Lucas 6:48 - Sharanahua: Diospan Tsain

⁴⁸ Tsoan pushu huaquin ahuun quishi nichishquin iquisi mai puhuuqui mai tuiqui nocoa. Ascashon pushu anaitiano ananmanri unu foanfiaquicai pacutiroma. Fasi pushu mutsisipacoin. Nanscarifiai nan uhuun tsain nicacoianfo nan un yoia cuscacoin acani. Ascashu ahuara ahuuscarafiainocai umaqui itirofoma.

Lucas 6:48 Iomraidhean Croise

2 Samuel 22:2

—Uhuun Ifo Diosin min uhuun cushumisicoincun. Un miqui ichotiro min ua cushunon. Min uhuun numamisi ahuara chacafoan ato oinmati un inonma.

2 Samuel 22:32

Nocon Ifo fustifin Diosiquin. Nan fustifin toquirininhuan cuscaraquin. Tsoan Diosin shucatiroma noco cushunonma.

2 Samuel 22:47

¡Ifo Diosin, minfin uhuun toquirininhuan cuscaran nipanaca! Tsoan mia anoa shucatiroma. Min ua cushupacunaca. Uhuun Numamisi nocon Ifo Diosin nantifi finoncoian. ¡Nannori nantifi yoipacupainon!

2 Samuel 22:5

Unuhuan fuchoaino yora asatiro. Nanscarifiaquin yora chacafoan ua namapai. Un fasi ratucoin ua cuyopaiyaifoanno.

Salmos 32:6

Unu faitanhuan nocoriscaino yorafo machi cuya ano foriscatirofo unu atoqui nocononma. Ascashu tsoanshtacai asatiroma. Nanscarifi ai Ifo Diosin tanamisifoan chaca huashu miqui focashon mia yoiaifoan oinquin min ato chaca soashotiro. Ascan nan mia chaca huamisifo min ato onaintimaitiancai nan mia tanamisiforicai min ato onaintimaima.

Salmos 62:2

Arus fusti uhuun toquirininhuan cuscaran. Diosin u fu rafuaino tsoancai ua shucatiroma ua pacumashquin. Uafin tarati huayacunaquin nan noicasmaifo non ahuara chaca uqui nocononfoma. Ahuarafoancai Diosmaquinoa ua potatiroma.

Lucas 6:47

Ascacun un mato yoi ahuu cuscaramain tsoan ua nicasharashu nan un yoia cuscacoin aaiquin.

Lucas 6:49

Ascan un yoiai cuscan nicafiashu tsoa ascaima ahuuscamain acanicain un mato yoi. Yoran pushu huaqui ahuun quishi nichifiaquin mai puhuuqui tuiqui nocoama. Fuquinishtacoin huaa. Ascashon pushu anaitiano ananmanri unu fai foanquin pushu paoanquin chacana huatiro. Nanscarifiai tsoan uhuun tsain nicafiai ascashuma ahuun unutani nantifi funocani. Omitsiscashcaniran, —ishon Jesús ato yoini.

Juan 16:33

Un mato yoiafo uhuunshon maton ointi man unimamafain man isharanon. Nuno icoinra huafoma murannoashu omitsiscafiacaquin shinanchacayamacahuun. Un Satanás yafi icoinra huafomati finoncoianquin. Ascan un mato cushuicai, —ishon Jesús noco yoini.

Hechos 14:22

Nanno Jesús tanamisifo Diosin tsain yoinifo aton ointi fupihuamashquin Jesús tanaquin finacoinnonfo. —Diospan tsain cachiquiri huayamacahuun. Jesús fusti icoinra huacahuun. Upa Diosin nantifi iquina ano non nocoataima non niyoashu non fasi omitsiscatiroran, —ishon ato yoini.

Efesios 2:20

Upa Diosin ahuun yorafofin nan pushu shara huamua cuscarafoquin. Non pushu tau huaquin quishi mutsisipacoin non yopatiro. Chipo nantifi pushun canofo non ichanan huatiro. Nanscarifi aquin Jesús fu rafumisifo futan Diospan tsain yoimisiforifi nan pushu cano shara cuscarafoquin. Pushu cano shara yamainocai non ahuuscashon fomancayan shara huatiroma. Nanscarifiai Jesús fu rafumisifo non Diospan tsain yoimisifoanri noco yoiyamainocai non ahuuscashon icoinra huacuanama Diospan yorafo iishquin. Ascano Cristo Jesusfin nocon pushu quishi mutsisipacoin cuscaraquin. Pushu quishi yamainocai non pushu huatiroma. Nanscarifi aquin Cristo yamainocai non Diospan yora icuanama. Ahuunoashufin nan pushu shara huamua cuscara non itiroquin. Nonfin nocon Ifohuunoashu pushu mutsisipacoin cuscaraquin ahuashtacai chaca amuran iquitiroma. Pushu yonomisiton ahuarafo fitiro pushu huashquin. Nanscarifi aquin natian Upa Diosin icoinra huafoti ahuun Furunhuunshon noco nannorisi shinanmaino non ahuun pushu cuscara shara inon ahuun Yoshin Sharahuunoashu non afu iishquin.

2 Timoteo 2:19

Ascafia Diosin tsain iconcoin. Toquirininhuancai tsoan rafutiroma. Diospan tsain nanscarari tsoancai fiananan huatiroma. Icon yoimisi cuscan nannoricoin. Toquirininhuanqui yora cunuacai tsoan soatiroma. Nanscarifiai Diospan tsain cununi isca huaquin, —Nocon Ifoan ahuun yorafo onancoian. Ascano ahuun yoracoinfoan chaca huamisifo cuscan potatiroforan, —ishon cununi.

2 Pedro 1:10

Ascacun uhuun yoramishtichin Upa Diosin mato amapaiyai cuscan nantifi acahuun. Ascashon man tapicointiro mato catonnicun ahuun yorafo man inon afu ipashquin. Ascashucai man chaca huapaoni cuscan man afanan nasopacunacama.

1 Juan 2:28

Uhuun yoramishtichin, Jesús mato tapima cuscan cachiquiri huayamacahuun. Shafatifi nicacoincahuun yoia cuscan aqui. Ascan Jesús nocoaino man aqui rafipaitiroma. Ascatamarocon ahuun ointaifi ahuara chacafo man huamisi shinanshma man Jesús fu isharatiro.

Judas 1:24

Ascan uhuun tsain unutaqui nocon Dioshuunoa un mato yoisharapai. Nanton mato cushusharatiro man chaca huanonma. Unimacoincain ahuun ointaifi mato imasharatiro. Nannoshocai tsoan matohuun ahua chaca nuutatiroma. Ascashu unimacoin man aqui nocoshquin. Nantofin mato nansca shara huashotiroquin.

1 Samuel 2:2

Tsoa futsacai mia cuscara sharacoinma. Mirus fusti min noco Numamisi. Mirus fusti min ahuamamishti huatiro. Toquirininhuancai tsoan shucatiroma. Nanscarifi ai min nocon Diosi min acai cuscacai tsoan mia nitu huatiroma.