai nan chanimisifoan chaca fustisi huafafaincani. Ascacanashu futsafo fu chaca huatananmisi icain niaifofori nicacasmafain. Diospan nai oinmatifori roamisifo.