Mateo 6:16 - Sharanahua: Diospan Tsain

¹⁶ Ascano tsain futsari un mato yoi man tapinon. Man piqui tunuaitian nan paramisifoan amisifo cuscan huayamacahuun. Nanfoan aton fuso chocayamafain puusimisifoma piqui tunucani. Dioshuunoa shinantama atohuunoarocon yorafo shinanmapaicani. Yorafoan atohuunoa shinanqui isca huanonfo, “¡Oincapon! Naton fuso Dios shinanquin piqui tunui puusiquimaran,” ishon. Ascashon atohuunoa shinansharafoanno unimacani. Ascafiafoanno Dioscai atoqui unimaqui ato ahuara inainma. Ascacun marifi ato cuscara iyamacahuun.

Mateo 6:16 Iomraidhean Croise

2 Samuel 12:16

Ascaiton David nocon Ifo Diosi fasi cufini isca huaquin, —Ifon, uhuun facushta ua caya huashopun naanonma, —ishon cufinquin piqui tunufai yamutifi maitoca racashini.

2 Samuel 12:21

Ascaiton oincaquin ahuun niaifo patasharinoafoan yocani, —Niaifon, min acai cuscacai non tapiama. Min facu nataima min piqui tunufain fasi min uaica. Ascan min facu naano min funishon min piaran, —ishon yoinifo.

Daniel 9:3

Nan tapishon un nocon Ifo Diosi cufian un yocai cuscan ua ashonon. Un cufinquin piqui tunufain uhuun sahuuti chocashta sahuufain un chii mapon mashpocomuni.

Mateo 6:1

Oinfain. Man futsafo shara huaino maton nomuran man shinain isca huaquin, “¡Aicho! Un ato shara huacun futsafo ua oincani uqui shinansharanonforan,” ishon anori man shinancai Upa Diosin matoqui unimaima. Mato ahua inainma.

Mateo 6:2

Nan paramisifo cuscara iyamacahuun. Nanfoan atohuunoa yorafo shinansharamacani isca huaquin, “Nan yora fasi sharacoin. Futsafo shara huashoanran,” ishon nannori futsafo atohuunoa shinanmapai. Nantifi ato ointaifi yora shara huapai ato oinonfo. Ascara chaca. Upa Diosin atoqui unimaima. Futsafoan ato, “Min shararan,” huatirofiaino Upa Diosincai atohuunoa tsain shara yoishquima. Atoqui unimaima. Ascan marifi ato cuscara iyamacahuun. Futsafo ato ointaifi ahuuoma inanpaicahuun mato oinonfo. Ascaquimarocon tsoa futsa oinyamaino man ahuuoma inanquin Upa Diosin oin matoqui unimai mato ashosharatiro.

Mateo 6:5

Man Upa Dios cufiaitian nan paramisifoan cufimisifo cuscan huayamacahuun. Nanfoanfin nishon yora ichananfo anoshon yafi ichananti pushu muranshonri ato ointaifi Upa Dios cufipaicani ato nicanonfo. Upa Dios shinancointamarocon nannoafo atohuunoa shinansharamapaicani. Ascaifoan oinquin futsafoan atohuunoa shinansharatirofia Diosincai atohuunoa shinansharatiroma. Ascashocai ato ahuashta inansharashquima.

Marcos 2:18

Ascano iyoco futsaino nan Juanhuunshon tanamisifo non Fariseofoan piqui tununifoquin. Ascaiton futsafoan Jesús yocanifo, —¿Ahuuscain Juanhuunshon tapimisifo futan Fariseofoanri piqui tunufiaino minhuunshon tapimisifoancai piqui tunucanimamun? —ishon yocaifoan.

Lucas 18:12

Nan semanantifi un piqui tunuquin rafu huafafaini. Nan un fiaishtafin un mia pashcashofafainiquin, Upa Diosin,” ishon Fariseo yoini.

Lucas 2:37

Ascashucai ochenta cuatro fari funuya. Nantianri Dios fu tsainti pushu muranshon Dios cufinquin piqui tunufafainpaoni. Nan muransi ipaoni ahuun Ifoan amapaiyai cuscan aashquin.

Hechos 10:30

Cornelion cumani, —Osha rafu non rafuri finontan nantianri un Upa Dios cufiaino nocofunu ahuun sahuuti chashaino uqui niriscatana.

Hechos 14:23

Ichananti pushuti anoshon Pablo futan Bernabé Upa Dios icoinra huafohuunoa cufifain piqui tununifo aton cushumisifo catonshcaquin. Ascaino, —Upa mia icoinra huacaniquin ato cushusharahuu, —ishon cufinifo.

1 Corintios 7:5

Raninonanyamacahuun. Ascashon man chipo shinanquin isca huatiro, —Natian non Upa Dios cufiyonon. Shafa ranan non iyoimacai. Chipo afanan non inon, —icashu man unuyotiro. Ascafiashon chai manariyamacahuun. Man ascariaino Satanás mato chaca huamatiroquin. Funu ainfo futsa fu ipaitiro. Nanscarifiai ahuin nocofunu futsa fu ipaiquin chaca huatiroquin.

2 Corintios 11:27

Un isin mufiain un fasi curushcai yonomisi nan un yamu ichapa osha tunufain un foniyanan nomicain piqui tunufain fasi un matsinacain sahuutiama icain.

2 Corintios 6:5

Ascashon noco coshafain cunu muran noco iquimafain noco huamisifo nan sinamisifo nocoqui fucashon noco chaca huashcaquin nanscamisifoquin. Ascan nonrifi curushcain yonoi atsanacain yamu ichapa oshayamacai foniyanan non ascamisiquin.