Lucas 15:4 - Samarenyo Meaning-Based Bible (1984)

⁴ “Pananglit usa ha iyo may usa ka gatos nga karnero, ngan mawara in usa ha ira—ano man an iya bubuhaton? Binabayaan niya an nobentay nuybe didto han panibsiban, ngan nalakat hiya hin pamiling han nawara, tubtob nga iya ini hiagian.

Lucas 15:4 Iomraidhean Croise

Mga Salmo 119:176

Nagsinudoy ako daw karnero nga nawara, sanglit pakadi gad ngan pamilnga. Ako, an imo surugoon, Ginoo, pangitaa, kay han imo mga balaod waray ako magpasibaya.

Isaias 53:6

Sugad kita ngatanan hin mga karnero nga nagkawawara, an kada usa ha aton napakadto han iya kalugaringon nga aragian. Kundi kinarawat han Ginoo an kastigo, an kastigo nga angay ha aton ngatanan.

Jeremias 33:13

Didto han mga bungto han sagkahon nga katunaan, didto han kapatagan nga mga tuna, ngan didto ha timogan han Juda, didto han katunaan han Benjamin, didto han kabaryohan nga palibot han Jerusalem, ngan didto han mga bungto han Juda, mag-iihap na liwat han ira mga karnero an mga magmarangno. Ako nga Ginoo an nagyakan.”

Jeremias 50:6

“Sugad hin mga karnero an akon mga tawo, nga pinasagdan han ira mga magmarangno nga magkawawara didto ha kabukiran. Nahisalaag hira sugad hin mga karnero didto ha kabukiran, ngan diri na hira nakakatultol han ira urokyan.

Ezequiel 34:16

“Pamimilngon ko adton mga nagkawawara, ibabalik adton mga nanhisalaag, bubutkon adton ira mga samad, ngan bubulngon adton mga magsakit; ngan pagbabantayan ko adton mga magtambok ngan an magkusog, kay magmarangno ako nga nagbubuhat han matadong.

Ezequiel 34:31

“Kamo nga akon mga karnero, nga akon pinakakaon nga panon, amo an akon mga tawo, ngan ako amo an iyo Dyos,” nasiring an Ginoo nga Dyos.

Ezequiel 34:4

Waray niyo paymangnoi an mga magluya, pagbulnga an mga magsakit, pagbutka an mga samad, pabalika an mga nahisalaag, o pagbilnga an mga nagkawawara. Ginraogdaog lugod niyo hira.

Ezequiel 34:8

Sugad nga ako amo an buhi nga Dyos, maupay pa mamati kamo ha akon. Ginsulong hin magpintas nga kamanampan nga nanmatay ngan nanngaon ha ira, kay waray man nira magmarangno. Waray gud magtinguha an akon mga magmarangno hin pamiling han mga karnero. Ginmamangnoan nira an ira la kalugaringon ngan diri an mga karnero.

Mateo 12:11

Binmaton hi Jesus, “Ano man an iyo bubuhaton kon pananglitan usa han iyo mga karnero mahulog ngadto hin hilarom nga luong ha Adlaw nga Iparahuway? Diri ba niyo kukuhaon dayon?

Lucas 13:15

Ginbaton hiya han Ginoo hin pagsiring, “Mga salingkapaw kamo! Bisan hin-o ha iyo maghuhubad han iya baka o asno tikang ha turubongan han hayop, ngan dadad-on ini ngadto ha gawas hin pagpainom ha Adlaw nga Iparahuway.

Lucas 15:3

Sanglit ginsumatan hira ni Jesus hini nga pananglitan:

Lucas 19:10

Kay kinmanhi an Anak han Tawo hin pagbiling ngan pagtalwas han mga nagkawawara.”

Mga Taga-Roma 2:1

Sangkay ko, naghuhukom ka ba han iba? Kon sugad, diri ka makakabaribad bisan kon hin-o ka. Kay kon ha imo paghukom han iba, ginbubuhat mo liwat an mga butang nga ginbubuhat nira, naghuhukom ka la ngahaw ha karat-an han imo kalugaringon.

1 Pedro 2:25

Sugad kamo hin nagkawawara nga mga karnero; kundi yana iginbalik na kamo hin pagsunod han Magmarangno ngan Magbarantay han iyo mga kalag.