TAGA-EFESO 2:8 - Maung A Balita Biblia

⁸ Ta lapud baleg a panangaroy Dios nilaban kayo la diad panamegley na pananisia. Impangaroy Dios yan kilalaban, ag nanlapud sikayon dili.

Maung a Balita Biblia

⁸ Ta lapud baleg a panangaroy Dios nilaban kayo la diad panamegley na pananisia. Impangaroy Dios yan kilalaban, ag nanlapud sikayon dili.

TAGA-EFESO 2:8 Iomraidhean Croise

Mateo 16:17

Inkuanen Jesus ed sikato, “Maliket kan tua, Simon ya anak nen Jonas! Ta say Amak ed tawen so angipaamtad sika yan katwaan, aliwan say too.

Mateo 20:9

Saramay ginmapon nankimey na alas singko, akaawat iray sansasakey a dinario.

Marcos 16:16

Siopamay manisia tan nabinyagan, nilaban; siopamay ag manisia, nadusa.

Lucas 7:50

Balet inkuanen Jesus ed samay bii, “Say pananisiam so angilaban ed sika. Laka la, tan pakpel moy linawam.”

Juan 3:36

Say manisiad Anak walay bilay ton andi-anggaan, balet say ag mangonur ed Anak ag nawalaay bilay—mansiansia ingey pasnuk na Dios ed sikato.

Juan 4:10

Inmebat si Jesus, “No amtam labat so iter na Dios tan no kabat mo no siopay mikekerew ed sika na inomen, miala kad sikato angangko et itdan to kay mabilay a danum.”

Juan 5:24

“Ibabagak ed sikayoy katwaan a siopamay ondengel ed salitak tan manisiad samay angibakid siak, walay bilay ton andi-anggaan; ag la nasintinsiaay dusa, lapud nilabasan to lay patey tan linmoob lad bilay.

Juan 6:35

Inkuanen Jesus, “Siak so tinapay na bilay. Ag lan balut naerasan so siopaman ya ondagod siak, tan ag lan balut naapgaan so manisiad siak.

Juan 6:37

Ondagon amin iray iter na Ama ed siak. Ag kon balut ipolisay so siopaman ya ondagod siak.

Juan 6:40

Ta saya so linawa na Amak: amin a makanengneng tan manisiad Anak, nawalaan na bilay ya andi-anggaan. Paolien ko rad bilay ya amin diad kaonuran ya agew.”

Juan 6:44

Anggapoy makaragod siak no ag iyasingger na Ama ya angibakid siak. Diad kaonuran ya agew paolien kod bilay so ondagod siak.

Juan 6:65

Intuloy nen Jesus ya inkuan, “Sikato yay makasengeg no akin et imbagak ed sikayo ya anggapoy makaragod siak no ag iyasingger na Ama.”

Saray Gawgawa 13:39

Nepeg yo met a kabaten a napaandiy amin a kasalanan na siopaman a manisiad sikato; ag ya nagawaan na Ganggan nen Moises.

Saray Gawgawa 14:27

Kasabi rad man, tinipon da ray kabyangay iglisia, tan tinongtong dad sikaray amin a ginagaway Dios diad panamegley da, tan no panoy impangilokas toy dalan pian makapanisia ray Hintil.

Saray Gawgawa 15:11

Manisia tayo a nilaban itayo a singa inkilaban da, lapud baleg a panangaro nen Jesus a Katawan.”

Saray Gawgawa 16:14

Sakey ed saray nandengel ed sikami et si Lydia a taga Tiatira tan managlakoy granati ran abel. Mangigagalang ed Dios yan bii. Nilokasan na Katawan so kanunotan to, pian asikasoen toy ibabaga nen Pablo.

Saray Gawgawa 16:31

Inmebat ira, “Manisia kad Katawan a Jesus, et nilaban ka, sika tan say pamilyam.”

Saray Taga Roma 10:14

Balet panoy itawag dad sikato, no ag da panisiaan? Panoy panisia rad sikato, no ag da ni narerengel so paliwawan nipaakar ed sikato? Panon met a makarengel ira, no anggapoy managpulong?

Saray Taga Roma 10:17

Kanyan say pananisia manlalapud pandengel na balita, tan say balita onsasabi diad panamegley na pampulong na nipaakar ed Cristo.

Saray Taga Roma 4:16

No ontan sirin, say sipan niletneg ed pananisia, pian magmaliw a panangaroy Dios yan sipan tan andi-saew a nagamuran na amin a kabyangan na saray boleg nen Abraham aliwa labat a saray manangonur na Ganggan, no ag pati amin da ray mananisian singa si Abraham. Ta si Abraham so maispiritun ama tayon amin.

Saray Taga Roma 4:5

Balet say toon ag mankimey, no ag ta manisiad Dios a manamaandiy kasalanan da ray makasalanan, paandien na Dios iray kasalanan to lapud pananisia to.

Saray Taga Roma 9:16

Kanyan aliwa ya onung ed labay o gaway too, no ag ingen onung ed panangasi na Dios.

TAGA GALACIA 3:14

Dinondon to itayo pian say bindision ya insipay Dios ed kinen Abraham et nagamuran da ray Hintil diad panamegley nen Cristo Jesus, tan nagamuran tayo diad panamegley na pananisia so Ispiritu ya insipay Dios.

TAGA GALACIA 3:22

Balet ibabagay Masanton Sulat ya amin a katoowan et aripen iray kasalanan, pian diad ontan diad panamegley na pananisiad Jesu-Cristo et niiter ed saray mananisia so sipay Dios.

TAGA-EFESO 1:19

tan no panoy ontan lan kabiskeg na pakayari ton mankikimey ed sikatayo ran mananisia. Sayan pakayarid sikatayo et kapara to may pakayariy biskeg na Dios

TAGA-EFESO 2:10

Say Dios so Manamalsa tayo, tan diad pikakasakey tid Cristo Jesus pinalsa to itayo a manggaway maung iran gawa a say Dios imparaan to la ran sumpalen tayo.

TAGA-EFESO 2:5

Anggaman ya inatey ti la lapud kasusumlang tid ganggan, binilay to itayo a kaiba tiy Cristo. Nilaban kayo lapud baleg a panangaroy Dios.

FILIPOS 1:29

Ta naitdan kayoy pankanawnawan manlingkur ed Cristo, aliwa labat a diad panisia yod sikato, no ag dia met ed panirap yo para sikato.

COLOSAS 2:12

Ta nen abinyagan kayo, nipompon kayon kaiba nen Cristo tan inmoli kayod bilay a kaiba to, lapud pananisia yod pakayariy Dios, ya amaolid bilay ed Cristo.

2 TESALONICA 1:9

Manlikna ray dusa, salanti say andi-anggaan a kaderal da tan say kiarawi rad arap na Katawan tan diad mapagalang a pakayari to.

Saray Hebreo 6:4

Ta panon a magbabawi lamet iray angibeneg na pananisia ra? Aliwawaan lay kanunotan da na nipaakar ed Dios, atawayan da lay mangatatawen a langkap, tan inawat da lay pinanabang ed Ispiritu Santo.

1 Pedro 1:5

Lapud mananisia kayo, sasalimbengan kayo na pakayariy Dios legan yon aalagden so kilalaban ya akaparaan lan nipaamta ed kaonuray panaon.