Éxodo 6:6 - Sharanahua: Diospan Tsain

⁶ Ascacun min caifo Israelifo ua ato yoishohuun isca huaquin, “Unquian mato Ifo Diosin. Unfin Egipciofo uhuun yono ismaicai. Un ahuamamishti huatiro cuscafin man oincain. Nantiancai afanan man curushcai yonoima. Afananricai tsoa aton yonomatifo iquima. Unfin mato numaicai. Ascashon Egipciofo un ato onaintimacoin uhuun curushhuunshon man ato mai anoshon un mato nichishquin.

Éxodo 6:6 Iomraidhean Croise

Éxodo 1:11

Nannori niaifo ato yoiaiton nicacatan Egipciofoan Israelifo yononi aton yonomatifo inon. Ascashon ato curushcain yonomanifo. Pitón mai anoa yafi Ramsés mai ano pushu rasi ato huashononfo. Nan pushu rasifo ano Egipciofoan ato tushufo mucushonifo.

Éxodo 12:41

Nan cuatrocientos treinta fari cuyoano nan shafatacoin Diosin ahuun yora nan Israelifo Egipciofo mai anoshon ato nichini.

Éxodo 12:51

Nan shafatafin nocon Ifo Diosin nantifi Israelifo nan manifoti Egipcio mai anoshon ato iyoniquin.

Éxodo 13:14

Chipo ua nocon Ifo Diosin mato yonoa cusca man aino maton facufoan oincashon mato yocaquin isca huai, “¿Ahuuscai nocon fusiti shafa nocoano man iscatiromun?” ishon mato yocaifoan man ato yoitiro isca huaquin, “Nocon Ifo Diosin ahuun curushhuunshon noco Egipcio mai arishon ihuuni. Non Egipcio mai ano fari ichapacoin Egipciofoan noco curushcain yonopaoni. Non ato yonomatifo icaitian non fasi omitsiscapaoni. Ascano nocon Ifo Diosin ahuun curushhuunshon noco Egipcio mai arishon ihuuni.

Éxodo 13:16

Ascacufin nan fusiti shafa nocon onanti cuscaran itiroquin. Maton mucu iyamarai maton fumananqui man cunui futsucun mato onantiro. Nanscarifiaquin nan fusiti shafahuunoa man shinantiro nocon Ifo Diosin ahuun curushhuunshon noco Egipcio mai anoshon iyoni. Nan fusiti shafahuunoa Diosin noco ashoni cusca non ointiaquimapacunacama. Nantifi manifoti anoafoan tapitiro non Diospan yorafocun, —ishon Moisés yoini.

Éxodo 13:3

Nannori nicatan Moisés ahuun caifo yoini isca huaquin, —Nocon Ifo Diosin ahuun curushhuunshon mato Egipcio mai arishon ihuua afanan Egipciofoan aton yonomatifo man inonma. Ascacun nan noco ihuua shafa nocoaitian faritifi nan shinancahuun. Ointiaquimayamacahuun. Nan shafatafin nocon fusiti shafa ipanacaquin. Nan shafatan misi farashatiya piyamacahuun.

Éxodo 15:13

Nonfin min yorafoquin. Min noco numa non afanan Egipciofoan aton yonomatifo inonma. Minfin noco nantishotapiquin noipacunacaquin. Minfin noco tapimatiroquin nan non cai cusca. Min curushhuunshon mai sharacoin ano min noco iyoshquin. Nanno min no fu iishquin. Min no fu icaitian shara fustisi non ointiro.

Éxodo 16:6

Nannori nicacatan Moisés futan Aarón Israelifo yoini isca huaquin, —Na yatafin man tapicain tsoamain Egipcio mai anoshon mato ihuuaquin. Nonmaquian nocon Ifo Diosifin mato ihuuaquin.

Éxodo 18:1

Ascano nocon Ifo Diosin Moisés yafi ahuun caifo Israelifo ato ashoni cusca ato Egipcio anoshon iyoni cuscari Moisés ahuun raisi Jetro nicani. Nan Jetro ahuun caifofo Madián anoafo aton Ifo Diosi cufinshomisi ini.

Éxodo 2:11

Ascano nan Moisés pushcoaitian ahuun caifo oincai cani. Ascatan nocoshon oian Egipciofoan ahuun caifo Hebreofo fasi curushcain ato yonomani. Ascano ato ano nocoshon oian Egipcio nocofunun ahuun caifo sutuaiton oinquin.

Éxodo 3:17

Nan min shunifo inonpacoai cusca un yoiyoni nan omitsiscaifotian un mato Egipcio mai anoshon mai futsa yora futsafo nanno icafo ari un ato iyoi cairan huani. Nan maifin Cananeofo non Hititafo non Amorreofo non Ferezeofo non Heveofo non Jebuseofo nan mai ano icafo. Nanno mai fasi sharacoin. Nanno yonofo foaisharacain tushu sharacoin futsa futsatapafo icain fona ichapa fata sharaforan,’ ” ishon yoini.

Éxodo 3:8

Unfin nai murannoashu fotoaquin ato numashquin. Unfin Egipcio mai anoshon ato nichicain nan mai uhuapa fasi sharacoin ano un ato iyoi cai. Nannofin nantifi yono foaisharacain tushu sharacoinfo futsa futsatapafo icain fona ichaparasiquin. Nan unu afatiro cusca nanscarifi ai nan fona ayati sharacoin afain. Nantianri nanno Cananeofo non Hititafo non Amorreofo non Ferezeofo non Heveofo non Jebuseofo non afo icafoquin.

Éxodo 32:11

Nannori Upa Diosin yoiaiton nicaquin Moisés cumani isca huaquin, —Uhuun Ifon, min curushhuunshon min ahuamamishti huatiro cusca na yorafo uhuun caifofo min ato Egipcio mai anoshon ihuua. Ascacun atoqui sinaquin ato cuyoyamapun.

Éxodo 6:2

Ufin maton Ifoquin.

Éxodo 6:8

Nan Egipciofoan mai anoshon un mato mai futsa shara ano iyoshquin. Un maton shunifo Abraham non Isaac non Jacob yoiyoni cusca un mato nan mai shara inain matona inon. Unfin mato Ifocoinquin,” —ishon nocon Ifo Diosin yoini.

Éxodo 7:4

Un asca huafiacai mia nicashquima. Ascaino un Faraón yafi nantifi ahuun yorafo nan Egipciofo onaintimacoinshquin omitsiscanonfo. Ascan ahuun unutaqui uhuun yorafo Israelifo manifoti un ato Egipcio mai anoshon iyoshquin.

Éxodo 7:5

Uhuun yono nan un ahuamamishti atiro cuscan un ato oinmashon shinan futsamashquin maton caifo nan Israelifo nichishquin. Ascaiton oinquin Egipciofoan tapishcani unfin Ifo Diosiquin, —ishon nocon Ifo Diosin yoini.

Hechos 13:17

Nonfin Israelifoquin. Upa Diosin nocon shunifo catonni ahuun yorafo inonfo. Egipto ano iyoshon ato shara huani. Ahuun curushhuunshon Egipto anoshon ato iyoni.

Deuteronomio 11:2

Un natian mato afanan shinanmanai cusca maton facufoancai oinyomisifoma. Nocon Ifo Diosin mato tapimani cuscacai tsoa futsan muumisima. Nan ahuamamishti atiro cuscacai tsoan oinyomisima. Ahuun curushhuunshon noco ashopaoni cuscaricai tsoan oinmisima.

Deuteronomio 4:23

Diosin mato yononi cuscan man aifin ahuun yorafo man iishquicain. Nan mato cushusharanon. ¡Ascan oinfain! Mato yonoa cusca potayamacahuun. Diosin mato yoini ahuarafo rami huayamacahuun maton diosi inon. Ascan man ahuara ointsafo rami huashofin man Dioscoin potaiquin.

Deuteronomio 4:34

Upa Diosin mato ashomisi cuscacai ahuara rami huafoan mato ashotiroma. Upa Diosin mato Egipcio anoshon iyoni. Futsafoan mato chaca huafiaiton Diosin mato numa. Aafin mato ahuamamishti ismapaoniquin. Aafin mato oinmamisiquin ahuamamishti huatiroshaquin. Tsoa futsa atiroma cusca nocon Ifo Diosin mato ismamisi. Nantififain man man oinmisiquin. Man ahuara rami huatocai Diosin mato ashomisi cusca mato ashotiroma.

Deuteronomio 6:12

Ascacun oinfain. Mayancoinshocai afanan ahua man yopaima. Ascacun nantian nocon Ifo Diosi ointiaquimayamacahuun. Man Egipciofoan ato yonomati iyopaonitian nocon Ifo Diosin mato numani aton mai arishon nuno mato ihuua.