Juan 8:12 - Samarenyo Meaning-Based Bible (1984)

¹² Naghimangraw na liwat hi Jesus ha ira, “Ako an kapawa han kalibutan. Magkakamay-ada kapawa han kinabuhi an bisan hin-o nga magsunod ha akon, ngan diri na gud hiya maglalakat ha kasisidman.”

Juan 8:12 Iomraidhean Croise

An Basahan ni Job 33:28

Ginpugngan ako niya hin pagkadto han kalibutan han mga patay, sanglit buhi pa ako gihapon.”

Mga Salmo 18:28

Hin kalamrag imo ako tinatagan, ginkukuha mo an akon kasisidman;

Mga Salmo 49:19

matampo hiya han ngatanan niya nga kaapoy-apoyan ha kamatayon, diin nagpapabilin hin kadayonan an kasisidman.

Mga Salmo 97:11

Nasilaw an lamrag ha mga magtadong, an mga mag-upay nagmamalipayon;

Isaias 49:6

Nagsiring ha akon an Ginoo, “May-ada ko darudako nga buruhaton para ha imo nga akon surugoon. Diri la nga ibabalik an kagamhanan han nanhisalin nga mga tawo han Israel, kundi hihimoon ko liwat ikaw nga kapawa ngadto han mga nasod— basi matalwas an bug-os nga kalibutan.”

Isaias 50:10

Kamo ngatanan nga nagtatahod han Ginoo ngan nagsusugot han mga pulong han iya surugoon, bangin masirom manggud an agian nga iyo ginlalaktan, kundi sarig kamo han Ginoo, tapod kamo han iyo Dyos.

Isaias 9:2

Kinmita hin dako nga kapawa an mga tawo nga naglalakat ha kasisidman. Adton nag-ukoy didto hin masirom nga tuna, yana sinmirang na ha ira in kapawa.

Oseas 6:3

Talinguhaa ta hin pagkilala han Ginoo. Makanhi hiya ha aton sugad han pagpunias han adlaw, sugad han pag-uran ha tuna kon panahon hin pananom o pamugas.”

Malaquias 4:2

Kundi para ha iyo nga nagsusugot ha akon, masirang ngada ha iyo sugad han adlaw an akon matalwason nga gahom ngan magtatambal sugad han mga sirak han adlaw. Talwas ngan malipayon kamo sugad hin mga nati nga baka nga ginpagawas han toril.

Mateo 5:14

“Kamo amo an kapawa han bug-os nga kalibutan. Diri matatago in bungto nga gintindog ha bawbaw hin bukid.

Lucas 2:32

Kapawa nga magpapadayag ha mga Hentil han imo paagi ngan magdadara hin kadungganan han imo katawhan nga Israel.”

Juan 12:35

Nagbaton hi Jesus, “Halipotay na la nga panahon an pag-upod ha iyo han kapawa. Pagpadayon ha iyo dalan samtang aada pa ha iyo an kapawa, basi diri kamo abotan han kasisidman; kay an naglalakat ha kasisidman diri maaram kon tipakain hiya.

Juan 12:36

Sanglit too kamo han kapawa, samtang aada pa ha iyo ini, basi mahimo kamo nga mga anak han kapawa.” Katapos ni Jesus magsiring hini, linmakat hiya ngan tinmago.

Juan 12:46

Kinmanhi ako usa nga kapawa han kalibutan, basi diri na magpabilin ha kasisidman an ngatanan nga natoo ha akon.

Juan 14:6

Nagbaton ha iya hi Jesus, “Amo ako an dalan, an kamatuoran, ngan an kinabuhi; waray makakadto han Amay kon diri pinaagi ha akon.”

Juan 3:19

Amo ini an paagi han paghukom: inmabot an kapawa ha kalibutan, kundi ginpalabi han mga tawo an kasisidman kay han kapawa, kay nagbubuhat man hira hin maraot.

Juan 7:17

Adton karuyag magtuman han ipinapagtuman han Dyos, mahibabaro kon an akon igintututdo tikang ba sa Dyos o tikang ba ha akon la kalugaringon nga pagburot-an.

Juan 9:5

Ako an kapawa han kalibutan samtang aanhi pa ako ha kalibutan.”

Mga Buhat 13:47

Kay amo ini an sugo nga iginhatag ha amon han Ginoo: ‘Iginbutang ko ikaw nga magin kapawa han mga Hentil, basi matalwas an bug-os nga kalibutan.’”

Mga Buhat 26:23

nga an Cristo kinahanglan mag-antos, ngan tungod nga hiya man an syahan nga mabanhaw tikang han mga minatay, hiya man an magpapasangyaw han kapawa ngadto han mga Judiyo ngan ngadto han mga Hentil.”

2 Pedro 2:17

Ini nga mga tawo sugad hin hinubsan nga mga burabod, o sugad hin mga dampog nga ginpapadpad hin makusog nga alipuros; igin-andam han Dyos in dapit para ha ira didto han labi kahilarom nga kasisidman.

2 Pedro 2:4

Waray kalooyi han Dyos an nagpakasala nga mga anghel, kundi iginlabog hira ngadto ha impyerno, diin ginkadenahan hira ha kasisidman, ngan naghuhulat hira han Adlaw han Paghukom.

1 Juan 1:6

Sanglit kon masiring kita nga nahiusa na kita han Dyos, kundi nagpapadayon kita hin pag-ukoy ha kasisidman, nagbibinuwa kita ha pulong ngan ha buhat.

Judas 1:13

Sugad hira han dagko nga mga balod han dagat, ngan an ira makaarawod nga mga buhat baga la hin burat. Sugad la hira hin mga layaw nga mga bitoon nga ginandaman han Dyos ha kadayonan hin dapit didto han labi ka hilarom nga kasisidman.

Judas 1:6

Panumdoma liwat niyo an mga anghel nga linmapas han katubtoban han ira igo nga kagamhanan, ngan ginbayaan an ira kalugaringon nga inuokyan: ginggapos hira hin mga kadena nga diri mauutod didto han hilarom nga kasisidman, diin ikinadto hira han Dyos para han dako nga Adlaw hin paghukom ha ira ha karat-an.

Ginpadayag 21:24

An mga tawo han kalibutan maglalakat dida han iya kapawa, ngan an kahadian han tuna magdadara han ira mga manggad ngada ha iya.