Números 12:2 - Sharanahua: Diospan Tsain

² —¿Nocon Ifo Diosicai Moisés fustihuunshon ahuun tsain futsafo yoiamun? ¡Ma! Nocohuunshonri ahuun tsain futsafo yoimisiran, —ishon María futan Aarón Moisésqui tsain chaca huanifo. Nan yoiti huaifo cusca nocon Ifo Diosin nicani.

Números 12:2 Iomraidhean Croise

Génesis 29:33

Ascano chipo facu futsari nanuni. Caincun Simeónran, ishon anuni. —Uhuun Ifon ua facu futsari inan uhuun funun ua noisharayamaiton oinquin, —ishon Leapan yoini.

2 Samuel 11:27

Uaiquin unuano David futsa nichini ahuun pushu ano Betsabé ihuunon. Ascan ihuuano David fini ahuun ahuin inon. Chipo man furonanfacuya. Ascafia David aca cuscan nocon Ifo Diosin shinansharamanama. Fasi chaca hua.

Éxodo 4:14

Nannori cumaiton nicain nocon Ifo Diosin Moisésqui sinataquin yoini isca huaquin, —Nan min ochi Aarón mia cuscara arifi Levitafo. Nantoncaifin tsain yoisharatiroquin. Natian man mia oinyoi. Miqui nocoaitian fasi unimacoinni mia oiainno.

Éxodo 4:30

Nan nocon Ifo Diosin Moisés nantifi yoini cusca Aarón ato tapimani. Nantianri Diosihuunshon tsoa atiroma cusca Aarón ato ismani.

Éxodo 5:1

Ascatan Israeli niaifofo ato tsain yoiquin anaititan Moisés fu Aarón nan Egipcio niaifo Faraón ano tapimani focani fonifo. Ascashon Faraón ano nocotan yoiquin isca huanifo, —Niaifon, non mia tapimanon nocon Ifo Diosin mia yoipaiyai cuscan, “Uhuun yora nan Israelifo tsoa istaipama ari nichihuun. Nanno ichanancashon pifain uhuunoa yoisharanonfo,” ishon nocon Ifon Diosin mia yoiran, —ishon Moisés futan Aarón yoiaifoan.

Éxodo 7:10

Ascatan Moisés yafi Aarón Faraón ano cani Diosin ato yonoa cusca anon. Aarón ahuun poquiti mai ano potaino rono oniriscatani. Faraón yafi niaifo patasharinoaton oinnifo.

Números 11:1

Nannori ato yoifianicun Israelifoan tsain chipunifo. Ascashon yoinifo, —Nonfin fasi omitsiscaicain, —ishon tsain chipuaifoan nocon Ifo Diosin ato nicain atoqui fasi sinani. Ascashon atoqui chiihuan otani coononfo. Nan pasoato icafori atirifi cooi futsunifo.

Números 11:29

Ascafiaiton Moisés Josué cumani, —¿Min shinan urus fusti un Diospan Yoshin Sharahuunshon yorafo yoipaimun? Ma. Nocon Ifo Diosin ahuun Yoshin Shara nantifi nocon caifoya rafumapainon ahuun tsain noco yoinonfo, —ishon Moisés cumani.

Números 12:3

Moiséscai curafiapaimisima. Tsoa futsacai Moisés cuscarama. Nantocai futsafo finonpaimisima. Manifoti anoacai tsoa a cuscara sharama. Nantofin Diosi fusti tanapaisharaiquin.

Números 16:3

Ascatan Moisés yafi Aarón ano fonifo ato yoiquin isca huanifo, —Manfin nantifi finonpaicain. Nantifi Israelifofin nocon Ifo Diosin catoanquin ato yonoshquin. Mato fustimaquian. Nocon Ifo Diosin nantifi noco fu ica. ¿Ahuuscaimun man shinanquin noco niaifocoin man itiro noco yonoshquin? Nonfin nantifi nocon Ifo Diosin ahuun yorafoquin, —ishon nannori yoinifo.

Romanos 12:10

Nan man icoinra huafoti noinancahuun. Maton yoracoinfo man noimisi cuscan huafainri futsafo ya noinancahuun. Yoinansharatanancahuun.

Romanos 12:3

Upa Diosin uhuun ramapaiquin ua maton muran nichini un mato tapimanon. Ascan un nantifi mato yoisharapai. Cacapaimisi iyamacahuun. Diosin mato imapaiyai cuscan fusti shinancahuun. Ahua futsa ipaiyamacahuun. Man Dios icoinra huatiro cuscan afin mato shinanmanaino cayacafi shinansharacahuun. Man icoinra huaa cuscan nan fusti Upa Dios ashocahuun.

Filipenses 2:14

Ascacun Diosin mato amapaiyai cuscan fusti huacahuun. Nantifi man acai cuscan huaquin tsain chipufain fochishmanantananyamacahuun.

Filipenses 2:3

—Ufin un apaiyai cuscan fustifin un huaicain. Ascan futsafoan apaiaifo cuscacai un shinanpaima. Ascano un acai cuscamun futsafoan uhuunoa shinansharapainonforan, —icashu cacapaimisi iyamacahuun. Anori itamarocon futsafohuunoa shinansharacahuun. Ascashon atohuunoa yoiquin isca huacahuun, —Nanfoanfin ua finontirofoquin. Ascan uncai ahuama. Jesús fustiton ua imasharatiroran, —ishon futsafo finonmapaiyamacahuun.

1 Pedro 5:5

Nanscarifiai pushcofoan iyoafofo nicasharacahuun mato yoiaifo cuscan aashcaquin. Pushcofoan iyoafofoya shara huatanancahuun. “Upa Diosicai cacapaimisifo cuscara tapipaima. Ascashon nan cacapaimisifo ato onaintimashqui. Ascan nan tsii huatananmisifofin shara huashoshquiquin. Nan cuscarafohuun Upa Diosin atohuun ramapaiquin ato shara huashofafainshquin,” ishon Diospan tsain cununi.