Jeremias 4:3 - Samarenyo Meaning-Based Bible (1984)

³ Nasiring an Ginoo ngadto han mga tawo han Juda ug Jerusalem, “Pag-aradoha na niyo an iyo ginpabay-an nga kaumhan; ayaw isabod an iyo mga binhe dida han katungkan.

Jeremias 4:3 Iomraidhean Croise

Genesis 3:18

Maturok ha tuna in katungkan ngan kasapinitan, ngan an imo kakaonon amo an mga tanom ha kapatagan.

Exodo 23:11

Kundi ayaw pagtamni an iyo uma dida han ikapito ka tuig, ngan ayaw niyo pag-aniha in bisan ano nga maturok dida han iyo uma. Makakakaon an mga kablas han mga naturok dida han uma, ngan makakakaon an ihalas nga kamanampan han nahisalin. Amo ngahaw an buhata han iyo mga urubasan ngan han iyo mga kahoy nga olibo.

Oseas 10:12

Nagsiring ako, ‘Pag-arado hin bag-o nga tuna para ha iyo ngahaw, pagtanom hin pagkamatadong, ngan pag-ani hin mga kaupayan nga bunga han iyo paghigugma ha akon. Panahon na ini niyo hin pagbalik ha akon nga iyo Ginoo, ngan maabot ako hin pagbubo ha iyo hin mga kaupayan.’

Mateo 13:22

An binhe nga nahulog ha tunokon nga kabanwaan amo an mga tawo nga namamati han mensahe, kundi nalulumos ini nga mensahe han mga kabaraka mahitungod hini nga kinabuhi ngan han paghigugma han mga manggad, ngan diri hira nabunga.

Mateo 13:7

Nagkahuglog an iba nga binhe ngada hin tunokon nga kabanwaan; pagtubo han kabanwaan natabonan an mga tanom.

Marcos 4:7

May mga binhe nga nahulog ha mga tunokon nga kabanwaan. Han pagtubo han kabanwaan, naambongan an mga tanom; sanglit waray mamunga.

Lucas 8:14

An binhe nga nataktak ha katunokan amo an mga namamati, kundi nalambongan ngan nalumos hira han mga karinggalan, mga manggad, ngan mga kaliawan hini nga kinabuhi, ngan natataktak dayon an ira bunga.

Lucas 8:7

Nagkataktak an iba han mga binhe ha katunokan, nga tinmubo tampo han mga tanom, ngan naambongan an mga tanom.