Lucas 2:10 - Samarenyo Meaning-Based Bible (1984)

¹⁰ Kundi nagsiring ha ira an anghel, “Ayaw kamo kahadlok! Hahani ako ngan may-ada ako dara nga maupay nga sumat para ha iyo, nga maghahatag hin dako nga kalipayan han ngatanan nga katawhan.

Lucas 2:10 Iomraidhean Croise

Genesis 12:3

Pagpapakaupayon ko adton mga magpapakaupay ha imo, Kundi pagtutunglohon ko adton mga magpapanhimaraot ha imo. Ngan pinaagi ha imo pagpapakaupayon ko an ngatanan nga mga nasod.”

Isaias 40:9

Jerusalem, sagka ngadto hin hitaas nga bukid, ngan igsangyaw an maupay nga sumat! Goliat hin dako nga tingog, Sion; ipahibaro an maupay nga sumat! Pagyakan ngan ayaw kahadlok, Sumati an mga bungto han Juda, nga maabot na an ira Dyos!

Isaias 41:27

Ako nga Ginoo amo an syahan nga nagpasangyaw han sumat didto ha Sion; nagsugo ako hin magsarangyaw ngadto ha Jerusalem hin pagsiring, ‘Nagtitikanhi na an iyo mga tawo! Nauli na hira.’

Isaias 49:6

Nagsiring ha akon an Ginoo, “May-ada ko darudako nga buruhaton para ha imo nga akon surugoon. Diri la nga ibabalik an kagamhanan han nanhisalin nga mga tawo han Israel, kundi hihimoon ko liwat ikaw nga kapawa ngadto han mga nasod— basi matalwas an bug-os nga kalibutan.”

Isaias 52:10

Paggagamiton han Ginoo an iya baraan nga gahom; pagtatalwason niya an iya mga tawo, ngan makita hini an bug-os nga kalibutan.

Isaias 52:7

Hin kamakaruruyag pagkit-on hin usa nga magsarangyaw nga naabot nga naglalatas han kabukiran, nga nagdadara hin maupay nga sumat, an sumat hin kalinaw! Nagpapahibaro hiya hin pagdarag-an, ngan nasiring ngadto ha Sion, “Hadi an imo Dyos!”

Isaias 61:1

Aadi ha akon an espiritu han Ginoo nga Dyos. Ginpili ngan ginsugo ako niya Hin pagdara hin maupay nga sumat ngadto han mga kablas. Hin pagtambal han mga masulob-on, Hin pagpahibaro hin katalwasan ngadto han mga bihag, Ngan hin kagawasan ngadto hadton mga priso.

Daniel 10:19

Nagsiring hiya, “Hinihigugma ka han Dyos, sanglit pagmakusog ngan ayaw kahadlok.” Han pakasiring niya hini, inabat ko nga nahibalik an akon kusog ngan sinmiring ako, “Sumati ako han imo igyayakan, kay nakahatag ka ha akon hin kadasig.”

Zacarias 9:9

Pagrayhak, pagrayhak, mga tawo han Sion! Goliat hin kalipay, kamo nga mga tawo han Jerusalem! Tan-awa, naabot an iyo hadi ngada ha iyo! Naabot hiya nga madinaogon ngan daogan, kundi mapinaubsanon ngan nasakay dida hin asno— dida hin usa nga nati hin asno.

Mateo 14:27

Nagyakan dayon hi Jesus ha ira, “Ayaw kamo kahadlok! Ako gad ini!”

Mateo 28:18

Hinmarani hi Jesus ngan ginsiring hira, “Iginhatag ha akon an ngatanan nga gahom ha langit ngan ha tuna.

Mateo 28:5

Ginsiring han anghel an kababayen-an, “Ayaw kamo kahadlok. Maaram ako nga ginbibiling niyo hi Jesus nga iginraysang ha kros.

Marcos 1:15

“Inmabot na an igo nga panahon,” nasiring hiya, “ngan haraniay na an Ginhadian han Dyos. Bayai an iyo mga sala ngan tuohi niyo an Maupay nga Sumat.”

Marcos 16:15

Nagsiring hiya ha ira, “Kadto kamo ha bug-os nga kalibutan ngan igwali niyo an Maupay nga Sumat ha ngatanan nga katawhan.

Lucas 1:13

Kundi nagsiring ha iya an anghel, “Ayaw kahadlok, Zacarias! Pinamatian han Dyos an imo pag-ampo, ngan mag-aanak hin lalake hi Elisabet nga imo asawa. Pagngangaranan mo hiya nga Juan.

Lucas 1:19

Binmaton an anghel, “Ako amo hi Gabriel nga natindog ha atubangan han Dyos nga nagsugo ha akon hin pagyakan ngan pagsumat ha imo hini nga maupay nga sumat.

Lucas 1:30

Nagsiring ha iya an anghel, “Ayaw kahadlok, Maria, kay ginpalabi ka han Dyos.

Lucas 2:11

Natawo yana nga adlaw didto han bungto ni David an iyo Magtaralwas nga amo an Cristo nga Ginoo.

Lucas 24:47

ngan ha iya ngaran kinahanglan igwali ha ngatanan nga mga nasod, tikang ha Jerusalem, an mensahe mahitungod han pagbasol ngan pagpasaylo han mga sala.

Lucas 8:1

Waray pag-iha, nagsudoy hi Jesus han kabungtohan ug kabaryohan, hin pagwali han Maupay nga Sumat mahitungod han Ginhadian han Dyos. Inmupod ha iya an dose nga mga tinun-an,

Mga Buhat 13:32

Ngan aanhi kami yana pagdara han Maupay nga Sumat ha iyo: an iginsaad han Dyos ha aton mga kaapoy-apoyan nga iya pagbubuhaton, gintuman na niya yana para ha aton nga ira mga tulin, pinaagi han pagbanhaw kan Jesus. Sumala han iginsurat ha ikaduha nga Salmo: ‘Ikaw an akon Anak; yana nga adlaw nagin Amay ako nimo.’

Mga Taga-Roma 10:15

Ngan uunanhon hin paghisangyaw han mensahe kon diri ipadara an mga magsarangyaw? Sumala han siring han Kasuratan, “Kamaruruyag han pag-abot hadton mga nagdadara han Maupay nga Sumat!”

Mga Taga-Efeso 3:8

Uruubos pa ako han giuubosi han ngatanan nga mga tawo han Dyos; kundi iginhatag ha akon han Dyos ini nga talagsaon nga higayon hin pagdara ngadto han mga Hentil han Maupay nga Sumat mahitungod han diri maiihap nga mga manggad ni Cristo,

Mga Taga-Colosas 1:23

Matuod, kinahanglan magpadayon kamo nga matinumanon dida hin marig-on ngan waray pagkawaring nga patukoranan, ngan diri kamo tumugot nga magruhaduha kamo ha iyo paglaom nga nakarawat niyo han pakabati niyo han Maupay nga Sumat. Tungod hini nga Maupay nga Sumat nahimo ako, hi Pablo, nga usa nga surugoon hini nga Maupay nga Sumat nga iginwali ha ngatanan dinhe ha kalibutan.