1 Juan 3:2 - Sharanahua: Diospan Tsain

² Uhuun yoramishtichin icon natian nonfin Diospan facufoquin. Noco chipo imai cuscan tsoan tapiataima. Ascafia Jesús oaiton oin non a cuscaracoin ishquin. Nan man non tapian.

1 Juan 3:2 Iomraidhean Croise

Salmos 16:11

Ahuuscashumain un mi fu nipasharatiroquin minfin mian tapimanaquin. Un miqui nocoaitian mian unimamacoinshquin. Mian oinmamisi un niyocun ahuuscashumain un mi fu ipasharatiroquin. Un mi fu rafuaino min uqui fasi unimashquin. Minhuunnoashu un fasi unimai mi fu isharapacunaca.

Mateo 5:8

Ascan nan Dios fusti tanasharashu ahuun nomuran shinansharamisi. Nan cuscarafoan chipo Dios ointirofo. Ascaiton Diosin ato ointi unimamashquin.

Lucas 17:30

Nanscacoinrifi aashqui un afanan oaitian. Ua shinantama afi apaiyaifo cuscasi huariaifoanno.

Lucas 20:36

Afananricai tsoa natiroma. Nanfo Diospan oinmati afu nai muran ica cuscarafo. Ascashu Diospan facufo. Naashu funicatan Dios fu nipanacafo.

Juan 1:12

Asca huafiainfoanno, nan noiaifoan icoinra huanifo. Ascaiton ato yoini isca huaquin, —Man ua icoinra huaashu Upa Diosin Facu man itiroran, —ishon ato yoini.

Juan 11:52

Jesuscai nocon caifo fustihuunoashu naimafinquin. Nantifi manifotichin icoinra huafohuunoashufin noco naashoshquiquin. Ascano nantifi Diosin facu inonfo. Noinancoincani. Nan yora fusti cuscara ishcaquin.

Juan 17:24

“Upan, nan mian inanfo un mifu icano un atorifi iquinpai un mifu ishara cuscan oinonfo. Non nan mai oni huataima min ua noicoinyopaoni. Ascan min yononi cuscan un mifu imisi nantifi min iquinon.”

Romanos 8:16

Nocon nomuranshon Diospan Yoshin Sharapan noco yoi isca huaquin, —Min Upa Diosin facucoinran, —ishon noco yoi.

Romanos 8:18

Shinancapon uhuun yoramishtichin. Natian non ahuunoashu omitsiscafiaquin non shinanchacanonma. Non aqui nocoaino a cuscara shara noco imai. Non omitsiscai cuscan cuyoshquin. Ascan noco imashara cuscacai unupacunacama.

Romanos 8:19

Upa Diosin ahuun facufo funimashquin a cuscara sharacoin imashquin. Ascan nan onihuanifoan manacani fasi oinsharapaicaquin ahuu cuscaramain non chipo ishquicain.

Romanos 8:29

Non Jesús Ifo huataima Upa Diosin tapiyoni ratofoanmain icoinra huaicain. Icoinra huaafotaima shinanni isca huaquin, —Nanfo uhuun facu cuscara un ato imashquinran, —ishon shinanyoni. Ascashon Furun Jesús funimaqui tau huani. Ascashon nocorifi funimashquin a cuscara non inon ahuun chipo facufo inon icai.

1 Corintios 13:12

Fuisiti matacoiannocai nocon fuso cuscaracoin non ointiroma. Nanscarifiai natian Jesús icai cuscacoincai non onancoiantaima. Chipo aqui nocoshon ahuun fusocoin non oincointiro. Nantiantari aficoinmain ua onancoiaintofin urifi un onancoinyaino.

1 Corintios 15:49

Non nuno mai anoashu caini non Adán cuscaracoinfo. Ascan Jesucristo nanton Dios icariashu fotoni non a cuscaracoin inon.

1 Corintios 2:9

Ascan Diospan tsain cunuquin isca huani, “Tsoan Dios noicoiainton ahuamamishti shara ato ashoin, tsoan oinyomisima cuscara sharafo ato ashofain tsoan nicayomisima cuscarari ashofain. Tsoanshta aton nomuran shinanyomisifoma sharashtacoin ato itishara huashoan,” ishon Diosin tsain cununi.

2 Corintios 3:18

Ascan noncai fufopomua cuscarama. Nocon Ifoan tsain non oinsharatiro. Nonfin fuisiti cuscarafoquin. Futsafoan noco oinquin nocon Ifo Jesús fasi shara ointirofo. Ahuun Yoshin Sharapan nocon nomuran noco iquifain nocorifi fiananan huaa non nocon Ifo cuscara shara non inon.

2 Corintios 4:17

Non natian niyoashu omitsiscai cuscan fasi curushcoinma. Samamashta finontiro. Ascan non Jesushuunoashu omitsiscaiton noco fasi sharacoin imai cuscan tsoancai ascaran shara oinyomisima. Nanfori cuyopacunacama.

Gálatas 3:26

Natian nantifi Jesús icoinra huafo Diospan facufo.

Gálatas 4:6

Icon manfin natian Diospan facufoquin. Nanscacun ahuun Yoshin Shara nocoqui nichini ahuunshon nocon nomuranshon Dios yoitiro isca huaquin, —Upashtan minfin uhuun Upacoinquin, —ishon non yoitiro.

Colosenses 3:4

Ascano Cristo afanan mai ano oaitian nantifiton ointirofo non afu rafumisifo noco nimapacunaca. Ascashu Cristo shara fusti ica cuscain norifi non a cuscara sharacoin iishquin nantifi yorafoan oinshquicani.

Hebreos 9:28

Ascashu Cristo aafiri inanmucain noco nashoin fustini. Yora ichapafohuunoashu omitsiscacai noco nashoni. Ascafia chipo afanan ahuun yorafoqui mai ano nasoshquin. Ascanishaquin nantian afanan nocohuunoashu naima nocon chaca soashquin. Ascatamarocon ratoranfo aqui unimacai manaifoan ato numashqui afu ipanonfo.

2 Pedro 1:4

Noco yoiyotiani cuscan ahuun curushhuunshon ahuara futsafo sharacoin noco ashoshquin a cuscaracoin non inon. Ascan nan icoinra huamafoan afin chaca huapaiyai cuscan huamisifo. Ascafiacun Jesús nocori numai non aton cuscara chacafo inonma.

1 Juan 2:28

Uhuun yoramishtichin, Jesús mato tapima cuscan cachiquiri huayamacahuun. Shafatifi nicacoincahuun yoia cuscan aqui. Ascan Jesús nocoaino man aqui rafipaitiroma. Ascatamarocon ahuun ointaifi ahuara chacafo man huamisi shinanshma man Jesús fu isharatiro.

1 Juan 2:7

Ascan un mato cunushonai cuscan man man nicamisi. Jesús maton ifo iqui taunitian mato yononi man man nicamisiquin. Mato yonoa cuscan mato tapimani.

1 Juan 3:1

Upa Diosin nocohuun fasi noicoin. Nocohuun shinansharamisi. Ascanshon noco yoiquin isca huatiro, —Manfin uhuun facufoquin, —ishon yoitiro. ¡Aicho! Shinancapon. Iconcoin nonfin Diospan facufoquin. Ascafiashon icoinra huacoinyamashon Upa Dios onanmisifoma. Ascan non Diospan facufofiacun tapiafoma.

1 Juan 3:10

Ascan ratofomain Diospan facufo iyamarai Satanás ahuun yorafoquin non tapitiro. Tsoa Diosin yoia cuscan aimacai ahuun facu itiroma. Tsoan futsafo noiamacai arifi Diospan facu itiroma.

1 Juan 3:21

Ascan uhuun yoramishtichin, nocon nomuran non shinain cuscan non chaca huayamashucai Diosqui rafipaitiroma. Non aqui ranotamarocon non afu isharapai.

1 Juan 5:1

—Jesús Diospan Furun. Diosin catonni nocon Numamisi inon, —tsoan icoinra huaiton Upa Diosin ato funa cuscara imatiro ahuun facufo inonfo. Ascan tsoan Upa Dios noiquin ahuun facuri noitiro.

Apocalipsis 2:28

Shafaino ishtumanhuan fustiton chashaiton nantififain ointirofo. Nanscarifiai un afanan oaiton nantififain ua oinshcani. Ascano nantianrifi un ato yonoshquin afanan tsoashta chaca huatama uacairocon tanasharanonfo. Ascashu ufu isharapacunacafo.

Apocalipsis 22:4

Nannoa nocon Ifoan fuso oinfafaincani. Aton fumananqui ahuun anu nutamana.