Juan 10:10 - Samarenyo Meaning-Based Bible (1984)

¹⁰ Nasulod la an kawatan hin pangawat, panmatay, ngan panmungkag. Kinmanhi ako basi makaangkon hira han kinabuhi, an hura nga kinabuhi.

Juan 10:10 Iomraidhean Croise

Isaias 56:11

Sugad hira hin lamot nga kaayaman nga diri gud nabubusog. Waray gud sarabotan ini nga mga pangulo. Nagpapabuot la han iya karuyag an tagsa ha ira, ngan nangingita han iya la kalugaringon nga kaupayan.

Oseas 7:1

“Ha akon karuyag hin pagtambal han akon katawhan nga Israel ngan pagtalinguha nga magmainuswagon na liwat hira, an akon la hinkikit-an amo an ira kamaraogdaog ngan an karat-an nga ira binubuhat. Nagpapalirulimbong hira, nasulod hira hin mga balay ngan nangangawat, naninikas hira hin mga tawo dida han kadalanan.

Mateo 18:10

“Bantayi nga diri kamo magtamay han usa hini nga mga gudtiay nga kabataan. Nasiring ako ha iyo nga dayuday aada an ira mga anghel ha atubangan han akon Amay ha langit. [

Mateo 18:11

Kay kinmanhi an Anak han Tawo hin pagtalwas hadton mga nawara.]

Mateo 20:28

sugad han Anak han Tawo nga waray makanih hin pagpaataman, kundi hin paghatag han iya kinabuhi para hin pagtubos hin damo nga mga tawo.”

Mateo 21:13

Nagsiring hiya ha ira, “Iginsurat ha Kasuratan nga an Dyos nagsiring, ‘Tatawgon an akon Templo nga balay hin pag-ampo.’ Kundi ginhimo niyo ini nga tagoan hin mga tikasan!”

Mateo 23:13

“Kamakaharadlok para ha iyo, mga magturutdo han Balaod ngan mga Parisiyo! Mga salingkapaw! Ginsasadhan niyo an porta ngadto han Ginhadian han langit ha atubangan han mga tawo, kundi diri kamo ngahaw nasulod, ngan gindidid-an pa niyo an mga tawo hin pagsulod! [

Marcos 11:17

Gintutdoan niya an mga tawo, “Nahisurat ha Kasuratan nga nagsiring an Dyos, ‘Tatawgon an akon balay nga balay hin pag-ampo han ngatanan nga mga tawo.’ Kundi ginhimo niyo nga tagoan hin mga tikasan!”

Lucas 19:10

Kay kinmanhi an Anak han Tawo hin pagbiling ngan pagtalwas han mga nagkawawara.”

Juan 10:1

“Susumatan ta kamo hin tinuod: kawatan ngan tikasan an tawo nga diri naagi ha porta hin pagsulod han turil, kundi nagsasaka hin iba nga agian.

Juan 10:11

“Amo ako an maupay nga magmarangno han mga karnero. An maupay nga magmarangno andam pag-unong han iya kinabuhi tungod han mga karnero.

Juan 12:47

Diri ko paghuhukman bisan adton namamati han akon pulong ngan diri nagtutuman hito. Kinmanhi ako pagtalwas, diri paghukom han kalibutan.

Juan 12:6

Ginsiring ini niya diri tungod nga napaid hiya han mga kablas, kundi tungod nga kawatan hiya. Hiya an tinaporan han supot han kwarta ngan naara hiya hin pagpasipara hin pagkuha hin kwarta.

Juan 3:17

Kay waray magsugo an Dyos han iya Anak nganhi hin paghukom han kalibutan, kundi hin pagtalawas han kalibutan.

Juan 5:40

Kundi diri niyo karuyag kumadi ha akon basi maangkon niyo an kinabuhi.

Juan 6:33

Kay an pagkaon nga ihinahatag han Dyos amo hiya nga linmusad tikang ha langit, ngan nahatag hin kinabuhi ha kalibutan.”

Juan 6:51

Amo ako an pagkaon nga nahatag han kinabuhi nga tikang ha langit. Mabubuhi ha kadayonan an kumaon hini. Ngan an pagkaon nga ihahatag ko ha iya amo an akon unod, nga ihinahatag ko basi mabuhi an kalibutan.”

Mga Taga-Roma 2:21

Ikaw nga nagtututdo han iba, kay ano nga diri ka magtutdo han imo kalugaringon? Nagwawali ka nga diri mangawat, kundi mangangawat ka ngay-an?

1 Timoteo 1:15

Matuod ini nga mga pulong nga angay ta karawaton ngan tuohan hin hingpit: kinmanhi ha kalibutan hi Cristo Jesus hin pagtalwas han mga makasasala. Ako an labi nga kamaraot ha ira,

Hebreo 6:17

Para hadton mga makarawat han iya iginsaad, iginpadayag gud han Dyos nga diri gud niya liliwaton an iya panuyo; sanglit idinugang niya han iya saad an pagsumpa.

Hebreo 7:25

Sanglit nakakahimo hiya, yana ngan ha gihapon, pagtalwas hadton nadangop han Dyos pinaagi ha iya, kay buhi hiya ha kadayonan hin pangamuyo sa Dyos tungod ha ira.

2 Pedro 1:11

Dida hini, tatagan kamo han bug-os nga katungod hin pagsulod han waray kataposan nga Ginhadian han aton Ginoo ngan Magtaralwas, hi Jesu-Cristo.