Éxodo 3:1 - Sharanahua: Diospan Tsain

¹ Ascano nantian Moisés ahuun raisi Jetro ahuun caifohuunshon Diosi cufinmisiton ahuun chashoanfo cushushopaoni. Fasi chaicoincushon tsoa istaipama ano ahuun raisin chashoanfo iyoni. Nanno machi cuyacoin Diospan ahuun machiran ishon anumisifo. Ahuun anu futsari Horeb huanifo.

Éxodo 3:1 Iomraidhean Croise

Éxodo 17:6

Nannoshon nan machi Horeb anoshon un mia manaicai. Min poquitinin na toquiri uhuapa tsacahuu. Min tsacaino toquiri murannoashu unu afanon nantifi min caifofoan ayanonfo, —ishon nocon Ifo Diosin Moisés yononi. Ascano nan niaifo patasharinoafoan ato ointaifi nocon Ifo Diosin yonoai cusca Moisés huani.

Éxodo 18:12

Nannori yoitan Moisés ahuun raisi Jetro ina rutushon coani nocon Ifo Diosi ismashquin arifin ahuun Diosin yoiai cusca aashquin. Ascano ahuara futsafori Jetro Diosi inan nan ahuun Ifo ismashquin. Ascano Aarón yafi Israelifo non aton niaifo patasharinoafori Moisés yafi ahuun raisi Jetroqui funifo ato futan piishcaquin. Diosi ointaifi ato futan pinifo.

Éxodo 19:11

Osha rafu finontan iyoconaino itisharacoinonfo un machi Sinaí ano un atoqui fotoi cai nantififain ua oinonfo.

Éxodo 19:2

Nan Refidim anoashu focanashu machi Sinaí tunanmanri noconifo. Ascashu nanno iyonifo.

Éxodo 19:3

Nannoashu Moisés machi mamaqui mapuni Diosi fu tsainshquin. Ascano nocon Ifo Diosin machi mamaquishon Moisés cunashon yoiquin isca huani, —Maton caifofo Jacob ahuun funafo Israelifo. Min ato yoitiro isca huaquin,

Éxodo 2:16

Ascano nan mai Madián ano nocofunu ahuun anu Reuel. Nantofin ahuun caifo Upa Diosi cufinshomisi ini. Ahuun facu shomaya mucu fustiti non mucu foshca fu rafuati ini. Naan shomayafo unu fii focani fonifo apan chashoanfo ayamashcaquin. Ascano nan pozomua ano Moisés tsaoa ini.

Éxodo 2:18

Nan samamashtacoin shomayafo aton apa Reuel ano nasofainifo. Nocoaifoan aton apan yocani, —¿Ahuuscai man nasoriscamun? —ishon ato apan yocaiton.

Éxodo 2:21

Ascashon Reuel Moisés yoini, —Uhuun pushu muran iquiyohuu, —ishon yoini. Ascano Moisés Reuel pushu ano a fu ini. Ascano chipo Reuel Moisés yoini, —Uhuun facu un mia fiimanon, —ishon Reuel Moisés yoini. Ascashon ainfacu Séfora fiimani Moisés ahuun ahuin inon.

Éxodo 24:13

Nannori nicatan Moisés Israelifo aton niaifo patasharinoafo ichanan huani ato yoishquin. —Unfin Josué fu machi Sinain mamaqui mapuicaicain nocon Ifo Diosin noco yoipaiyai cusca noco yoinon. Nunoshon noco manayocahuu. Un nunomano ahuara chaca finonshon Aarón iyamarai Hur yoicahuun nan rafutan mato yoitiro manmain ahuuscatiroquin, —ishon Moisés ato yoini.

Éxodo 3:12

—Unfin mi fu ishquicai. Min caifo Israelifo Egipcio mai anoshon iyoaitian nan machi Horeb anoshon man ua cufinshquinon. Ascashon min tapitiro un mia ya min yorafo nan Israelifo ano nichiaran, —ishon yoiaiton.

Éxodo 3:5

—Nanno nitunhuun. Afanan nii cuyamamishti shocoa chaimashta oyamahuu. Unfin nunoquin. Mincai ua cuscara sharama. Ascacun min sapato pucahuu un mia yoinon.

Éxodo 4:18

Ascano Moisés afanan ahuun raisi Jetro ahuun pushu ano nasoni. Ascashon ahuun raisi yoiquin isca huani, —Anifon, un Egipto ano capaicai. Ua nichipun. Uhuun caifo un afanan ointanon atirifimain man naafoquin, —ishon Moisés yoiaiton. —Shara. Minfin catiroquin. Casharatahuun. Min atoqui noco sharapainonran, —ishon ahuun raisi Jetro cumani.

Éxodo 4:27

Ascano nantianri nocon Ifo Diosin Aarón yoini isca huaquin, —Min ushto Moisés tsoa istaipama miqui oiquin aqui nocotahuun, —ishon Diosin Aarón yononi. Ascano nan machi anumisifo Diosin ahuun machiran, huamisifoanno. Nanno Moisésqui Aarón noconi. Nocotan fasi chipocuquin unimacoinquin ahuun tamoqui tsoani.

Lucas 2:8

Nan Belén chaimashon chashohuan cushumisifoan nan yamutari aton inafo faasi funununshon cushushinifo.

Hechos 7:30

Ascano cuarenta fari finoanno Diosin ahuun oinmati afu nai muran ica Moisésqui nichini. Nantianri Moisés machi ahuun anu Sinain chaimashta cani. Nanno pushu yamacain nii yamai. Fasi yafi chofo uhuapama fusti nanno. Nii cuyamamishti urufiainocai coonima. Moisés oinni. Oiainno mustairini. Ascan tapipai ahuuscain nii cuyamamishti urufiashucai nocaima chaimashta cashon. Oinni nii cuyamamishti uruai muran Upa Diosin ahuun oi nicani.

Deuteronomio 1:2

Machi Horeb anoashu fai nan machi Seirhuuri cai once dia oshatan Cades-barnea ano nocotiro ini.

Deuteronomio 1:6

Machi Horeb anoshon nocon Ifo Diosin noco yoini isca huaquin, —Na machi ano man iyomisi chain. Natian afanan nuno iyamacahuu.

Deuteronomio 4:10

Man machi Horeb tunanmanri nocon Ifo Diosin ointaifin man nanno nia ini. Nantian nocon Ifo Diosin ua yoini isca huaquin. “Nantifi min caifofo Israelifo ichanan huahuu un ato tapimasharanon. Nanfoan ua nicasharafain tapitirofo ahuuscashomain nan mai shara anoshon uhuunoa shinansharafain un ato yonoa cusca nicasharafain aton facufori tapimacanicain. Ascano nanfoan niyocashon ua nicasharatiroforan,” ishon ua Diosin yoini. Nanhuunoari maton facufo tapimacahuun.