Apocalipsis 11:8 - Sharanahua: Diospan Tsain

⁸ Ascatan nan rafu Jerusalén anoashu naacanashu aton caya fai ano racafo. Nannoshorifi noco Ifo mastanifo. Ascacun Jerusalén ano icafo yoitirofo nan Sodoma yafi Egipto anoafo cuscara. Nannoshon fasi chaca huapaonifo. Dios yafi ahuun yorafo noicasmapaonifo. Asca Jerusalén anoafofin nanscarafoquin. Ascacun nannoashu nan rafu naacanashu aton caya fai ano racafo.

Apocalipsis 11:8 Iomraidhean Croise

Génesis 13:13

Nan Sodoma anoa nocofunufoan fasi chacacoin huapaonifo. Nanfoan nocon Ifo Diosi nicacasmafain chacasi huapaonifo.

Génesis 19:24

Ascashu nocoaino Ifon Diosin nai muranshon chii yafi foi chashcaica Sodoma yafi Gomorra camaqui ocani.

Éxodo 20:2

—Unfin maton Ifo Diosiquin. Man Egipciofoan ato yonomatifo ipaoni. Ascafiano un mato Egipcio mai arishon ihuua afanan aton yonomatifo man inonma.

Éxodo 3:7

Ascano Diosin afanan yoini isca huaquin, —Uhuun yora Israelifofin mun oianquin fasi omitsiscaifoan Egipciofoan ato curushcain yonomanai cusca fasi atsanai pashapaiyaifoan un oian. Un fasi atohuun ramapaicoian.

Mateo 10:15

Un mato icon yoi. Diosin nantifi nan chaca huamisifo ato yoipacuaitian nan Sodoma yafi Gomorra ano ipaonifori ato onaintimashqui. Ascashon nan mato nicacasmafori natian ato onaintimaquin finacoinshquin.

Hechos 9:4

Pacuquin ahuun oi nicani, —Saulo, Saulo, ¿Ahuuscaquimun mian omitsisca huaiquin? —huaiton.

Hebreos 13:12

Nanscarifiai Jesús Jerusalén pasoatonoashu noco omitsiscashocai ahuun imi focai ahuun yorafohuunoashu nani nocon chaca noco soashoshquin non a cuscara shara inon.

2 Pedro 2:6

Nanscarifi aquin nan Sodoma yafi Gomorra ano icafoan fasi chacasi huapaonifo. Ascacun Diosin yoini, —Un ato onaintimacoinshquiran, —ishon yoini. Yoitan nai muranshon chi urumanhuan potani ato coaino nai cuyononfo. Nanno chi mapo fusti ini. Nanscarifi aquicai Diosinhuunoa futsafoan shinanmisifoma. Nanscacun ato musu huapaifiaino atirififain chaca shatuyamashu omitsiscapashcani.

Judas 1:7

Diospan oinmati a fu nai muran icafoan chaca huapaonifo cuscari Sodoma yafi Gomorra chaimashon nanscara chaca huapaonifo. Nocofunufoan aton ahuinma chotaifoanno. Ainfofoanri aton funumafo chotamapaonifo. Nocofunufori afi ranan chotananpaiyaifoanno ainfon tanatama. Ascacani chacanisi tapipaonifo. Ascacun atohuunshon non tapitiro nan chaca huamisifo omitsiscapanacafo muran focani. Nanhuunoari ointiaquimayamacahuun.

Apocalipsis 11:13

Fotapaiyaifoanno mai ano fasi curushcain naiyanaiyaishquin. Ascaino atirifi pushu Jerusalén anoafo maocomushquiai cuscan un oinyoa. Ascaino siete mil yorafo man naafo. Nan tushuafo fasi ratucoianfo, —Shinancapon. Upa Diosin nai muran icaton ahuamamishti huatiroran, —icashu yoinanshcani.

Apocalipsis 11:9

Ascacun maifoti yafi manifoti tsain futsa futsatapafo nan Jerusalén ano ichananfo nan rafutan aton caya oinpai fuafo. Ascafia niaifofoan yonocun tsoancai aton caya mai huatiro icama. Osha rafu non fusti nushmancayan aton caya racacun oinriafo.

Apocalipsis 14:20

Diosin icanoshon ato onaintimanama. Futsafoan ato rutushcani aton imi ichapa foshquin. Ascaran tsoan oinyomisima. Aton imi noacoin caballo fasi tusanancoian. Ahuun chai trescientos kilometro.

Apocalipsis 14:8

Ascatan Diospan oinmati futsan afu nai muran ica ahuun tsain anaitishon futsan nocotoshishon isca huaquin yoia, —Nan pushurasi uhuapa ahuun anu Babilonia. Yorahuanrasi nan pushurasi uhuapa ano ica. Nan yorafoan fasi chaca huamisi. Nanfoan chaca huamisi cuscan manifotiri chaca huama. Asca huaifoan Upa Diosin ato onaintimai afanan ipanonfoma. ¡Aichofain! Diosin ato onaintima afanan pushurasi Babilonia yamairan, —ishon Diosin oinmatinin nai muran icaton yoia.

Apocalipsis 16:19

Ascan nan pushurasi uhuapa ahuun anu Babilonia ano nayanaiyaicaino mainhuan nantiocoin rafu non fusti toshamanhuan cainni. Maifoti anori aton pushurasifo nan mai nayanaiyaiquin maocomua. Diosin na pushurasi Babilonia anoafo chaca huamisifo cuscan ointiaquimamisima. Ascan atoqui fasi sinamanhuanquin ato onaintimacoin omitsiscanonfo.

Apocalipsis 17:1

Ascatan uhuun namapan ointsa ahuara ahuuscaran ariscashquiain cuscan afanan ua oinmayoa. Nan Diosin oinmati afu nai muran icafo siete tutso tsomacashon futsan ua yoia, —Nuri ohuu. Nan pushu ichaparasi unufo chaimashta anoafo fasi chacacoin. Ainfo furomacoin cuscarafo. Ascano Upa Diosin ato onaintimashquin. Oinyopon. Mia oinmanon.

Apocalipsis 17:18

Na ainfon furomacoin cuscara ainfocointamarocon naanfin pushurasi uhuapacoin. Nanfoan manifoti aton niaifofo iquinaran, —ishon Diospan oinmatinin afu nai muran imisiton ua yoia.

Apocalipsis 17:5

Ahuun fumananqui cunua cuscan tsoan onanmisima. Isca huaquin cunua, babilonia nan pushurasi anoafo tsoan futsa ato cuscarama. ainfofo furomacoin cuscara yafi nantifi mai anoa chacamishtifo aton uhua cuscararan, ishon cunua.

Apocalipsis 18:10

Nanfo coaino oincani niaifofo fasi ratushquicani. “¡Ohuashta! Babiloniafoan rato caifo futsancai mato cuscarama. Man tapicoinsharafiacun samamashta Upa Diosin mato onaintimai man coi futsunon. ¡Ai timafin!” ishon ratucoincaquin niaifofoan yoishquicani.

Apocalipsis 18:2

Oi ashcafinin cunaquin isca huaa, “Babilonia ano icafoan fasi chaca huamisifo. Chaca fustisi shinanmisifo. Nocofunufoan aton ahuinma chotamisifo ainfofoan aton funumari chotamamisifo. Man amisifo cuscan caifo futsanfori atohuun caoafo. Ato chaca huamamisi Upa Dios tanatamarocon chaca fustisi tananonfo. Man chaca huamisifo cuscan caifo futsafori aton niaifofoan nanscarin huaquin chaca huamisifo. Nan Babilonia ano icafoan fasi mafo ichapaya. Ascan ahua yopacaquima mai futsa anoafo aton mafo inan ahuun rafanan pui fiishcaquin. Ascano futsafoanri mafo inanmitsacashon ahuun rafanan pui finonfo. Asca huacanashu Babiloniahuunoashu afori mafo ichapaya icafo. Asca huacaquin Upa Dios shinanmisifoma.” “Ascacufin Upa Diosin nan Babilonia anoafo fasi onaintimai afanan tsoan ano inonma. Ato namaquin cuyoshquin. Afanan ano yora itamarocon yoshin chaca futsan futsantapafo tsain mutsama yoifafainaifo ano icaforan,” ishon Upa Diosin oinmatinin nan afu nai muran icaton ua yoia.

Apocalipsis 18:21

Ascatan Upa Diosin ahuun oinmati afu nai muran icaton futsan mutsisipacoin toquiri uhuapacoin finifoantan unuhuan muran potaquin yoia isca huaquin, “Un na toquiri curushcai pota cuscan nanscarifiai Upa Diosin nan pushurasi anoafo Babilonia curushcai ato onaintimashqui coi munononfo. Cuyoriscatashquin afanan tsoan oinnacama.

Apocalipsis 18:24

Babiloniafoan Diosin tsain yoimisifo non Jesús icoinra huafo futsafori rutumamisifo. Manifoti anoa ato rutunifo,” ishon Diospan nai oinmatinin yoia.