Exodo 6:1 - Samarenyo Meaning-Based Bible (1984)

¹ Niyan nagsiring kan Moises an Ginoo, “Yana hikikit-an mo an akon pagbubuhaton ngadto han hadi. Pagpipiriton ko hiya hin pagpalakat han akon mga tawo. Ngani pagpipiriton ko hiya hin pagpagawas ha ira tikang han iya tuna.”

Exodo 6:1 Iomraidhean Croise

2 Hadi 7:19

nga ginbaton han opisyal, “Diri gud ito mahinanabo—bisan pa kon buksan han Ginoo an mga bintana ha langit.” Ngan binmaton hi Eliseo, “Makita ka nga matutuman ini kundi diri ka hini makakakaon.”

2 Hadi 7:2

Nagsiring kan Eliseo an opisyal nga kaupod han hadi, “Diri gud matutuman an iya ginsiring bisan pa kon buksan han Ginoo an mga bintana ha langit!” Binmaton hi Eliseo, “Makita ka nga matutuman ini kundi diri ka hini makakakaon.”

2 Cronicas 20:17

Diri kinahanglan nga kamo an makiaway ha ira. Tindog la kamo ha iyo mga dapit ngan paghulat kamo; makita kamo nga padadag-on kamo han Ginoo. Mga tawo han Juda ug Jerusalem, ayaw pag-alang o kahadlok. Gawas kamo ngadto ha pag-awayan, ngan maupod ha iyo an Ginoo.”

Mga Salmo 12:5

“Kundi maabot gud ako,” nasiring an Ginoo, “Kay ginraraogdaog an mga kablas ngan nag-aaraba an mga ginpapakurian. Tatagan ko hira han katalwasan nga ira ginhihingyap.”

Mga Salmo 12:6

Masasarigan an mga iginsaad han Ginoo; pareho hin katinuod han salapi nga ginpurog hin makapito didto ha hudnoan.

Mga Salmo 136:12

Pinaagi han kusgan nga kamot niya, kay padayon gud an iya paghigugma. Han gamhanan nga butkon gindara hira, kay padayon gud an iya paghigugma.

Mga Salmo 89:13

Hin pagkamakagarahum nimo gudman! Hin pagkadako gud han im' pagkakusgan.

Exodo 11:1

Niyan nagsiring kan Moises an Ginoo, “Usa na la nga kastigo an akon igpapadara han hadi han Ehipto ngan han iya mga tawo. Katapos hito, palalakton na kamo niya. Ngani, paiiwason gud niya kamo ngatanan.

Exodo 12:31

Hito ngahaw nga gab-i ginpatawag han hadi hira Moises ug Aaron ngan ginsiring, “Iwas, kamo ngan an mga Israelita! Bayai niyo an akon nasod; kadto ngan pagsingba kamo han Ginoo, sumala han iyo ginhangyo ha akon.

Exodo 12:33

Gin-agda han mga Ehiptohanon an mga tawo nga magdagmit hira hin pagbaya han nasod. Nagsiring hira, “Magkakamatay kami ngatanan kon diri kamo umiwas.”

Exodo 12:39

Naghudno hira hin tinapay nga waray patubo tikang han dara nira nga daan minasa tikang ha Ehipto, kay tigda la an pagpaiwasa ha ira nga waray na nira panahon hin pag-andam han ira pagkaon o hin minasa nga may-ada patubo.

Exodo 13:14

Ha tiarabot nga panahon, kon pakianhan kamo han iyo anak kon ano an kahulogan hini nga turumanon, iyo babatonon hiya, ‘Pinaagi hin dako nga gahom, ginpagawas kami han Ginoo tikang ha Ehipto, an dapit diin gin-oripon kami.

Exodo 13:16

Ini nga pagsaurog usa ini nga pahinumdom sugad hin ihinigot nga tigaman ha amon mga kamot o ipinatik ha amon mga agtang nga magpapahinumdom ini ha amon nga ginpagawas kami han Ginoo tikang ha Ehipto pinaagi han iya dako nga gahom.’”

Exodo 13:3

Nagsiring hi Moises han mga tawo, “Hinumdomi ini nga adlaw—an adlaw han pagbaya niyo han Ehipto, an dapit diin mga oripon kamo. Amo ini an adlaw han pagpagawsa ha iyo han Ginoo pinaagi han iya dako nga gahom. Diri kamo makakaon han tinapay nga may-ada patubo.

Exodo 13:9

Ini nga pagsaurog usa ini nga pahinumdom sugad hin ihinigot nga tigaman ha iyo kamot o ipinatik ha iyo agtang nga magpapahinumdom ini ha iyo basi magpadayon kamo hin pagsubay ngan pag-aram han Balaod han Ginoo tungod nga ginpagawas kamo han Ginoo tikang ha Ehipto pinaagi han iya dako nga gahom.

Exodo 14:13

Binmaton hi Moises, “Ayaw kamo kahadlok! Tindog la kamo ha iyo dapit, ngan makita kamo kon ano an pagbubuhaton han Ginoo hin pagtalwas ha iyo yana nga adlaw; diri nagud kamo makita liwat hini nga mga Ehiptohanon.

Exodo 15:6

“Makaaramdok an imo tuo nga kamot tungod han imo gahom, O Ginoo; gindudugmok hini an kaaway.

Exodo 7:4

Niyan ipadadara ko ngadto ha Ehipto in makalilisang nga kastigo, ngan dadad-on mo hin paggawas tikang han tuna an mga tribo han akon mga tawo.

Exodo 7:5

Niyan mahibabaro an mga Ehiptohanon nga ako amo an Ginoo, kon bayawon ko na an akon kamot kontra ha ira ngan pagawson ko na an mga Israelita tikang han ira nasod.”

Isaias 63:12

Hain na an Ginoo nga tungod han iya gahom nagbuhat hin dagko nga mga butang pinaagi kan Moises, nga nagbuhag han katubigan han dagat ngan nagdara han iya mga tawo hin paglatas han hilarom nga tubig, basi madaog para ha iya ngahaw in kabantogan nga waray kataposan?” Ginmandoan hira han Ginoo, ngan sugad hin ihalas nga mga kabayo diri gud nalilisa an ira mga tiil, ngan waray gud hira manhipakdol.

Numero 11:23

Binmaton an Ginoo, “May-ada ba katubtoban an akon gahom? Makita ka kon mahinanabo ba o diri an akon iginsiring!”

Numero 23:23

Waray anting-anting, waray pagdiwata Nga magagamit kontra han nasod han Israel. Yana masiring an mga tawo mahitungod han Israel, ‘Tan-awa kon ano an ginbuhat han Dyos!’

Mga Buhat 13:17

An Dyos han katawhan han Israel nagpili han aton mga kaapoy-apoyan ngan ginhimo hira nga dako nga nasod ha panahon han pag-ukoy nira nga mga lumalangyaw didto ha Ehipto. Ginpagawas hira han Dyos tikang ha Ehipto pinaagi han iya dako nga gahom,

Deuteronomio 32:39

“‘Ako, ngan ako gudla, amo an Dyos; waray na iba nga diyos nga matood. May gahom ako hin pagpatay ngan pagbuhi, pagsamad ngan pagtambal, ngan waray makakariwa han akon ginbubuhat.

Deuteronomio 4:34

May-ada na ba diyos nga nangahas hin pagkadto ngan pagkuha hin mga tawo tikang hin lain nga nasod ngan paghimo ha ira nga iya kalugaringon, sugad han ginbuhat ha iyo han Ginoo nga iyo Dyos didto ha Ehipto? Ha atubangan gud han iyo mga mata ginamit niya an iya dako nga gahom ug kusog; ginpadara niya in mga peste ug araway, ginbuhat niya in mga milagro ngan mga orosahon, ngan ginpahinabo in magpakaharadlok nga mga butang.